طالت ليالي الـــــــــشوق والقلب محروم
والعين تبكي حــظها من الليالي
عزاه ما طابت عــــــــــــيوني من النـوم
ساهر وطيفك يالــغلا في خيالي
كني سجـــــــــــــــــينٍ ليته اليوم محكوم
يا طول صـبره من العنا ما يبالي
يا شوق ويــــــــــنك غيـبتك طالت اليوم
ياليت تدري وش جرى وش جرالي
من سبـــتك ليل الولـــــــه صـار مغروم
والكون كله في غـــيابك يسالي
ياللي أحــــبك طاحـــــــــت اليوم العزوم
والوقت جــاير ليت ترفق بحالي
يا زين من بعـــــــــــدك أجاسي ومظلوم
تركتني وخلــــيتني وش بقالي
في بحر حـــــــــــبك ما درى قلبي العوم
ضايق بعيني الكون ضـايق مجالي
وينك حبـــيبي وش بقـــــــى غير الهموم
تلعب بقلبي بــــعد ذاك الوصال
روحي على فرقــــــــــاك تبكي من اللوم
ياللي مكانك راســــخ كالجبال
يا نور عيني حــــــــــــــظنا اليوم مقسوم
وادري الزمن في نظــرته ما صفالي
كلما طواني الليل والحـــــــــــــال معلوم
تصرخ عيوني كـــيف بدل بدالي
ريمٍ من الــــــــــــغزلان يرعى ومحشوم
مالت غصـــــونه يوم قفا ومال
والعين أدعج سهـــــــــمها الموت محتوم
من شافها يا حســين عمره زوال
الله اكبر لنه الحـــــــــــــسن مرسوم
في شفته موتي طـــرالي وبدالي
أفرح بشوفه وارســــــــم الحرف منظوم
غالي واقول العـمر يرخـص لغالي
روحه جميله وطـــــــــيب الأصل والقوم
في طلبته ما هو بســـهل المنال
يا حسين ضايع منـــــــــطق العقل معدوم
في حالتي والمـــوت منه طرالي
يا رب يا عالم خـــــــــــفيات العلوم
ترحم شقيٍ طاح حـــــظه ومال
المفضلات