السلام عليكم ورحمه الله وبركاته
كيف حالكم اخواتي شخباركم وش مسوين
لي فتره مانزلت شي فقلت انزل هذاالموضوع ان شاء الله يعجبكم^^
كلكم باذن الله تكبرون وتتوفقون باذن الله ووتزوجون وان حملتوا ان شاء الله راح تجيكم بنت او ولد ووقتها راح تكوني انتي امه
محد غيرك امه انتي بس اللي مفروض يقولها امي انتي اللي ترضعينه وانتي اللي تدينه حب مايقدر احد غيرك يعطيه
فقد ايش مهم عندك الامومه يوم تتزوجين؟؟؟ اعرف بنات يقولون حتى لو تزوجنا مستحيل نحمل اللا بعد سنتين على الاقل او يوم اوصل لل30 ووقتها اقدر اجيب عيال ولكن في العشرينات واخرب جسمي لا طبعا (لان المرأه تحمل وتتغير فيسوليجيه جسمها ولكن اللي تهتم بجسمها ماراح يتغير)
واعرف ناس يقربون لي بعد حملت وجابت بنت وجابت على طول خدامه وقالت خلي الطفل مع الخدامه ارضعه وبس انا ماني فاضيه له وراي عزائم ووظيفتي فخلي الخدامه تربيه وتغير حفائظه وكل شي
والبنت تربت مع الخدامه لدرجه والله ثم والله انه يوم جا عمرها 4 سنوات صارت تتكلم عربي بلهجه اندونيسيه وانه الخدامه في يوم قررت تروح البنت اغمى عليها من كثر البكاء ومالقوا حل الاهل اللا انهم يدفعون للخادمه 2000 في الشهر وذا يعتبر مبلغ مره مرتفع لخادمه
فيعني الاحظ هذه الايام الكثير من النساء بدوا يتحررون من مسوؤلياتهم الكبرى وهي كونها ام وتقول وراي مستقبلي المهني انا موظفه ولازم احافظ على مستقبلي والاطفال الخدامه تهتم بهم او كما يفعلون الامريكان يقولون لها ال(الدادا او النانا او بالانجليزي Nany) والان اعرف عائله الاب موظف في الجمارك الام موظفه في وزاره البريد وكلهم يرجعون البيت على العصر والاطفال اصغرهم 3 سنوات واكبرهم 15 3 بنات وولد واحد كلهم معاهم جوال خاص فيهم وكلهم ينامون مع الناني او المربيه اللي كانت خادمه في الاصل وصارت مربيه والمربيه هذه صارت توديهم السوق وتشتري لهم الملابس حقت العيد وتوديهم الملاهي وتوديهم المكتبات لو يبغون شي تروح هي والسواق والاطفال والاهل يقولون خذوا الفلوس فقط
ليش النساء صاروا مايهتمون بدورهم كام بصراحه احمد الله على اللي اعطاني امي اللي تهتم بنا كلنا دون مفارقه في الحب فبعض الامهات تكون تحب ولدها اكثر من بناتها او العكس وتفضل ولد واحد وتجلس تكره البنات عيشتهم
ولا بعض الامهات حرام فيها كلمه ام بل كلمه مراهقه تنفع اكثر تكون الام تحط مكياج وتتعطر وتلبس العبايه الملونه الضيقه شوي وتاخذ بناتها وتروح السوق وتاخذ معسل او شيشه وتشرب والبنات جالسين معها او تطلع علبه دخان وتجلس تدخن وبناتها طبعا راح يطلعوا على الام بيطلعوا على مين جارتهم ؟؟ فيكبرون البنات ويحطوا مكياج ويدخنوا ويعسلوا..
زوجه واحد من اقاربي الله يهديها امها تدخن وتعسل وهي ايضا تعسل قبل فتره جابت ولدها مايقدر يتنفس وجلس 4 شهور او اكثر في المستشفى فقط اكسجين عشان امه كانت تعسل وتدخن
فانظري الى نفسك اختي كفتاه لسه ماتزوجت هل ترين نفسك زوجه مثاليه او قريبه من المثاليه هل تريدين بنتك تطلع عليك
ان كنتي تفعلين الحرام وترضينه هل ترضين بنتك تسويه يوم تتزوجين وانظر ايضا اخي الشاب تدخن تغازل وترقص كانك فتاه يوم يكبر ولدك تبغاه يطلع زيك؟؟
اتمنى ان تفكروا في الكلام هذا امكن الله يغير في قلوبكم شي وتخافونه
وتهتمون في نفسكم عشان تطلعون جيل يخاف ربه ويحبه وجيل بنات محترمات في زمن غير محترم
...
اخــــــــوكم : كيـــــوتــ
المفضلات