مشاهدة النتائج 1 الى 4 من 4
  1. #1

    أقولك شي وما تزعل ولا تاخذ على الخاطر << اماراتيه

    هذي قصة جنااااااااااان انا قرأتها بنفسي

    قبل كل الشي السلام عليكم

    كيفـــــــــــكم ؟؟

    تفضلو القصة ::::::::::::::

    للكاتبة // ذبحني الشوق


    أقولك شي وماتزعل ولاتاخذ على الخاطر!! (1)

    ((أقولك شي وما تزعل..ولا تاخذ على الخاطر..
    صحيح إني أحبك موت..ولكني معك تعبان..
    تخليني وتنساني..تعب قلبي وأنا صابر..
    وأقول اليوم يتغير..وأنا معاك أتغير..
    أدور لك سبب مقنع..وأقولك يا هوى حاضر..
    عشان الحب في قلبي..أخلي قلبي الغلطان..
    أخلي قلبي الغلطان..))
    \أنت شو قاعدة تقولين؟؟
    \\اللي أنت قاعد تسمعه
    \لكن
    \\لكن شو؟؟ والله تعبت خلاص ما اقدر أستحمل هالعيشه
    \بس أرجوج أعطيني فرصه ثانية
    \\يا كم عطيتك فرص وأنت اللي ضيعتهم..وضيعتني معاك..
    \ما أقدر أعيش من دونج
    \\ياليتني أقدر أصدقك
    \وليش أجذب؟؟
    \\لأنك أخلفت وعودك.. وطلعت جذاب..جذاب
    \والحل هو الطلاق؟؟
    \\هيه..
    \لكن طلاق مب مطلق
    \\ليش؟؟
    \مزاج..
    \\والله تعبتني معاك..خلاص أنتها اللي مبينا أنتها
    \كيف تبغيني أطلقج؟؟مش كافي المشاكل من بينا ومن بينكم؟؟
    والحين لو طلقتج بزيد الطين بله يترجع الحرب اللي بينا..
    \\كيف تبغاني أعيش معاك؟؟ وانتوا اللي سويتوا هامشكلة شوذنبي أنا؟؟ها؟؟قولي فهمني؟؟حرام عليك اللي قاعد تسويه فيه والله حرام..أنت تعرف شو كنت..كنت بالنسبه لي؟؟ دنيتي كلها تسوى الدنيا وما فيها لكن تغير أسلوبك معاي صرت تجفيني صرت ما تطيق كلامي وحتى القعدة معاي وهالشي خلاني أكرهك كثر ما حبيتك..ليش تغيرت على؟؟في شو مقصرة أنا في حقك؟؟في شو؟؟أرجوك جاوبني؟؟؟؟جاوبني؟؟
    \
    لا تعليق
    /
    طلعت من الصالة والدموع مثل النهر ينزلن من عيونها وراحت لحجرتها كالعادة
    انسدحت على شبريتها وهي تحاول تنسى شوي اللي صار هلكت عمرها وايد
    ودها تضحك لكن..نست كيف تضحك..ونست شي أسمه سعادة..فتحت مذكرتها الصغيرة اللي باللون االوردي الملفوف عليها بشريط وردي وشكلة حلو..كتبت فيه
    لا أدري..لا أدري
    إلى متى سأظل هكذا.. معلقت بين الحزن والفرح..
    أريد الفرح..
    لكن الحزن يشدني إليه بقسوة..
    هل يا ترى سيعود الفرح لي؟؟
    أم
    سأظل معلقت بين الحزن والفرح؟؟
    بعد ما خلصت ألتفت في لحافها الوردي ورقدت
    كانت غرفتها كلها وردية..عل وعسى اللون الوردي ينسيها حزنها وهمومها
    كان يحبني..يموت فيه..مايقدر يعيش يوم واحد بلياي..كل يوم والثاني قاعد عند باب بيتنا
    عقب ما تحقق مرادة وعرس..مر أول 3شهور..ألا وكل شي متغير..صار يرد البيت متأخر وأحس أنة يتضايق مني..صار يزاعق علي..يغلط علي
    سامحته مرة..مرتين..لكن يهيني؟؟مستحيل
    كنت أشوف فيه الأبو والأخو والحبيب والزوج
    لكن نظرتي له تغيرت..صار أهو الغريب..والعدو
    أكرهه..أكرهه..أكرهه..أكرهه
    .......في الماضي.......
    زايد:دانوة وصمخ
    دانة:خير؟؟
    زايد:عمي يباج في الميلس
    دانة:أبوية هنية؟؟
    زايد:لا هناك
    دانة:سخيف
    زايد:توج تدرين؟؟
    دانة:يوووه أروح أبرك لي
    وبعد ما راحت..
    زايد:فطامي وين كتاب دانوة؟؟
    فاطمة:ليش؟؟
    زايد :ما يخصج؟؟
    فاطمة:اكوة جدامك يالعمي..
    زايد:ختيه وتمونين..
    فاطمة:الحين صدق عمي في الميلس؟؟
    زايد:لا..
    وحط شي في الكتاب وسكرة..
    وأن دانة يايه من بعيد..
    دانة:زيود..ليش جذبت علي؟؟
    زايد:تصدقين يمكن تهيأ لي أنه كان يناديج..
    دانة:والله متفيج الناس قاعدة تدرس لأمتحاناتها وأنت فاضي..
    زايد:هاذي أنت قلتيها فاضي..
    دانة:فطوم دخيلج خلينا نروح غرفتج أحسن..
    زايد:أفا يا بنت عمي أنت قعدي وأنا اللي بطلع..
    دانة:خلاص ممكن تطلع؟؟
    زايد:من عيوني..
    ............................................
    تذكرت ذاك اليوم اللي كانت قاعدة مع فاطمة بنت عمها وزايد أخو فاطمة..
    كانن يدرسن لأمتحانات آخر السنه..وهي في الصف الأول الإعدادي..
    وفطوم في نفس عمرها..أما زايد في الصف الثالث الإعدادي...
    بعد ماراح عنهن لقت وردة جوري حمرا في كتابها وعرفت أنها من عندة وضحكت عليه..
    ...............أعود للحاضر....................
    بعد ساعة..
    فاطمة:دانة ....دانوة..
    دانة:هـــــــــــــاه..
    فاطمة:قومي بسج رقاد من الظهر وأنتي راقدة..
    دانة وهي تفرك عيونها:كم الساعة الحين؟؟
    فاطمة:خمس العصر..
    دانة:دقايق وبقوم..
    فاطمة:وترانا بنروح العزبة..
    دانة:العزبة؟؟ليش؟؟
    فاطمة:أبوي عازم ريال وبيسون العشاء هناك وعزم عمي اللي هو أبوج..
    وكلنا بنروح..
    دانة:الله والله ولهت على العزبة والحواطه فيها..
    فاطمة:آه بس اللي ناقص بنات عمتي وخالاتي..
    دانة:وليش ما عزمتوهم؟؟
    فاطمة:الشباب ومشغولين واللي عندها أمتحانات ودراسة..
    دانة:خلاص روحي خليني أخلص قبل لا تروحون عني..
    فاطمة:أوكي..
    دانة:ألا زايد ماشفتيه؟؟
    فاطمة:غريبة حرمه ما تعرف ريلها وين رايح؟؟
    دانة:أأأأ تراني كنت راقدة..
    فاطمة:خلاص أتصلي له..
    دانة:لا ما أبا...
    فاطمة:ليش؟؟
    دانة:ها؟؟خلاص غيرت رايي..يالله جلبي ويهج..
    فاطمة:على أي صفحة؟؟
    دانة:سخيفة..
    فاطمة:ههههههه توج تدرين؟؟
    دانة:صدق أنج طالعة على أخوج..
    فاطمة:أي واحد فيهم؟؟
    دانة:فطيم....تكفين أطلعي خليني أخلص..
    فاطمة:أوووه سوري..عطلتج..
    ...........................................
    أعرفكم على شخصيات القصة..
    سيف24سنة وهو يشتغل..
    فهد22سنة وهو يدرس في الجامعة..
    دانة20سنة..معرسة..
    عوشة18سنة ثانوية عامة..
    هدى16سنة أول ثانوي..
    .................................................. ...
    عيال عمهم..
    سلمى25سنة معرسة..
    زايد22سنة معرس..
    فاطمة20سنة..تدرس في جامعة زايد..
    شما19سنة تدرس في الجامعة وهي مخطوبة من ولد عمتها..
    التوأم وآخر العنقود..
    خليفة17سنة ..ثاني ثانوي..
    خلفان17سنة..ثاني ثانوي..
    ...............................................
    عيال عمهم..
    وهم عايشين في بدع زايد..
    سعيد31سنة ومعرس..
    عبدالله28..آخر سنة له وهو خاطب بنت عمة..شما
    أمل26سنة..معرسة..
    محمد24..يدرس في كلية الشرطة في أبو ظبي..وكل أربعاء يرد بدع زايد والجمعة يرجع لأبوظبي..
    اليازي22..تدرس في الإنتساب..
    روضة20..تدرس مع اليازي..
    ناصر18 سنة..ثانوية عامة..
    موزة16سنة..أول ثانوي..
    ........................................
    دانة لها قسم بس برى عن البيت ..في نفس الحوش للبيت الكبير ..وهو عبارة عن غرفتين نوم+3حمامات+مطبخ+3صالات..والبيت روعة وهذا بفضل دانة ذوقها وايد يجنن..اهي كانت راقدة في الغرفة المقابلة لغرفتهم..بعد ما صار اللي صار لا يمكن ترد له خلاص كل واحد وله حياته ..
    أوصف لكم البيت..
    أول ماتدخلون تكون صالة كبيرة على اليمين صالة صغيرة فيها التلفزيون ..وعلى اليسار المطبخ اللي كان مطل على حديقة صغيرة ومفتوح فيها باب زجاج اللي عبرها تقدرون تدخلون صوبها يعني أن المدخل الوحيد لها من المطبخ.. نكمل طريقنا.. وعدال المطبخ حمام وبعدها صالة صغيرة بين الغرفتين وكل غرفة بحمامها..البيت روعة وأحلى ما فيه الحديقة الصغيرة اللي زرعت فيه الرمان والموز والنعناع وزهور مختلفة الأنواع..وغيرها..فيها كرسيين وطاوله خشب الخيزران والسطح عبارة عن مشرمية خشب واللي زادها حلاة العنب اللي ملتف عليها..
    ..................................
    بعد ما تلبست راحت لغرفتهم وقعدة تمشط شعرها..ماكان طويل وأشقر..بعد ما طوته قعدت تتجحل..وكانت حاطة وايد فقمضت عيونها كلهن..
    دخل عليها زايد وهي مغمضة عيونها ما عطاها ويه وراح للحمام وهي ما حست فيه بعد ما خلصت شغلتها شافت الغرفة فوق تحت وقعدت ترتبها ..
    طلع من الحمام وهو كان ماخذ له شاور على السريع..وقعد يدورله كندوره في الكبت اللي في غرفة الملابس..
    وهي ترتب لقت سفرتة وشلتها قعدت تتأملها وقالت..
    دانة:آه فديته ياناس..وفديت ريحته الحلوة..ليش؟؟ ليش يسوي فيه جذيه؟؟؟
    والله حرام عليه حرام؟؟مايحس؟؟عديم إحساس؟؟ وين زايد الأولاني؟؟والله أنة صدق..عـــــــــــديم إحساس..
    نزلت دمعة من عيونها وهي لاويه على سفرته كان يختلس النظر من ورا الستارة حن عليها..لكن ليش هو يعاملها جذيه؟؟ليش.؟؟
    طلع لها وهو طاوي الفودة على خصرة..
    دانة:زايد؟؟أنت هنيه؟؟
    مسحت دمعتها وفرت السفرة اللي بين يديها..
    راح صوبها مسك أيديها ضمهن لصدرة وشافها بنظرات خطيرة...
    نزلت قطرة ماي من بكلته على ويهه..وخلاص هي ذابت..
    ((آه يا ناس والله يذبح يليته يعرف قدرة في قلبي...))
    زايد:دانة..آسف والله ما كان قصدي..
    دانة شلت يدينها من يدينه وتذكرت اللي صار لها:ما أقبل إعتذارك..
    زايد:والله هاي آخر مرة أرجوج..
    دانة:تأخرت أنا بروح..
    زايد:أنا اللي بوديج..
    دانة:ما أريد أثقل عليك..
    زايد:لا أنا رايح هناك وبوديج..
    دانة وهي طالعة من الغرفة:وفطوم بتروح معاي..
    زايد:هاي دومها لزقة؟؟
    بس ما سمعته لأنها طلعت من الغرفة..
    .................................................. ........
    عوشة:هداوي..هدى..
    هدى:نعم.؟؟
    عوشة:نعامة ترفسج..وين نعلي البنفسجي؟؟
    هدى:....ما أدري؟؟
    عوشة:والله؟؟ومنو البارحة اللي لابسة؟؟
    هدى:والله ما أدري وين عقيته..
    عوشة:نعم نعم آنسه عيدي ما سمعت..
    هدى:كلام الملوك لا يعاد..
    عوشة:عادال يا الكلبة..الحين تروحين تدورينهن ويا ويلج إن ما يبتيهن..
    هدى:كلبة ما غيرج..
    عوشة وهي رايحة صوب هدى اللي منسدحة تحت التلفزيون وتابع Frends في Cannel 2..وأول ماحست بها قامت تراكض في البيت..
    عوشة:وراج وراج والزمن طويل يا البقرة الضاحكة..
    هدى:بس يا عصقول الدياية ..
    عوشة عصبت ما تحب هاللقب لأتها ضعيفة وايد لا شو ضعيفة؟؟ألا معصقلة عكس هدى اللي أمتن منها بس مش متينة وايد يعني((كل خوانها ضعاف ألا هي المتينه من بينهم))..تشل جهاز التلفزيون وتفره على هدى من القهر بس أنصدمت بظهور شخص ما كانت متوقعتنة..
    فهد:آه..
    عوشة:فهــــــــــد؟؟؟
    هدى:هههههههههههههههههه
    عوشة:ضحكتي بليا ضروس قولي آمين..
    فهد:آمين..بس بلاكن صريخكن واصل للميلس؟؟
    هدى:بروح غرفتي باي..
    عوشة:هيه نسيت الجاهي على الغاز..
    وكل وحدة تعلثت لها بشي فهد وايد عصبي وما يحب الوقعة وخاصة الصوت العالي يحب الهدوء والتأمل في الطبيعة..
    وتدخل أم سيف..
    أم سيف:فهد..أنت هنيه؟؟
    فهد:هلا أميه..
    أم سيف:عيل وين أخوك وأبوك؟؟
    فهد:أبوي سبقنا العزبة مع عمي..وسيف طلع عندة شغله مهمه وراح...
    أم سيف:عيل منو اللي بيودينا؟؟
    فهد:والريال اللي واقف جدامج؟؟
    أم سيف:وينه؟؟
    فهد:لا يكون أنا للحين ياهل في نظرج؟؟
    أم سيف:هههههه لا أسولف معاك..فديتك الله لايحرمني منك وإن شاء الله أيوزك وأشوف عيالك قبل لا أموت..
    فهد:آمين.بعد عمرج طويل إن شاء الله..
    .................................................. ...........
    ahmed-fbaf93f413

    واخيرا باكـ من جديد .. biggrin


  2. ...

  3. #2
    .................................................. ...........
    وبعد كل التجهيزات..الكل ركب السيارة مع الدريول..زايد تأخر والكل ركب معدى دانة لأن السيارة ماكفتهم..يعني خليفة وخلفان وأم زايد وفاطمة وشما والخدامة ..
    ما عندها حل غير أنها تروح مع زايد..
    دانة:خلاص بروح مع زايد..
    فاطمة:أروح معاج..
    خلفان كان قاعد عدالها:لزقة عنزروت قعدي محلج..
    فاطمة :ليتك تسكت بس..يعلك تفدى خليفة الهادئ مش أنت عافانا الله..
    ((خليفة عكس خلفان هادئ ومحب ومسالم مايحب الحشرة ولا الوقعة..أما خلفان الله لا تبلانا عدواني وحشري وفضولي يدخل عمرة في أي موضوع))
    خلفان:أحترمي نفسج..
    شما:يالله عاد نروح والله مت من الحر..
    دانة:خلاص الله يهديكم ..ما أريد حد يروح معاي..
    ورجعت للبيت والكل راح تمت ترقبة في البيت تأخر وايد الكل راح وهي بروحها في البيت والساعة صارت 6 المغرب لا يكون نساني؟؟لا ياويله..
    اتصلت عليه..
    دانة:ألو..
    زايد:مرحبا الساع..
    دانة:مرحبتين..
    زايد:ها؟؟
    دانة:وين أنت؟؟
    زايد:في العزبة..
    دانة:لا والله؟؟
    زايد: ليش؟؟
    دانة:ولا شي يالله باي..
    وسكت وهي معصبة على الأخير ولا كأنه قال لي بوديج..
    وهي قاعدة في الصالة ومتضايقة تفاجأت على حد يغمض عيونها..
    وصرخت صرخة واللي برى يسمعها.
    دانة:آآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآ..
    زايد:بسم الله الرحمن الرحيم..طريتي ذنية..
    دانة:أنته؟؟
    زايد:لا هو..
    دانة:ماقلت أنك في العزبة؟؟
    زايد:أمزح معاج..
    دانة:وفر مزحك مرة ثانية...
    زايد:خلاص سوري ما راح أمزح معاج..توبة..
    دانة:الظاهر تأخرت وايد يالله نروح..
    زايد:عيل وين فطوم؟؟((لأنها قالت له بتروح معاهم))
    دانة:راحت معاهم..
    زايد:أوكي يالله..
    وبعد ما ركبوا كلهم ساكتين ولا واحد تكلم..هي((ياليتني خليت فطوم تروح معاي))
    هو((ياليتج يا فطوم ركبتي معانا))..
    شغل زايد FM لأنهم ساكتين ..طلعت أغنية لراشد الماجد..
    في عبارات العيون أشياء كثيرة تسألك..
    دمعها حكي ونداها بلل الخد الندي..
    ما قدرت أرضي غرورك وأستحيت أزعلك..
    كل ما لك وأنت تنهيني وأنا أرد أبتدي..
    دام نظراتك مدارات ورجى قلبي فلك..
    كم عن برج العرب يبعد مدى برج الجدي؟؟
    قلت تقريبا عدد ما اعشق حبك أنا..
    ما اقصد ألا أعد قصة جروحي أبعدي..
    قلت لك لا لا ترد تقول لي ما قلت لك..
    لي مشاعر ما تنام وأنت قلت لها أرقدي..
    وأنت يوم الله عطاك أحلى الوصوف وكملك..
    كيف تتركني على شطك وأنا قلبي صدي؟؟
    والله أن عروق قلبي كلها ترتاح لك..
    ليتك ألا مثل ما خذت بيدك خذت بيدي..
    كل ما ألمس يديك أتفداك وأتفدى هلك..
    ما دريت أن الهوى والعشق باللمس يعدي..
    .............................................
    رن تلفونه وقعد يتكلم فيه..لفت ويهها صوبه قعدت تتأمله..
    زايد ما شاء الله عليه جمال غير عن كل البشر ما أقول الا سبحان الله..
    حتى أنه أحلى من دانة..عيونة السود الواسعات حياته المقرنة خشمة الطويل شفايفه الورديه لحيته الخفيفه شعرة الأسود الناعم..
    فجاة كان لاف ويهه يدور قلم تفاجأ أن دانة كانت تراقبه حس بشعور ثاني شعور يديد حس أن هاذي الانسانه تموت فيه ولا يوم بتتخلى عنه..
    هي استحت وغدن خدودها ورديات ولفت ويهها على طول..
    وشوي أنهم واصلين ونزلوا يسلمون..
    .....................................
    فهد كان مركب عوشة وراة في الدراجة ويركبها النقيان والجو روعة مغيم وبراد..
    البنات فاطمة وهدى وشما قاعدات يرقبن دورهن..راحت لهن دانة بعد ما سلمت على أمها ..
    دانة:هاي صبايا..
    هدى:يامرحبا والله عد ما حبات التراب علىالأرض..
    دانة:الله الله هداوي صارت شاعرة من متى؟؟
    هدى:من أول ماشفت هالحلاة والجمال اللي جدامي..
    دانة:شوي شوي شو خليتي لفطيم؟؟
    فاطمة:ولا شي..
    هدى:والله تولهت عليج يعني أفداج وأتفدى الأرض لي تمشين عليها..
    فاطمة:لا أنت مش هدى قبل شوي غير والحين غير؟؟
    دانة:أكيد عويش مغثثتنج في البيت ؟؟
    هدى:هي والله ..بس لو تدرين اليوم شصار..
    دانة:الله يستر اليوم أشياء وايدة صارت في حياتي..
    هدى وفاطمة وشما:خير شو ستوى اليوم؟؟
    دانة:بسم الله يالفضوليات..ما شي..
    هدى:كانت عويش تدور نعالها البنفسج.......
    وقعدت هدى تعيد السالفة لدانة وشوي ألا فهد ياي ومعاة عوشة وهي شاقة بالحلج من كثر ما أستانست..وزايد كان بعد ياي..
    تقوم دانة وتسلم على أخوها..
    دانة:الله يالله الحين دوري..
    هدى:أستريحي محلج دوري..
    دانة:ما يخصني الكبيرة أول..
    هدى:ما اريد ما اريد..
    فهد:دانوة هاذوه ريلج خليه يركبج..
    دانة:شو؟؟
    زايد:في دراجة ثانية؟؟
    فهد:هيه الخربانة قبل أسبوع يايبينها عند الصلاح وهي جاهزة شغلها وركب
    Yoer Waif
    وراح لأن هدى راكبة وراه..
    بعد ماشغلها ونادى دانة..
    دانة:لا خلاص كنت أمزح..
    شما:خلاص عيل ركبني بدالها..
    زايد: لا دانة أول وعقب أنتن يالله دانوة عشان خاطري..
    فاطمة:حرام عليج شغلها على شانج..
    ((حرام عليكم ما ريد والله خلاص))
    واستسلمت للأمر الواقع وركبت..طبعا لازم تلوي عليه عشان تتقبض عن لا تطيح.. وهي خلاص ودها تنزل ما تريد تنحط في هذا الموقف.. دار بها كم دورة وركبها النقى شدة بيدينها عليه وضمته أقوى خافت أنها بطيح مع أنها تحب هالشي بس مع زايد؟؟؟؟
    وأول ما نزل خففت من شدة يديها وأول ما نزل في نفس اللحظة أهتزت الدراجة وضرب خشم دانة في ظهر زايد وهي خلاص عورها خشمها+راسها..
    وأول ما حس بها وقفوا..
    زايد:ها شي صار لج؟؟
    وشاف دانة ما سكة خشمها والدم يصب منه..
    زايد:آسف..يعورج؟؟
    هزت راسها:لا ..
    زايد:خلاص يالله ركبي بنرد..
    دانة:هاذية أنا راكبه ((وهي ما سكة خشمها عشان ما تخيس))
    زايد:لا جدامي..
    دانة:جدامك؟؟ مستحيل..
    زايد:دانوة أستهدي بالله نحن بعيد شوي عن العزبة مش قراب وأخافج تطيحين..
    دانة:مش شوي شوي..
    زايد:الحين المغرب والدنيا بتظلم..يالله يا بنت الحلال..
    دانة:أمري لله..بعد ما ركبت جدامة ركب وراها وهي قابضه على خشمها وشكلها يضحك..شغل الدراجة ومشى..
    ((يا ترى هو يحسبيه؟؟أكيد لا..لكن قالي خايف عليج..أكيد يحس...آه يا زايد ليتني بصدقك ورد الثقة العمياء اللي كنت واثقة وايد منك..وبترد علاقتنا مثل ماكانت..
    آه يادنيا هاذا الشي الوحيد اللي أريدة منج بس نرد لبعض .....هذا الطلب وايد عليج؟؟))..
    وبعد ما وصلوا أن الكل يصلي وعوشة وفاطمة عدهن يلعب بالدراجة...نزلت دانة وراحت تنظف خشمها بند الدراجة وراح يتوضأ للصلاة...
    وبعد الصلاة أجتمع الكل برى الخيمة حول الضو والقمر طالع والرياييل في خيمة الرياييل بعيدة شوي عن خيمة الحريم..الكل يسولف ومستانس ما عدى وحدة شكلها شاله هموم الدنيا كلها على كتوفها..
    أم سيف:بنيتي بلاج؟؟
    دانة:ها؟؟هلا أميه..
    أم سيف:هلا؟؟أقول بلاج..
    دانة:لا كنت أسمع سوالف هدى..
    أم سيف:عليه؟؟
    دانة:لا والله ماشي..
    وتتدخل هدى:شبلاكن تتصاصرن؟؟
    عوشة:دزت فيس من طبايع التيس..
    هدى:والله ما لج خص فيه..
    عوشة:الواحد يعقل يوم يكبر وأنت العكس..
    هدى:أميه طالعيها من الصبح وهي تسب وتواقع..
    أم سيف:أنا ما أقول غير الله يعيني عليكن متى بيوزكن وبفتك؟؟
    دانة:ههههههههه الله يهديج يا أميه مستعيلة..
    أم سيف:والله دوم وهن يتواقعن ولا مرة شفتهن يسولفن ويضحكن مع بعض..
    عوشة:عاد هي اللي قليلت الأدب..
    هدى:أنـــــــــــــــــــا؟؟
    عوشة:لا يدتيه..
    هنيه عصبت هدى ودها تقوم وتفش غيضها في عوشة..بس استحت لأن الكل موجود..ما استحملت وطلعت برى عاد هي سريعة في مشيتها إذا كانت معصبة ..
    توها طالعة..ألا وداعمة لها حد..
    هدى:أف ما تشوف جدامك..؟؟
    خليفة:آسف..
    هدى:ها..((أول ما انتبهت أنة خليفة استحت))
    هدى:أنا اللي آسفه ما دريت أنك أنته..
    خليفة:لا عادي..باين أنج معصبه؟؟
    هدى((ما تحب حد يتدخل في خصوصياتها)):ما يخصك..
    خليفة:سوري يا الشيخة الظاهر أني غثيتج بسؤالي..
    وكمل طريقة للداخل أما هي حست أنها زودتها شوي معاة..
    ((الظاهر أنه تضايق..خلني أرقبه وأول ما يطلع بستسمح منه..))
    أول ما طلع نادته..
    هدى:خليفة آسفه..والله كنـــ..
    يقاطعها:لا عادي ...
    تقاطعة:لا والله كنت معصبة وما أعرف شو أقول و.....
    يقاطعها:أقولج لا تبررين موقفج عادي..
    تقاطعة:بس أحس أنك حطيت بخاطرك..و...
    يقاطعها:خلاص أقبل أسفج المهم تأخرت على الرياييل بودي لهم العود تلاقين زايد معصب علي أدعيلي يمكن يجتلني..
    هدى:هههه الله يعينك..
    ....................................
    وهنيه كل واحد كمل طرقيه هدى لخيمة الحريم وخليفة لخيمة الرياييل وكل واحد فيهم يغني ويضحك بروحة ويسولف..

    ان شا ءالله تعجبكم

  4. #3
    لهذي الدرجة مب حلوه

    بكمل .. بس على الأقل القى رد واحد واحد بس

  5. #4
    حلــــــــــــــــــــــــــــــــــــــــــــــــ ــوه
    انتظر التكمله
    وتقبلي مرروري
    get-2-2007-h5snfwg4

بيانات عن الموضوع

الأعضاء الذين يشاهدون هذا الموضوع

عدد زوار الموضوع الآن 1 . (0 عضو و 1 ضيف)

المفضلات

collapse_40b قوانين المشاركة

  • غير مصرّح لك بنشر موضوع جديد
  • غير مصرّح بالرد على المواضيع
  • غير مصرّح لك بإرفاق ملفات
  • غير مصرّح لك بتعديل مشاركاتك
  •  

مكسات على ايفون  مكسات على اندرويد  Rss  Facebook  Twitter