سألتنى بنتى ؟
شعر : محمد ضباشه
سألتنى بنتى سؤال
ما عرفت أرد عليه
بعد ما نتعلم فى المدارس
هيكون مصيرنا ايه
ولو كانوا بيعلمونا بصحيح
طب ما بيشغلونا ليه
ولو ما أشتغلنا يابابا
الشهادة لزومها أيه
وليه البطاله زادت
وشبابنا بلا هويه
نسيوا انتمائهم لمصر
وماعاد حتى وطنيه
وليه بيهاجروا الشباب
وياريتها هجرة شرعيه
بيرجعوا فى تابوت
وفيه حثه ملقيه
وليه الحزن خيم على قلوبنا
والناس ماشيه ومبليه
اكيد فيه حاجة غلط
ولا دى حاله مرضيه
وفين حكومة بلدنا
نايمه بتاكل عسليه
ولا فاهمين الحكايه
وعنيهم عنا معميه
وفين اللى بنسمعة
ان فى بلدنا حريه
فيها قانون واحد
وما بقتش تقليه
وكوسه ولعب عيال
وشعار بيقول ديموقراطيه
وايه معناها يابا
وأيه القصد والنيه
الناس دى بتضحك علينا
وبقى ضحكهم غيه
ولا سكوتنا المميت
خلاهم حتان فى الدنيا محميه
ومين بس اللى حاميهم
اكيد هو وكمان هيه
حبسوا الفرحة فى عيونا
ونسيوا اللى اتقتل فيه
مرت أحوال البلد كشريط
مسكته لحظة بأديه
وشوفت أحوال الناس
اللى راحة وجايه
أحوالهم تحزن صحيح
وتركت أثر فيه
وشوفت شباب ضاع
وبقوا عصابة حراميه
واللى بقى مدمن
وشرب البابنجو تسليه
واللى ماشيين جيوبهم
ما فيها نقدية
ضاعت كل احلامهم
لا شقة ولا عربيه
ولا وظيفة تليق بيهم
ويلبسوا البدله مكويه
ويكونوا فى الحياة اسره
زى اللى عاشوا قبليه
بقوا زى السمك
على نار البطالة مشويه
عايشة على الجمر
وياريتها فى بحرها حيه
بتنادى على المسئولين
خفوا عننا شويه
عاوزه أعيش زيكم
وكفايه غدركم بيه
هما الخرجين فى البلد
بقوا عمله منسيه
خلتونا شربنا الذل
وكرهنا البلد ديه
وفجأه تذكرت السؤال
ولحقتنى بالجواب هيه
أنا عارفه أن ما فى أمل
لما شافت الدمعة فى عنيه
وسابتنى مع دمعتى
ولقيت دموعها على الخدود جايه




اضافة رد مع اقتباس




المفضلات