سولدر فرونت أفضل لعبة حربية
بسم الله الرحمن الرحيم
اليوم جبت لكم موضوع عن لعبة سوليدرفرونت اللعبة القتالية وهي تشبه لعبة
كاونتر ستريك ، اللي يميز هاللعبة إنها مجانية 100% وعلى فكرة هي لعبة اون لاين
وفيها رتب وفلوس وأسلحة تشتريها ومنافسين قويين
طريقة اللعب :
ادخل على الرابط
http://sfront.ijji.com/
تلقى على اليمين مكتوب
Username
Password
تحتها
Sign up
تضغط على sign up
وتسجل المعلومات مثل إنشاء إيميل ، بعدين تفعل اشتراكك من الإيميل مثل المنتديات
ثم ترجع وتسجل بيانات دخولك اليوزرنيم والباسوورد
ثم تحمل اللعبة من هذا الرابط واللعبة حجمها 276 م.ب
http://gamedown.ijjimax.com/pub/U_SF/U_SFInstaller.exe
بعد ما حملت اللعبة وثبتها على جهازك
اضغط play live
راح يجيك صندوق برتقالي يحمل ملف حجمه صغير ما يتعدى 2 ميغا
بعد ما يخلص البرتقالي من التحميل راح تدخل على اللعبة
تلقى سيرفرين اضغط الأول ثم join
راح تلقى شانل chanel
اضغط على أي وحدة تبيها
ثم تدخل تلقى غرف تدخل واحد وتضغط ready وتلعب
ــــــــــــــــــــــــــــــــــــــــــــــــــ ــــــــــــــــــ
للمشتركين الجدد راح صندوق اسمه
Codename تكتب فيه اسمك المستعار اللي تدخل فيه للعب >>>>>> لا يمكن تغييره أبدا أبدا أبداً
ثم راح يدخلونك على أسلحة تختار اللي يناسبك
أول ما جيت ألعب أحسب إن الكود نيم الرقم السري وأنا كنت حاط الرقم السري حق الايميل كتبت الرقم السري حق الايميل الكل يشوفون رقم الايميل السري
خخخخخخخخخخخ
ــــــــــــــــــــــــــــــــــ
بدة المفيد
فيه عدة أنواع من الأسلحة :
قناصات ورشاشات
مسدسات
قنابل
سكينة >>>>> ضعيفة بس ارتفع ضغطي منها إذا ذبحني واحد فيها يضحك علي كل من يلعب (تهي تهي)
مميزات القناصات
1- تصويب على الهدف بدقة كبيرة
2- في أغلب الأحيان تكون الطلقة الواحدة تكون قاتلة ، بعكس الرشاشات اللي تتأخر عشان تقتل
مساوئ القناصات
1- لازم تكون بعيد عن الهدف عشان تأخذ راحتك
2- إذا كان فيه واحد يهاجمك وهو قريب يصعب عليك تذبحه وفي أغلب الأحيان تكون ميت إلا إذا محترف
3- بين كل طلقة وطلقة مدة بين 5 إلى 10 ثواني
4- تفيد في القتال الانفرادي والجماعي مع فريق ( لأن فيه قتال مع فريق وفيه قتال انفرادي)
جاء الحين دور
الرشاشات
المميزات
1- سرعة الرمي
2- مباغتة الخصم >>>> مباغتة هذي كثر منها
3- تفيد في القتال الانفرادي
المساوئ
1- يبالك وقت عشان يموت خصمك من الطلقات
2- لازم تكون قريب في أغلب الرشاشات وموب كلها
ــــــــــــــــــــــــــــــ
بنظري إن القناصة أفضل
ـــــــــــــــــــــــــــــــ
القنابل ، وما أدراك ما القنابل
فيه ثلاثة أنواع من القنابل
1- قنابل البارود يعني انفجار مؤذي جسدياً
2- قنابل دخانية تمنع الرؤية لمنطقة محددة
3- قنابل مضيئة تعمي من 10 ثواني إلى 15 ثانية حسب شدة التعرض لها
وهي بنفس الوقت صوتية تمنعك من سماع الطلقات والخطوات
السكين إذا فضا رصاصك ولا بتقهر خصمك يعني ما تأثر تأثير كبير
كل ما ذبحت ناس أكثر أخذت نقاط أكثر
(ذبحت ذي كثر منها ، ليش هم غنم خخخخخخخخخخخخ )
single هذي تعني قتال انفرادي
Team قتال مع فريق
Trident هذا للتدريب ، في هذي الواحد يتعلم (القليتش) فيها
Clan
هذا قتال باسم العصابة حقتك ، وما راح تدخل عصابة إلا لما تكون رتبتك عالية
يا الثالثة يا الرابعة وأنا سويت عصابة خاصة فيني
(( راح أعطيكم الرابط حقها عشان تسجلون فيها للمحترفين وغير المحترفين ))
مهما كان أنا كنت مبتدئ إذا شافوني طردوني
على ما أعتقد كل 1000 نقطة تزيدك رتبة واحدة وماني متأكد
ــــــــــــــــــــــــــــ
بعد كل معركة يتعطل شيء بسيط من السلاح
ويتم تصليحه بفلوسك اللي كسبتها من القتال
(لا تتوقع إن كسبك للفلوس سهل)
الفلوس في اللعبة sp
ـــــــــــــــــــــــــــــــــــــــــــــــــ
ويحدث غش في اللعبة وبقول لكم بعض من أعمال الغش
Glitch
القليتش
هذي أكثرها انتشار وأنا ما تعلمتها للحين ، ونأمل من المحترفين يعطوننا الطريقة لإتقانها
هذي الطريقة تخليك تدخل في الجدار والصناديق
يعني أنا ما أشوف اللي داخل الجدار لكن هو يشوفني حتى لو عرفت انه داخل الجدار ما أقدر أطلق علي لأنه محمي من الجدار
Hacks
لها عدة أنواع ، ولكم واحدة من أنواعه :
هذا بصراحة أكثر شيء أكرهه لأنه يعتمد على برنامج تركبه على جهازك يخليك تشوف ورا الجدار يعني قبل ما يطلع خصمك تكون جاهز له وتخرم رأسه ألف خرمه
يقال انه تم إيقاف هذا الهاك لكني لست متأكداً
Tap
هذي أقذر خدعة
تسمح لك بتثبيت خصمك وتجميده من دون لمسه ، لكن ليست منتشرة بكثرة
وتذبحه مرارا وتكراراً
لكن هالتجميد مؤقت يعني تشوفه يرميك ولا تقدر تسوي شيء
والتثبيت هذا يمكن يصير دقيقة ثم يروح بس الأكيد إنك راح تتفلطح
يعني جلدة وجليدة
للخبراء في اللعبة رجاء إذا كان عندي أخطاء في المعاني أو أخطاء المصطلحات تعدلونها في ردودكم
والخبراء في حركات الغش يعلموننا
في اللعبة إذا ضغطت tap
راح تلقى على اليمين فوق كلمة اسمها ping
وراح تلقى جنب اسمك البنق حقك
هذا البنق كل ما ارتفع قلت سرعة تلقي السيرفر لأوامرك وتحركات
أعلى بنق موجود في اللعبة هو 500
وحامل البنق هذا هو أنا طبعا مع مرتبة الشرف
قهرني هالبنق جابلي جلطة
طبعا الأمريكان والأوربيين بنقهم مزرقش منخفض من 0 إلى 200
إحنا العرب 300 إلى 500
طبعا اللي بيسجل في الكلان حقي هذا الرابط
http://sfront.ijji.com/ar4ever
واسمه ar4ever
يعني عرب للأبد
تدخل الرابط تضغط join this clan
في الجهة اليسرى
ويشرفني إنكم تكونون في كلاني
ولا تعتبروني ريس للكلان بل اعتبروني مثل الجندي
لكن بصلاحيات أكثر
اسمي في اللعبة
Bazoka2008
الأسلحة
قناصةPsg1
مسدس رعات بقر ، يجيب المرض ما لقيت إلا هو
سكين وجميع أنواع القنابل
ازرق عليه شرطتين سود
وآسف إذا أطلت عليكم
والشرح ماني متأكد إنه ممتاز أو لا
كان ودي أجيب صور لكم بس اللعبة ما تسمح بالتصوير بالبرينت سكرين
بس ادخلوا اليوتوب
وابحثوا عن
Soldier Front
وكل المصطلحات اللي عطيتها لكم وتبونها عن هذي اللعبة
وان شاء الله إذا عرفت شيء جديد راح أقول لكم
واللي بيسجل في الكلان حقي حياه الله في أي وقت
اضافة رد مع اقتباس
المفضلات