يا مصر ليه تخافي
سطر خطوط وحروف
أكتب كلام معروف
أكتب ولا يهمك
في حد هيذلك
ماسك بايدي قلم
بكتب حروف من ألم
بكتب وعندي أمل
في بكره يا بلدي
مصر يا عشق الروح
القلب بات مدبوح
والصوت بقي مبحوح
خايف وكلي جروح
يا مصر تتظلمي
كل اللي عدا وفات
وأنين الذكريات
الظلم عاش أو مات
خايف لتنجرحي
الثوره دي قامت
والكل بقي صامت
ونسينا شهدائنا
والباقي أعدائنا
بيلعبوا بينا
من مرسا لسينا
نسونا أسامينا
في كل يوم قرارات
وكلام ومؤتمرات
والتعلب فات فات
وبيان من نشرات
وصحافه مدسوسه
بعظامنا كالسوسه
وانتي يا محروسه
سجينه مغروسه
في الوحل يا عروسه
يا مصر أغسلي توبك
لمي ولادك لمي
وأصحي بقي وهمي
ليه تبعدي عني
سيباني في ظني
وانتي هنا في دمي
شرياني يا أمي
بتصرخي تغني
والصرخه دي مني
يا مصر منهوبه
طوبه ورا طوبه
في الراس مضروبه
علي الجرح مغصوبه
في الأزمه معطوبه
وعليكي منصوبه
والكل بيغني
يا مصر يا أمي
سرقوكي في جيوبهم
وعابوكي من عيبهم
والشعب سايبهم
ويقولوا ده نصيبهم
م الذل والاهانات
حكموكي سرقوكي
بالذل هانوكي
في الفرح نسيوكي
وفي الهم داعوكي
في السجن سجنوكي
ولسه بتغني
السجن ده مصيرهم
وهما في غيرهم
ما كان علي بالهم
يبقي هنا حالهم
السجن والقضبان
والسجن للسجان
الي يواليهم
ويعتني فيهم
ويداري بلاويهم
وكل ما عليهم
من ظلم من عدوان
يامصر يا غاليه
انتي هنا عاليه
وربي حاميكي
من كل أعاديكي
مذكوره في القرآن
خمسه من ربي
تعالي يا حبي
صبي هنا صبي
شهد وعسل وحنان
لولادك الشجعان
ونرجع ليالي زمان
ونعيش بكل حنان
في حضنك الدافي
يا مصر ليه تخافي
المفضلات