السلام عليكم ورحمة الله
رمضان كريم وعساكم بخير =)
القصة باختصار ان اهلي تركوني وحيد بالبيت وتركولي بالتلاجة لحمة بالبطاطس في صينية تيفال .. وتم توصيتي انه استخدم شئ خشبي او بلاستيكي عشان ما تنخدش والا خربت .. او انقل اللحمة لبطق عادي واقطعها ..
لكن عفويا يدي مسكت السكينة وقطعت اللحمة وهي بصينية التيفال وعملت خدشين طوليين .. وتذكرت الوصية بس بعد فوات الاوان ..
انا خلاص اكلت اللحمة والبطاطس لكن اشعر بالذنب والانزعاج لأني خربت حلة تيفال .. وانتم عارفين ان الإناث يقدسوا اشياء المطبخ يعني يعتبر انا عملت كارثة .. والمؤسف ان حلة التيفال ضمن طقم واكيد غالية .. هي مش ماركة تيفال الاصلية هي شئ مشابه بس اكيد مش رخيصة .. كمان جديدة شكلها وانا وضعت اول بصمة خدش ..
حاليا الشعور بالذنب والاختناق حيقتلني .. انا خبرت اختي فاذا بها تتبرأ مني وتقول مالها دخل .. لكنها اكدت لي اني حتنفخ لو عرفوا .. وانا مش خايف من التهزيق والكلام الجارح اللي حسمعه .. مع انه عارف كلام جدا جارح واهانات وممكن اتمنع اقرب من اي حلة .. مرة حرقت مقلاة من كم سنة .. اتحرمت من اني اقترب منها .. اتحرمت اني اعمل بيض مقلي .. وبعد كذا سمحولي استخدم مقلاة مستهلكة .. ومرت سنين لحد ما تسيم الموضوع وسمحولي اقلي بيض عادي .. الآن الوضع متأزم ومش عارف ايه حيحصل ::
الآن اشعر بقوة اني عايز اقلهم واعترف اني خدشتها عشان ضميري يرتاح .. لكن صوت اخلي يقول خليني ساكت ممكن ما يلاحظوا لأني ممكن انكد عليهم ..
طبعا الحياة مليانة مشاكل وهموم معقدة .. لكن ممكن مشكلة صغيرة تنكد علينا وننسى مشاكلنا الكبيرة وننسى الاحباط :: فلا حد يقول عني مدلل .. بل انزعاجي دليل على شعوري بالذنب والمسؤولية ..
المهم اتوجهلكم بسؤالين :
1- هل اللي عملته هو شئ كارثي ومزعج جدا ولا خطا عادي وما يستاهل التهزيق مع العلم ان الصينية تيفال مربعة وجديدة ومافيها خدش واحد قبل ما اخدشها ؟
2- هل أعترف واريح ضميري وانكد عليهم بهذا الخبر ولا بلاش انكد عليهم ولما يكتشفوا الامر اعترف ؟
=(
المفضلات