طبعا كلنا مرينا بمواقف لا تنحسد عليها مثل ما يقولون
و بما أن ملل و طفش قلت خلنا نضحك على عمرنا شوية
وتكتبون مواقف اللي وايد تفشلتوا منها
أنا ببدأ أول :
1. في السعودية - مكة - ( العمرة ) : الوالد و الوالدة كانوا يطوفون حول الكعبة و قالوا لي ولأختي انتو اقعدوا وانتظرونا ، نحن قعدنا تحت يعني في الصحن ، كانوا هم فارشين لنا فرش على الأرض ، المهم وبعد شوي أشوف جيش من الشيع كانوا إيرانين إلا وين جيش معسكر كامل ، يلسوا يمبنا ، و أنا قاعدة ياسة احسبهم واحد واحد و اسمع حد يضحك بس ماعرفت منو ،المهم جا لهم شيخ ( مطوع ) من اللي في المسجد الحرام ويكلمهم إيراني و يقول لهم : ( قوموا هنا مكان صلاة للرجال وهاذيل الناس اللي قاعدين ، قاعدين ينتظرون أهلهم ) ترى هم كانوا حريم مع رياييل ، أنا فهمت شو يقول لهم لأني عيمية ، المهم أقولكم وقف واحد منهم جان كلهم وقفوا مرة وحدة ، وأنا أشوفهم أقول : ( خيبه ، خيبه ، خيبه ، حشى مب شيع ، هاذيل أحفاد قريش ولا بلاش ) وبعدين اسمع حد يضحك ويوم أشوفه إلا نفسه الشيخ ( وافشيلتاه ) بعدين يقول يا أختي في الله ما يجوز تغتابين الناس و لو كانوا شيعه أو غير مسلمين .
أنا من الفشيلة صار ويهي أحمر وقمت سرت يلست داخل المسجد ، والله للحين متفشلة من هذا الموقف .
2. المدرسة : في يوم أنا كنت مريضة وكان علي امتحان ولازم احضره ، وأنا يوم أمرض أشفر 180 درجة ، المهم الحصة الثانية يا لنا موجه ، الأبلة تشرح و أنا حاطة راسي على الطاولة الجهة الثانية عشان ما أشوف الأبلة ، المهم بعد ما خلصت الأبلة شرحها ، قام الموجه و يسأل البنات و أنا كنت وحدة منهم ( يا ويلي ) ، ما أعرف شو قال لي ، بعدين أنا قلت له : شوووو ؟؟؟؟
وعاد السؤال مرة ثانية و بعد ما سمعت ، ويوم أشوف الأبلة ورا الموجه ياسة تهدد و تأشر بإيدها ، خخخخخخخ ، أنا قلت لها : شو بتسوين يعني ؟
ويوم التفت الموجه شافها وهي ياسة تأشر بإيدها اتقولون أبلة لغة إشارة مب لغة العربية ، قال : ما عليك منها ما حكيتي لي أنا سألتك وما جاوبتيني
أنا سمعته يقول لي : أنا زعلتك ما جاوبتيني
قلت له : أبد ، انته تزعلني في شي
الموجه استغرب هذي المينونة شو تقول ،و يوم أشوف الأبلة فاتحة عينها و شوية ولا بتنطر ، قلت لها شوي شوي لا تطيح عيونج
( والله مشفرة ) <<< معذورة ، كلهم ضحكوا حتى الموجه ، بعدين قال : انتي مسخنه
قلت : لا ، محمومة <<< انزين نفس الشي
قال : اهااا ، وليش جاية المدرسة ؟
قلت :علي امتحان و لازم أحضره
قال : طيب كيف راح تحلي الامتحان ؟
قلت : بسيطة وسائل المساعدة عديدة
ضحك علي و قال : الله الله في وسائل المساعدة ، ساعدوها كتير ، بس اتأكدوا إنها ناقلة المعلومات صح ، لأنها مش طبيعية .
هنا تفشلت من الخاطر
قلت له: أدري إني مشفرة ، و هذي وصية من الاستاذ لكم يا بنات .
والباقي خلوها على ربكم ما تعرفون شو سوت فيني الأبلة
يلا أنا كتبت لكم مواقف اللي تفشلت منها وايد
الحين الدور عليكم تكتبون
يلا أبي مشاركات و تفاعلات
( ترى الموضوع مب ملطوش ولا منقول )
اتمنى إن محد ينقل الموضوع ما نبي الفضايح تطلع برع المنتدى
خخخخخخخخخخخخخخخ
المحبة : سوسو الشقية
المفضلات