اسئله ممكن تسألونها أفكار ممكن تجيكم معليش تدخلون تشوفون اول
بسم الله الرحمن الرحيم
السلام عليكم ورحمه الله وبركاته
ودي أتكلم بالعاميه ( لو سمحتم )
لاحظت من تواجدي بهذا المنتدى الرائع والجميل ان عدد لا يستهان به من الاعضاء أقل من 18 سنه
وبهذا المرحله العمريه أحس مرحله التفكير بالحياه وبالمجتمع والمستقبل في أوجها
طبعا انا مو باحثه اجتماعيه ولا اي شي من هذا القبيل انا كل الي كان ودي اسويه اني اتواصل مع الي اصغر مني مو لاني اكبر ( وترى مو بكثير على فكره ) بس لان ظروفي الي عشتها خليتني اشتغل بسن صغير واكملت دراستي بسرعه بشي ما احبه ( موضوع يطول شرحه )
بس قرأت مره مقوله او حكمه ل إيلانور ان الواحد مفروض يتعلم من أخطاء غيره لانه الحياه مو طويله انك تقعد تجرب الاغلاط كلها بنفسك وتتعلم منها
فحلو الواحد يستفيد من تجربه غيره واخطائه
الفرق عندي ان احب الاسلوب البسيط الي اتمنى من خلاله اوصل فيه لداخلكم
واعتذر من اسم الموضوع خانتني كل الافكار وصار بس ودي اجذبكم
انا ما اعرف كيف فكرت فيه بس اراءكم بتحدد
توكلنا على الله
بتواجهون مشاكل تتعلق بالمستقبل
المستقبل اكيد بيد الله عزوجل بس لو تبي تبنيه من الحين اختار لك هوايه تحبها اختار شي تحس ان تحبه عشان تقدر تحط لك هدف انك توصله لا يكون هدفك المجموع وبس لاتفكر بالدرجات فكر وش تبي تسوي لبقيه حياتك
لاتنسى حلمك مهما كان ولاتقبل بشي اقل من الي تمنيته الا اذا فرضت عليك الظروف بس برضوا لا تنسى الشي الي تحبه مهما كان وفرص التعليم الحين احسن من قبل 5 سنوات ومافي فيها شي الانسان يتغرب عشان علمه بالعكس صدقوني تصقل الشخصيه والخراب الفساد موجودن بأي مكان الانسان الي يختار وهو بيده القرار
ومشاكل الثقه بالنفس
مشاكل الثقه حدث ولا حرج
ثق بنفسك مهما كان
لانك لو وثقت بنفسك فأنت بالتالي تثق بالي خلقك الي هو الله عزوجل وهو ما ينسى أحد
لاتخلي أحد يعاملك بدونيه لانها (( أحسن منك )) محد يقدر هذا الشي الا الله عزوجل
بالنسبه لي(( محد يقدر يحسسك بالدونيه الا اذا انت سمحت له بكذا)) ( اقتباس من اليناور روزفلت )
افخر بالشي انت تسويه
حتى لو ماجتك ردود فعل حلوه عليه مو كفايه انك قدرت تسوي شي
لو كنت بدين تقدر تنحف وتصحح طريقه أكلك بيدك هذا الشي وبتشعر شعور رائع بعد ما تقدر تنزل الوزن
ولو كنت شديد النحافه صحح طريقه غذائك وحاول قد ماتقدر لانك كذا تضر جسمك وتهلكه والله مايرضى بكذا
والاسلام والله علمنا أساسيات كيف نكون أصحاء
حثنا بنظافه البدن
وحثنا بالاعتدال بالمأكل والمشرب
وحثنا على الرياضه
يعني كذا بنكون عبيد صالحين كمان
الثقه بالنفس مفاتيحها كثيره وركزت على الشكل لانه محور إهتمام الاغلبيه
ومشاكل التفكير
شوفوا التفكير هذا عالم لحاله
تقسيم الادمغه
في أدمغه تفكر بالافكار وتجارب وأشياء غريبه شوي الي منها تجي الاختراعات العظيمه
وفي أدمغه تفكر وتتكلم بالاحداث الي صارت
وأدمغه تفكر بالناس ( أسميهم مجموعه قيل وقال وسوف يقول )
نرجع للتفكير ممكن ناس يكون تفكيرهم بأسئله تحيرهم ويحسون مالها إجابه وفعلا مريت بهذي المرحله لما قرأت شي كتبه اينشتاين ان اكثر شي غامض بالحياه ان كل شي ممكن فهمه فعلا وهذا الي قاعدين يسونه العلماء يكتشفون أشياء الله اصلا خلقها
وأخذت المسأله اني أتأمل بخلق الله عزوجل أكثر من أني أتساءل كيف صار فصارت عباده لاني أتدبر وأسبحه سبحانه
وانا صغيره كنت مشتركه بمجله ماجد ( يا حبيلها ) المهم كان في صفحه يسأل فيها القراء كاتب كبير يكتب بالمجله
سأل طفل من الاطفال المثقفين نوعا ما وكان اسلوبه قوي الا لما سمعت سؤاله بصراحه استغربته كان سؤاله انه هو قدر يفهم اشياء كثير ومافي اي سؤال محيره باي شي الا سؤال من أول البيضه او الدجاحه !!!
طبعا الكاتب عطاه رد قوي وأثر في كل القراء اتوقع لاني ما يصلح نقول اننا توصلنا لحل كل الغاز الكون ومابقى الا سؤال مين البيضه او الدجاجه
طيب انا بسأل من اول الديناصور او بيضته
مو انه سؤاله مو مهم بس انا متأكده هو وصل لمرحله الهوس
والهوس بالتفكير مضر لو كان مو بمحله
بس لو اديسون ما صار عنده هوس كان ما اكتشفنا الكهرباء
ولو هو ابرهام جراهان بيل كان ما قدرنا نتواصل تلفونيا
وما قدرنا مستقبلا نكتشف كثير من الاشياء الي خلتنا نتواصل الحين بشبكه الانترنت
وممكن كمان نفكر بيوم القيامه والموت
كمان مريت فيها بس كمان الافضل ان نفكر كيف نستعد لهذا اليوم أحسن مانفكر باليوم نفسه هو اننا نتذكره شي مفيد بس مانخليه هاجس لانا بكذا مانقدر نعيش فالافضل تفكر باليوم الي انت فيه وفكر كم عمل صالح سويته اليوم
وممكن الكثير يتساءل عن الحب
انا منهم صراحه واحب مرات اكتب عنه واتخيله بس كمان الحب ممكن يكون وهم وممكن يكون عاطفه كاذبه وممكن يكون استغلال عشان كذا معظم الاهالي يخافون على بناتهم وعلى اولادهم مو من الحب نفسه بس من الاشياء الي انت ممكن تسويها باسم الحب فتأجيل الحب أفضل حل والحب صدقوني مو موجود بس بحب رجل بالنسبه للمرأه او بحب أمرأه بالنسبه للرجل الحب شي أكبر من كذا وممكن يوصل لعدد أكبر وحب الله عزوجل ونبيه يتوجها كلها لو فعلا حسينا بهذا الحب بنحس بحلاوه الحب ومافي شي بنقدر نقارنه فيه لان حبهم هم بيوصلنا الجنه فكروا فيها كذا
نرجع كمان للحب
الحب لو جاء وربي كان كاتبه محد يقدر يسكر عليه الباب لو مين كان الحب مثل ما اتخليله إيطار جميل يجمع بين اثنين بين قلبين بين روحين بس لازم يجي بالطريقه الصحيحه لاتسألوني كيف الطريقه الصحيحه
لان كلنا نعرف متى يكون الصح من الغلط ولو حسينا ان الشي الي نسويه غلط خلاص تراجع عنه اتبع احساسك وغريزتك تخيل انك بغابه واغرمت بجمالها بس ساعه ماحسيت بانه في شي مخيف في شي غلط اتبع غريزتك الاولى واهرب
الصداقه
لازم تصادق نفسك اول شي وتحس انك انسان مرغوب فيه وحبوب
اذا قعدت تفكر وتقول ( طيب ليه يحبوني وش فيني يعني مميز )
مع اني متأكده ان كل انسان ربي خلقه بمميزات تميزه هو لحاله اذا مالقيت أي شي اكتفي بأن ربي خلقك وحب ان تعيش بذي الدنيا
اذا صادقت نفسك وعرفت ايش تحب وايش تكره
بتقدر تصادق أي احد بالدنيا
بس كمان الصداقه لها حدود لاتخلي الصداقه تلغى كل خصوصياتك لاتخليها تأثر عليك كليا لا تقبل تكون مهمش وتابع وبنفس الوقت بيكون عندك عدد كبير من الاصدقاء الي ماتعرف كيف صادقتهم من الاول بس مابتقدر تبعدهم وببتعود عليهم مع الوقت مع انك ماتلقى أي شي مشترك بينك وبينهم
بس احس الصداقه مثل ( القرعه ) مافي طريقه معينه تتبعها عشان تختار الصديق الممتاز
واحنا أطفال
تعرف على صديقتي بس لانها كانت قاعده جنبي !!!
والاولاد ممكن يتعرفون على بعضهم عشان لعبوا مره مع بعض كوره وصاروا اصدقاء ما ينفصلون
اكيد تتعرض الصداقه لبعض المشاكل ( مرحله المنخال اسميها)
بهذي الفتره بتترض لمشاكل واختلافات بالراي ممكن يكون صديقك الي تعرفت عليه وهو صغير وطول عمرك معه ممكن يتجه للطريق ما يعجبك بكل بساطه ممكن تطلع من حياته والحياه بتمشي لان هذا هو الصح مافي وقت للبكاء على الاطلال لانك بفتره بسيطه بتكتشف انك تقدر تتعرف على اشخاص ثانيين وبتظل ذكرياتك الجميله مع صديقك الاول لا تفكر بس بلحظه الفراق فكر بالكم سنه الي عشت معه فيها بأحلى الاوقات
ودي أكمل كمان بس ودي أشوف ردود فعلكم بالبدايه لاني حابه اتطرق لموضوع الاهل وغيرها
تشاااااووو
اضافة رد مع اقتباس
المفضلات