السلام عليكم
امتى نحكم على واحد انه متعصب و امتى نحكم عليه انه منحل ...
يعني من وجهة نظري البسيطة ان المتعصب ده اللي شايف نفسه صح على طول و مبيقبلش بالرأي الاخر ... و ممكن متعصبين دينيا يكفروا ناس لمجرد ان رايهم مختلف ...
ولما بشوف حد متعصب ببقى زي ماكون عايزة امسكه و افكه من الحصار و التقييد اللي وضعه لنفسه ... و بحس ان دماغه زي غرفة مغلقة معتمة لن تحصل منها على شئ ...
اما بقى المنحل فده شيفاه معجب اوي بالرياضيات و الارقام لما فيها من خاصية اللانهاية ... يعني مالهوش حدود ...
ولما بشوف واحد منحل ببقى عايزة اقفل شباكه من كتر التيار اللي دخّله ...
والجوزين دول -التعصب و الانحلال- بيفكروني بنظرة المجتمع العربي للحلال و الحرام ...
فتجد ان الحلال هو اشياء مقيـــــدة بالكاد تستطيع الحراك بها ... و الحرام هو الابحار في مياه بلانهايات بكل حرية ...
افتكروا بس انا قولت من وجهة نظر المجتمع العربي يعني كلها تقاليد و عادات مجتمع و لكن لو حبينا نتكلم عن الدين فده محتاج فقهاءه و علماءه
وتعرفوا ايه اسوأ الاشياء في الدنيا دي ؟؟
1- حد بيسمع لنفسه بس و شايف نفسه صح على طول و لا يفكر في مراجعة هذا الشئ المتمسك به ....
2- اخر حاطط كل شئ تحت الشك و لا يؤمن بالحقيقة المطلقة ....
وده اللي يخلينا نتطرق للماذا تخلف المسلمون ؟؟ لانهم عندما كانوا يصلون الى معلومة .. لا يقبلون مراجعتها و التفكير فيها من جديد لذا لم تنضج عقولهم و توقف ابداعهم .. و لكن الغرب الذي اخذ علم المسلمين و ترك صفة (تحريم التفكير في المعلومة من جديد) انتج و ابدع كثيرا لكنه اتخذ لنفسه صفة جردته من دينه و ايمانه بالله و هي ان لا حقيقة مطلقة .... ففي الحالتين اتت نتائج غير مرضية لخبطت العقل و اربكته ....
يعني نظام (يا ابيض يا اسود) مينفعش و الاصح هو النظام (الرمادي) المتوسط المعتدل العقلاني ... فلا احد يحب ان يشرب فنجان شاي بدون سكر او ملـــئ بالسكر فيتحول لعسل اسود ....
الموضوع ده معرفش حتى ايه لزمته فكلنا عارفين ان التعصب و الانحلال وحشين .... بس افحص نفسك كويس و شوف يمكن تطلع متعصب او منحل ...
فبصراحة شديدة في موضوع في القسم ده كان بيتكلم عن سواقة المراة و شغلها و عن الاختلاط و بصراحة شديدة وجدت ان هناك متعصبين سجلوا ارائهم في الموضوع ... يعني مقبلوش الرأي الاخر و على فكرة في حاجة مهمة عايزة اقولها ... الانفتاح مش معناه انك تتخلى عن افكارك او دينك و تلبس عباءة العلمانية ... لكن الانفتاح بحق انك تــســمــع للطرف الاخر و ترى الموضوع بعينه ... و كانت الناس دي بتُعرّف بالمتعصبين لانهم مقبلوش الراي الاخر و اتهموه بضعف الايمان و لو ان ايماني بالله و رسوله و شريعة الله تجعلني اتفهم الاخرين جيدا و اقدر ارئهم مادام لديهم حجة و برهان طبيعية و ليست افكار غريبة شاذة بعيدة عن فطرة الانسان ... و بالحجة و البرهان توصل سيدنا ابراهيم -عليه السلام- الى الايمان بالله لما فكر و فحص الكون و اتى بالحجج و البراهين ... ايماني بالله مبيجعلنيش احكم عالناس و اقول ده مؤمن و ده كافر .. كله في القلب و القلب يعلمه الله ...
بصوا ...
حتة الموضوع بتاع المنتدى اللي كتبت عنها في الفقرة السابقة مش عايزة عليها خناقة و دول كان مجرد كلمتين محشورين في الزور ...
عايزة انهي الموضوع بس مش عارفة اقولكم ايه في الاخر .. اقول انتظر ارائكم ؟؟ اراء ايه هنتظرها و مش هيكون فيها اختلاف عظيم يعني مش هيكون في حد مع التعصب او الانحلال مثلا ...
على اية حال انا حبيت اكتب الموضوع ده و اقول فيه وجهة نظري المتواضعة ... و لو اني حاسة اني ماقولتش كل اللي عندي او ماقولتش اللي عايزة اقوله صح بس طلع مني كدة و ربنا يستر ... و كمان حاسة انه موضوع سلطة و مليان فروع كتيرة ... على اية حال ...
هدوس انشر و زي ماتيجي تيجي ...
سلام .





اضافة رد مع اقتباس





) في نظره 

المفضلات