مات الحرف
محمد ضباشه
مات الحرف من كتر الخوف
والكلمة صرخت جوايا
وبتسألنى أنا ليه محبوسة
وليه بتجر أخواتى ورايا
وبسمعها تقولى يا صاحبى
د أحنا كلام
مش الغام
ولا نووى هدمر بيه
صحى لسانك ينطق بينا
وياريتنا هناثر فيه
ياما كلام فى الجوف اتذل
زى الفل اللى بنرمية
وزى الشجر اللى بتساقط
ونسينا فى مره نرويه
وزى النسمة فى ليله صيف
لما ياخدها البحر اليه
ويدوبها مع امواجة
واحنا يا ريتنا حاسين بيه
صحى لسانك ينطق بينا
وأوعى تخاف
أوعى تأن
وأوعى تكون لهوايا كداب
ما أنا عارفاك
وعارفة كل الاحباب
أحسن ناس تلعبوا بعواطفى
وتخافوا اخرج من الجوف
دأنا من الضلمة وكتر العتمة
راحت من عينى الشوف
زى العاميه
زى الخارسة
زى اللى بقالها سنين تعبانه
شايفة ولاد الباشا لابسين
وانا عريانه
مكسوفة اخرج فى النور
والعب دور
جوه روايه مكتوبه بعناية
ليه تحبسنى جوه الجوف
وتجر اخواتى ورايا




اضافة رد مع اقتباس


نحن لن نستسلم ننتصر او نموت 

المفضلات