ساعات بحس إن انا بحالات
ساعات بكون تعبان وحزين .. بدموع حيارة ملهاش عنين .. مش عارف أمشى طريقى منين
وسط الموج والدوامات
ساعات بحس ان انا مش انا .. عجوز وعايش يجى ميت سنة .. شايف حياته المتلخفنة
عقد وانفرط حبات

ساعات بكون مش طايق حد .. ولا عاوز سلامات ولا ود ... خايف م الحاضر والغد
وندمان بحسرة على اللى فات

ساعات بحس أن انا مش راضى .. واحزن عالمليان والفاضى .. دافن نفسى فى حضن الماضى
اللى كله اهات فى اهات
ساعات بكون مش فاهم حاجة .. وكل تصرفاتى سزاجة .. وكتير بحس إن انا ولا حاجة
تافه وغارق فى اللذات
وساعات بحس اننا فى ضلال .. واهم نفسى بحلم محال .. عايش نص حياتى خيال
ومضيع عمرى فى متاهات
ساعات بحس ان انا مهموم .. بشكى ولكن مش مفهوم .. الهم عمره فى يوم مايدوم
كان اولى بالشكوى السكات
ساعات بحس إن انا مخنوق .. روحى كأنها طالعة لفوق .. وساعة ما ادعى ربى افوق
وكأنى مكونتش من لحظات
ساعات تاخدنى أفكار بليدة .. ورغم إن نفسى لسة مريضة .. لسة احلامى البعيدة
ماسكة فى ديلها الأمنيات

ساعات بحس ان انا محبوب .. عايش كسبان مش مغلوب .. ملاك وخالى من العيوب
والخطايا والسيئات
ساعات بحس ان انا مجنون .. بضحك بس ملينى شجون .. وساعات بحس إن أنا موزون
حكيم وراسى وله علامات
ساعات بكون رومانسى قوى .. شارب من الحب ومرتوى .. رغم انى لسة وحيد منطوى
بقلب خالى من الدقات
ساعات بحس إن أنا بلا روح .. ومفيش أمل او حتى طموح .. وفى لحظة تتلم الجروح
وابص بعين سعيدة للأت
ساعات بشوف الدنيا بحالها .. عروسة حلوة بكحلها .. واقول ياريت تفضل على حالها
اسمع صدى صوت يقول هيهات
ساعات بحس بزهد غريب .. وقلبى مايتسمعله دبيب .. وأبعد بنفسى شوية واغيب
يمكن الاقى الروح والذات
ساعات اتأمل فى الوجود .. فى الصانع الحق المعبود .. واسأل اسئلة ملهاش ردود
وتاخدنى ياما كتير شطحات

ساعات اكون عاشق أصيل وشهم .. مرشوق فى القلب ييجى ميت سهم .. جوايا طاقات وفيا الوهم
قبل مايتولد كان مات

ساعات


برجاء ابداء الرأى فى القصيدة