اول مرة تقريبا انزل موضوع في هذا القسم ^^
و دا طبيعي لاني دي تاني مرة ادخل فيها المطبخ و اعمل حاجة
المهم دخلت المطبخ و قلت لازم اعمل لاقرايبنا حاجة في العيد
و بالفعل عملت الدوناتس و الحمد لله
و حازت اعجاب الجميع ^^
و قلت لازم انزلها لكم و ان شاء الله تجربوها و تعجبككم ^^
ندخل ع المهم
^^
إليكم الطريقة
المقادير :
1/3 كوب سكر
1/2 ملعقة صغيرة ملح
1/2 ملعقة محسن خبر
1 كيلو دقيق
ملعقة خميرة كبيرة
ملعقتين بيكنج باودر
كوب و نصف لبن
4 بيض
1 بشر ليمون
كوب إلا ربع زبدة أو سمن
الخطوات :
نضع الدقيق و معه كافة المكونات الجافة ( سكر , ملح , بشر ليمون , بيكنج باورد , ملح ) في العجانة
بعد خلط المكونات الجافة نضيف اللبن شوية شوية حتى يندمج تماما مع الدقيق
ونضيف المحسن بعد اذابته في قليل من اللبن
وكذلك الخميرة ..
نعجن كويس جدا جداااااااا لحد ما كل المكونات تندمج مع بعضها كويس
نحط البيض واحدة .. واحدة .. نسنى لما كل واحدة تندمج تماما
و نحط اللي بعدها
و بعد كدا نحط الزبدة حتة حتة زي البيض
نعجن كويس ..
المهم تعملي العجينة كوورة كدا بقى و تحطيها في طبق عميق
و تشغلي الفرن تدفيه شوية صغيرة خالص
و تستنيى شوية تحطي الطبق و عليه قماشة مبلولة شوية
" ع الطبق نفسه تغطيه بيها مش ع العجيب "
و تحطيها حوالي ساعة و ربع في الفرن او اي مكان دافي المهم و تسيها تخمر
بعد كدا تجيبها
ترشي شوية دقيق ع المكان اللي هتشتغلي فيه " عشان العجيبن مش تلزق "
تفريدي العجيبن بارتفاع 1 سم تجيبي القوالب المخصصة الحجم اللي انتي عاوزاه
و لو مش عندك عااااادي
احنا بندبر امورنا تجيبي غطا كبير " بتاع برطمان مثلا "
و تجيب غطا صغير خالص " غطا زجاجة ميا مثلا" تبع الحجم اللي انتي عاوزاه
و تقوم حاطة الغطا الكبيرة تقطعي العجينة بيه ع شكل دائرة كبيرة
و بعدين تقطعي في النص بالغطا الصغير![]()
تجيبي صينية كبيرة ترشي شوية دقيق بسيط عليها و تحطها الدونات
و تسيبها تخمر ساعة و نص
تكوني جهزتي مقلاة عميقة شبه الحلة كدا و تحطي زيت كتيييييييييييير
و تخليه يبقى سخن جدا جدا جدا جداااا
تحطي الدونات واحدة واحدة و خلي بالك انها بتتحمر بسرعة جدا
يعني تكوني مجهزة كل حاجة
تحط الدونات و اول ما تحسي انها لونها بقى دهبي
غامق شوية كدا تقلبيها في ثواني ع الجنب التاني و هكذا
للتزين :
طبعا التزين دا براحتك جداااااااااا
انا استخدمت هنا شوكلاتة بيضا و شكولاتة بني بس لاني كنت مستعجلة بصراحة
بتسخني الاتنين في حمام ميا و تقلبي حطي حتة سمنة او زبدة ع الاتنين
و ممكن شوية لبن عشان مش تبقى كثيفة اوي
بعد لما الشكولاتة تسيح معاكي خالص تجيبه و تغمسي نصها اللي فوق بس و هكذا
و بمعلقة تعملي الشكولاتة البيضا
ملحوظة 1:
هذا المقدار يكفي لعمل 20 من الدوناتس الموجودة بالصورة
ملحوظة رقم 2 :
هتلاحظو ان في بعض الدونات الشكولاتة متشالة و ممسوحة
و دي اصابع اخواتي الاعزاء و و هما بيخدوا حتة و يجروا
ملحوظة رقم 3 :
معذرة " شوية تفكير "
دا اسم الصفحة بتاعتي ع الفيس بوك يعني مش حد غريب
بس نسيت اصورها من غير الاسم![]()
و طبعا خلصت تماما فمش قدرت اصورها تاني ^^
أتمنىى تعجبكم
و بالهنااااااااااااااااااا و الشفاااااااااااااااااااااااا
^_^















اضافة رد مع اقتباس









المفضلات