رجعت من تاني
خلاص يا مصر أنا مسافر
وهسيب البلد
لا عندي فيكي عمل
ولا زوجه وولد
ما لقيت فيكي محبه
ولا طفل اتولد
كل اللي فيكي كرهته
يا حضن حبيته
العمر ضاع مني
والبيت ما عاد بيتي
سرقونا وسرقوا احلامنا
هما عصابه ولا حكامنا
وان كنت يوم اتكلم
السجن قدامنا
وان قلت يوم لا
ضربنا سجانا
قالونا احنا الساده
والشعب خدامنا
خرجت منك يامصر
والدمعه محبوسه
ليوم بكيت عليكي
ولا قلت محروسه
ورحت لبلاد بعيده
فيها فلوس بالكوم
فيها لقيت الريال
بس م لقيت النوم
الوحده فيها صعبه
وعليكي انتي اللوم
سنين العمر بتعدي
وانا غايب
يا مصر امتي تقومي
وترجعي الغايب
احنا يا مصر ولادك
وفيكي انا دايب
اصحي من نومك يا غاليه
واكسري قيودك
ليه بترضي يا مصر المذله
وكلنا جنودك
انتي اللي ربي مجدك في كتابه
واحنا هنصونك
اصرخي في وجه اللي باعوكي
وحطموا شموخك
صرختك بتدوي يا مصر
في بلاد الكون
صرخة تحرق كل ظالم
وتحرر المسجون
ونرجع ليكي من تاني
وفيكي تاني نكون
مصر يا امي واحلامي
راجع ليكي من تاني
لحضنك الدافيء يا امي
لفرحي بعد أحزاني
فقدت في غربتي امي
فقدت حتي عنواني
رجعت وفيكي انا باقي
اداوي جرح اعدائي
رجعت




اضافة رد مع اقتباس





المفضلات