تعالوا معاي يا حلوين ونشوف القصة دي ..

دلجموني: خد يا صلاح.. هات لنا تشكيلة لب وسوداني من عند "برهان" ..

صلاح: وإيه لزومه؟

دلجموني: نتسلى بدل ماحنا قاعدين وشنا فوش بعض.

صلاح: مانشوف طريقة تانية نتسلى بيها..

دلجموني: زي إيه؟

صلاح: نزاكر مثلا..

دلجموني: أووه.. ما بلاش السيرة دي ..

صلاح: صدقني يا دلجموني.. ساعات بفكر في ( البلطجة) الي احنا فيها دي وبزعل أوي ..

دلجموني: يا بني آدم إحنا بننجح كل سنة..

صلاح: بالغش ؟

دلجموني: بالغش بالمش .. المهم النتيجة..

صلاح: وهي نسبة 50% بتسميها نجاح؟

دلجموني: وهما اللي بيجيبوا 99% بيستفيدوا إيه؟

صلاح:بيدخلوا كليات القمة يا سي دلجموني ..

دلجموني: والله كليات القمة دي بتفكرني بأندية القمة في الدوري المصري.

صلاح: إزاي؟

دلجموني: يعني.. أندية القمة عندنا .. لا تصلح للدرجة التانيةفي أوروبا .. وكذلك كليات القمة عندنا..

صلاح: طب وتقول إيه في الدكتور أحمد زويل؟

دلجموني: أولا : أحمد زويل كان طالبا في كلية العلوم.. ودي مش من كليات القمة..

صلاح: وثانيا ..

دلجموني: ثانيا: هو تألق بعد ما هاجر من بلده هربا من البيروقراطية والروتين والأحقاد والضغائن..

صلاح: يعني لو ماهاجرش ما كانش أخد جايزة نوبل؟

دلجموني: أنا باتصور إنه لو كان ما زال أستاذ جامعي هنا..

صلاح: كان ح يكتشف الفيمتو ثانية؟

دلجموني: لأ.. كان ح يكتشف وسيلة جديدة يطبع بها كتب وملازم للطلبة ووسيلة جديدة للدروس الخصوصية .

صلاح: معقول؟

دلجموني: وأقصى طموحه إنهيبقى عميد الكلية ، أو يسافر يشتغل في الخليج!

صلاح: طب والدكتور فاروق الباز؟!

دلجموني: نفس الكلام .. الشطارة يا صلاح إن العالم ينبغ هنا.. في بلده.

صلاح: وتفتكر العيب في العلماء يا دلجموني؟

دلجموني: لأ..العيب في العلم نفسه!

صلاح: طيب ممكن نذاكر ونلتحق بكلية الحاسبات والاتصالات ؟

دلجموني: حتى دي.. الهنود والماليزيون أكلوا الجو مننا في بلاد الخليج.

صلاح: طب ندخل كلية الإعلام ونشتغل صحفيين..

دلجموني: عمرك ما ح تتعين في مؤسسة صحفية لأن معندكش واسطة!

صلاح:يبقى ندخل كلية السياحة والفنادق ونشتغل مرشدين.

دلجموني:حنقعد في البيت لأن السياحة انضربت عشان التوتر اللي في المنطقة..

صلاح:أنا ماشي..

دلجموني: على فين؟

صلاح : رايح أجيب اللب!

مع تحيات سيد ماكسات تزكروا هذا الاسم