عالم الأنمي في غرفتي
السلام عليكم..
كيف الحال؟! إن شاء الله بخير..
ما أدري ليش أنا عملت هذا الشيء! بس حبيت تعرفون أن عالم الأنمي ممكن دايم يكون معنا، وبعد أي واحد مننا ممكن يعرفنا عن نفسه أكثر بمثل هذي الطريقة إلي أنا استخدمتها..
بس تعرفون أنا وش سويت؟! صوّرت لكم الأشياء الي بغرفتي والي فيها أنمي أو عن الشرق الأقصى بشكل عام، وطبعا لكاميرا الجوال
يلا.. بسم الله نبدأ
دايما نسمع الناس تقول ((الكتاب باين من عنوانه))، وأنا غرفتي باينه ومعروفة من بين كل غرف البيت!
بس شوفوا وش مسوية، يعني بما أني أحب التصميم عملت تصميم وطبعته وعلقته على الباب، وغير هذي الستكرز الي اشتريتهم بس ما أذكر من وين، أظن من كليرز.. خخخ..
عاد بعد ما دخلت الغرفة، أول شي شفته وصورته لكم هو هذا الـNote notebook، أظني اشتريته العام من مكتبة جرير، أعجبني لأن عليه رسمات لـ (Japanese Nekos) يعني بسس يابانية..
وهذا الدفتر دايما أخليه بجنبي عشان أكتب فيه الأشياء المهمة، أو أحيانا أشخمط فيه، مثل رسمات هبلا وتعليقات أهبل.. وبخليكم تشوفن بعض هذي الشخاميط
الحين بخليكم تشوفون بعض الدفاتر ومجلات وأشياء مثل كذا وكلها عليها شخصيات أنمي..
- هذي مفكرات أستفيد منهم دايم.. ههههه، تذكرت ديث نوت
- وهذولا دفترين لكارد كابتر ساكورا، والصراحة أنا مرررررررة أحب هذين الدفترين، لأنهم يحملون ذكريات مرة حلوة، وهم عندي يمكن من 5 سنوات.
- وهذي كراسة همتارو، مع أني ما أحب هذا النوع من الكراسات لأنه ما يصلح للرسم عشان وأوراقه مره خفيفة، بس أضطريت أشتريه
- هذا دفتر للستيكرز، بس فاضي
- هذا غلاف لعبة إنوياشا على البلاي ستيشن2.. بس صدقوني انها لعبه غبية
- هذي ملفات لأوراق، حلوة وأستفيد منها كثير
- وهذا غلاف مجلة مصرية أسمها بلبل، وأحيانا يتكلمون عن بعض الأنميز مثل ميجا مان.. وأكيد إخواننا المصريين بيعرفون هذي المجلة..
- وهذا بعد غلاف لكوميكس سونيك إكس، بس حسافة مو رسم ياباني
هذي الصورة صراحة من خارج غرفتي! هي لبنت أخوي، وهي مرة تموت على سلام دانك، وماشالله عليها مدري من وين جايبة هالبوستر الحلو لهم
أما هذي صورة للبوكس حق الكومبيوتر، وملصقة عليه ستكرز ليوغي، مع أني ما أطيقه
هذي شنطة اشترتها لي أختي، قلت لي عشانك تحبين الأنمي جبتها لك.. مشكورة وما تقصر، بس بصراحة كأنها خيشة رز أبو بنت
هنا صور عرايس أنمي:
هذي ألعاب صغيرة لعبقور طلعت لي مع كيندر سبرايز، وعاد أنا أمووووووووت على شركة كيندر كلها من يوم ما فتحت عيوني على الدنيا
وهذي بنات حلوات لابسات الكيمونو، في اثنين منهم مفقودات، عشان بنات أخواني ماقصروا ضيعوهم >_<
وش رايكم نلقي نظرة على الديفيديات الي عندي؟! معظمهم أنميز..
هذي بس 3 صفحات، من أصل 4 مجلدات
طيب الحين بنروح لعالم (فتيات Witch):
شوفوا هنا أسمي طلع في مجلة فتيات، بس حسافة كان ذاك آخر عدد نزل في الأسواق
بهذي الصورة وعدونا بأن العدد القادم بينزل الشهر الجاي، بس كذبوا علينا..
أما هنا قالوا لنا بأنه راح يكون فيه دفتر ستكرز لفتيات، وقريبا بالأسواق.. بس هم نصابين!
هذا الدفتر اشتريت منه 3 دفاتر، واحد لي وثنتين لبنات اخوي، بس تدرون أني بعد ما اشتريت الدفتر تركته وخليته على جنب وما استفدت منه بأي شي..
وهذي بعض البوسترات إلي أعطونا هي، وأنا ما صدقت علقتها على الجدار، أما الباقي راحت في خبر كان مع أولاد أخواني الصغار
أنا اشتريت تقريبا كل العرايس حقت فتيات من أصغرها لأكبرها، بس خلف الله عليهم! بنات أخواني الصغيرات أخذوا كل عرايسي ولعبوا فيها وما بقوا منها شي، ما غير هذي الي أنا خبيتها عنهم، وحتى ثيابهم مقلبه
شوفوا يا حرام كيف صار شكل (هاي لين) كأنها طالعة من معركة
أما (كورنيليا) راحت فيها! تخيلوا أنها بدون ملابس الضعيفة، وملابسها قطعوها.. والله هذولا وحوش مو أطفال صغار أقل من 3 سنوات..
طيب، بعد هذا العذاب مع فتيات.. وش رايكم نشوف عالم الشرق الأقصى الي عندي؟!
هذا كتاب تعليم للغة اليابانية، مرة حلو ويوضح أشياء كثيرة، بس بصراحة أنا ما استفدت منه كثير، لأن معظم الموجود فيه أنا أعرفها ، يعني ما جاب شي جديد
هذا كتاب يتكلم عن اليابان باختصار، تعرفت فيه على أشياء كثيرة عن اليابان من خلاله.. بس أنا بصراحة ما صرت أحب اليابان ولا اليابانيين من زمان
هذا سي دي، معظمه مقطوعات موسيقية من عازفين يابانيين وكوريين مشهورين..
هذي علبها جابتها أختي لي، هذي العلبة ستايلها صيني مرسوم عليه باندا لابسة لبس صيني، وأنا أحط في أكسسواراتي البسيطة..
صورت لكم العلبة من فوق ومن الجنب عشان تشوفون الستايله الصيني الجميل
أما هذي الأشياء فأنا اشتريتها من ناس صينيين حتى ما يعرفون يتكلمون إنقليش، مرررررة يهبلون ^ ^.. طبعا كان هذا بالصيف في الطائف..
هذي ساعة ستايلها صيني، وبعد هذا كرتونه..
وهذا الله يعزكم (شبشبة) يعني زنوبة، بعد ستايله صيني، ومره مريحة في اللبس، عاد صرت دايما ألبسها في البيت..
والله كان عندي أشياء كثيرة اشتريتها من الصينيين مثل الأعواد الأكل وأباريق وأشياء مرة روعة، بس حسافة مدري وين راحوا..
وبكذا نكون انتهينا من الأشياء الي عندي بالغرفة الي هم عن الأنمي والشرق الأقصى..
إن شاء الله تكونن استمتعتم في هذي الجولة المتواضعة..
أوه.. في شي أبيكم تشوفونه قبل لا أروح..
خخخخخخ.. تدرون وشو هذا؟! هذا المكان هو تحت السرير، وحاطة أشياء كثيرة فيه: مجلات، أكل، كريمات، أكياس.... الخ. يعني الدولاب ما أعترف فيه بالمرة.. على العموم أنا دايم غرفتي محوسة مهما نظفوها، وأخواني يسموني العربجية
تقبلوا تحياتي:
(سوكي ماتسورا) أخت (يوو ماتسورا)
اضافة رد مع اقتباس
[IMG]
[/IMG]
المفضلات