ارحب بالجميع في هذا الموضوع .. اختبار الذوق ..
اولا بعرفكم على اساسيات قبل لاتدخلو الاختبار
الذوق: هو قمة الاخلاق .. << مو ذوق ملابس !! خخخخ
وهو حاسة معنوية تدعو صاحبها الى مراعاة مشاعر الآخرين واحوالهم وظروفهم ..
وطبعا هو مهم .. ليش؟؟ تكمن اهميته في كسب تقدير الطرف الاخر<<عند اغلب الناس
والقرب من نفوسهم وهو يدل على كمال في العقل وبعد في النظر واعتدال في المزاج .. ونباهة في النفس
وهو شعور اجتماعي محبب<<الخلاصة
انتهى الدرس والآن اختبااآآآآاار نيهيهيهاي
بسم الله
اللهم لاسهل الا ماجعلته سهلا
هذا الاختبار يعتمد على شخصياتكم ...
(جيبو ورقة وقلم وسجلو فيها درجاتكم)>>انتم الي بتصححوا مو بانا بس حرام الغش
السؤال الاول:
ويخص الاستئذان
بافتراض ان : لديك اخ او اخت اصغر منك عمره او عمرها خمس سنوات ويمتلك غرفة بالحاله
اردت ان تدخل عشان تاخذ شي يخصك من داخل ولنفترض محفظتك..
في البداية..
أ- ستطرق الباب وان اذن لك تدخل!!
ب- ستطرق وتدخل على طول>>كانك تقول انا داخل ترا
ج- ماحد قال انك بتفكر تطق الباب!!
السؤال الثاني:
والان..
لقيت اخوك او اختك سكر الباب وقال لحظة..وانت مستعجل صديقك له سنة منتظرك تحت ..
او >> عشان البنات .. السواق بيروح عليك .. في هذي الحالة:
أ- بتطلب منه يجيبلك المحفظة
ب- بتساله وش قاعد يسوي , اذا كان شي مو ضروري بالنسبة لك بتدخل وتطنشه
ج- بتفتح الباب وماعليك من احد
...........
السؤال الثالث :
في الشارع ..
لقيت مجموعة من الشباب مبين عليهم راعين صياعة << الله يهديهم
ومريت بجنبهم ..
أ- بتسلم ( السلام عليكم ورحمة الله ) وانت مار بجنبهم
ب- بتقول السلام عليكم بصوت واطي >> اذا سمعوك كان بها
ج- مالك دخل فيهم
السؤال الرابع :
جاء واحد من هالشلة وقام يطالع فيك ويضحك..
أ- بتظن فيه خير وتبتسم له
ب- بطنشه وتسوي نفسك ماشفت شي
ج- بطقها هوشة لانك من زمان كان ودك تكفخهم
.......
السؤال الخامس :
في المجمع ( المول ) ..
وقفت في محل تبي تحاسب .. ( عند الكاشير )
وكان قدامك عائلة .. الاب عطس وقال الحمد لله ....
أ- بترد وتقول يرحمك الله
ب- بتقول عيب اقط وجه (ادخل عرض) ومارح ترد<< مراعاة لاختلاف اللهجات
ج- اساسا انت ماترد على اخوك في البيت عشان ترد عليه
السؤال السادس :
طلعت من المحل وانت ماشي شفت من بعيد صديقك محمد في الدور الي تحت وماشفته من زماآآآاان..
وقدامه ثلاث امتار ويطلع من المجمع..
المشكلة غير رقمه ونسي يعطيك رقمه الجديد << شوفو التعقيد خخخخ
انت ..
أ- بتحاول تسرع واذا قربت منه ناديته بصوت منخفض مسموع ,, واذا مالحقته قدرالله
ب- بتروح ركض زي الصاروخ .. صدمت باحد آسف ع الطاير ومالك دخل لو شي طاح منه
ج- ليش تتعب نفسك من الدور الي انت فيه طل براسك و... مـــحااامــااااد
السؤال السابع :
لقيت محمد ومشيت معاه .. وطلعتو من المول والا لقيتو واحد متكي على سيارته ولونها
اصصصفر فاقع .. لاومطقم لبسه واياها ,, ولاتنسى الجل والقصة الي مسويها..
وحاططلك نظارة شمسية في شعرة وانتم في الليل .. احطياط من يدري يمكن الشمس تطلع فجأة!!
الموهيم بس شفته انت ومحمد..
أ- بتلف وجهك وتقول لمحمد يلف وجهه .. والا
ب- انت لفيت وجهك بس لما شفت محمد يطالع قلت مو انا لوحدي..
ج- حتى لو ماكان محمد يطالع بتقله شوف شوف ..
....................
السؤال الثامن :
مزاجاتك ..
كنت قاعد في البيت اجازة اخيرا وتطالع البرنامج المفضل الي كان ودك من زمان تشوفه وهذا اخر يوم اعادة والا
دق جوالك ... ترررن ترررن طالعت لقيت صديقك قلت ارد دامه فاصل اعلاني << ماشاء الله مظبطة
قالك صديقك انو واحد من ربعه (اصدقاءه) صار له حادث بالطريق وهو الان بالمستشفى وهم
بيروحون يزورونه وطلب منك تذهب معه..
أ- بتترك البرنامج وتذهب لزيارته لعلمك بفضل عيادة المريض
ب- بتعتذر له باسلوب لائق باحثا عن اي حجة مقنعه
ج- بتقله الصراحة عن البرنامج ووجهة نظرك حيث ان المريض صديقه وليس صديقك
السؤال التاسع :
جاء ابوك / او امك اذا كنت بنت
المهم ان خبروكم بكرة في عزيمة .. وانت عااااد مالك خلق تشوفين/تشوف وجه احد
بس مافي مفر لوكنت ولد ..
ابوك طلب منك تروح تشتري معجنات مادري من وين قبل لايجون عشان تظل طازة
وقمت الصباح مصدع ومالك نفس .. جبتها بالموت ورجعت البيت ..
ولو بنت ..
امك قومتك بدري من النوم سوي معاي الاكل يابنية..
قمت وانتي شايفة الي قدامك وراك وحالتك حالة ..
سؤالي.. بيجي الضيوف الان هل:
أ- بتكشخون وتتطيبون وتلبسو افضل ماعندكم .. لان هذي عادتكم تظهرون بشكل انيق ..والا
ب- بتلبسو ملابس حلوة وتتعطرو وانتهى الموضوع
ج- اساسا زين انكم لبستم ..
السؤال العاشر :
طيب .. بردتم خاطر اهلكم وسلمتو ع الضيوف وقعدتو شوي وشويات.. اثناء القعدة هل:
أ- بتقوم تشوف الي يبي قهوة .. شاي وتقدم اكل ... الخ والا
ب- اذا مافي احد قام بيطر سموك يقوم ..والا
ج- اساسا ماحد قال انك بتظل قاعد الى وقت اكلهم
...........
السؤال الحادي عشر من خمسة عشر سؤال :
كنت تتمشى في اي مكان وشفت من بعيد ناس تعرفهم ماشيين ..
أ- بتروح تصافحهم لعل ذنوبكم تتساقط ..ام
ب- على طول بالحضن .. لانك مشتااااق
ج- والا اساسا مالك خلق تشوف احد بعد ذيك العزيمة
السؤال الثاني عشر :
كنت في المدرسة او الجامعة اوحتى العمل وكنت مع مجموعة من الزملاء ..
وفي واحد قال ماحد يناديني الا بوخالد مثلا >> وهو مو متزوج في الاصل
او وحدة قالت ماحد يناديني الا نان مثلا <<بما ان الكل يناديني كذا
جيت تبي تناديه بعدها بشوي وتذكرت هل :
أ- بتناديه مثل مايحب
ب- بطنش وتناديه باسمه
ج- هذا اذا تذكرت لاني دايما اناديه ابو اربع عيون ماناديه باسمه..
الثالث عشر :
كنت انت وابن عمك تسولفون بشي يخص العائلة ودخل واحد تعرفونه المكان الي انتم فيه
أ- بتقله بنكمل السالفة بعدين حتى لو كنت متحمس
ب- بتطلعو بره الغرفة واحد واحد عشان مايحس وتكملو السالفة <<الي ميتين عليها
ج- بتكمل بصوت واطي وماعليك منه يظن الي يظنه
الرابع عشر :
رحتم البر انتم والعائلة الكريمة او نقول البحر لان في ناس مافي في بلادهم طلعة كشتات..
المهم شويتو دجاج ولحم ع الفحم ..
وخلصتو واكلتو .. سؤالي ع الفحم :
أ- بتحفرو حفرة عميقة وتحطو الفحم فيها
ب- بتكبو ع الارض وتحطو فوقه ماي عشان ماحد يحترق .. والا
ج- اقوووول في البحر وخلاص باقي بنحفر ونكب
الخامس عشر والاخير :
كان ودك تفتح مكسات شوي وعندكم كمبيوترين بالبيت واحد قال اخوك الكبير انه يبي يقعد
عليه يسوي بحث<<مثقف .. والثاني اخوك الصغير يبي يلعب عليه سباق سيارات<<فاضي
الحل؟؟ .... :
أ- تنتظر ايش وراك؟؟ اكيد واحد منهم بيطفش بعد شوي ويقوم
ب- بترحم المسكين البزر وتقول للكبير ارحمني كمارحمت انا الاصغر وقوم
ج- بتحترم الكبير ولك سلطة على ذاك .. قوم يللا بلا سباق بلا مبزرة ايش هالخرابيط<<كانك وانت صغير ماكنت تلعب
الان .. سجلو عند كل أ : 3نقاط
وكل ب : 2 ,, وكل ج : 1
وشوفو درجاتكم
اذا كانت من 45 الى 35 :
انت تمتلك ذوق رفيع .. تتفهم طباع الاخرين ومشكلاتهم وتضع نفسك في موقفهم
قبل القرار عليهم ..
تعتبر انسان عاقل ومنطقي يحترمك الاخرون ويقدرونك .. تجد احيانا انتقادات من الاخرين
ولكن واصل الثقة بنفسك واثبت نفسك امامهم .. واعلم ان سبب انتقادهم هو
تسرعهم في اتخاذ القرارات او ربما يكون غيرة منهم ..
واذا كانت من 34 الى 23
فانت تمتلك بعض الذوق ..
فانت تحترم الاخرين ولكنك قد تسيء اليهم احيانا بدون قصد .. لك شعبية
ولكنها محدودة .. فشعبيتك تكمن فيمن يفهمك ويشعر بك ..
حاول ان تشعر بالاخرين وتتحسس ظروفهم قبل الحكم عليهم.
اما ان كانت من 22 الى 15
انت انسان (عايش حياته) لايهتم بمشاعر الاخرين او بسعادتهم من عدمها اذا كان سعيدا
وفي نفس الوقت اذا لم يكن سعيدا طلب من الاخرين الشعور بما يعاني
من اجله ومراعاته ..
باختصار انت مخلوق اناني .. ولكن مايجعلك كذلك هو تسرعك في فهم الامور ومعاملة الناس كشخص واحد
فيجب عليك ان تعلم ان الناس معادن منهم الثمين والرخيص ومنهم
من لاقيمة له فيجب عليك معاملة كل شخص على حدى
وفي النهاية .. اشكركم واعتذر على اطالتي ..
ولكن .. تبقى شيء واحد قومو بالتصويت على حسب درجاتكم ..
اهم شيء لاتنسو .. لاني اقوم بعمل احصائية
اشكركم مرة اخرى واتمنى ان الموضوع قد نال اعجابكم ..
ابغى اراءكم في الموزوووووع ..
واتمنى من الادارة تثبيت الموضوع لمدة لاتتجاوز الاسبوع .. من فضلكم يعني ..


























المفضلات