مشاهدة النتائج 1 الى 4 من 4
  1. #1

    Talking زيزو " زين الدين زيدان " الجزء الاخير

    تكملة للتعريف بزين الدين زيدان ... واللي بدينا فيه بالموضوع اللي فات ..
    واللي ماقدر يقراء الموضوع اللي فات .. ماودي اضيق صدره وأقول له فاتك نص عمرك
    أبقول له نقاط .. عشان يشبك معنا على الموجه ... والافضل انه يسوى بحث عنها
    ويقراه علشان يريشبك صح
    (زيزو " زين الدين زيدان " الجزء الاول) <<<<<< بحث

    - منقطع سره بمرسيليا الفرنسية
    - استملس جلدة مطامر بالشوارع ... الين دل طريق الملاعب
    - أول كندره لبسها يوم عمره أربعطعش
    - أول مباراة لعبها كان ضد فريق مرسيليا ... ووقتها كان مع كان ( كان الثانية أسم الفريق)
    - راح لأيطاليا مع اليوفي , بعد ما أنهزموا مع بايرن مينوخ
    - حلبة أستعراض زيدان في كاس العالم 98
    - ثاني حلبة أستعراض له كاس أمم أوربا 2000



    ريال مدريد طقتهم الغيره ... وارسلوا لزيدان واحد يجس نبضه بحيث يروح لهم بـ 64 مليون دولار
    64 مليوووووون دولااااار ... مااااهيب لعب

    خلت زيدان ينسى الأول والتـــالي ويروح لريال مدريد .. ويجحد أيطاليا مثل ماسواها قبل في فرنسا
    وعلى أول طياره لأسبانيـــا ... راح زيدان
    يوم قالوا له جماهيره .. وش بك لاتكون زعلت علينا
    قال لا والله بس مرتي أسبانيه ... وتبي تروح لأهلها .. وانا تعبت والله في الدوري الايطالي .. كررف
    ودي أروح أوسع صدري شوي بـأسبانيا ( أنوااااع الاعذار )




    وكانت الملاعب الاسبانيه أطلق مكان أبرز فيه زيدان مواهبه ... وأنسجم مع فريق الريال بأسرع من اللي كانوا يتوقعونه .. والا قحشه ملايين بزعمهم ماتسوي اكثر
    بدى زيدان يجمع الالقاب للفريق المدريدي ... واللي بدت أسهمه تعطي نسب !
    ودخل قلوب الجماهير وحبوه كلــهم ... حتى أنهم ماصاروا يتخيلون هالفريق بدون هاللاعب



    وعلى وقت كاس العالم 2002 راح لمنتخبه فرنسا عشان يلعب معهم ... وبالتدريبات وقت ماكانوا يلعبون مباريات وديه ... أنــكسر هالمقرود قبل بداية الدوري .. واللي حاس أوراق المدرب وضاق صدره
    وخرب الخطط كلها ... وأثر هالشي بنفسية الفريق كله ... وكان التــأثير واضح ...ان فرنسا قضبوا الباب من الدور الاول .... وكان وقتها أكبر دليل أن زيدان هو فرنسا




    طبعا اللي ماقلته لكم .. ان زيدان معرس على وحده فرنسيه أصلها أسباني ( الله من زين النسل)
    أسمها ( طوووط) ... وجاب منها ولدين سمى الاول ( آنزو ) على مثله الاعلى اللي قلت لكم أسمه قبل والثاني سماه لوكا ... ماسمى أحد على أبوه !!




    وفي كاس العـــــــــالم 2006 .. واللي كان حاط براسه أن هالمونديال بيكون آخر مشاركة لزيدان ... كان ناوي يلتفت لعياله .. ويترك الملاعب .. وكان مونديال موب صاحي أطلق من اللي قبله ... وبالفعل لعبت فرنسا
    مثل ماعرفوها العالم .. ورجعت لمستواها ... ووصلت للمباراة النهائية اللي كانت قدام الفريق الايطالي


    الفريق الايطالي ..!!!!!!!!
    في المباراة النهائية لهاللاعب ... والنهائية للمونديال ... واللي كان يشوف هالمباراه كل العالم
    سوى زيدان اللي رجـــــع الذكريات مع المقابله اللي صارت مع أمه من أول يوم تقول
    ولدي راسه يابس
    بالفعل أثبت زيدان للعالم كلـــه أن راسه يابس .. وبالذات للأيطالي ماتيرازي بنطحــه على صدره
    زيدان النــــاطح ..
    واللي أخذ على هالنطحه كرت أحمر ... وصارت أشهر نطحــه بالتاريخ
    النطحه اللي تكلـــموا فيها العالم كلهم ... وكلن يحلل هالتصرف من راسه ... وبدى يطلع الكلام اللي قال أن المنطوح سب زيدان .. واللي قال انه تكلم على أهله .. واللي قال .. واللي قال .. واللي قال
    بس بمقابله رسمية للناطح قال ان المنطوح تكلم على أمه وأخته
    وصلت شهره هالنطحة أن البلاي ستيشن بيطلعون جبهته زيدان مصعرره !




    ولو رجعنا لأول الكلام وفي مقابلة مع أم زيدان يوم تقول راس ولدي يابس ... الله يستر لايكون جاها شي لأن هالكلمه مالظاهر أنها طالعتن عبث

    بطاقة الاحوال حقت زيدان
    الاسم : زين الدين أسماعيل زيدان
    الجنسية : فرنسي , جزائري الاصل
    مكان الميلاد: مرسيليا الفرنسيه
    تاريخ الميلاد : 23 تموز 1972
    الحالة الاجتماعيه : معرس
    الطول : 185 , ووزنه : 78

    اللي يستاهل أنه يذكر بحيـــاه زيدان
    أنه أسلم على يده خمسه من أشهر اللاعبين الموجودين بالمنتخب الفرنسي ... وانه كان محترم مع الجميع ويتعامل معهم بأسلوب مايتخيله أحد ... كلهم يمونون عليه
    وعلى حسب المعلومات اللي وصلتني قبل شوي على الجوال أنه ناوين يحج هالسنه

    ( حج مبرور مقدماً .. والله الله بالحملات السنعه يازيزو )



    قال عنه مدرب فرنسا
    زيدان لاعب لاصار ولا أستوى .. الله يرزقنا بواحدن مثله



    وقال بيكهام ( لاعب أطخم )
    هو اللاعب الاول في الملعب .. وجوده يحوس الخصم !



    وقال كارلوس ( لاعب رجله قويه )
    حسوفه والله على فرنسا .. واحدن مثل زيدان ماينسونه الحراس



    وقال رونالدو ( لاعب ضروسه كبيره )
    أذكر قال لي زيدان يوم تقابلنا بدور الثمانيه " لو هزمتني يارونالدو منيب متحسف لأنك صديقي "
    وانا رديت عليه وقلت " ياشيخ روح إلـهـي يفتحها بوجهك"



    وقال باتستوتا ( لاعب ليت كل اللاعبين مثله )
    زيدان لمعه في تاريخ الكوره ... ما الظاهر تبي تتكرر !!



    وقال سيسينهو ( لاعب مدري منهو )
    لالالا ماودي يروح زيدان ... ودي يكمل معنا


    وانتم وش تقولون ؟؟؟
    ربي اتوب اليك ,, اغفر لي ذنبي واسرافي ,, انا بريئ من كتاباتي امام الله
    وحسبي الله ونعم الوكيل


  2. ...

  3. #2
    مشكور على الموضوع
    والله الملاعب لن تجد مثل زيدان
    0.35148011796454

    ليس كل ما تراه هي الحقيقة
    sigpic167300_1[IMG]http://www5.*********/2008/01/24/10/320202153.jpg[/IMG]

  4. #3

  5. #4
    ************************

    الله يوفقكــم ..

    ومشكوريـــن ..

بيانات عن الموضوع

الأعضاء الذين يشاهدون هذا الموضوع

عدد زوار الموضوع الآن 1 . (0 عضو و 1 ضيف)

المفضلات

collapse_40b قوانين المشاركة

  • غير مصرّح لك بنشر موضوع جديد
  • غير مصرّح بالرد على المواضيع
  • غير مصرّح لك بإرفاق ملفات
  • غير مصرّح لك بتعديل مشاركاتك
  •  

مكسات على ايفون  مكسات على اندرويد  Rss  Facebook  Twitter