هذه قصيدة لي باللهجة العامية المصرية
أتمنى أن أعرف صداها لديكم
آملاً ألا يعيق اختلاف اللهجة تواصلكم مع كلماتها
--------------------------------------------
يفوت اليوم بعيد عنِك كأنه سنين
واتوه بعدِك
واعيش عمري مع امبارح ولحن حزين
وحبك في الضلوع ساكن
شموع قايده بتكويني
وورده تنام هنا فـ قلبي
تحيَّرني..تعذِّبني..وبرويها بدمع العين
وتفضل روحي تستنى معاد ميجيش
وانا قلبي حنين هاجر ورا نجمه
بشوفك ترسمي حدودها
ونورك فرحه فـ خدودها
و اناديلك..واغني لك..وماترديش
يسافر ليل ويرجع ليل
و روحك جوَّا روحي تعيش
تصبَّر شوق مسهَّرني
تطمنِّي..و توعدني
بفجر عشقته فـ عنيكي
و بَعدك تاه
و ضاع منِّي..و مرجعليش
ولو مره ناداني النوم
يدوب القلب م الفرحه
واحسِّك روح بترجع لي
واشوف طيفك يناديني
يدفيني
ويحضني وما يسيبنيش
ويفضل حلمي واخدني
واخاف اصحى ألاقيكي بقيتى بعيد
وخدتي فرحتي معاكي
وسيبتيني هنا لوحدي..مع التنهيد
مع الذكرى..وميت فكره
تمنيني.. وتحييني
تموِّتني..وبيها بعيش
بعيش و الحزن أغنية بغنيها
واقول للدنيا ياخسارة
وفين أيامي خدتيها
واناجيكي بكلمة شوق
ولهفه فـ العيون باينه
و أمنيَّة بصدَّقها
لكن قلبي...ماصدقنيش
ويرجع يومي من تاني كأنه سنين
ويرجع قلبي ويهاجر ورا نجمه
واشوفك ترسمي حدودها
ونورك فرحه فـ خدودها
و اناديلك..واغني لك..وماترديش
ماركيـز




اضافة رد مع اقتباس













المفضلات