اقرا ملامح ضيقتك في عينك اللي ما تبوح ..

احسها .. لو ما تبين اعترف باحساسها ..

اشوف همك بالعيون اللي مدامعها تلوح ..

لكنها ما ترخص الدمع وتحدث ياسها ..

ما انتب على بعضك .. وكلماتك من الضيقه تفوح ..

حرام تحرق ورد خدك من لهيب انفاسها ..

وشفيك ضايق .. منهو اللي كدر الوجه الصبوح ..

لو انها الدنيا لانزل يا حبيبي راسها ..

قلي علامك لا يطول الصمت وتزيد الجروح ..

شف شمس موعدنا هفت والليل دق اجراسها ..

باقي دقايق من وعدنا لا تخليني وتروح ..

ولو رحت قلي وش يفك النفس من وسواسها ..

اضحك .. ووسع خاطرك .. يا صاحبي خلك مزوح ..

الريح تنتظر ضحكتك ومقفه نسناسها ..

قد قلت لي : لاصرت ضايق اركب امواج الجموح ..

والنفس ما تركع لضيقتها وترخي باسها ..

وقد قلت لي : خلك كتاب ابيض ويملاك الوضوح ..

ومن ينحني للعاصفه اعقل من اللي داسها ..

وين المبادئ ؟؟ وابتسامتك .. وهذاك الطموح ..

والا سوالفك القديمه ماتت بقرطاسها ..

مهما تصد بنظرتك عني انا لي فيك روح ..

تشاركك في ضحكة ايامك وفي هواجيسها ..


وعيونك اللي ما تبيها تعترف لي اوتبوح ..

شف دمعتك هذي تراها ترجمت لي احساسها ..