في يوم خذني ابوي وياه الميلس ( المجلس) وكنت اول مره في حياتي اشوف ربع ابوي جلست على يمين الوالدوكان على يميني واحد متين هذااااااااااار مايعرف يسكت مشكلته انه يتكلم ويطلع تفال من حلجه سبح ويهي يومها الله وكيلكم بخاخ طبيعي المهم هذا مب موضوعنا الحين في هاليوم شد انتباهي بعض الكلمات اللي قالها اللغوي المتين وبعقلي الصغير يومها مافهمت ايش كان يقصد وفسرتها بطريقتي الطفوليه الخاصه وحدث ماحدث خلنا نشوف بعض الكلمات اللي قالها من بس من غير تفال
بط جبدي
اول ماسمعت هالكلمه استانست وايد لأني تخيلت ان واحد من اللي قاعدين كان في يده مسمار وقام وغج المتين في كرشته وبط جبده وفكنا من تفاله لكن للأسف بعدين عرفت ان الكلمه تنقال لما يصيد الشخص الغيظ ومايحتمل اللي جدامه مثلي
راسه يابس
قالها المتين حق واحد عيوز كان يصب لنا القهوه قلت خلني اجرب وخذت الفجان اللي فيدي (وطاااااااااااخ) وافلعه بقمه راسه من حسن حضي ان العيوز فقد الذاكره عقبها ولليوم مايدري مين اللي صكه على راسه...
المهم عرفت بعدين ان راسه يابس معناتها عنيد
عينه حاره
لما سمعت هالكلمه افتكرت ان الريال صادته سخونه من يومين وماطاب بالكامل بس باقي عيونه حاره للحين مابردت اذكر لما كنت اسخن كانت امي على طووول تعطيني تحميله قعدت افكر من وين اجيب التحميله حق الريال وحتي لو جبتها من اللي بيعطيه قلت مافي الا اكلم ابوي يمكن يساعدني .... وفعلا قال لي الوالد : انثبر مكانك عينه حاره يعني حسود يالدثوي
يده تاكله
هالمره قالها ابوي حق المتين استغربت في البدايه قلت شلون ممكن اليد تاكل صاحبها
بعدين قلت : احسن مادام بتاكل المتين وبتفكني من تفاله بس شلون ياترى اخلي يده تاكله!!؟
جاتني فكره جهنميه قلت لازم افتح شهيه (يده ) علشان تجوع وتاكله
طلبت شوربه عدس من راعي المجلس وانتظرت الوقت المناسب واول مافتح المتين يده صبيت الشوربه كلها في يده وبدال ما افتح شهيه يده بالشوربه حرقتها للأسف يعني يده عمرها ماراح تاكله بعد اليوم ابدا ... خساره !!
المهم بعدين عقب مارجعت البيت عرفت معنى يده تاكله يعني ماتتم الفلوس في يده ويصرفها على طوول
وهناك كلمات كثيره سمعتها في الميلس بس فضلت اني اسكت عنها وانطم وما احاول ابدا افكر فيها يكفي اللي صار
باقولها لكم على السريع وبقول معنها الصحيح
لسانه طويل: يعني كثير السب والشتم
دمه بارد:غير مهتم
ريجه ناشف : من كثر الكلام
جبده لايعه :يعني يرغب في التقيؤ
دمه ثقيل : يعني لايستساخ
يده طويله : يعني يضرب ويبطش
راسه انبط : من كثر الازعاج
يبيض الويه: يعمل اعمال يفتخر به
المفضلات