بسم الله الرحمن الرحيم
بالأول لازم الأمانةلست انا كاتب الموضوع ولكن احد أصدقائي وأرسلها لي إيميل
ثانياً الموضوع رائع جداً يرجى قرائته كاملاً واتمنى سماع تعليقات وردوود
سبحان الله وبحمده
عدد خلقه
ورضا نفسه
وزنه عرشه
ومداد كلماته
السلام عليكم
حبيت اكتب لكم هنا اللي نفسي فيه إنه يسير .. وآسف على أي كلمة تزعجكم
من البداية بقولكم إياها .. بس عن جد مافي طريقة إنه هادا الشي يوصلكم
غير بالإيميلات ومواضيع منتديات
وبما أننا احنا شباب الأمة وبناتها .. يعني نقدر نتوحد ونحقق اللي راح اوصلكم هو
أمنيتي الحالية .. إنكم تكملو القراءة
أول حاجة لازم تعرفو انه أنا مو معلم ولا دكتور ولا داعية ... لالالا .. أنا شاب متوظف
وأكيد تفكيري نفس تفكير كل اللي في سني .. يعني على قدي
طيب
بما أننا قربنا من شهر رمضان
كلامي حيكون عن شي في شهر رمضان الكريم للأسف دائما بيسير هادا الشي
ووالله إني مرة أزعل من كدا
يمكن كتير منكم مايعجبهم كلامي أو أسلوبي .. بس والله إني بأكتب هادا الايميل وأنا فعلاً نفسي إننا نتوحد ونكون كلنا يد وحدة
كلكم غاليين على قلبي .. لأننا كلنا أمة وحدة وتجمعني فيكم علاقة أخوة في الله قبل أي حاجة
بس أنا هنا راح اتكلم عن تجربة شخصية عشتها
وعن جد لاحظت تغيير واضح فيا ودوقت طعم تاني للحياة وكنت محتاج بقوة .. وعشان كدا حاب إنكم تعيشوها انتوا كمان وشوية شوية راح نتغير للأفضل بإذن الله
طيب .. طوّلت المقدمة عليكم وكلامي كتير عارف
بس أتمنى من اللي ماعجبو كلامي .. انه يبعت الايميل لأي أحد
ولو لشخص واحد يمكن ربنا يكتبلنا كلنا الأجر .. وممكن كمان تكون سبب ليك في دخول الجنة
لأنه راح تاخد حسنات كل اللي يقرأو هادا الايميل .. وأكون ممنون ليكم كتيييير
راح أخش دحين في الموضوع ويارب الكل يتفهمني ويحاول انه يجرب .. صدقوني راح تستمتعو كتير وتحسوا بإستجمام وراحة نفسية
محور كلامي هو بإختصار حاجة شاغلة الناس فعلا وسارت شغلهم الشاغل في دي الدنيا
ويمكن كمان مانقدر نعيش من غيرو .. وأنا كمان عارف نفسي
الشي هادا هو
((( التلفزيون )))
أنا أتفرج عالتي في طبيعي وأبلّط قدامه أحياناً وتجيني حالة تناحة منو كمان
بس هنا حاب اقول اش العلاقة التي فيه بشهر الله .. بشهر القرآن وشهر العتق من النار
مااأعرف ليش لما يقرب شهر رمضان القنوات كلها تتجنن
ومن قبلها بشهر بتجلس تعلن في الافلام والمسلسلات والبرامج
إش معنى يعني شهر رمضان وسابو الـ 11 الشهر الباقية ؟؟
ماقد أحد فكر في هادا السؤال ؟؟؟
من جد دمي يغلي لما اشوف دعايات المسلسلات والاشياء الخراب دي
طيب .. نقول مسلسلات دينية تاريخية ثقافية اي حاجية << عشان القافية بس
لا لا لا .. مسلسلات مسخرة ان صح لي القول .. ولا تلاقوها مسلسلات عن حياة الفنانين
والفنانات وقصص حياتهم ومدري اش شكلو
( يعني حاجات بتخرجنا من جو رمضان وتخلينا ننسى الروحانية )..
ليش طيب ؟؟!!!
أنا شخصياً كنت بتفرج على دي الاشياء في رمضان والله
بس التلاتة السنوات اللي راحت .. الحمدلله بطلتها وحسيتها دقة قديمة
رمضان شهر مايتكرر ولا ينعاد .. عرفت قيمتو الغالية على قلبي .. بينما المسلسلات بيجلسو يعيدوها ويكرروها الين تلاتة سنوات قدام وأكتر كمان
بتفرج عالتي في فـ رمضان .. بس على ايش
هنا الفرق
الصراحة سرت من أشد المتابعين لبرامج
أ.عمرو خالد
و أ. أحمد الشقيري
و أ. محمد الثويني
و د. طارق السويدان
و أ. حسن شاهين << صح برنامج صغار بس والله مرررة لزيز أسلوبو
وزي كدا من رجال الخير الداعين للخير جزاهم الله كل خير
وزي كدا أشياء ..
أنا ماقصدي إني أوصلكم أنا إش بتفرج ولا أقولكم لازم تتفرجو زيــي
لأ مو كدا .. بس يعني حاجات تغنينا عن حاجات
إش استفيد أنا لما أضيع ساعة في اليوم من رمضان عشان اتفرج على مسلسل واحد
طيب احسبو كم مسلسل تتفرجو .. يعني كم ساعة حتضيع في اليوم
يللا احسبو تاني عدد الساعات كلها لمدة 30 يوم
هاااا .. شفتو كم ساعة ضاعت من شهر رمضان
إش عرفنا إنه هادي الساعة ممكن تكون لينا شفيعة يوم القيامة لو قرأنا فيها صفحة من القرآن
أو ممكن تكون لينا دافعة لميتة السوء لو نزلنا عند باب البيت واتصدقنا فيها << زي محنا عارفين الفقراء والمساكين بـيتملّوا في رمضان
أو ممكن كمان هادي الساعة تكون ساعة العتق من النار
أو مساعدة باباتنا في هادي الساعة يمكن ربنا يحطلنا فيه البركة ويكتبنا من البارين
وبالنسبة للبنت ممكن تروح المطبخ مع أمها وتطبخ اكلات طعمه ..يعني اعتبرها عزيمة منك مسلن << صدقني راح تكون عزيمة غيييير شكل .. وماراح تسمع فيها غير الدعاوي ليك
يعني انت الكسبانة
أوممكن وممكن وممكن
...
طيب .. ليش نضيع صومنا عشان حتة ناس لاكانوا ولا ساروا .. بس نتفرج عليهم وعلى هبابهم
وشوية حنسير عبيد ليهم
اش الأغلى والأبقى .. صومي وعباداتي ولا هما ؟؟
ليش مانكون إحنا أقوى من شياطين الإنس اللي يظهروا عالتي في
ليش مانتوحد ونسير أقوى منهم .. وأكتر منهم
ليش الناس بـتقتدي فيهم وتضيع وقتها عليهم
وتنسى معنى هادا الشي واش عواقبه
لدي الدرجة سرنا غافلين !!! مو معقول
بدأنا نضيع مبادئنا وقيمنا وأخلاقنا وشوية شوية إسلامنا لاسمح الله
زي ماقال الرسول ( بدأ الاسلام غريبا وسيعود غريبا )
أنا زمان أعتبرت هادا الشي تحدي بيني وبين نفسي << يعني مع نفسي !!
بس الحمدلله ربنا ساعدني وقدرت أكسب هادا التحدي
ومرررة كنت مبسوط من نفسي .. الين الرمضانين اللي فاتو الحمدلله سار كل البيت زي كدا
وماأبالغ لو قلت كل عيلتي العزيزة كمان والحمدلله أنا مرة فخور بهادا الشي
جا الدور علينا وفهمنا أهمية دا الشي .. أتمنى ياااارب كمان انتوا تفهمو هادا الشي ويجي الدور عليكم
طيب .. الين هنا
حوقف كلام .. عارف جالس ابربر من أول بس والله لمصلحتنا كلنا
ومو معنى هادا الشي انه ربنا هداني على الصراط المستقيم خلاص بس اعتبروني اخ لكم واحبكم وابغى مصلحتنا كلنا فوق كل شي .. يارب يهدينا كلنا
وكلنا بنغلط بس الأهم اننا نعترف بالخطأ ونعدله
عشان في يوم من الايام نلاقيه يرجع لينا بالخير مو بالشر
يللا ننظم كلنا حملة ( رمضان بلا مسلسلات ) ولا سموها زي ماتحبوا
وأبدأوا بنفسكم .. بأهلكم .. بعوائلكم
وربنا يقدرنا على نشر الخير
أخيراً : آسف على كلامي اللي مرررة مرتب ماشالله
وباللغة الفصحى كمان
أتمنى نعيد النظر في هادا الموضوع
وشكرا لييييييكم كووولكم وآسف بالمررررة كتير ع طول الكلام
وتصبحون على ألف خير




لست انا كاتب الموضوع ولكن احد أصدقائي وأرسلها لي إيميل 







. بس والله إني بأكتب هادا الايميل وأنا فعلاً نفسي إننا نتوحد ونكون كلنا يد وحدة

اضافة رد مع اقتباس



المفضلات