الله يرجك ..... ياوطني.... عليك حركاااات

**Demonizer** · 16-08-2005, 16:06

المُرسَل إليه : وطني

المرسل : ابنك

نص الرسالة :

آهـ . . . يا وطني

عيدك مبارك ياوطني

كل عام وأنت بخير يا وطني ..

تصدق أني أحبك رغم اللي تسويه فيني يا وطني

آه يا وطني يمكن إنك ما تصدق بس الله العالم إني أحبك ..

صحيح إن عليك حركات بس ما عليه تمون يا وطني ..

صحيح إنك قهرتني أكثر من مره لكن أبمشيها لك ..

تذكر يا وطني يوم تتبرع للدولة الفلانيه

وحنا يالله لاقين شي ناكله يا وطني .

وغيرنا مليون بعد ما يلقون شي يأكلونه ..

أكيد تذكر تصدق إني ساعتها جتني ضيقة صدر ..

ما توقعتك تسويها ..

طيب ليه ..

ما يقولون الأقربون أولى بالمعروف ..

وإلا إنت جايك شي مني وتبي تقهرني ..

طيب ما تذكر يوم إني أتخرج من الجامعة

وأقدم لك أبي وظيفه و تطنشني ..

وتعين اللي أقل مني عشانه من آل فلان وعنده واسطه ..

ليه ياوطني مو إحنا كلنا عيالك وإلا أنا ولد الشغاله ياوطني ..

أكيد بعد تذكر ياوطني يوم ابوي يطيح مريض

ويقولون علاجه في احد المستشفيات الكبار ..

وأجيك أبي فزعتك وتقول آسف ماأقدر عندنا زحمه

وبعد يومين أقرى في الجريده وأشوفك

جايبن فلان من برا و تعالجه على حسابك ..

وفي نفس المستشفى صدقني في ذاك اليوم

ماجاني النوم من القهر آه ياوطني ..

أفا عليك بس ياوطني ..

لهالدرجه حنا رخيصين عندك

لاتقولي ماتذكر ..

أو أخاف إنك تقول إنك تمزح معي

الله يرجك ياوطني مزحك ثقيل ..

إلا على فكره تصدق إني مادريت

بعيدك اللي قبل كم يوم إلا اليوم ..

ليه ياوطني ياخي على الأقل خل هالمناسبه

مميزه مثلا عطونا إجازات في هاليوم

ولا وزعوا حلاو علينا أهم شي

ندري إن اليوم يومنا الوطني وإلا مستحي منا

طيب بهالمناسبه يابعد قلبي ياوطني

شرايك نفتح صفحه جديده وننسى اللي فات ..

هاه وش رايك ..

بس على شرط حركاتك ومزحك الثقيل خلها عنك ..

وياليت بعد تسوي فينا خير

وتدبر لنا وظايف قسم بالله ذبحتنا

العطاله والتبطح في المقاهي

ترى حنا شبابك نعجبك بس عطنا فرصه

وياليت تكمل معروفك ياوطني وترحم ابناءك

وشعبك وتخفض من أسعارالبنزين والغاز ..

تكفى ياوطني والله ذبحتنا ويكون بعلمك

ترى شعبك مو كلهم تجار وعيال نعمه ..

يمكن إنت ماشفتهم معذور ياوطني

ولكن والله موجودين وبكثره لاتنساهم الله يرحم والديك ياوطني..

وبعدين سالفة الواسطات والعنصريات

هاذي ياليت تتركها بعد كلنا عيالك وكلنا عيال تسعه ..

ترى الواسطات والله ماوراها إلا

الظلم والقهر للمساكين خلك عادل يابعد قلبي ..

انا داري إنك بتقول صعبه وإن المخرج عاوز كده ..

صدقني داري ياوطني بس ياليت

تحاول تفكنا منها على قد ماتقدر والله يعينك..

وحط في بالك ياوطني إننا ابناءك

واللي يمسك يمسنا وحنا نفديك

باأرواحنا واموالنا وكل مانملك

تامر شي ياوطني أنا إنتهيت من رسالتي ..

وابيك تعرف إني

أحبك وأموووووووت فيك ياوطني ..

المرسل : ابنك

قريته واعجبني كثير واتمنى ماينحذف
The Mechanix

**جودريان** · 16-08-2005, 16:54

شكرا على الكلمات التي تحدثت ليس عن نفسك بل عن جميع ابناء الوطن

شكرا The Mechanix

جودريان.....................

**sola** · 17-08-2005, 05:14

الله يرجك ياوطني مزحك ثقيل

هههههههههههههههه

شكرا The Mechanix

على الموضوع الحلو

وكلنا فداء للوطن

get

***هـــــمــــس*** · 17-08-2005, 07:23

السلام...

تسلـــــــم أخوي The Mechanix على هذه الرسالة ...

من جد خطييييييرة...

خصوصا...

انا داري إنك بتقول صعبه وإن المخرج عاوز كده ..

يعطيك العافية...

بالتوفيق...

سلامي...

*هـــــمــــس*