مشاهدة النتائج 1 الى 3 من 3

المواضيع: شمع في سبيس تون

  1. #1

    Talking شمع في سبيس تون

    والله يا جماعه هذي قصتن صارت معي وانا والله مااعلم متى لكن الوكاد انها صارت خذو العلم مني . الشاهد من الكلام هو اني دخلت بيتنا ذاك اليوم والله وانا الي احصل اخوي الصغير (9سنين)مسنتر عند سبيس تون الله لايجزاهم خير خلو بثها 24 ساعه وهاااتك يا فله البزران في بيتنا انا يوم حطوها 24ساعه تحمدة الله اني مانيب دش صار! دشنا مايطفى تقول محلات (ميد)مهوب دش والله وانا الي القا الحبيب نايم عند التلفزيون واقوم واشيله واوديه لفراشه <==تحسون ان الرقه ماتصلح لي خخخخخخخخخ

    لا الصحيح اني مزعته لين قام وقلت ظف وجهك لفراشك يا قليل الادب (هذا الشمع الي انا اعرف) وانا الي ارجع عند الدش والله وينسجم خويكم مع ذا الكراتين ومافيه الا قوه بوكيمونات ومدري وشو والله وانا اقوم اشجع وانا الي اغير من جلستي واتحمس جداً .ويوم ركزت مع الصوره وهو الي ينفتح التلفزيون ويشفطني وافتح عيوني عقب الشفطه واذا بي!!!!!

    قاعدن في غابه ولا ادري وين الغنم سارحه(يعني ماادري وش السالفه) المهم تعوذت من بليس وبيني وبينكم ترى انا تشققت من الفرح ولو جوالي مهوب استقبال دقيت على الزكرت نكشت في ذيك الغابه يوم تلفتت حولي ولا ذيك البنت الي تقول طلقه يوم انا كمشت براطمي من حماسه الموقف وهي الي تنصاني واجيها قلت وش العلم يا بنت الناس وش الحاصل وراتس كنتس ملحوقه قالت وخر تكفى انت وذا الوجه الي تقول طابع بريدي!! حقيقتاً يا جماعه انا جاني ذبات اشكال والوان بس ذا الذبه جديده والله وانا الي ارفع راسي والنيه قشر تسان بسدد لها ذبه اغير اسم عايلتهم بها (احس اني قوي) يوم رفعت راسي ولا البنت تقول للقمر ظف وجهك وانا الي انحجر وش اقول لها ذي والله و اسكت والفقها واقول في نفسي يحق لتس يابنت التسلب يوم تمقلت فيها زين ولينها لابسه وزار ابيض وزنوبه شفافه لا والزنوبه اليمنى ضايعه قلت اقول من انتي يا الشيخه قالت انا عمتك سندريلا ...انا يوم قالت عمتك انعميت ولولا اني ماامد يدي على مره ولا تسان عطيتها المقسوم قلت اسمعي انتي يا سنو وايت مدري توم وجيري انتي وقوارير هالببسي الي في رجليتس (اسمع في القصه ان جزمتها قزاز) ترى ان ماذكرتي الله بيجيتس علم مهوب الي انتي تبين مير اعقلي وخلتس رجال <== حلوها

    اثر البنت قلبها رقيق وانا متعود على التماسيح يوم هشت عليها وهي تخنقها العبره بيني وبينكم ترى انا شديد بس مع دموع البنات اخور مانيب خويكم الاول والله وانا الي اعفط ما استطعت تعفيطه من براطمي وبغيت اطق البتسوه بس اني مانيب معتذر لو تموت مهوب بس تصيح مير اني لقيت حل افضل قلت اسمعي روحي لذيك البقاله واشتري الي تبين وقولي الحساب على شمع اللي هو انا <==احس اني اراضي بزر
    وهي الي تطس عن وجهي(على فكره ترى رقمتها ولا شمع وبنت في الغابه ولا يرقم؟ قويه لا واحمدو ربكم الي وقفت على ترقيم)

    المهم اني رحت والنيه ابي اطلع من ذا المكان الي مدري وين الله رماني فيه . يوم ابعدت شوي وانا الي القى بنك بنثر(ترم ترم) والحقه وينحاش والحقه وينحاش والحقه وينحاش (خلاص يا ابو وصلت الفكره) يوم جا الاخير وانا الي اطلع سنارتي واصيده (هذا الي جا في بالي لاتسالون كيف) يوم وقف وانا الي احطه في قفص واقعد انغزه ابيه يحتسي. وانغز! ابي!! يا ابن الحلال!!! طيب كلمه ولو جبر خاطر طيب حرف طيب أي شي ولا فيه امل وانا الي احقره واروح ادور شي اتعيش به في ذا الغابه يوم قعدت شوي وهو الي يطلع مساحه من مخباه ويمسح القفص الي هو قاعد فيه ويطلع علي(خيال واسع) قال اقول الشرهه مهيب عليك الشرهه على الي يخليك تصيده . الحقيقه يا ناس انا داري انه مايتكلم بس قلت بحرجه كود يتكلم بس يوم تكلم انا عورني بطني من الخوف صوته تقول تغره بعير الله يغربهل ههههههههههههههههه تباًله

    االمهم اني تعشيت ونصيت ديره قريبه اشوف نورها واثرها مهيب ديره اثرها الملعب الي يصورون فيه مسلسل الكبتن ماجد يوم بغت تشقق خشتي من الوناسه وانا الي ا تحزم وانطل نعالي (تكرمون) واجي يقالي بفرق معهم يوم وصلت لينهم تاكين على جنب والكبتن ماجد معلق بخيوط في الهوى والله وتخف ابتسامتي وتنقلب تكشيره قلت وش الحاصل يا الزكرت ماهنا لعب ولا وشلون؟ ولا ماتلعبون الي ما جاب تكميله
    <== يتذكر ايام حصه الرياضه

    قالو لا الحلقه ذي كلها والحلقتين الي عقبها بيسوي فيها الكبتن ماجد دبل كيك ..قلت انا يؤيؤ الله يعين المشاهدين بس عاد الصراحه اني تمنتي ان التلفزيون كمل جميله وانه شفط الهايلوكس حقي عشان اركب ياسين خوي ماجد ذاك الزين اخذ به فرتين نكشخ به بس ما حصل
    <==ترى على فكره عطيت ياسين رقمي خفت يحتاج شي ولا شي

    المهم مالكم في الطويله والله وتتلني رجلي لين الجبل وانا الي ارقاه وانواع التعلق والتغريز يوم وصلت فوق الا هذي هايدي الصغيره وبيتر يرعون الغنم وهو مسوي نفسه ذيب يقول لها تعالي اعلمتس وشلون تحلبين يا هايدي على باله محترف بس على مين طاح في يد شمع وانا الي اتله مع علباه(علباه=قفى راسه) قلت اسمع يا الكائن ترى تدور الصيده والصيده بظهرك لاتقعد تميلح على ذا الضعيفه عشانها يتيمه مدري اهلها ناطلينها هو صح اني ماشفت الحلقه الاخيره بس اعرف انك نجس يوم انلخم ولا وده انه امسك في ذا الموقف ولا عاد سمعت له حس واتل البنت وارورح اوديها لجدها شيخ الطعوس مدري الجبل المهم انه شيخ على مدري مين.



    وادحج الباب وادخل قلت انت يا هيه البنت مأمنينك عليها يا شايب بليس وانت مهملها مع ذا الداج بيتروه (من عيال حارتهم على غفله) قال انا مدري وشو.... قلت اقول درجها ولا يكثر بعدين لبسها بنطلون مهوب كل ماتمرجحت في ذيك المرجيحه طلع شسمه الداخلي يا قليل الادب والله وانا الي احس ان الموقف بحاجه لكف ولا يثنيها ابو عبد العزيز وانا الي ارنه بكفين لين ابترمت خدوده يوم ناظرت الا هو ماخذن المحش حقه والنيه بينحرني كما تونحر الشاة

    قلت افا يا ذا العلم مهيب هي يا ابو عزيز تكفى العمر غالي والله وانا الي اركض ركضاً مبرحا يحلفون اني شطفت ذاك الي يقول (بيب بيب) من زود سرعتي والتفت اناظر الشايب ولا خدوده تقول اسطبات كدلك مديل 2000 وضاربه الفرامل (يلعن ام الوصف البيلغ) وفيما انا اركض ولا القى باب صغير وانا الي اندعس فيه ولا دريت الا انا في صاله بيتنا

    واتعوذ من بليس واطفي الدش الله لايعيده وافقع عند اخواني في الملحق قلت في نفسي انكانه بايع عمره ذا الشايب يجيني عند اخواني سبعه ثيران في ذا الملحق مالهم فايده خلهم يفزعون!! الموضوع قده خرب فيها ذبح الدعوى مير اشوى ماطلع علي من التلفزيون احد

    --------------------------

    في النهايه اسف على الاطاله وانشالله تجوز لكم القوصه
    0


  2. ...

  3. #2
    رووووووووووووووووووووووووووعه
    وش هالخباااااااااال biggrin
    مو طبيعي
    مت من الضحك biggrin biggrin
    ابوي بغى يكفخني يشوف بنته الفجر قاعده على الكمبيوتر وفاقعه ضحك
    هههههههههههههههههههههههههههههههههههههههه
    بس تعال مو كل الى فالمنتدى يفهمون كلامك
    تراى في ناس تلقاهم يقرون ومو عارفين وين الله قاطهم فيه هههههههههههههههه
    وبعدين صادق والله مشكله لما خلو سبيس تون وmbc3
    24 ساعه والله اخوي ذبحني من البوكيمون الى ابطال الديجتال الى جومانجي
    والله حفظت اسمائهم
    مااقول الا يازين كراتين قبل لا ابطال الديجتال ولا خباريه tongue
    مو كاني طولت السالفه الا اقول وش رايك ازين قهوه واجيب تمر ونقدع انا وياك
    والناقش هالمشكله بس نخلي يبناا ستاره عشان الهيئه خخخخخخخخخخخخخخخ (ماعندي سالفه ) dead
    شكرا اخوي
    اسفه اذا زهقتك بردي <<<<تراى ماتنعطى وجه خخخخخخخ dead
    attachment




    ¨°o.O Will y0u miss me when i'm g0ne O.o°¨


    I'll be only a memory away
    0

  4. #3
    0

بيانات عن الموضوع

الأعضاء الذين يشاهدون هذا الموضوع

عدد زوار الموضوع الآن 1 . (0 عضو و 1 ضيف)

المفضلات

collapse_40b قوانين المشاركة

  • غير مصرّح لك بنشر موضوع جديد
  • غير مصرّح بالرد على المواضيع
  • غير مصرّح لك بإرفاق ملفات
  • غير مصرّح لك بتعديل مشاركاتك
  •  

مكسات على ايفون  مكسات على اندرويد  Rss  Facebook  Twitter