مجرد طفل
هي:شايف على عمايل الاسرائيلين
هو :مشان الله غيري لنا هالموضوع المعت..بلاها الحكي بالسياسة
هي: عن شو بدي أحكي لكن
هو:عن أي شي ..عن الطفولة مثلا..
هي :آه والله..جاي ع بالي ارجع بنت صغيرة..وعيش هيك متل ولاد الأغنياء والمدعومين
هو:ليش بقى؟..
هي:ما في أحلى من الطفولة..براءة..ولطافة..وحلاوة
هو:هلاء هيك صارت الطفولة..أي في ولاد بيعوفوك حياتك من قد ما هنن غلاظ وتقلا
هي:هي معك حق فيها..لأ وشو أهلهم بيشوفوهم أحلى وأذكى أولاد بالعالم
هو:بتلاقي الضيوف دخلو ع البيت وقعدوا..وبعد شوي بيجي الأب والأم وأصحاب البيت وبيجيبوا ابنهم الغليظ مشان يستعرض مواهبه قدام الضيوف
هي:وبيكون خجلان أول الشي..بس الضيوف اللي بيزنوا على خراب عشهم بيشجعوه..لحتى يبلش ..
هو:وبيبلش
هي :بيسلخهم نشيدة أول شي..
هو:وبيقوموا الضيوف بيصفقواله ..وبيبوسوه..وبيدقوا ع الخشب
وبيصلو ع النبي..وهي اللي بتفتح تمها وبتقول ياي ياااااي شو مهضوم...
وهاد اللي بيقول ..يسلملي شو أكبر من عمره
هي :فــ..بيتحمس الولد الثقيل وبيسلخهم غنية هالمرة
هو:أخاصمك آه..وبيصير يقلد نانسي عجرم
هي:قام الضيوف بيفرطوا من الضحك وبيعتصروا مشان يطلعوا الضحكة
هو:وعلى ياااي شو لذيذ..وبيعقد..وعلى بوسة من هون وقرصة من هون ..مشان يوقف
هي:لأنه خلص.. بيكفي..
هو:وبتكون الخدامة جهزت الطاولة وقالت الأم للضيوف يشرفوا..
هي:بيقوموا بيشرفوا..وبيقولوا للولد..يا لله حبيبي تعال وكول معنا مشان تنام..
هو:قام الولد بيقل للضيف اخرس..يا غليظ..وبيقوموا الضيوف بيضحكوا..وبيصير الأب بيقول للضيف..حبك ..لو ما حابك ما بيقلك اخرس..
هي:قام الضيف بيرد له المحبة للولد وبيقعده بحضنه وبيلعب له بشعراته
هو:طبعا الطفل المهضوم رح يقله قيم ايدك عن شعراتي يا وسخ..
هي:وبيضحكوا أبوه وأمه على ظرافته
هو:بس الأب بيقول للضيف وهو ميت من الضحك..خلص حبك
هي:وفجأة ..بينزل الولد من حضنه للضيف وبيشده من الكرافة تبعه..وبيسحبه ..لحتى يخليه ينزل ع الأرض ويمشي ع أربعة
هو:لأنو الزغير حبه..وطبعا رح يركب الزغير على ظهره للضيف..ويقله حا..
هي:والضيوف؟::
هو: بيكون جمدوا..لا من تمهم ولا من كمهم.. وكل واحد بيقول لحاله..منيح اللي ما كنت أنا..
هي: وأبوه وأمه بيكونوا مبسوطين وعم يقولوا لابنهم يحرق حريشك شو ملعون..
هو : والأب تحديدا عم يقله للضيف ..حبك..العمى شو حبك
بعد تفكير وتنهدات
هي:ما بتحس الولد الغليظ هادا بيشبه اسرائيل خنطق منطق
مؤيدا
هو : وأبوه وأمه اللي عم يقولوا له برافو بيذكروك بأمريكا
هي:والضيوف ..بيشو بيذكروك..
بشكل قاطع
هو: الصمت العربي..







المفضلات