بسم الله
السلام عليكم
جمال الحياه
The Beauty of Life
لمشاهدة الفيلم
http://shortanimationstudio.blogspot...y-of-life.html
معلومات عن الفيلم
التصنيف: دراما - انمي قصير - كلاسيك
البلد: المانيا
السنه: 2003
اخراج: Moritz Bunk
سيناريو: Moritz Bunk
انتاج: The German Film School
-----------------------------------
فيلم بسيط جدا كلاسيكي بس معناه كبير وببساطته بيعرفك فعلاً ان الحياه بسيطه
اتفرج علي الفيلم قبل ما تشوف الكلام الي تحت
الفيلم بيبتدي برسم بدائي جدا وبيتطور مع سنين حياه البطل واظن من وجهة نظري تطور الرسم ليه معنايين
اولهم ان الطفل كان بيرسم بإيدو وده طبيعي
بعدين بيكبر فالرسم بيتطور
وتانيهم وده الاهم ان نظرته للحياه بتختلف من عمر للتاني بكل تفاصيلها
بتحس ان المخرج كان بيرسم احلامه وبيحققها للبطل.
ابتدي بالطفل مع رسم بسيط اب وام وكلب وبيت
بعد كده مصاحبه الاب ليه وزرعهم للشجره الي ليها معني كبير اوي في الفيلم ..
كبر الطفل والرسم اتطور والشجره كبرت معاه
ودخلت معانا في القصه بنت جميله تشاركه القصه
انا جارتك وساكنه هنااااااااااااااك :P
كبرو سوا ولعبو سوا واتعودو علي بعض
لحد لما وصلو لسن نظرتهم لبعض فيه اختلفت حتي هو نظرته للحياه بقت كلاسيكيه جدا وباينه اوي في رسمه
الرسم اتطور لدرجه انه بقي بقلم فحم وجابلك البطل وهو بيرسم البنت ويديها الرسمه ومش عارف قيمه الي عمله
غير لما كافئته هي بمعرفتها وعرفتو ان الي عملو كبير ان مش مهم بساطه الحاجه اهم من معناها
المخرج بعد كده جوزهم علي طول
عشان يصلحو غلطتهم
جابهم مع بعض في البيت عايشين حياه بسيطه اوي
بيت مفهوش غير صورتهم وشويه عفش بسيط والاهم من ده كله فيه حب بين اتنين
جابلك البطله حامل والبطل بيعمل سرير للبيبي تحس ان كل واحد ليه وظيفه والاتنين في هدوء فيه حب
مشهد جميل تحت الشجره الي زرعها ومعاه اغلي حاجه بالنسباله بيتفرجو علي السما تحس انهم مالكين الدنيا كلها
وبعد كده جابو طفل وزي ما يكون حققو هدف من اهدافهم سوا ومرسوم علي وشهم الرضا
الطفل بقو اتنين وتلاته بيلعبو قدام البيت والاب والام قاعدين علي نفس الكرسي تحت الشجره وكإنها بتدون الكلام ده علي ورقها
بعد كده الاتنين في سن كبير وفي نفس الهدوء الي ابتدو بيه رحلتهم ولوحدهم وكإن المخرج عايز يوصلك هو ده الي باقي في يوم من الايام انك تبقي قاعد في امان وراحه بال وكل ده بسبب اختيارك للبدايه
مشهد صعب الي جاي ده الاتنين قاعدين بيشوفو منظر الغروب
وفجأه تختفي من جمبو شريكه حياته وكإنها فعلا الشمس وبتغرب من حياته
فكره جميله من المخرج لما جابلك البطل بيلاعب الكلب دليل علي الوحده والجو برد وتلج وكإن الدنيا حزينه علي حبيبته بس هو متماسك بالي بيعملو ده
بعد كده جابلك البطل وهو بيرسم اجمل معاني واجمل ذكريات متجمعه في رسمه رسم الشجره ورسم البيت ورسم السما ورسمهم منظرهم حلو اوي
ومرسمش نفسو وكإن دي نظرته للحياه في الوقت .... كإنه بيقلك ان برضو جمالها في فنائها
جابهولك بيعلق الصوره وكانت تاني صوره تتعلق في البيت بعد صوره جوازه وكإنها اخر صوره هيرسمها ودليل انها اخر صوره لما جابهولك بيسيب الفرشه من ايدو بعد ما رسم
وينتهي الفيلم وهو بيتفرج علي الشجره الي جمعت كل ذكرياته علي الحياه الي مستمره حتي بعد خروجو منها...... وهو قاعد في قمه الهدوء وكإنه راضي عن حياته بكل بساطتها
حياته الي مفهاش ثراء مفهاش اجمل نساء الدنيا مفهاش انه طلع القمر مفهاش انه سافر بلاد الدنيا كلها مفهاش حجات كتير بس فيها اهم حاجه فيها حب واستقرار وفيها اغلي حد في الدنيا علي الاقل بالنسباله
الفيلم وصلنا جمال الحياه
الحب والاستقرار وراحه البال لو اي حد لقاهم وكان بيدور علي مال او علي اي حاجه في الدنيا هيسيب اي حاجه عشان دول
لإن جمال الحياه في بساطتها وفنائها
يارب الفيلم يعجبكم
لمزيد من الأفلام زورو المدونه من هنـــــــــــــــــــــــــــــا
محمد


























اضافة رد مع اقتباس


^^استمتعت والله كثير كثير بقراءة موضوعك الراااائع والمؤثر^^





المفضلات