مشاهدة النتائج 1 الى 11 من 11
  1. #1

    i love you فرنسا <<يلعن بليسي افت انجليزي

    يمه يمه وين ثوبي عندي اجتماع بسرعه
    امي: شفه معلق وتراني غاسلته وكاويته احرص عليه ولا تعفطه biggrin

    دخلت الاجتماع

    اسمعو يا شباب حنا لجنه دعايات وبنرسل كل واحد لديره
    رفعت اصبعي قلت يالريس قال نعم يالاخير. قلت انا لا تودوني الا للمزاحميه عشانها قريبه من الرياض قال اقول انطم biggrin
    وقال كل واحد منكم بيروح لديره برا السعوديه رفعت اصبعي وقلت انا ودوني لشعراء قال يا زينك ساكت بس اقول برا السعوديه كلها.. قلت ايه الشعراء برا السعوديه كان ابوي يقولنا ان الشعراء مهيب بالسعوديه لأننا نسمع العالم يقولون رحنا برا السعوديه واستانسنا وحنا مانقول الا رحنا لشعراء صار يقول لنا ابوي ترا الشعراء برا السعوديه عشان ما نقلقه ونقول ودنا ودنا biggrin
    قال انت يالي ترفع اصبعك كل شوي. ابعاقبك واوديك لمريكا
    انا ناظرته احسبه يستهبل قلت الحين يقالك تعاقبني قال وان تكلمت ثانيه ابوديك لفرنسا عقاب قعدت اغني عشان يوديني لفرنسا biggrin قال تبي امريكا ولالا قلت ايه ابيها قال تدل فيها قلت اشوفها بالاخبار حلوه وشكلها صغيره قال ايه شاطر رح لها انت مندوب مبيعاتنا هناك ويوزع لكل واحد ديرته الي راح لماليزيا و اندونيسيا والهند والمغرب والعراق <<الي راح للعراق كان عليه نعال برتقاليه biggrin

    وانا اروح للبيت وقلت لمي تراني يمه خلاص ابسافر قالت ايه بقريح قلت لالا صدق ابروح قالت وينهو له قلت لمريكا وهي الي تناظرني وتقول رح بس اكنس الحوش biggrin قلت الحين انا اروح اكنس الحوش؟؟؟ قالت ايه انت قلت الي بيروح لمريكا يكنس الحوش قالت وش امريكا انت وخشمك وانا اروح لغرفتي اصيح اقول وراهم ما يصدقوني وكنت ماسك دوبي الفوشي واصيح واصيح واقول يا مدحت وراهم ما يصدقوني(طبعا الدب حقي اسمه مدحت biggrin ) واصيح واصيح ويدق جوالي وارد قلت نعم وكنت قاعد امسح دموعي قال السلام عليكم اخوي نونو انت الحين بتروح لمريكا صح؟ قلت ايه صح . قال خلاص ترا رحلتك اليوم الساعه 2 الليل وكانت الساعه 6 المغرب قلت يوه متى يمديني اروح للبطحا اشتري ملابس biggrin واضف بعض اغراضي وانزل بسررررررررعه ما دريت الا الدب الفوشي مدحت بيدي واناظره قلت وش جابه ذا اذا رحت لمريكا ابلقا اطلق منه ومنيب مسميه الا بيتر biggrin وانطله واركض واشغل السياره واول ما شغلتها قال فضلا اربط حزام الامان وقعد يقول الباب الخلفي مفتوح <<معه ميتين ال خخخخخ واربط حزامي واصك الباب وادوس وصلت البطحا وشريت كل اغراضي من جنزات كانت ثاني مره اشتري جنزات اول مره كنت مع خالي بالسوق وشاف جنز وقال هذا يصلح لك خذه ولبسته وصرت يالله امشي وكل شوي اصك السحاب biggrin وكل ما صكيته قلت اييييي ههههههههههههه
    وهالمره شريت جنزات كبيره شوي واناظر الساعه والقاها تسع ونص الا خمس واروح للحلاق واحلق شعري واشيل الشنب<<من كثره يومنك تشيله biggrin ... يوم طلعت من الحلاق شفت عمري توني مبكر قلت يا ولد ورا مااروح اسلم على عماني وخوالي صح انهم يكرهوني بس ما يخالف ابروح اسلم واروح لعمي اول واحد وادخل عليه واحب راسه وقال وش عندك جايني قلت يا عم انا بسافر وقلت خلني اسلم عليك قبل ما اروح قال عشانك بتروح لشعراء تجي تسلم علي ضحكت ضحكه سخريه قلت الشعراء خليناها لك يا زلابه وهو يلفني بالغضاره مع خشتي غدت تسنها ركبة فؤاد انور biggrin قال هذا وانا عمك وتقولي كذا قلت اسف اسف وتراني خلاص ياعم ابترك السعوديه ابروح لمريكا ويرفسني وقال تكفى ضف وجهك عني منيب رايق لك قلت بصرك لا تصدق وامشي واروح لخالي الكبير كان حول بيت عمي واطق الباب ويفتحلي ولده الصغير وكان هذاك الولد اقشر واحد بالعالم وحاقد علي من بد العالم واول ما فتحلي قلت اهلييييين حمووودي كيف الحال على بالي ابي ادلعه عشان ما يسويلي شي ويحسب شماغي وينحاش يا ورع يا هوه وقف ياز لابه وقف يا كلب وهو يركض وانا اتطارد انا وياه بالحوش ويطلع خالي من الصجه ويشوفني الحق ولده قال خير خير خير قلت يا خال ولدك ذا شكلي بنطله بالسطح قال خير انشالله جاي ببلاش يومنك تنطله بالسطح طبعا ولده ذا مدلع ما فيه الا هو ويالله جا بعد ويقولي يومنك تطرده بالحوش لو طاح وانكسرت يده ولا رجله وش اسوي به قلت وده للمستشفى ويطيب ويلفني بزبيريته مع خشتي وقال اقول ضف وجهك بس قلت على العموم يا خال تراني جاي اسلم عليك وامشي لاني ابسافر والقا ولده بعيد شوي يقول اخيرا اخيرا بيسافر بصراحه معنه بزر بس قهرني biggrin
    قال وين بتروح قلت ابد قريب قال وين يعني قلت امريكا قال وانا خالك انت اظاهر انك تدل باب بيتي قلت افا عليك قال ضف وجهك قلت على العموم تراني صدز ابسافر قال ماشالله عليك كل يوم في ديره برا السعوديه قالها وهو يتطنز قلت تبي شي من امريكا قال ايه قلت وش تبي قال ابي شريط فديو قلت وشو قال طاش ما طاش مهوب مقطع طبعا يتطنز

    يتبع
    e107


  2. ...

  3. #2
    قلت فمان الله حتى ما قال فمان الكريم سحب علي واشغل موتري قلت كل عماني وخوالي ما يبوني وشوله اروح اسلم عليهم يعني رحت ولا ما رحت ما درو عني واناظر الساعه والقاها 12 واروح للبيت واشيل شنطتي بالسياره وكل اغراضي واروح لمي واسلم عليها وقلت يمه فمان الله قالت وانا امك تدل المطار قلت لا قالت انا خابره ان الرحله بتفوتك وانت ما وصلت المطار قلت انكاني ما وصلت دقيت عليتس توصفين لي قالت وش شايفني عمتك جهير كل يوم في ديره المهم واركب الموتر وادق علي الدحمي قلت هلا ابو لؤي قال هلا والله قلت يالله تعال ودني لمريكا ويسمعني صوت القطار وادق ثانيه قلت يالله تعال ودني لمريكا قال قطك شاري طياره قلت لالا ودني المطار قال يالله جايك ويجيني واركب ورا على بالي امير هماني ابروح لمريكا وناصل المطار واعطيه مفاتيح الميتين ال واقوله توقع عليها يا صديقي العزيز قال موترك في بير قلت كل تبن بس ولا تسوي فيها مراجل واسلم عليه وهو يصيح ويقول نونو ياخي احس الرياض من دونك ما تسوا قلت حتى انا بس ما يخالف تحملو غيابي وادخل المطار يا كبره كبراااااه ويطنطن ويقول الي بيروحون لمريكا يتوجهون للبوابه الاولى
    واروح للبوابه الاولى والقا ناسن واجد بيروحون معي واسأل واحد قلت كل ذولا بيروحون لمريكا قال ايه قلت يلعن بليسي تراني معكم ابروح ويسفهني وكان شايفن نفسه ونركب الطياره وانا ارررررركض اررررركض ويقولون لي وراك تركض قلت ابلحق اركب قدام المهم وما لقيت مكان قدام والقا مكان عند الدريشه واجلس <<احسبك وقفت ويطلع لنا صوت ويقول اربطو احزمه الامان وقلت احلا يقلدون الميتين ال حقتي والتفت ولقا جنبي وحده القمر يجيها ويقول تكفين تعالي بدالي <<يسمع بالمدح واتميلح عندنا ابيها تلتفت علي واكحكح ولا تناظر واتغر عشان تناظرني وعيت تناظر ويوم مشينا شوي واسمع شخيرها وقلت ابرقد مثلها واحاول ارقد منا يا ولد منا عجزت مااعرف ارقد الا جنبي الدب الفوشي مدحت المهم وتجيني السستر<<اطلع برا ..قصدي الموظفه وقالت بدك عصير او شي بارد قلت تكفين قوليها ثانيه قالت بدك عصير ولا شي بارد قلت كلهن ابيهن قالت عصير ايش قلت فراوله زيك يا فرواله <<يلعن ام الاسلوب يا شيخ
    قالت عنا اورنج وتفاح قلت لا ابي اورنج انا ما طلبته الا عشان اسمه مستنكر وقلت خلني اذوق هالأورنج وتجيبه لي واشربه بجغمه وحده وقلت هذا مهوب عصير بردقان وتناظرني وتضحك وتقول انتا بتروح لمريكا عن جدك؟ قلت ايه ابروح عن جدي قالت ما تعرف الاورنج وتبي تروح لمريكا وتروح وتخليني وما دريت الا لوحه في السماء امريكا 400 كيلو شوي وتصفط الطياره قلت اكيد الكفر انصلخ عليهم ابروح ازينه <<مهوب سهل وانزل واشوف مطار وناس يركبون وناس ينزلون والزينه الي كانت جنبي نزلت قلت بس هذي امريكا واجيب اغراضي وكل خلاقيني وانزل واقعد امشي امشي لعنبو هالمطار ما خلص واجي والقا واحد يبربر ولا ادري وش يقول وناس واقفين يقولون تكسي تكسي وفيه بنات بعد يقولون تكسي تكسي واتنقا وحدتن زيييينه وقلت بكم توديني قالت وت قلت بكم اروح معتس المهم ما صدقت على الله لقت واحد وسيم زيي وتشيل شنطتي وتحطها بسيارتها <<ايه هين وسيم
    وركبت وققعدت تبربر ولا ادري وش تقول قلت اي شي ودينياه ونمشي ونمشي والقا باريس 6 كيلو وانا الي اقعد اناظر واقلب عيوني قلت ويني فيه وامسك كتفها واهزه ويني فيه يا مره يا هيه ويني فيه انتي ناويه تخطفيني لالا نزليني لك الي بالشنطه كله بس نزليني ماابي انخطف طبعا الشنطه ما فيها الا جنزاتي الي شاريها من البطحا وكم فنيله وصوره لدوب الفوشي وفيه ترنق حق وزاره المعارف الي منول يعطوناه جايبه معي ابكشخ به وهي تضحك تضحك واتذكر الافلام اذا جو يسرقون احد وان افصخ نعالي قلت لا تتحركي<<تكفى انطم وتوقف وتهاوش وتهاوش وتهاوش وتهاوش ولاادري وشي تقول وقلت وير ار يو قالت فرنسا قلت انا ابي امريكا وش جابني لفرنسا وتقول وت قلت ابي امريكاا مهوب فرنسا وتنزل وتفتح الشنطه وتنزل كل خرابيطي وتقول يالله انقلع وانزل واقعد افر على رجليني ودور والقا عندهم شاطي بن سته وستين كلب واوقف عند الشاطي وامسك الحصا واقول لوني عند اميمتي الحين اكنس هالحوش واذا قضيت من الحوش رحت لدحمي اتهاوش انا وياه مهوب اصرف من هنا بكثير وامسك حصا وارميها واقول لو البحر هذا كله فلوس وش ابسوي واناافكر هالتفكير البايخ ويجي واحد ويطقني مع ظهري قلت خير نعم وش تبي ياخي قال وش فيك معصب واناظره وانهبل قلت تكفى قلها ثانيه قال وش فيك معصب وانا امسكه واخمه مع رقبته قلت احبك احبك بس دلني يرحم ام ام الي جابك ياخي انا مندوب مبيعات شركه بالسعوديه وقالو لي رح لمريكا ووقفت الطياره في فرنسا ونزلت وجحدوني ولاادري وش اسوي وانا طفران والشركه ذيك مواعديني بالمطار وبيعطوني كلش هم قايلين لي محفول مكفول معليك ويناظرني وقال وش وراك قلت ابد فاضي قال خاوني الشقه قلت قدام لو تبي اخاويك لجهنم مشينا بس افتك من هالدوجه المهم ويركبني بمرسدس ملعونة ابو جد من الونااسه ركبت ورا ويناظرني قال ترا ما بعد صرت سواق عند اهل امك واركب قدام وشوي ووصلنا الشقه ونزلت اغراضي ودخلت الغرفه والقا وحدتن راقده وقلت يوه اسف تراني والله ما شفتها (احسبها مرته ) ويناظرني ويضحك وقال تعال لا تخاف وادخل والقاها راقده وفاتحه افمها واناظره قلت هي دايم مسويه كذا قال اذا رقدت تسوي كذا قلت ومتحملها؟ قال وش اسوي ..واجيب منديل وادعسه في خشمها هههههههههههههه وتقوم علي وتتفل في وجهي وتهاوشني بالفرنسي وذاك فاطس من الضحك وتقوله بالفرنسي من هذا الوولد قال هذا من نفس ديرتي ولقيته بالبحر وتناظرني وتعطيني سبه على الطاير وانا الي اقمط واسكت ويوريني شقته يا كبرها كبرااااااااه قال هاه عساها اعجبتك الشقه قلت لعنبو بليسك ذي شقه ولا قصر ويضحك علي ويقول اجل لو شفت الشقق الباقيه وش بتقول هذي اشين شقه في فرنسا قلت وبكم هي به قال الشهر بربعين واناظره قلت صاحي انت قال وش تبيني اسوي انا محد يبيني ويصيح علي وقعد يقولي انا مهاجر من السعوديه عشاني لاعنن ابوي ومسطره وهو قايل لو جا لسعوديه يلف للقبر اصرف له ويقعد يصيح ويقولي ياخي يا حضك تقدر تروح السعوديه ويصيح وانا خنقتني العبرا واقعد اصيح معه مدري وراه بس مشاعري واحاسيسي تجبرني<<تبوني مشرف للأدبي ترا ما عندي مانع
    وامسكه واقعد اخمخمه واقوله يا رجال لا تشيل هم من زين السعوديه زحمه وقلق <<يقالي ابكرهه بالسعوديه عشان ما يصيح
    وانا اسولف معه وتقوم هذيك الشهباا وتسلم عليه وهو يسلم من دون نفس وتناظرني وتكشر في وجهي قلت جعله بذاالخشه الي تسنها شنطة محامي ويوم راحت قلت يا ...وقاطعني وقال معك مدحت وانا الي اخمه واقعد احببه والمه وهو منهبل ويقول وش فيك ياخي قلت يلعن بليسك تصدق اني مشبهك فيه من زمان قال منهو قلت مدحت قال مدحت ويش قلت الدب حقي ويلفني بمخمس وقال انا دب يا كلب ونتهاوش شوي وبالاخير تصاحبنا<<لوكم بزران اصرف
    قلت يا مدحت من هذي الي معك قال هذي خويتي قلت يالي ما تستحي عندك خويه <<يلعن ام البرائه
    وهو يقول انا احبها واموت عليها قلت حبها ورجعها لهلها وش تبي فيها وترا بيجونكم الهيئه ويمسكونك ويجلدونك ولا هيب نافعتك هالشهبا ويولع زقارته وقال تكفى كل تبن وش تبوني اسوي به اقوله كل تبن طبعا ابقول انشالله عشان ما يطردني من شقته واخذ لي قيلوله واقوم والقا الجو ليل وهو كاشخ وخويته كشاخه قلت ماشالله من بيعرس<<بعذري بالرياض مااكشخ الا للعروس
    قال محد بيعرس بس رانيا (الي هي خويته) اليوم عيد ميلادها قلت وكل هالكشخه عشان عيد ميلاد قال ايه قلت يلعن ام التطور انا وهو انا منيب اتذكر عيد ميلادي الا اذا خلص
    وقال هاه بتخاوينا ولا لا قلت الا ابروح معكم بس اصبر ابكشخ واطق لكم هاك الجنز الي لو يشوفني لابسه الدحمي سرقه مني والبس الفنيله الي مكتوب عليها Mbc <<انواع القرونه
    واطلع لهم وهو يفطسس ضحك وخويته ماسكه بطنها قلت وش فيكم لبسي شين وهو يضحك قال تبي تفشلنا انت قلت ايه قال اجل مشينا واركب ورا وخويته قدام واناظرها واقول الي ورا امراء والي قدام خدام خويي ناظرني قال انت مملوح كذا دايم
    ووصلنا للحفله واشوف لكم هذاك الفندق الي لو اموت ما دخلته يا كبره كبراااااااه ويجيني واحد ويفتح لي الباب قلت هيه وين اركب مع الجهه الثانيه قال لا انزل قلت يوه اسف وانزل وخويي مسك خويته وكل من دخل معه خويته الا انا واشوف الي كانت معي بالطياره واناظرها وانا منهبل واروح لها قلت عرفتيني وانا اتبوسم في خشتها قالت لا منيب اعرفك قلت انا وياتس بالطياره يوم نجي قالت مااذكر كنت نايمه قلت المهم معتس احد قالت لا لحالي قلت ممكن اصير خويتس لين تخلص الحفله قالت نو بربلوم واروح واخليها وتناظرني احسبها تقول نو يعني انقلع واجيها ثانيه قلت تكفين كل واحد له خويه الا انا قالت ايه انا قلت لك نو بربلوم يعني عادي واناظرها واسفهل وامسكها مع يدها وندخل الحفله وخويي ابن الكلب سحب علي وادخل وكل واحد يسلم علي ويحب يد خويتي وكل من مرينا عليه حب يدها انا بديت اغير عليها وجا واحد يحب يدها قلت هيه هيه مهيب حلا ياابو الشباب تراها جايه معي اجل لو تجي لحالها وش بتسون فيها انا معها وتحبون يدها لوجت لحالها بتفصخونها اظاهر المهم تعشينا ودبيت دب مهوب طبيعي وخلص عشاهم ويبدون بالرقص الهادي وامسك خويتي وقلت هل لي برقصه ياسيدتي (مااقول الا يا حبيلتس يا Mbc كنتي تجيبين مسلسلات مدبلجه وصرت اعرف ) وقالت اوكي ما عندي مانع ونرقص ونرقص شوي وتجي زبيده وتقعد تطق تطق<<كل تبن بس ويشغلون لنا دسكو وارقص وارقص واطيح الي براسي هما ما فيه احد يعرفني ديرتن مهيب ديرتك .....وانت واقف<<ترا النقاط مشفره يعني شوي ويصفقون لي العالم ويصفقون لي صرت اطلق واحد يرقص بينهم واتميلح عندهم واتشقلب ويوم تشقلبت وينشق صروالي ويضحكون علي قلت ياوالله النشبه وانحاش وخويي وراي واركب الموتر قال مليت قلت ايه يا رجال طفش قال مليت ولا عشان صروالك انشق قلت لا والله عشان صروالي انشق ويركبون هو وخويته قدام واناظرها وقلت الي يركب قدام خدام والي ورا امراء وتلفني بمخمس قالت

  4. #3
    قلتها مره وسكتنا اما تسمجها وتقولها ثانيه وووصلنا الشقه وافصخ ملابسي وما علي الا صروال طويل مشقوق مع الركبه وابرقد واشوفه هو وخويته يسولفون قلت ما ودكم ترقدون قال انت ارقد حنا ما نرقد الا الفجر قلت اجل ابجلس معكم ويناظرني قال يانت نشبه ابي اجلس مع خويتي لحالنا قلت عادي سولفو منيب افهم ويلتفت علي قال بتروح ولا طردتك قلت تمنن علي بشقتك يا ورع قال ايه اتمنن قلت كل تبن انت وشقتك يا شيخ ومنة الله ولا منة خلقه يا كلب واشيل ملابسي وخلاقيني واطلع وتناظرني خويته وهي تبتسم وكان جنبي كرتون مناديل وانطله عليها ويصكها مع سنونها وتصيييح وتصييييح قلت يوه دلوعه
    وانطردت وانا نازل قلت الحين ورا مااخليهم هو وخويته لحالهم وشوله اتلقف الحين وش استفدت طلعت من الشقه وبس وارجع للشقه واطق الباب ويفتح لي قلت خلاص سولفو ابروح ارقد قال ياخي انت بجيح قلت وش اسوي طلعت برا وكلني البرد ولا ادري وين ارقد ورحمني ودخلني واروح ارقد ويوم جا الصبح واقوم لحالي وهو وياها راقدين بفراش واحد وجنب بعض واشوفهم واتحمد اقول ما يستحون وامسك رجل البنت واسحبها وهي الي تمسط على وجهها وتقعد تقول اي اي وخويها قام قال وش سويت يا خبل قلت ابد شفتها راقده جنبك وشلتها قال وليه تشيلها قلت عيب ياخي وكان جتبه طفايه دخان وينطلها وتجي جنب خشتي وانحاش واخليهم وانزل تحت واقعد ادور بهالشوارع وصرت ادل فيهن وادخل على محل لقيتهم يلعبون سوني واناظرهم يلعبون قلت الله زينا يلعبون وطبعا وقتها كنت اصقع الدحمي وعزيز وادخل عليهم والقاهم يصفقون ويصارخون دخلت على واحد قلت وش تسوون وقعد يبربر علي ولا ادري وش يقول وفجأه عطاني اليد حقت السوني يعني العب واخذ فريق والثاني ياخذ فريق ثاني<<لا ياشيخ ونلعب الشوط الاول 0-0 وبدا الشوط الثاني واسوي كم تغيير وتبدا المباراه ويصقعني بهدف ويقعدون يصارخون كل المحل يلعن امهم محد يشجعني ويقعد يعيد الهدف حقه كل شوي ويوم بدا اسنتر الكوره وامسك فريق واسحب فيهم واحد واحد واسجل قول من بعييييييييد وبن كلب هذاك الهدف سكتووووووو كلهم سمعت واحد من بعيد يصارخ اثرنه خويي الي انا ساكن معه قال بعدي بعدي والله انك فنان واناظره واشره بصبعي الكبير ويناظرني ويشر لي بصبعه الكبير يعني يا فنان واكمل اللعب واكمل وجت اخر دقيقه ويجيني بلنتي واقعد ارقص من الفرحه وهو قاافله معه الولد وحطها بالباب ويدخل قوووول ويصارخ خويي ويقول قسم بالله انك فنان يا خبل يا مهستر ياليتني داري عنك من زمان كان جبتك ويسنتر الكوره ويمشي شوي ويصفر الحكم وافوز عليه (اجل انا الي كاتب القصه ولاتبوني افوز )
    ويجي خويي ويلمني ويلمني ويقعد يحببني قلت وش بلاه ذا مبسوط شكل هالي اباريه اقوا واحد عندهم بفرنسا ويجيني الي فزت عليه ويسلم علي ويبربر فرنسي ويعطيني ورقه والتفت على خويي قلت وشذا قال هذا شيك قلت فلوس يعني قال اجل ويش قلت كم كم قال انت تو تلعب بطوله العالم لسوني (وش رايكم بالواسطه ما لعبت الا على النهائي )
    قلت طيب كم المبلغ قال مليون دولار قلت انقلع بس لا تستهبل علي قال كل تبن لا تصدق قلت لالا صدز كم دولار قال اقرا ياخي ما تعرف تقرا ارقام بعد قلت الا اعرف واناظر والقاها 1000000 واغمض وافتح كل شوي والتفت للي عطاني القروش قلت قط الوليد بن طلال يقرب لك المهم واروح للبنك ويصرفون لي الشيك ويعطوني قروش ويعطوني صرافه وقعدو يقوولون لي مبروك مبروك وخويي معي صار هو الي ينشب فيني وقلت ياخي وش اسوي بهالقروش قال لعنبو بليسك هالقروش تسوي فيها الي تبي قلت اول شي ابفتح شركه للألعاب وابسمي الشركه مدحت على اسم الدب حقي قال فكره حلوه وفرنسا ما عندهم زي هالحركات قلت اجل توكلنا على الله واتعاقد مع شركات وخرابيط وبعد فتره فتحت شركتي وصرت منغنغ وتهاوشت مع خويي الاول <<قليل خاتمه الزلابه وصرت من التجار في فرنسا وصرت معروف ويوم من الايام قابلوني الاخبار حقت الس ان ان وكان عند عمي الكبير عزيمه عازم خوالي وعماني بمناسبة غيابي لمدة سنه وكانو يناظرون السي ان ان اظاهر فيه انفجار بيسمعون عنه شوي واطلع لهم انا ويناظروني وينهبلون ويقعدون يقابلوني وانا ابربر انجليزي (ايه ابربر خذت دوره بقروشي وصرت ابربر انجليزي وفرنسي بعد ) وعماني وخوالي وامي منهبلين واخر المقابله قال هذاك الشايب عندك اي كلمه تبي تقولها قلت ايه ابسلم على اهلي وكل عماني وخوالي الي بالسعوديه واسلم على الدحمي واقوله عسا ما خربت الميتين ال حقتي قسم بالله لو اجي لرياض والقا البنزين تحت النص اني للعن ابو جد الي جابك وقضا البرنامج وادخل القصر حقي ويدق التفلون وارد الو ويكلمني واحد وقال هلاااا وانا خالك وش اخبارك ووش مسوي عساك طيب قلت اي خال انت قال خالك ابو حمووودي قلت والترااااااااااب قال مسامح مسامح وانا خالك انا خابر اني زعلتك ذاك اليوم بس وش اسوي قلت خل حموودي ينفعك الحين لاعنن سقافي عشان هالبصوه والحين جاي تمصلح معي قال وانا خالك والله لوني منيب احبك كان ما دقيت عليك قلت لي سنه بفرنسا محد دق علي ويوم طلعت بالتلفزيون تدقون قال كنا ما نعرف رقمك قلت عسا امي شافت المقابله قال ايه كانت عندنا قلت كنتو متجمعين قال ايه قلت وش الطاري قال ابد بمناسبه غيابك سنه (يلعن ام البجاحه يقولها بوجهي ) قلت اها عشاني غايب عنكم سنه سويتوها يعني مبسوطين يومني بعيدن عنكم قال بصراحه لا بس عمك وش اسوي به قلت على العموم انكان ودكم تجون تصيفون عندي ما يخالف عندي بيت وعندي كل شي تعال انت وعماني وكل خوالي وجيبو الدحمي معكم تلقونه الحين قاعدن يدوج بموتري الكلب قال خلاص الصيف بنجيك قلت ما يخالف واعرس لي على فرنسيه ويجون اهلي وعماني يلقون ذي الشهبا في بيتي وتلفت امي قالت من هذي قلت مرتي قالت هذي مرتك وش تبي بها قلت اعرست وخلصت لا تقعدين تصجيني قالت وين راحو بنات خالك وبنات عمك قلت منول اذا دقو على بيتنا ورديت انا يصكونها بوجهي ويكرهوني كره مهوب طبيعي وخوالي وعماني مهوب يحبوني تبيني اخذ من بناتهم ولا عشاني صرت غني تقولون ورا ما خذت فلانه وتناظرني امي وتصيح واصيح وقالت صح اننا ما فهمناك يا ولدي بس وش نسوي انت كنت بثر واقشر والحين عرفنا ان مخك تجاري وتعرف مسؤليت نفسك (ما يدرون ان كل هالقروش عشان مباراه سوني )

    واروح لشقه خويي القديم وادخل والقا خويته راقده وفاتحه افمها وادخل المطبخ ولقيته ياكل قلت هلا مدحت ويناظرني وقال هلا والله ويقعد يلمني ويلمني(معن القصه نصب بس خنقتني العبرا هههههه)
    وقلت شف يا مدحت هالشقه ابيك تطلع منها تراني طقيت لك بيت في ارقا الاحيا بفرنسا وتستاهل والله ويخمني وقال فعلا انك رجال وقلت على شرط يامدحت قال سم قلت تعرس على هالي منبطحه الضعيفه قال ودي بس اهلها يبون قروش قلت معليك انا ابعطيهم الي يبون بس اعرس عليها وانتم تحبون بعض يعني تستاهلون بعض ويقعد يصيح يصيح وقلت ابوك ابكلمه بعد وابتفاهم معه قال اقول كل تبن بس مسوي حبيب انت وراسك قلت يلعن بليسك اول مره اسوي نفسي حبيب
    وبعد كم شهر جبت لي ورع وسميته مدحت على اسم الدب الفوشي حقي وجبت الدب الفوشي حقي من الرياض لقيته منطول بالمقلط وصرت معد ارقد الا اذا صار معي

    اوجعتني اصابعي

    معليش على الاطاله وداري ان فيه اغلاط املائيه واجد يعني لا تسوون فيها مدرسين املاء وتصححون الغلطات لأنكم بتتعبون

  5. #4
    هههههههههههههههههه

    رهييييييييييييييييييييييييييبه القصه

    بالله من تأليفك؟؟

    أذا كانت كذا.......فأن دمك خفييييييييييييييييف....

    أصلا باين من اسمك.....

    مشكووور عالقصه........موتتني من الضحك....

    بس اللي ماهو سعودي ماراح يفهم شي.......

    باي ^_ ^

  6. #5
    ذي من تأليفي


    يومني نايم حالم

    قلت خلنا ناخذلنا اقتباس من الحلم ونحطه قلت يالله


    ولكم تحياتي

  7. #6
    ههههههههههه

    أقول انت متأكد من كلامك wink

    شكلك مواصل ثلاث أيام وأنت تكتب القصه smile

    شاكر لك
    تحياتي و أشواقي
    اخر تعديل كان بواسطة » silent في يوم » 21-03-2005 عند الساعة » 22:38

  8. #7
    تسلم والله اخوي على الرد

    اجل وشرايك قاعد فيها 4موب 2 او3

    بس مانيب سهران ارقد واقوم واكمل


    وولكم تحياتي: منسدح بالبلكونه

  9. #8
    خخخخخخخخخخخخخخخخخخخخخخخخخخخخ

    وربي حسيتها صدق ياخي عليك احلام لووووووووؤطه

    طانك على الموضوع
    sigpic5452_1

    :: كلمات من القلب ::
    "اللهم إن كانت الحياه خير لي فأحيني وإن كان الممات خير لي فأمتني"

  10. #9
    والله موضوعك مسطووول <<< وحط على كلمة مسطول اربع خطوط tongue

    مسألت انك تاخذ جهد غيرك وتجهي هنا تسوي قريندرز وتعيش ملك على حساب غيرك ما نبغى

    اعتقد ما راح يضرك كلمة منقول بأخر الموضوع wink


    ذي من تأليفي


    يومني نايم حالم

    قلت خلنا ناخذلنا اقتباس من الحلم ونحطه قلت يالله

    ومصر بعد .... tongue


    اقول سلمني على ( مساطيل ) وعلى رأسهم ادريان موتو

    ولا تتعودها وتنسب جهد غيرك لنفسك wink



    تحياتي يا منسدح biggrin


    FLASH MIX

  11. #10
    منسدح بالبكونة
    قد قلت لك ان اسمك فله مو لاوزم اعيد الاسطوانة

    واللـــــــــــــه على البدقان احلى شئ
    بس يا عمري امي دايم اذا قالتها تطلع القرون في الراسي
    اقعد اسوي لها محاظرة يا قلبي



    يعني لو لو مثلا القصة حقيقية معقولة في احد ما يعرف انجليزي

    المهم مشكووووووووووووووووووووووووووووووووووووووووووووووو وور على القصة الي مت عليها من الضحك
    وياحليله خويك مرررره عجبني يعرف وشلون يساعد عيال ديرته الله يوفقه <<<<< مصدقة

    وانا اسولف معه وتقوم هذيك الشهباا
    يا عمري ياذي الشهبا حاط دوبك ودوبه

    المهم ما ابي اطول
    يسلموووووووووووووووووووووووووووووووووووووووووو على النقل

  12. #11
    حبيب البي فلاكس مكس هاذي من تأليفي انا وياه لانه يقربلي ياالبي


    قسم بالله انك خويي كيف كشفت السر>>>>امحق سر خخخخخخخخخخخخخ


    هاذي انا وياه مألفينها واللي مايصدق يطق راسه بالدريشه>>>>كلالالالالالالالالالام هههههههههههههه

    تسلمين الحنين على الرائع

    اللي بعده مكس كيف حالك عساك بخير والف شكر لك على الرد

    سويت لولي تسلمين اختي وهاذا الموضوع موب نقل انا اللي كاتبه انا وادريان موتوووووووو

    منسدددددددددح بالبلكوووووووووووووووووووووووووووووووونه

بيانات عن الموضوع

الأعضاء الذين يشاهدون هذا الموضوع

عدد زوار الموضوع الآن 1 . (0 عضو و 1 ضيف)

المفضلات

collapse_40b قوانين المشاركة

  • غير مصرّح لك بنشر موضوع جديد
  • غير مصرّح بالرد على المواضيع
  • غير مصرّح لك بإرفاق ملفات
  • غير مصرّح لك بتعديل مشاركاتك
  •  

مكسات على ايفون  مكسات على اندرويد  Rss  Facebook  Twitter