القضية
مهما تعلق لى ف كباري او تفحت لى ف مجاري
اوتعلي لى ف مباني أوتصدر لى ف قانون عقاري
ابني عايز أرض فاضية يبنى فيها عشة هادية
عشت عمري أربي فية وحرمت نفسي القوت عشانة
هى دي أصل القضية
...........
بيعتو كل اللى كان بإيدنا ماخليتو شيئ يفيدنا
اللى يسرق واللى ينهب ياخد فلوسنا ويهرب
معدش فية لبني وظيفة ولا لاقى مهنة شريفة
اللى ضاعت منة الكلاوي واللى قاعد عل القهاوي
هى دى أصل القضية
..........
خضخضونا وخصخصونا مافاضلش الا يبيعونا
الأراضي بوروها والحيتان استوردوها
حطو ايدهم عل المنابر وماخلو حد قادر
يصنع المستقبل لجيلنا ولا للأجيال اللى جاية
هى دى أصل القضية
..........
نهبو تأمينا ومعاشنا اللى أصلة عشان ولادنا
ابني راح يركب سفينة عشان يهاجر من بلدنا
لو لاقي فى الأرض خيرها اية اللى يخلية يغادرها
نفسة يحقق آمالة يمكن يلاقي مجالة
سايب حبة ف انتظارة وهو واخد قرارة
هى دى أصل القضية
..........
بص فى عيون اللى رايح
بص فى عيون اللى جاي
اللى رايح واللى جاي فى عيونهم نفس الكلام
لاحظ حركة حياتهم هى طريقة كلامهم
القهر قاتل طموحهم الذل كاسر نفوسهم
الفقر هادد كيانهم الغلب قالق منامهم
الكل مش طايق العيشة وزهقان من المعيشة
هى دي أصل الحكاية والقضية ليها بقية



اضافة رد مع اقتباس
المفضلات