لما شفت واحد جاب السيره عن ديفل مان استحمست جدا جدا فالسلسله دي هيا السلسله الوحيده اللي قدرت تضاهي القندام بالنسبه ليا ليش؟. لعده اسباب منها العمق في القصه فالقصه اولا غير بقيه القصص في الانمي اسلوبها يختلف تماما عن البقيه وانا عادتا احب التغيير وشيء تاني انها مناسبه لواحد عمره 26 سنه فهي اعمق من ادراك واحد عمره 12 او حتى 16 سنه والسبب التاني كميه العنف والدم اللي في السلسله وانا احب الشيء ده (شوفوا ديفل مان ابوكلبس اف امن وحتعرفوا) مشكلتها الحقيقيه في التعري لكن لو نطيته حتلاقي السلسله ممتازه ومن اكتر ما اعجبني في السلسله الشخصيات يعني شوفوا البطل "فودوا اكيرا" كيف شخصيته جباره وعندكم "امن" كمان شيء نضيف.
الان بسرعه ساستعرض السلسه (الانمي والمانعا) واقول راي فيها ولكن لا احد يطلب مني صور لاني اولا كاتب الموضوع من رأسي من دون الرجوع لمواقع او شيء يعني ما في قدامي أي مصدر صور وتانيا اني ما احب وجود الصور في الموضوع علشين ما تبطيء فتح الموضوع والان حأبداء بمقدمه وبعد كده انفلت.
مقدمه طبعا الكل عارف انه المؤلف لسلسله هوا غوناغاي(حبيب الشعب ) مؤلف غريندايزر والمازنجر و كيوتي هني وغيرها الكثير جدا جدا جدا المهم من اين جائت الفكره جائت بعد ان قرأ روايه او قصيده او ملحمه اغريقيه قديمه اسمها دانتي انفيرنو(واللي طلبها من امازون وحتوصل قريب) فيها قصه عن وجود الشياطين قبل وجود البشر بملايين السنين منها اتحمس وفكر في ماو دانتي في سنه 1971 و بدأ ينزل المانغا للماو دانتي ومنهما جائت فكرة الديفل مان لكن وبعد ما وافقوا في التوي انيميشن على فكره الديفل مان وقف الشغل على الماو دانتي و انفلت في الديفل مان والمازنجر وكيوتي هاني وغيرهاالمهم الان سأكتب مقدمه عن كل واحد مع رأي المتواضع فيه.
المانغا:
الاصليه 1973 :
نزلها غوناغاي قبل الانمي في نفس السنه لكي يضمن حقوق العمل و يسجل تحت اسمه رسمها مقارنتا بالاشياء في وقتها تعتبر ممتازه تتكون من 5 كتب فيها القصه الاصليه للديفل مان والى الان تعتبر من اكثر اعمال المانغا نجاحا وتعتبر اول مانغا رعب في تاريخ المانغا سببت الكثير من المشاكل في وقتها بسبب كميه العنف والدم والتعري اللذي سبب الكثير من الصدامات بين غوناغاي والاعلام ومؤسسات التربيه في ذلك الوقت فمثلا في احد المقاطع يظهر وحش يقتل طفلا رضيعا بين احضان امه وذلك ادى الى اعتراضات كثيره من مؤسسات تعليميه وتربويه شتى لكن غوناغاي تغلب على اغلبها.
بالنسبه لي كانت تحفه القصه غايه في الروعه شخصيه فودو اكيرا (البطل رائعه) لم افهم الا بعض المقاطع المترجمه لكن بالنسبه لي هيا ثاني افضل مانغا رأيتها بعد امون من نفس السلسله.
ديفل مان ليدي:
قصتها بعد الاصليه مباشره وتتكون من 14 كتاب رأيت الرابع لان الشباب جابوه لانه فيه ظهور الديفل مان الاصلي الرسم قريب من الاصلي القصه ممتازه برضوا ويكفي انها تكمله بعد الديفل مان.
فايلنس جاك:
بعض الناس حتستغرب ايش علاقه فايلنس جاك بالموضوع لكنه تكمله بعد المانغا الاصليه ففايلنس جاك هوا rebearth للديفل مان من جديد في عالم جديد . يتكون من 30 كتاب واللي شافوه يقولو ممتاز لابعد حد (انا ما شفته لكن حأطلبه قريب).
ديفل مان نيو:
عباره عن قصص قصيره للديفل مان قام برسمها وعملها رسامسن مشهورين للديفل مان بعد ان اخذوا الحقوق من غوناعاي من القصص 2 لغوناغاي نفسه الباقي مشكل اللي كنت اعرفهم كانوا كلامب فيديو. مستواه يفرق فأحد المؤلفين مثلا عامل قصه كوميديه و كلامب شوجو وكل مؤلف على حسب اسلوبه بالنسبه ليا انا ما حبيت العمل ككل بالنسبه ليا الديفل مان يا من غونا غاي يا بلاش.والعمل 6 كتب.
امون :
على حسب القصه انه بعد حفله مسمينها حفله القناع يدخل"امون" داخل اكيرا فودو (البطل) و"امون" يعتبر اقوى شيطان على الاطلاق لكن اكيرا يسيطر عليه ويبقيه داخله الشيء ده هوا اللي يخليه يتحول للديفل مان. النظريه(ودي نظريتي) انه من زمان كان التركيز على اكيرا والان صار التركيز على امون فالمانغا هنا تتناول قصه امون والتركيز الكامل عليه. تتكون من 4 كتب والخامس حينزل في 2003 انا شايف 3 والرابع جاي في الطريق بالنسبه ليا افضل عمل مانغا رأيت على الاطلاق الرسم لرسام غير غوناغاي لكن فاهم بالضبط أي يبغى غوناغاي من ناحيه العنف والدم الراجل ابدا ما قصر و مستوى الرسم ممتاز و عموما اقل ما يقال عنها انها ابداع.
عموم المانغااليوم والانمي قريب.
ماو دانتي
في المانغا نسيت اذكره لكن الان بسرعه سأستعرضه قبل ما تيجي الفكره في رأس غوناغاي قراء ملحمه اسمها انفيرنو لمؤلف ايطالي قديم اسمه دانتي تتكلم عن وجود الشياطين قبل البشر بملايين السنين ومن ماو دانتي جاتو فكره الديفل مان وده يعني انه كقصه ماو دانتي ماله علاقه بالديفل مان لكن تقدر تقول انه اساس فكره الديفل مان وبدا المانغا سنه 1972 لكن بعد ما وافقوا في التوي انيميشن على الديفل مان وانشغال غوناغاي بعدها بالمازنجر وكيوتي هاني وقف العمل عليه لفتره وكمله بعدين لكن الانمي ما صار الا بعد بفتره جامده سنه2002 .
الانمي :
الاول 1973 : في ديك الفتره كان غوناغاي لسه مبتديء ماهو في وضع ممكن يفرض فيه رأيه فلما عرض الفكره على توي انيميشن وافقوا عليها لكن طلبوا منه انه يغير في القصه فلما شافه انه الشيء اللي حيطلع غير الشيء اللي في راسه اداهم الضوء الاخضر للتغير ونزل المانغا تبعه بالقصه اللي يبغاها قبلهم فأتسجل الديفل مان بأسمه و قال لعشاق الديفل مان لا تعتبروا داك من السلسله وماله أي علاقه بالقصه. طيب كيف طلع الانمي بعد التعديل؟ طلع بطل خارق بحركات super robot كل حلقه يطلع وحش يقاتله والسلام مافي ديك القصه المتعوب عليها زي الاصليه صح في شخصيات متشابهه لكن الانمي ما له علاقه بالديفل مان الاصلي. ميزته الوحيده بالنسبه ليا هي اغنيه البدايه اللي اعتبرها احلى اغنيه انمي من السبعينات(احلى من ليدي اوسكار وغريندايزر في نظري).
الOVA في التمانينات:
و ملاحظه قبل ما ابداء اسمها O . V. A كل حرف ينطق لحاله مو اوفا .
المهم دي تقدر تقول انه البدايه الحقيقيه ااديفل مان في الانمي نزلت حلقتين كل حلقه من ساعه ونصف الحلقه الاولى عباره عن احداث الكتاب الاول من المانغا الاصليه و التانيه عباره عن الكتاب ال2 من المانغا الاصليه الانمي ممتاز لان المانغا كانت ممتازه لكن لا تشوفه مدبلج انجليزي لانه الدبلجه كانت سيئه والحوار ملعوب فيه شويه.
فايلنس جاك :نزل 3 او في أي و سبب مشكله بين غونغاي والاعلام ةالياباني و مؤسسات التعليم والتربيه هناك بسبب كميه العنف مندبح قتل دم اكل لحوم البشر و الاغتصابات اللي فيه كانت المسائل لسه ما بردت من اللاول و لقضايا لسه شغاله فراح منزل التاني والتالت المهم انا ما شفت ال النسخه الامريكيه المقطعه والمدبلجه فما اقدر احكم لكن اعرف انه محبين غوناغاي يقولوا انه جيد عموما حأطلب المانغا قريب واشوف وسمعت انهم حينزل دي في دي مو مقطع في امريكا فمستني.
Devilman lady :
نزل سنه 1989 وعرض في التلفيزين الياباني في وقت متأخر من 26 حلقه ماله علاقه بالقصه الاصليه لكن عباره عن تجميع افكار من السلسه الفائته بمعنى لو انك مطلع على السلسله كلها القديمه حتلاقي افكار واشياء كتير تفكرك بيها مثلا ديفل مان الانمي تبع السبعينات موجود لكن باسم اخر وفكره البيست فاكتور اللي كل قصه الانمي حولها موجوده في المانغا الاصليه اللي في السبعينات لكن كانت جانبيه عموما ممكن يعجبك حتى لو ما لك اطلاع على القديم فشوف واحكم بنفسك انا عجبني جدا جدا.
ديفل مان اباكلوبس اوف امون :
او في أي من حلقه واحده وزي ما قلت انه الان التركيز مو على فودو اكيرا البطل الان التركيز على امون الشيطان في داخله احداثه عباره عن خمسين صفحه من اخر المانغا الاصليه لكن نهايه المانغا الاصليه مو موجوده مشكلته الحقيقيه انه مبني على اساس انك عارف المانغا الاصليه لو ما انتا قاريها ما حتفهم أي شيء لكن لو (زي )عارفها حتنبسط مره بالنسبه ليا هوا مع القندام زيتا افضل ما انتج من انمي في تاريخ الانمي ابداع ابداع لكن من الملاحظلات عليه كميه العنف الكثير جدا جدا واللي خلته بحق اعنف ما يمكن تشوفه من انمي ونصيحتي لاي بنت او واحد ما يتحمل لا يشوفه اتذكر لما واحد من عشاق مايزاكي شاف مقطع معين منه دخل الغرفه وبكي من القرف والتأثر والى الان يطيق العمى ولا يطيق غوناغاي.
ماو دانتي
الديفيدي الاول نازل من اسبوعين في لايابان لكنه عرض في التلفيزيون في وقت متأخر (بعد ما يناموا البزوره) ومسوي شيء طيب كل الناس بتمدحه انا شفت صور من المسلسل و شكله ممتاز جدا جدا طالب الدي في دي الاول و مستنيه على نارواستنو لما اشوفه واديكم رأي.
كلمه اخيره عن غوناغاي هي انه صحيح في ناس كتار يقوله انه الادمي ده مريض وفي عنده مشاكل كتير الا انه لولا شغله والمشاكل الكتير اللي سواها مع الاعلام الياباني ما كنا شفنا اشياء زي بيرسرك وهيلسنق مثلا اللي فيها عنف لكن مقبول فبسببه انفتح الباب لناس بعده سوا اللي يبغوه من كان عارف ممكن لو ما عمل المشاكل دي كان حتى دم ما شفنا في الانمي الان.
اخيرا شفت الديفل مان ليدي المانغا كامله واستغربت اني لقيت انه في اخره يطلع ماو دانتي يعني في الاخر مو بس فكره الديفل مان طلعت من الماو دانتي لكن اتفجأت لما لقيته في الديفل مان ليدي. القصه ماهي بمستوي المانغا الاصليه لكن تبقى جيده وتديك احساس ديفل مان فيها افكار موجوده في الانمي لكن مهي نفس القصه بقي اقول انه ديفل مان ليدي الانمي مؤلفه نفس مؤلف فامباير برنسس ميو و نايت ووكر مو جوناجاي.
اضافة رد مع اقتباس
فأنا مهتم كثيرا بديفل مان وأتمنى فعلا أتابعه
المفضلات