الــــــغــــــــايــــب
أنا مالي من الأحلام سوى طيف ٍ أسولف له
يفرحني صدى صوته واهيم بضحكة الغايب
وش اوصف من خيالاتي وقلبي فيك متولــّــه
عسى حروفي من غيابك ترجع خاطرك طايب
مسافر تارك ٍ ثوبه .. يحضنه الطفل من جهله
يشم العطر بهدومه يحَسْب ان صاحبه آيب ؟
فراشه ألتجي بظلك من احراق الزمن كلـّه
قتلني الثلج باحساسك و قلبي بلوعته ذايب ؟
هديتك قلبي بهمومه هقيت بتكفـِني حمله
همومه زادها فراقك وصاح من الهوى تايب
أنا غيابك تركني بلا دليل وعقل ٍ ..أو مله
رويته دمع من عيني وطعنه بالحشا صايب
سرقت النبض من جوفي وتركته يحتوي ظله
تصدق ان ظل قلبي غدا من قسوتك شايب ؟!!
تغيب .. وتجرح .. وترجع.. وعقده مالها حله
وجود بلا أمل يحيي .. وغياب ٍ للردى جايب
أحاكي الطيف كن الحرف منه يبري العلّــه !!
أجيه بشوق ٍ ولهفه .. وأعوّد والرجا خايب
ووش يبقى من الاحلام سوى طيف أسولف له؟؟
فديت الطيف يبقالي .. وتبقى ضحكة الغايب!!
المفضلات