مشاهدة النتائج 1 الى 19 من 19
  1. #1

    ليالي صيف جدة غير

    1981387-Jeddah-Jiddah

    الجازي : (19سنة)
    جمانة: بنت عمها (21سنة)
    محمد
    زياد: اخو الجازي الصغير (15 سنة)
    ابو مازن : ابوها
    ام مازن : امها
    رهام : بنت عمها صالح الصغيرة (14 سنة)
    مازن : ولد ابو مازن البكر
    صالح: عمها ابو جمانة ورهام واسامة
    اسامة : ولد عم الجازي الكبير ولد ابو صالح
    هنادي : بنت عمتها (13 سنة)
    خرجت من الاستراحة علشان تشيك على جوالها إن كان احد اتصل عليها ولا لا واضطرت علشان توصل لسيارتهم الجمس الزرقاء انها تعدي من كذا شلة شباب قعدوا يطالعوها بنظرات ازعجتها بس مااهتمت فيهم
    وصلت السيارة لشنطتها وطلعت الجوال واخذته معاها راجعة للمطعم الي في اهلها وهي ماشية تشيك على الجوال الا حصلت صحبتها مسويتلها 5 مس كول اتصلت عليها مو مهتمة انها حولينها شباب في طريقها :
    • الو صالحة.
    • الو.......
    • ايوا صالحة.
    • الو.......
    • ايوا يابنتي ايش الدوشة دي الي عندك.
    • انا موصالحة.
    • ها؟؟؟ انتي امل ؟؟؟مها؟؟ ايش دي الدوشة؟؟ ترى مني سامعة شيء.
    وطبعا وهي ماشية لا اراديا صارت تتكلم بصوت عالي نسيت انها حولينها شباب.
    انقطعت الشبكة بدون ماتقدر حتى لا تعرف دي صالحة ولا امل ولا مها..
    • اوف.
    خرجت بنت عمها جمانة وقابلتها عند باب المطعم بعد ماغسلت يدها ولحقتها علشان يدوروا شويا في الاستراحة على بال ما الاهل يخلصوا
    • فين رحتي لحالك يااختي مو شايفة الشباب قدامك؟(وحاطة يدها على خصرها)
    • ماهمني فيهم خليهم ينقلعوا ( رفعت يدها ترميها وراء كتفها باستهتار) اقولك خلصتي؟ تعالي نمشي شويا .
    • طيب يلا اصلا انا خارجة ادورلك علشان كدا.
    • نروح السقالة
    مع انهم لاحظوا ان دخول السقالة كان مستحيل لانوا خشبات ارضيتها الامامية كانت طايحة في البحر
    • يلا اصلا انا كنت ابغى اروح هناك
    شكت ...كيف بنت عمها تبغى تروح هناك وهي من طقة الدلع والمرقعة ياااي!! ويييي!!! حتى انها جية استراحة بكعب عالي ومناكير ومكياج كامل وسيشوار وهلليلة!! صحيح هما الاثنين لابسين جينز لكن هي لابسة فوقوا بلوزة رياضية زي حقت اخوانها وبنت عمها لابسة فوقوا بدي اسود وبعدين لافة حولينها زي الشال ملفوف في رقبتها من فوق وينزل يلتف حول جسمها من تحت لركبتها منه استر وشياكة في نفس الوقت.
    واستغربت حتى انها سبقتها ونطت بكعبها العالي ووصلت للطرف الثاني من ارضية السقالة قبلها وبعدها نطت هي وقعدوا يمشوا علشان يوصلوا لنهايتها.
    • ليش مايصلحوها مالت عليهم غصبنها فاضية محد فيها والله كنت حطيح
    • ايش دا؟
    طالعوا في البحر
    • في سمكة
    • كبيرة
    • شوفي سمكة قرش
    • شكلها سمكة قرش بس صغيرة
    • ايوا لساها صغيرة
    وبعد ما لاحظوا خيط صنارة مدلدل ومربوط نهايته في السقالة
    انتبهوا ان سمكة القرش صارت تسبح لفوق كانها انتبهت لهم
    ابتعدوا لا اراديا ...
    • انتبهي ترى سمك القرش ينط من المويا
    ورجعوا لوراء ..ومالحقوا حتى يستغربوا لانهم حصلوا السمكة فعلا نطت وصارت عندهم على ارضية السقالة تتحرك
    وبدون صريخ او صوت...حاولوا يبتعدوا عنها ... رغم انهم لو كانوا شافوا صرصار او فار كانو ملوا الدنيا صراخ وزعيق ....لكن لان الانسان لمن تكون حياته على المحك يبدا يتصرف بطريقة يستغرب فيها هو من نفسه...
    صاروا يمشوا يحاولوا يبتعدوا عن السمكة الي بدات تتحرك في اتجاههم وكل ما ابتعدوا عنها اكثر هي وراهم رغم انها مو في المويا بس تتحرك تحاول توصلهم وهم يبعدوا وكل واحدة مستغربة انها لسه رجلها ماصارت في فم السمكة
    • (بصوت واطي وهادي ) انتبهي تعضك ترى عضة سمك القرش مسممة...
    طالعتها بنت عمها بخوف في جزء اقل من الثانية ووجهها كان يمثل العذاب بنفسه
    لين ماوصلوا لنهاية السقالة ومايدروا كيف صاروا على الارض بس هي برضه وراهم حصلوا نفسهم دخلوا في غرفة مفتوح بابها جنبهم حسبوها اول مرة مستودع لكن دحين حصلوا فيها ادوات صيد وتقريبا شبه مطبخ وشبه مكتب وكانت ريحة السمك تفوح منها... اكيد انها تابعة لمطعم الاستراحة.... يستخدمها العمال لتقطيع السمك وتنظيفه وتحضيره للطبخ والبيع.......
    استغربوا انو السمكة رغم كذا لساها وراهم....... راحوا للمكتب في الزاوية يحاولوا يخلوه حائل بينهم وبينها وطلعوا فوقه ورفعوا رجولهم عن الارض لكن ويااللغرابة السمكة صارت تحاول توصلهم تدور لهم طريق من خلال رجول المكتب..
    افتكرت ...... ساعتها ان سمك القرش نسبة ذكاءه عالية جدا وافتكرت فيلم deep blue sea وخافت هل حتصير نهايتها زي نهاية بطلة الفيلم في بطن سمكة القرش او رجلها او راسها لانها كانت خايفة انها تنط على راس واحدة فيهم حاولت علشان كدا تدور حائل تخبي فيه راسها هي وبنت عمها ما حصلت الا مخدة صفراء كبيرة بس لمن لاحظت مناورات السمكة من تحت رجول المكتب علشان توصلهم صارت تحطها في وجهها وهي خلاص اعصابها اتوترت وعصبت وطفشت من الحالة الي صارت فيها وفكرت يالطيف مافي احد شايفهم ولا انتبهلهم كل دا الوقت لا اهلهم ولا الشباب الي الله يخرق عيونهم كانوا يراقبوهم بعيون زي الصقور.... فينهم دحين؟؟
    بنت عمها جنبها صارت تبكي ....و هي انقهرت وعصبت ...خلاص متى حينتهي هذا العذاب؟؟ متى ؟؟؟ رغم انها اصغر من بنت عمها استغربت القوة الي صارت فيها وهي تحاول تمنع السمكة تدخل عليهم من تحت المكتب بالمخدة صار يتهيى لها انو السمكة صار لها ايدي وانها وقفت قدامها تطالعها بنظرات شريرة ومسكت المخدة منها تحاول تبعدها : هاها ها

    ها طالعت باستغراب !!!!!!
    مين يضحك ؟؟
    رفعت عينها حصلت واحد قدامها مااستوعبت ايش بيعمل بس صارت تطالعه بصدمة مافاقت منها الا هو قدامها يقولهم:
    • خلاص خلاص لاتخافوا
    فكرت (ايش لاتخافوا ايشبوا دا يستهبل) ماكانت تدري انها شكلها فكرت بصوت عالي الا لمن سمعتوا يقول
    • خلاص بعدتها ماكانت حتقدر تسويلكم شيء مدام انتو مبعدين رجولكم من الارض اصلا هي لسه بيبي (ويطالع السمكة المحبوسة في السلة كانوا يطالع فعلا بيبي)
    • .......... (ماقدرت من القهر ترد الله ياخذك مو حاسس بالعذاب الي مريت فيه انا وبنت عمي)
    • مدري ايش جابها هنا احنى مصطادينها من زمان بس رابطينها كل شويا نطلعها ونرجعها في المويا لمن نحصل العمال مشغولين (ويطالعها بفخر)
    • (اهااااااااا!!!افتكرت حبل الصنارة الي شافته مربوط في السقالة) طبعا وماهمكم لو جاءت ونطت على احد وعضتوا (صارت تصرخ عليه بقهر)
    اكتر شيء تكرهه في حياتها الشباب لمن يتصرف بعدم كفاءة طبعا يروحوا يصطادوا مايدروا ينفع ما ينفع المهم كل واحد يستعرض عضلاته على كله
    • (طالعها الاخ باستغراب من رفعة صوتها) يااخت نحن رابطينها في نهاية السقالة وان كان فكت نفسها جاتكم لهنا ترى دا مو ذنبنا
    • هي مو جاتنا لهنا من نفسها (خلاص وصلت معاها انقهرت من برود اعصابه كانت تبغى تسمع منه رنة تعاطف لها ولبنت عمها وانفجرت وهي واقفة فوق الكرسي ) هي من هناك فوق السقالة (وتأشر باصباعها ناحية السقالة) نطت علينا ولحقتنا لهنا فاهم يااخ وبسببك يمكن كنا انا ولا بنت عمي في بطنها دحين... بس علشان حضرتك محسبها البوبيت حقك ...رابطلي اياها كمان .
    • (رفع راسوا يطالعها مستغرب من رفعة صوتها ايشبها دي) اصلا مافي غير المجنون الاهبل الي ماعندوا ذرة عقل راح يطلع فوق سقالة الله العالم بحالتها يعرض نفسه للخطر (ويطالعها من فوق لتحت باحتقار وهي واقفة فوق الكرسي حاطة يدها على خصرها وبنت عمها المسكينة جنبها من اول منكشة على نفسها مانطقت ولا كلمة)
    • (بصوت اعلى واستهزاء) والله من بعض ماعندكم اجل انت بكامل عقلك رابطلي سمكة قرش بخيط صنارة صيد عادي
    • خلي عنك السمكة ...خلي عنك الصنارة... وانو نحن رابطين السمكة... علشان تجي تأكل جنابك ... وجودك هناك غلط ... بينا ولا بغيرنا ...كنتي معرضة نفسك للخطر انو أي مصيبة تجيلك...(يحاول يرفع صوته علشان يوازي طبقة صوتها مدري تحسب نفسها مين )
    • اوكي انا موافقة أي مصيبة تانية لكن مو سمكة قرش تأكلني
    • انتي ماتفهمي ؟؟؟ حتى لو مو نحن رابطلك السمكة هناك كان ممكن يصير نفس الشيء
    • لا يااخويا مو ممكن لانو سمك القرش ما يوصل لهناك
    • (مصيبة مايفوت عليها شيء) بيتهيئلك (خلاص طفش واخرتها معاها دي) سمك القرش الصغير ممكن يوصل لمياه ضحلة وياكلك حتى لو انتي قاعدتلوا على البيتش
    • (بقهر مسكت يد بنت عمها ووقفتها ونطت من فوق الكرسي على الارض قداموا وعينها في عينوا بتحدي) لا مو ممكن
    ومشيت من قداموا وهي تجر بنت عمها وراها الي كانت تطالع السمكة بخوف بعد ما انخمدت حركتها

    كان جسدها لازال يرتجف من جراء قسوة الموقف وربما ما كان يبين عليها ظاهريا لانها ماحاولت تزيد الوضع سوء على المناحة الي سوتها بنت عمها التي نجحت ببراعة على استقطاب اهتمام كل العائلة بسبب الانهيار العصبي الذي انتابها بعد ان ارتمت في احضان امها اول ماوصلت لها ...على كل حال هذه ليست طريقة الجازي بالتنفيس فهي من عادتها بعض الاحيان اذا ما استفزها او احزنها شيء ان تصب عليه كامل غضبها وسخطها وساعتها لا يمكن التكهن بردة فعلها لفين ممكن توصل زي مااحصل قبل شويا مع منقذهم المزعوم ... او تسكت وتبربر وتتحرطم ...وفي كل الحالات يفضل تجنبها.... طالعت الجازي بسخرية مرة تانية لبنت عمها المنهارة في يد امها معجبة ببراعتها في شد الانتباه ...لدرجة اجبرت الجميع علشان خاطرها يكنسلوا بقية التمشية ويؤضبوا اغراضهم في سياراتهم علشان يتسابقوا في الرجوع لجدة...


  2. ...

  3. #2
    "ناكرات الجميل...."
    كان لا يزال حاقدا عليهم بعد ان عاد لاصدقائه وشاهد معهم انسحاب العائلة المؤسف من جراء حادث ما اصاب واحدة من بناتهم .كان اصدقائه يتسألون عن ما اصاب الفتاة الجميلة الشقراء الي اعجبتهم ولكنه لم يحاول جاهدا ان يزيد معلوماتهم ....كان جزء منه بتمنى لو انه يرى نفس الدموع في عيون تلك القوية الوقحة المسترجلة التي مرت من امامه واصدقائه بكبرياء ولم تعره ولو حتى نظرة ...استغرب تلك القوة في عيونها وملامحها... استغرب انها حتى لم تحاول تجنب نظرات الشباب كبقية بنات عائلتها ...رحلت مع عائلتها وهو مستشط كان يتمنى لو حتى نظرة احتقار من ذلك الوجه البارد الخالي من المشاعر تعبر فيه عن معاناتها " صحيح لوح..."
    • ها..!! (سأله صديقه الي جنبه عندها اكتشف انه كان يفكر بصوت عالي)
    • لا ولا شيء . (وبدون ندم صار يتخيلها في اسوء المواقف واصعبها الي تبكيها دم بدل الدموع ...)

    " عمى في ديك العيون " في السيارة الجمس الزرقاء المتجهة لجدة .
    سبحان االله رغم اعتقاد الاخ ان الاخت ما عبرته بنظرة الا انها كانت شاعرة بوجوده بكل حواسها واتجددت مشاعر الحقد اتجاهه واجبرت نفسها بصعوبة انها ما تروحله تمسك في خناقه وتحبس انفاسه .. و كأنه كان مدبر الموقف بنفسه عامدا متعمدا ....غمضت عيونها بقهر وفتحتها لتجد امامها رأس نفس سمكة القرش التي بدأت تحرك شفتيها:
    • غرغرغرغر !! انا بوسيدون ... اله البحار والمحيطات .. اين الفتاة التي كانت ستقدم لي على العشاء اليوم..... (كاااااااااخ ..كف على وجه اخوها الصغير زياد الي كان يحاول يستخف دمه... الي مل من طول الطريق وخطف سمكة قرش صغيرة اشتراها ابوه من الاستراحة وانتهز انها غمضت عيونها و ....... اتفاجأ بالكف والبكوس التي تلته )
    • وجع في شكلك ياحمار.
    • وبعدين معاك انتا وهي ياولد ......ماتهجدوا دحين؟؟ تحسبوا نفسكم لسه بزورة صغار !! ايش سبتوا لاولاد عمتكم وعمكم؟؟ (ابو مازن بدا يصرخ عليهم)
    • هو الي بدا يا بابا
    • كنت امزح معاها.
    • انكتم ..(وطراااخ على راسه وتبدأ المضاربة من جديد )
    • بااااااااااااس .....والله لو ماهجدتوا ...لاوقف وانزل اوريكم شغلكم.
    • (ام مازن متسلية وتأكل فصفص) لا ايش توقف الله يخليك ...مافينا على الحر ...كمل طريقك ...وفي البيت وريهم الي تبغى توريهم اياه
    • الله على الام الحنون ...هادا بدال ما تهديني وتمتصي غضبي ... تحرضيني على اولادي
    • ياابويا ما تحتاج تحريض .... هما من نفسهم يحرضوا الي مايتحرض ...ثم مافيها شيء لو مرة من نفسك ربيت عيالك ... جرب شويا الي انا بعانيه معاهم كل يوم.
    • افا .....حشا امنا الغولة انتي مو ام....عناد فيكي مني موقف ولاني ماد يدي على واحد فيهم....انشاء الله يدي تنقطع قبل مااسويها (وابتسملها بغيظ يبغى يقهرها)
    • (سكتت تطالعله بنفس نظرته واخيرا قالت ) بعد الشر عليك
    هذا الحوار بين الابوين كان الخلفية الصوتية لمشهد آخر في الخلف بين الاخوين الي كانوا يتوعدوا بعض بنظرات عيونهم ..قطع هذا الحوار صوت جوال زياد
    • نعم ايش تبغي ؟؟ (رد زياد على بنت عمه رهام الي تصغره بعام)
    • الناس يسلموا اول ..
    • ماكانو دوبي كنت معاكي ... مني مسلم ايش تبغي تسوي؟؟ (بتحدي يبغى يقهرها)
    • انقلع كيفك...المهم نحن قاعدين نلعب انسان حيوان جماد ...تلعب؟؟
    • نعم يا اختي؟؟!!
    • اللعبة الي كنت تلعبها معانا زمان لمن كنا صغار وما تلقى احد يعطيك وجه وتجي تترجانا نلعبك معانا ...
    • هيا بس انكتمي بلا هرج فاضي ....مني لاعب لازمان ولا دحين ..(وكأنه استوعب شيء فجأة ) ثم تعالي كيف تبغي تلعبي معايا وانا في سيارة وانتي في سيارة ؟؟
    • عادي انا في سيارة بابتي وانتا في سيارة بابتك وهنادي في سيارتهم ...(وكأنها تفسر) والي يخلص اول يتصل على التانيين ...اجل ليش في يدك جوال زينة؟؟ (تتريق)
    • لا وانتي الصادقة علشان اكسره على راسك....... (ويبدا مضاربة كلامية مع بنت عمه الي هي الاخرى ماقصرت معاه لين قاطعهم ابوه وهو يصرخ عليه)
    • وبعدين معاك ؟؟ انتا ماتبغى تهجد.. اشوفك ماخليت ولا بقيت احد الا ومتضارب معاه ...(وخلاه يقفل في نفس الوقت الي اجبر ابو رهام بنته انها تقفل عنه لمن احتد النقاش)
    • انتا منتا عارف ايش كانت تبغى ياابويا ....تبغاني العب معاها انسان حيوان بالجوال ...دحين الجوال اخترعوه للضرورة ولا للتفاهات حقت بنت اخوك؟؟
    • (قاطعته اخته وفي وجهها ابتسامة شماتة علشان ابوها صرخ عليه) وانتا ايش دخلك ياافلاطون زمانك .. ماعجبتك الشغلة قفل في وجهها ...
    • انكتمي انتي ...
    • لا تصرخ على اختك ...شكلك ماحترتاح الا لمن اوقف من جد و.....( وتدارك فجأة ايش قاعد يقول وطالع بسرعة على زوجته الي تمضغ لبان وهي تطالعه بنظرة سخرية حنونة ) يؤؤؤؤ!!! (وفجأة رن تلفونه) الو ..هلا مازن ابويا ؟؟
    • السلام عليكم ابويا (مازن بكر ابو مازن)
    • وعليكم السلام ابويا
    • اقول ابويا ..ياريت توقف على جنب ترى غيرت رأيي ابغى اجي معاكم البيت اغير ملابسي وبعدين اروح للشباب...
    • خلاص زي ماتبغى
    • ها!!! لحظة ابويا !! (يكلم احد عنده) ابويا جمانة تقول خلي الجازي تجي معاهم وبعدين انا ارجعها معايا
    • خلاص طيب ....بس هي كيفها دحين؟؟
    • طيبة ماعليها ....يلا جيكم دحين...خلي الجازي تنزل تجي هنا بدالي...

    jeddah_01

    وتوقف السيارات وعلى مضض نزلت الجازي لكن سمعت كلام ابوها الي قالها معليش علشان بنت عمك..
    • لاتقفلي جوالك على طول ادقلك وتنزلي سامعة...(قالها اخوها لمن قابلها بين السيارتين)
    • (بطفش وبصوت واطي) انقلع ...
    • نعم يااختي؟؟
    • (طفح بيها الكيل) ولا شيء..
    • (بتحدي وحط يدينو على خصره) اه بحسب قلتي شيء .. يلا ..انتبهي على نفسك..
    • (بطفش الدنيا كلها) انشاء الله..(وركبت سيارة بيت عمها صالح وجلست جنب بناته جمانة ورهام ) السلام عليكم
    • (ردو الكل عليها) وعليكم السلام...
    وقعدوا كل مين يقر على راسها بس هي مو معطية لهم بال مقهورة انها تساق من مكان لمكان بدون محد يأخد رأيها علشان خاطر بنت عمها الدلوعة.. وبعد مايأسوا البنات انها تتجاوب معاهم انصرفوا كل مين عنها رهام رجعت لجوالها تكلم بنت عمتها هنادي في السيارة التانية اما جمانة فكانت مضطرة تستمر في التظاهر بالمرض بعد الانهيار الي صابها في الاستراحة... حاولت الجازي ترجع تسترسل في افكارها وبؤسها على نفسها لولا صوت فوزي محسون الي كان يصدح من مسجل سيارة عمها الي منسجم يغني معاه ...ومو معتبر لحد راكب معاه اعتبار ... (منطرب الاخ) استغربت الجازي كيف الواحد يكيف على هذا النوع من الاغاني (ماتنلام الاخت من جيل اليسا ونانسي عجرم) واستغربت اكثر انو مرت عمها فكرت مثلها في نفس الوقت...
    • طيب يااخي وطي على صوت المسجل شويا خلينا نستمتع شويا بصوت الكروان ... (بسخرية)
    • تتريقي ؟؟!!!
    • لا استخف دمي .. بس يااخي اعتبر للي معاك في السيارة اعتبار .. انا هنا انسدت اذني ... والبنات الله العالم بيهم ...وولدك المسكين قالك تعبان يبغى يريح علشان طلعة الليل مع اصحابه ..وسبلك الدركسون وراح ورا ينام ... ولا علشان انتا محد يقدر يكلمك تحسبني انا كمان حسكت لك ...
    • (يظهر صوت اسامة من الجزء الخلفي من السيارة الجيب من بين الاغراض الكتير الي يستغرب ان يتواجد انسان بينها ) الوالدة لاتتكلمي على لساني انا مو منزعج من الوالد ... انا نايم ومرتاح ومكيف ... بس انتي لا تقومي علينا الحكومة...
    • (وتحط رهام يدها على مايك الجوال وتقول) ولا انا ياامي مني متضايقة خلي بابتي ياخد راحتو...
    طالعتها امها بقهر من اولادها الي فشلوها قدام ابوهم ...وطالعت جمانة والجازي كأنها تقولهم " ها عندكم شيء انتو كمان تبغوا تقولوه " بس هما انحرجوا من نظراتها ونزلوا عينهم وهما ساكتين...
    • (ابو اسامة نافخ صدره وبستهزاء) شفتي ... تحطي نفسك في مواقف بايخااااااة ....(ويكمل فوزي محسون ) من بعد مزح ولعب وفرح حبك صحيح ...
    فكرت الجازي ماشاء الله الخير عندنا وعندهم ... عمي صالح عنده المناقرات شغالة زي عندنا ...سبحان مين خلقهم اخوان ابويا وعماني ...لكن الحمدلله اطيب من الطيبة نفسها ... الناس كلهم يحبوهم وهما يحبو كل الناس... ويحبو بعض وعمرهم ماقاطعوا بعض بعد وفاة الجد والجدة... فمع انو من المتعارف انو الاخوات البنات هما الي دايما يلموا ويجتمعوا لكن ابوها واخوانه واختهم الوحيدة كسروا القاعدة المتعارف عليها ....فما كانوا يصبروا عن بعض.. ولا ينقطعوا عن بعض ...سواء في اجماعاتهم في بيوتهم مع اولادهم او خرجاتهم زي خرجة اليوم ... واتنهدت وفكرت ...الحمدلله ...الله لا يغير علينا حال ...وكانت حتغمض عينها وترجع راسها لوراء لمن سمعت فجأة صوت انفجار ... ورجعت فتحت عينها لتجد امامها منظر لسيارة جمس زرقاء .... انحرفت عن الطريق العام وهي تتقلب وتتدحرج.... سلبها هذا المنظر بحيث لم تستوعب أن سيارة عمها بدات تخفف سرعتها.. عندما دعس عمها المذهول على الفرامل التي جعلت العجلات تفحط على الطريق محدثة صوتا فظيعا ... ولم تشعر بها وهي تتوقف...... ولم تسمع صرخات زوجة عمها وبناتها ......كان تشعر بمفعول المخدر يجري في عروقها .. كانت وكأنما تشاهد مشهدا في فيلم بالحركة البطيئة.. عقلها لم يكن يستوعب غير امر واحدا .. يتكرر تكرارا في رأسها الان ...كان من المفروض ان اكون في تلك السيارة .....

    "اوووففف !! ايش دي الزحمة!!"
    • شكلو حادث ...
    • ننزل ؟؟
    • فين تنزل ؟؟ فين ؟؟ ناقصتك هي كمان؟؟ يعني الامم دي كلها والشرطة والاسعاف مستنينك تجي تفزع ؟؟؟
    • طيب خلاص ماانتبهت لسيارة الشرطة...
    • كشفات الديسكو في الظلام دا كله ما انتبهت لها ...ها ؟؟ (بسخرية )
    • قلنا خلاص (بعصبية) تراك طفرتني ... ترى مو انتا بس الي تعبان وزهقان حتى انا ...بس الناس للناس وانا عالطول فكرت لو كان احتاجوا مساعدة ولا شيء ...اتخيل لو كانوا اهلك...
    • طيب خلاص يا كوفي عنان .. روقنا بسكاتك ..كفاية عليا زحمة الناس الي مايصدقوا يصير حادث علشان يشبعوا عقدة الشهامة الي عندهم زيك ...(وسكت وهو عارف انو صاحب عمره ميت قهر منه ومن قلة انسانيته لكن هو حاسس انو تعب شغل يوم كامل تحت الشمس طاح عليه فجأة وماله خلق يساعد احد ولا احد يساعده ... هدت سرعة السيارة التي امامه فطول على البوري لينبه سائقها الي بلم من فظاعة الحادث وهو يتأمل السيارة المقلوبة رأسا على عقب على جنب الطريق وجنبها سيارات الشرطة والاسعاف وسيارات اخرى احتشدت للفزعة اذا لزم الامر... و عندما مر من امامها هو نفسه .. وشاف منظر السيارة المقلوبة...لم يتمالك نفسه هو ايضا ولم يشعر ان السيارة قد توقفت ...والسيارات خلفه تذمرت وبدات تعامله بمثل ما عامل هو السيارة التي قبله ...ولم يشعر الا بصوت مروان بجواره يناديه )
    • هيا محمد ... اشفيك ؟؟ حيأكلوك!!
    • ......... (وانتبه لنفسه واعاد تشغيل السيارة وتحرك للامام)
    • ادعيلهم الله يلطف بهم....ويرحمهم...
    • ............ (معقول تكون هي نفس السيارة ؟؟!! الي ركبتها البنت الهمجية ... الي كان يتمنى انه يشوفها تبكي دم بدل الدموع ... سبحان الله مسرع اتحققت امنيته... لكن ليش هو مو فرحان ؟؟؟ ليش يشعر بتأنيب الضمير ؟؟!! ودعس......... وزاد سرعته كأنه يهرب من شيء متجه لجدة ..............)
    jeddah1

  4. #3
    يسلموووووووووووووووووووووووووووووووووووووووووووووو وووووووو
    sigpic137688_1جوفنتس +برشلونه +الارسنال= يعني بالعربي ملكت العالم

  5. #4
    عليا : عمة الجازي الوحيدة
    فوزية : زوجة العم صالح عم الجازي
    مشاري : ولد عمة الجازي (12 سنة)
    سلطان : ولد عمة الجازي الاكبر
    فرهاد : بنت عمتها (18 سنة)
    عبير : صديقة جمانة
    مجد و لين : تؤام صديقات جمانة


    دخلت جمانة الغرفة و فتحت كل اللمبات فيها وجرت اللحاف من فوق الي متكورة تحته ..
    • الجازي ....قومي اتحركي ...عمتي واولادها ماشيين يبغوا يسلموا عليكي...
    • ........ ( مااتحركت )
    • ( تدزها باصباعها على كتفها بتريقة ) قومي ...الحركات دي مو عليا ... وفري على نفسك ... مني متحركة الا لمن تقومي...
    • (تجلس على السرير بسرعة وشعرها مكركب ومغطي عيونها ونص وجهها وتصرخ بوحشية ) يؤؤؤؤؤؤ .. انتي ايش تبغي دحين؟؟؟؟؟ سيبيني في حالي ابغى انام ...
    • نامي زي ماتبغي بعدين ... قلنالك لا تطلعي تنامي الا لمن تسافر عمتي انتي الا عاندتي ... ودحين هي تبغى تمشي ومايصير تروح من غير ما تسلم عليكي... نحن ماصدقنا هديناها واقنعناها تخليكي عندنا ....
    • (تطالعلها الجازي بحقد وعيونها مليانة نوم وتبربر ) ايوا مو كيس مخدة بين يدكم صرت دحين .... ودوني وجيبوني على كيفكم مضبوط ....
    • ايش تبربري تقولي ؟؟؟ قومي ..قومي ..لاتصدقي نفسك ... تلاقيكي قاعدة تفكري ...(وحطت يدها تحت خدها ومدت شفايفها التحتانية تقلد وحدة تتحسر على نفسها ) انا مسكينة .. انا يتيمة ... الناس كلها ضدي...اعرف ..اعرف ...الافلام الي تصير في راسك... ( وتدف راسها بحركة خفيفة وتشرد لانو الجازي قامت تجري وراها وهي منقهرة من جد وفي يدها المخدة تبغى تضربها بها ) ...
    وتمسكها وتبطحها على الارض وهي فوقها تضغط المخدة على وجهها وجمانة تضحك وتحاول تفك نفسها لكن هيهات ....والصريخ واصل اخر الدنيا ... لين غرفة المعيشة مكان ماكانوا ام جمانة وعمتها و بقية البنات جالسين ...
    • حسبي الله ونعم الوكيل ... دحين انا قلتلها روحي ازهميها ...ولا قلتلها روحي اكشفي حال البنت المسكينة ..(ام جمانة تتحسب وتكلم نفسها) ..وانا كمان مالقيت الا ارسل دي الهبلة ...مااقول الا مالت عليا..
    وكل الي في الغرفة يضحكوا على ام جمانة وعلى الاصوات الي جية من فوق....
    • (تناديهم ام جمانة ) بس يابناااات !!! وبعدين معاكي ياجمانة ... استحي على وجهك صوتك واصل لهنا ... تحسبي نفسك بزرة لسا؟؟
    اتوقفت الحرب على صوت ام جمانة هي تنادي ونزلت الجازي بعد ماحطت حرتها في بنت عمها و تركتها منبطحة في الارض مهلوكة ... وفوق هذا امها تتحسب عليها ... وتنتظرها تهزيئة معتبرة منها ...
    • والله يا امي هادي هي ... مسكتني وضربتني وكانت حتخنقني ... ( نزلت وراء الجازي على طول تبرر لامها الي ظلمتها وبدون ماتحضر المضاربة حطت الغلط على جمانة على طول لانو هي الي صوتها كان طالع )..
    • ماادري ايش خليتي لرهام وهنادي مدام انتي تسوي كدا ؟؟ ( وبدون ما تطالع فيها علشان تبين لها انها زعلانة منها)..
    • ياامي والله ........ ( وسكتت وطالعت بقهر للجازي الي قاعدة تطالعها بسخرية و هي في حضن عمتها... وانحرجت وسكتت لمن لاحظت ان كل الي في الغرفة يطالعوها... واعطت الجازي نظرة تفهمها انو حسابها معاها بعدين )
    • الجازي ياقلبي ..(بدأت العمة تكلم الجازي وحطت يدها على وجهها ) ... ما غيرتي رايك ؟؟ مو هاين عليا ابعد واسيبك والله...
    • .... ( طالعتها الجازي بأسف .. ونزلت راسها)
    • (ام جمانة ) يؤؤ يا عليا ...ايش دا ؟؟ حنرجع الي حنعيدوا نزيدوا ... انتي تبغي اخوكي يدخل يسمعك ... ويسويلنا هوليلة زي امس ...
    • (وصارت العمة تبكي ) والله غصبا عني ... مني عارفة قلبي يعورني على ايش اكتر ... على فراق اخويا .. ولا اولادو .. (وتشهق بالبكاء) ولا مرتو الي كانت اكتر من اخت ... ولا على البنت الي صارت لوحدها من غير ام ولا اب ولا اخوان ...( وانهارت بكاء... شفقة على حال بنت اخوها المرحوم..بدون ماتقدر تسيطر على نفسها هذه المرة ...فاللحظة التي لم تكن تريدها قربت ...وهي لا تتخيل ان تترك الجازي ... آخر شيء من ريحة المرحوم اخوها الكبير الي عمرو ماقصر معاها بشيء .... فبداخلها شبه اقتناع انو بتخليها عن بنته وسفرها بعيد عنها كأنها بتتخلى عن اخوها الي كان دايما يعاكسها ويعاملها باحترام زايد عن اللزوم .. كأنها عجوز طاقة الستين مو واحدة لسه دوبها مادخلت الاربعين ويقولها انها شيخة حريم العيلة ومافي اكبر منها ولازم بقية بنتات العيلة ياخدوا بركتها ... ماقدرت تضحك زي كل مرة لمن تفتكر هذه الذكرى ... ماقدرت حتى تتحكم في لسانها وتمنع نفسها تقول الي ماكان المفروض تقوله قدام الجازي ... حاولت كتير مع اخوانها يسمحولها تاخدها تعيش معاها ومع اولادها في الرياض لكن هما رفضوا والجازي فضلت رأيهم واقنعت عمتها تخليها مع عمانها..متحججة بالجامعة ) .

  6. #5
    • خلاص ياامي (البنات حزنوا على امهم الي عمرهم ماشافوها تبكي كدا الا في عزا جدهم وجدتهم حتى هنادي صارت تبكي متأثرة بدموع امها ورهام مسكتها وحضنتها تحاول تواسيها والدموع حتفر من عيونها هي التانية )
    • ياعليا ( وحاولت تهديها ام جمانة وتكلمها كأنها طفل صغير ) الله يهديكي... هادا بدال ما تقعدي تقوي الجازي وتدعميها ... تقولي دا الكلام قدامها ... شوفيها جالسة جنبك ماشاء الله عليها ... قاعدة تواسيكي... وتهديكي ... زي ماكانت طوال ايام العزا هي الي تهدي الناس وتقويهم بصبرها وقوة ايمانها ... ( استغربت جمانة انو الكلام دا عن الجازي وطالعت للجازي الي كانت في عيونها هي كمان نظرة مستغربة انو الكلام دا بيتقال عنها ) ثم مين الي قال هي صارت بلا ام ولا اب ولا اخوان ... اجل نحن اهلها... رحنا فين ؟؟؟ !! الله يخليكي انتي وعمانها لها ... واولاد عمانها وبناتهم عمرهم ما راح يقصروا عنها ... وبالنسبة ليا ... الجازي واخوانها كانوا دايما معزتهم عندي من معزة اولادي ... (وطالعت للجازي الحزينة على عمتها فرق قلبها لها وحبت تغير الجو شويا عليهم وقالت ) طبعا مو علشان سواد عيونهم ...بس علشان امهم كانت من اعز صحباتي ... (انصدم الكل من كلام الحرمة الكبيرة العاقلة الي فجأة بدات تخبص وضربت جمانة كفينها ببعض...لكن رجعوا واستغربوا لمن شافوا العمة والجازي ابتسموا من كلامها ... طبعا هي كملت ولا همها فيهم بس فرحانة انو غرابتين النكد الي قدامها فكوها شويا وضحكوا ) وطبعا انتو عارفين انا ما كنت احبها هي كمان علشان سواد عيونها ... بس علشان كانت تغششني في الاختبارات زمان في المدرسة ... (هنا خلاص الكل صدح بالضحك .. والعمة فوزية الحنون تمثل دور المستغربة وتطالع الجازي وعمتها بنظرات تكبر مصطنعة ... وفي داخلها هي فرحانة انها قدرت ترجع الضحكة لهادي الوجوه ... علشان تقدر العمة تروح وقلبها مطمن على بنت اخوها وتقابلت نظراتها مع نظرات الجازي الي كانت تهديها نظرة فيها كل معاني الشكر والامتنان ...اااه !! ياقلبي !! مالومها عمتك يابنتي قلبها يتقطع عليكي والله مالومها ... قاعدة تضحك .. وتهدي عمتها .. وتتقبل تعازي الناس وتواسيهم ... وكأنها صارت حرمة كبيرة ... وانا متاكدة يابنتي انا جواكي لسه في بنت صغيرة ضايعة مو مستوعبة كل الي بيحصلها ... )
    • ايوا كدا ياماما فكيها شويا ...(فرهاد تشجع امها الي قاعدة تضحك ) ثم خلاص لو سمحتي انتي وهي ... لاتصدقوا نفسكم ..وسعوا عن بعض شويا ترى انا أغار ...(وتدف الجازي شويا عن امها وتجلس وسطهم وتجي رهام كمان فوقها )
    • وانا كمان ... (صار المنظر عليا والجازي تحت وفوقهم بناتها فرهاد و هنادي يتضاربوا على مكان بينهم )
    • (صارت عليا تضحك على بناتها الي صاروا قدها بس قاعدين يتدلعوا) هاها ها !! خلاص الله يقطع ابلايسكم !! ها ها ها ..
    • (ام جمانة) لا يا اختي مو خلاص .. خلينا نضحك شويا من زمان ماسمعنا صوت ضحك...
    • ...... (نظرت لها عليا واعطتها ابتسامة بلا روح)
    • وخالتي صادقة ياامي .. ( اتربعت فرهاد في الارض قدام امها توضح لها) من جد تراكي زودتيها ... الجازي انشاء الله ماعليها خلاف ... لا تقلقي عليها ... انتي عارفة انو لو ايش ما قلتي وسويتي .. خيلاني ماكانوا حيرضوا انها تسيبهم وتجي عندك .... مو حلوة تسكن في بيت الغريب وتسيب بيوتهم .. ايش حيقولوا الناس؟؟!! (تتفلسف الاخت) ..ثم هنا في بيت عم صالح ماراح يتغير عليها شيء ... تراها مسطحة عندهم اكتر من بيتهم ... مبشكين هي وجمانة كل يوم والتاني ... في البيت والجامعة .. وانا المسكينة لوحدي هناك في "البطحة" ياغافلين لكم الله (قالتها وهي تتحسر على نفسها)
    • والله انك ماتستحي .. بيتي انا بيت الغريب؟؟؟ (وضربتها على راسها )
    • قصدي ابويا يا ماما مو انتي...
    • ( جمانة بسخرية وهي تتكي كوعها على كتف الجازي وواقفين يتفرجوا على فرهاد بتحدي) يعني انا اعرف انو في شيء اسمه ذوق... كياسة ... عمرك ماسمعتي فيهم يابنتي ؟؟ بعد اذنك ياالجازي (تستأذن منها )
    • اتفضلي .. اتفضلي.. (مندمجة معاها في احراج فرهاد)
    • افرضي ..افرضي .. لو انو الجازي ماعندها اعمام ... وماعندها غير عمة واحدة وهي امك ..
    • (تقاطعها فرهاد مندمجة في الحوار .. ماراح تعطيهم فرصة يقطعوها) ساعتها بيت الغريب أولابها من الشارع ... (محد من العيلة انصدم لانهم متعودين على طريقة مزح هدول البنات الي يوصل بعض الاحيان لمستوى قاسي وجارح احيانا ..لكن هما مايزعلوا من بعض ومتعودين على الدفاشة بينهم وبين بعض لكن قدام الناس احم .. احم...)

  7. #6
    • اسكتي الله يخليكي ... (تسكتها امها وتطالعها بنظرات شريرة) انا عارفة اصلا انتي ليش تقولي دا الكلام .. وليش ماتبغي الجازي تجينا الرياض ... انا عارفة ايش في راسك ... عارفة انتي على ايش مخططة ..
    • (تطالع امها بخوف) طيب ليش تكلميني كدا ؟! كأنوا انا السبب !! ولا انا الي محرضة خيلاني ؟؟ عاد الي يسمعك يقول انو احد معتبر لكلامي !! ولا لرائيي!!
    • لا... محد معتبر لكلامك ولا لرائيك ...
    • (قاطعتهم ام جمانة) خلاص ياهو !! اشوفكم قلبتوها جد !!
    • قوليلها يا خالتي ... ماما ساعات تخليني احس كأني عدوتها مو بنتها (تشتكي )
    • المفروض انا الي اقول دا الكلام ...
    • ( ربتت الخالة فوزية بيدها على خد فرهاد لمن حطت راسها على كتفها كانها تتحامى فيها ) خلاص عليا الله يهديكي انتي كمان تحطي عقلك بعقل دول ...
    • (نطوا الثلاثي جمانة والجازي وفرهاد مرة واحدة ) مين دول ؟؟؟؟؟ ايشبهم دول؟؟
    • بسم الله علينا ... (وكل واحدة تضبط شعرها ونفسها )
    • (جمانة)العوايل كلها تحسدكم علينا .. جمال وادب واخلاق وخفة دم .. فوق دا كله بنات جامعة .. اللهم لا حسد ... (وترقي نفسها بحركة الحريم المعتادة).....
    • والله الي يسمعك يااخت جمانة .. يحسب محد دخل واتخرج من الجامعة غيرك ... لا وبعد طلوع الروح ... ماصدقنا متى حتتخرجي...
    • مدري ايش تحسبيها الجامعة ياماما ؟؟!! متوسطة ولا ثانوية .. اخلصها لكِ في 3 سنين ...
    • مو لازم 3 خديها في 4 مو 5
    • ايوا مو هي جامعة ابويا اخلصها على كيفي ... ولا تحسبيها هارفارد .. ولا السغبون ... اطبق فيها صيفي وادفن عمري زي ولدك ما يسوي ... ( بتكبر ..) وحتى لو كان في عندنا النظام دا ... لا ياحبيبتي انا انسانة تحب الحياة ... عارفة الي ليا والي عليا .. صحيح اخرج واجي واروح وفسح وزيارات ... بس درجاتي تشفعلي ...واستاذاتي في الجامعة يحبوني ... وصحباتي يحترموني ... ودوبني مخلصة درجة البكالريوس من كلية الاداب في علم النفس بتقدير امتياز مع مرتبة الشرف ...
    • طبعا اصلك ما حتنفعي الا مع المجانين الي زيك ( ردت عليها امها بسخرية)
    • ( شهقت جمانة زي الي حس بالاهانة ) علم النفس صار علم المجانين ؟؟؟!!!!!!!! حرام عليكي يا ماما والله حرام عليكي (وتبربر بصوت واطي ماسمعه غير الجازي وفرهاد الي كانو جنبها) خليتي للمتخلفين ايش؟؟؟
    • (قاطعتهم عليا) حتطولوا ؟؟
    • ياشيخة خلينا منهم ومن مجاغتهم ... بنات اخر زمن (وتزغر جمانة بنظرة تتحداها ترد بكلمة) قومي ياشيخة خلينا نشوف ايشبهم الرجال .. قالوا يلا .. ورجوا اهلنا ... وبعدين سكتم بكتم .. مالهم حس مااشوف احد منهم قام ...
    • لا تروحي انتي ... ازهمي مشاري يروح ...قومي هنادي شوفي اخوكي..
    • طيب ..
    • اهه !!(وتتنهد عليا تنهيدة عميقة )
    • صلي عالنبي ياام سلطان ...
    • اللهم صلي عليك يانبي ...
    ويدخل سلطان وراء هنادي من مجلس الرجال ...
    • ها يا يمه ؟؟ يلينا ؟؟
    • (جمانة تتحرطم بصوت واطي مايسمعها غير الجازي وفرهاد الي جنبها ) يؤؤؤ!! ناقصينوا البدوي دا !!!
    • اشفيكم ياولدي حيرتونا ... صارلكم من ساعة قايلين يلا ...(امه عليا)
    • نحن جاهزين يا يمه ... بس ننتظركم ... جيت قبل شوي .. لقيتكم عاملينها مناحة ...فقالي ابوي خليهم شوي .. عادي حتى لو فاتتنا الطيارة ننتظر الي بعدها ..
    • لا ياابويا الله يخليك مافيا اقعد استنى في المطار .. خلي ابوك يستنى لوحده ... يلا قمنا ...
    • هادا جزاتوا الرجال ... تاركك تاخدي راحتك تودعي مجازي على راحتك ...
    • (تقاطعه الجازي ) الجازي لو سمحت ...
    • مجازي .. كوزي كله واحد ... على الاقل له معنى ...
    • ....... (سكتت الجازي مافيها تناقره زي كل مرة )
    • ( لمن شافها طنشته طالع للي جنبها لقى جمانة فقلها) نعم !!
    • نعامة !!
    • ترفزك!!

  8. #7
    • خييير!!
    • انتي الي خير.. ليش تطالعين ؟؟
    • لا والله !! حرااام نطالع ؟؟
    • اي حرام ...
    • حرمة عيشتك ... ثم تعال هنا ... "يلينا" مصطلح من مصطلحاتي الي ماتعجبك .. والي طايحين فيا تريقة عليها انتا والاخ أسامة ... فبأي حق تستخدمها؟؟؟
    • (ضحك من قلبه .. كان عارف انها حتتنرفز ... مهما كبرت دي البنت عقلها حيفضل زي الصغار) ثاني مرة اكتبي عليها حقوق النشر محفوظة ..
    • ولا سجليها في الشهر العقاري... (ماقدرت فرهاد تقاوم نفسها وخانت صحباتها وانضمت لصفوف العدو الي هو اخوها )
    • هاااااااااااااهاااااي ... حلوة !! حلوة !! (ومدلها يده ) كفك !!(ولمن جات تبغى تضرب كفه سحبها وخلاها تضرب كفها بالهواء ) لا والله ... مصدقة عمرك ... قدك انا تمزحين معاي ...
    • ....... ( اتفشلت فرهاد وانقهرت من اخوها)
    • (انفجرت جمانة والجازي من الضحك) ها ها ها ها !! فشلوها .... هاها ها !! حلال يسوي فيكي .. علشان تعرفي مين الي راح ينفعك .. صحبات عمرك ولا اخوكي الي عمروا مااعطاكي وجه !!...
    • (اتدخل سلطان بالحجازي دي المرة ) اخوها طبعا حينفعها ...مالك شغل انتي !! اختي وانا حر افشلها ولا مااعطيها وجه على كيفي ...اختي ... ( ولاحظ انو الجازي تحاول تكبت ضحكاتها ) هيييييي !! انتي !! لا تسوين نفسك تضحكين .. شكرا ما نبغى مجاملات منك .. (وضربها على راسها ) ...
    • وجع في شكلك (وقامت الجازي عليه تضرب فيه بكوس وكفوف وهو يرد ضربة بضربة وبعدوا جمانة وفرهاد عنهم علشان ما يوصلهم طشيش من المعركة الي اتوقفت على دخلت عليا الي طلعت مع الخالة فوزية تعطيها اغراض من فوق)
    • يلا بنات قوموا البسو عبيكم...
    • بدري يا يمه ..(سلطان يتريق على امه)
    • بدري من عمرك يلا بلا هرج فاضي ...
    وخرج بعد مااعطى الجازي كفين حمروا خدودها .. ومانسي نصيب جمانة من الوداع بخبطة على راسها ... حتى رهام ما سلمت منه ... رجة الولد دا ... طبعا جمانة ما حاولت تنتقم بس الجازي ورهام حاولوا يردولوا الضربات بس هو شرد منهم لين السيارة .. ولمن حاولوا يلحقوه في الشارع .. هزئهم اسامة ودخلهم البيت ... وكان وداع العمة واولادها سريع لانو زوجها استعجلها .. فهو يعتقد انو كفاية مشاعر ودموع لحد كدا ... اعطاهم وقت بما فيه الكفاية ... زوج عليا من اهل الرياض لكن درس في جامعة جدة وهو رجل جاد وحازم و عملي .. كل شيء عنده له وقت واصول ... الشغل واللعب والكورة ....ولده سلطان يكره يلعب معاه بلوت.. لانه حمقي ومايحب السكي مكي ... يحب يلعب بشرف وبدون غش ... عكس سلطان الا ما يعرف يلعب الا لمن يغش.... طالع زي خيلانه ...
    بعد ما راحوا مع اسامة وابوه علشان يوصلوهم المطار...
    خرجت جمانة للحوش حصلت الجازي ورهام قاعدين على درج المدخل حاطين يدهم على خدهم ...
    • ايشبكم ؟؟ياحظي فيكم كل واحدة حاطة يدها على خدها...
    • (ردت رهام بقهر) اسامة زعقلنا ...
    • ليش انشاء الله (وحاطة يدها على خصرها)
    • علشان كنا نبغى نخرج نضرب سلطان...
    • لا والله ... تحسبوا نفسكم في الكباين انتي وهي خارجين فازين طولكم للشارع بدون عبي ... هيي!!! انتي وهي فوقوا انتو كبرتوا ...
    • كبرتوا .. كبرتوا ..دحين كبرتوا .. لكن لو جيت اقول شيء ... انكتمي انتي صغيرة ...
    • ياريت تسوي فعلا الي تقولي عليه دا ... وتنكتمي وتنقلعي ... صدقتي نفسك انا اعطيكي وجه .. ياامي روحي قولي الكلام دا لامي مو ليا ...
    وراحت عنهم رهام مقهورة ودخلت......
    • الجازي ...
    • ها....
    • الجااااازي !!!
    • هاااااااااا !! اقولك هااا !! يابنتي طرشة انتي ماتسمعي !!
    • لا اسمع كويس .. بس مو عاجبني الي قاعدة اسمعه ...
    • يابنتي انتي تبغي تتبلشي وبس ؟؟ دحين انا قلت شيء ولا فتحت فمي ...

  9. #8
    • هو دا الي انا مو عاجبني .. ياالجازي ... الهدوء الي قبل العاصفة ...
    • أي هدوء ؟؟!! واي عاصفة ؟؟!! جمانة ترى من جد .. من جد ... مالي خلق ... نكمل كلامنا عن الهدوء والعاصفة حقونك دول بعدين .. انا كنت ابغى انام وانتي صحيتيني ... يلا عن اذنك تصبحي على خير...
    • اهله ........ (وتركتها تروح لكن بينها وبين نفسها متوعدتها ودخلت للصالة ماحصلت احد فراحت على طول شالت جوالها ودقت ) خليني اشوفها دي ... راحت وقالت عدولي..الو ..
    • اهلين جمانة ... ( رد عليها صوت صديقتها عبير)..
    • اهلين .. فيكي صح النوم ... دوبك تصحي لعمرك .. مو قلتلك اول ماتوصلي تتصلي تتطمنيني انكم وصلتوا ...
    • لاوالله ... تبغيني اول مااوصل افتكر فيكي ولا ادري عنك ... ياامي روحي .. ايش ابغى فيكي ؟؟ انا وصلت تعبانة وهلكانة ... اخدت دش ونمت ودوبي بس الي صحيت ..
    • طبعا وانا خليني انفلق ...
    • وانتي ايش تبغي فيا ... زوجي انتي وانا ماادري ...
    • اقوووول ..عبوور ... اشوف طلعلك ريش ... واتفرعنتي علينا ... ترى مرديك ليا ياحلوة ... لا يغرك الكم يوم الي حتقعديهم في مصر ..
    • حبيبتي داك كان زمان .. وجبر .. دحين مافي جامعة .. ولا رصيف مبنى 5 ...ولا جمانة ..ولا عبير...
    • افااااا ... مسرع ... مسرع ... مانسيتي ياعبيير ... كان زمان ..ها؟؟
    • لا افااا عليكي ... وانا اقدر ... المهم .. لاتطولي عليا حرام عليكي .. دحين بيتحسب عليا زي ما بيتحسب عليكي ... قفلي خلاص لاتخسريني...
    • مو منك.. مني انا الي متصلة اتطمن عليكي ...انقلعي اشوف...
    • ها ها ها !! باي
    • باي !! صحيح ماتستحي... ( وتتصل على رقم تاني واستنت لين ماردوا عليها ) الو .. هاي..
    • هاي انتي ... كيفك ؟؟
    • زفت ..
    • ليش؟؟ ايش صاير ؟؟ الجازي فيها شيء؟؟
    • لا .. مافيها الا العافية..
    • اجل.. ايشبك انتي ؟؟
    • يا شيخة .. اتصلت على الغبية عبور ... اتطمن انها وصلت بالسلامة .. لو تشوفي كيف كلمتني بطريقة خايسة كأني اشحت منها ..
    • تستاهلي ... علشان تبطلي هبالتك .. ايشلك فيها ؟؟ هي كانت من بقايا اهلك ؟؟!!
    • انتي عارفة يا مجد .. بعد الحادث الي صار لعمي .. صرت قلقانة على أي احد يسوق سيارة ولا مسافر..
    • لا والله من متى الحنية دي كلها ؟؟ خلي شويا للجازي .. هالله هالله فيها.. دحين مالها غيركم...
    • اسكتي ياشيخة مقطعة قلبي .. دوبها عمتي سافرت وبالزور تركتها عندنا ..وصار فيلم ودموع انهار انهار... وامس اتضاربت مع ابويا ومع عمي علي ..
    • ليش ؟؟ ليش ؟؟ لا يكون دا كله على الورث والفلوس والشغلات هادي؟؟؟
    • لا ياحمارة .. ياحسرة أي ورث ؟؟!! من فين لنا ابويا وعمي الله يرحمه وعمي علي مالهم غير رواتب التقاعد حقتهم والسوبرماركت الي متشاركين فيه والي ياريت شايفين من وراه خير ... الا يصرف على نفسه ....ياشيخة عمتي الله يهديها كانت تبغى تاخد الجازي عندها وابويا وعمي علي مارضيوا طبعا ......
    • يحق له والله بنت اخوه.... ها ؟؟ لحظة جمانة ( وتكلم احد عندها ) جمانة لين تسلم عليكي ...وتقولك سلمي على الجازي ... ياشيخة .. مدري دي الاجازة ايش حنسوي من غيرك ؟؟ نفسنا نرجع .. منها نكون معاكي .. ومنها نوقف مع الجازي ...
    • بطلي بكش .. والله تلاقيكي ماصدقتي ...انتي ولين ماتصدقوا أي اجازة تجي .. وطيران على مصر ... عاد دحين اجازة مفتوحة مدى الحياة ... مين يقدر يجيبكم من هناك؟؟
    • حراام عليكي .. والله بس مو حلوة بدونك ...
    • ايش تبغوبي ؟؟ عندكم عبير جاتكم وصلت اليوم .. روحوا بشكوا معاها ...
    • تعرفيني انا ولين مو كتير نحبها ...
    • الي تعرفيه احسن من الي ما تعرفيه...
    • على قولك ... المهم حبيبتي .. تأمريني بشيء من هنا ؟؟
    • سلامتك .. جمعولي اكبر قدر ممكن من الاخبار والحكايات عن بنات الجامعة الي تقابلوهم...
    • لاتوصي حرييص !! هاهاها
    • تيب يلا بايو
    • بايو....

  10. #9
    في المطار...
    kaia_overview
    kaia_southterm_misc_small

    كانوا عليا وبناتها وولدها مشاري ينتظروا مع اخوانها صالح وعلي على بال ما يخلص ابو سلطان اجراءات السفر مع اسامة وسلطان ... لان الرحلة للرياض الي حجزوا فيها فاتتهم واضطروا يستنوا الي بعدها .. في حالة اتخلف احد المسافرين ... يركبو بدالهم ...وبمجرد ما اتاكد سفرهم قرب ابو سلطان لهم ...
    • يلا ياام سلطان يلا يابنات..
    • انشاء الله...الله يخليك ياصالح ... ماراح اوصيك...
    • انا لله وان اليه راجعون ... ياناس احد يساعدني حتدبحني دي الحرمة...(وصاروا بنات اخته واخوه علي يضحكوا عليه)
    • خلاص عليا تراكي لسه زي ماانتي ماتغيرتي حتى بعد ما صرتي حرمة وبناتك صاروا طولك ...استحي على وجهك ...اكلتي قلب الرجال ... من اول ماركبت السيارة ... مااوصيك .. ماوصيك ... اقول لاتكون بنت اخوكي لوحدك ونحن لا ...
    • انتا مالك شغل (عليا وعلي سنهم قريب من بعض لكن عليا اتزوجت وهي صغيرة وعلي دوبه متزوج من 5 سنين وما عنده الا بنتين ومن صغرهم وهما ناقر ونقير)
    • خلاص مو وقتكم دحين (قاطعهم اخوهم الكبير صالح) يلا ياابو سلطان شيل حرمتك وبناتك .. ولا تنسوا تطمنونا اول ماتوصولوا ..
    • لاتوصي .. (ابو سلطان) يلا سلطان مع اخواتك ... وين اخوك ؟؟
    (مشاري كان جنبهم مندمج بالقيم بوي الي في يده لكن لمن سمع ابوه فز ومشي مع اهله)
    • مع السلامة عمتي .. (اسامة ويبوس راسها) مع السلامة بنات ..
    • مع السلامة حبيبي ... (ولفت على اخوانها وعيونها مليانة دموع وقالت لهم قبل ما يسحبها زوجها على البوابة )مع السلامة ياصالح ... مع السلامة ياعلي ... ولا تزعلوا مني .. ابو مازن الله يرحمه جمايله عليا كتير وماهما سويت مااقدر اوفيه حقه ...(وتركت اخوانها وقلبهم يتقطع عليها .. عليا هي اختهم الوحيدة .. وقلبها كان دايما حنون عليهم... حتى بعد مااتزوجت وبعدت عنهم محبتهم لها زادت وحتى بعد ما كل واحد فيهم اتزوج وجاب اولاد معزتهم لها ما اهتزت ... دايما الاخت عليا لها مكانتها ومعزتها في قلوبهم..)

  11. #10
    عم اسماعيل : جد محمد كنايته ابو ابراهيم
    خورشيد : الصبي الافغاني عند جد محمد
    عم محسن : زميل عم اسماعيل صاحب محل الورد والريحان واللخم (السمك المجفف) كنيته ابو هلال
    رام : صبي القهوة الهندي
    عم قاسم : صاحب محل العطارة
    عم سعيد: احد الصيادين القدامى وصاحب الاستراحة في ثول وعنده محلات يابلاش وابو فيصل صاحب محمد كنيته ابو احمد
    عم محمد امين : احد التجار اصله من الصين
    مرام : حبيبة محمد
    مراد : زميل محمد في الجامعة
    عبود : زميل محمد في الجامعة وصديق مراد
    نعيمة : جارة بين عم اسماعيل من زمان..
    عزيزة : اخت عم اسماعيل عندها 4 اولاد و3 بنات
    ود : حفيدة نعيمة..


    hiway%20night%20run
    في ظلمة الليل على الخط السريع طريق جدة ... كان محمد سايق سيارته ... وانتبه لمن عدت سيارة جمس زرقاء من جنبه ...واتخطته باعلى سرعتها ... "لالا !! لازم انبههم !!" دعس بنزين باعلى سرعة علشان يلحقهم ...لكن السيارة زادت من سرعتها ... بشكل ماقدر هو يتخطاه ... حاول يبههم بالبوري ... لكن بدون فايدة ... فجأة يتكرر مشهد انقلاب السيارة قدامه وهو واقف يتفرج بحزن على المشهد الي حاول يمنعه مثل كل ليلة بدون فائدة ... ومثل كل مرة كان اول من يجري لينقذ المصابين ... كان يتفقدهم واحد واحد يدور بينهم مستعجل .. ماكان يحاول ينقذ احد .. خايف يضيع الوقت زي كل مرة ... وفعلا دي المرة لقيها .. والدم مغطي وجهها زي كل مرة ..... حاول يفوقها ويتأكد من نبضها انها حية ... وفرح لمن شافها تحاول تفتح عيونها ... وشافته .. وبدأت تحرك شفايفها كأنها تبغى تقول شيء ... وقرب اذنه وسمعها تقول (انتا السبب !!) وفارقت الحياة ونظرة الاتهام لازالت في عيونها ..... كل ليلة كان يحلم دا الحلم .. وتشاء الظروف انه مايكمله .. كل ليلة يحاول يمنع الحادث ولمن مايسعفه الحظ مثل كل مرة ... يحاول ينقذ افراد الاسرة المنكوبة ... او ينقذ ديك البنت الكريهة الي محملته ذنب هو مااقترفه ... وهو لسبب مايعرفه ..مايقدر يمنع احساس تأنيب الضمير منه... مثل ما هو الان جالس وهي قدامه بلا حياة ... ونظرة الاتهام في عيونها ... واتأسف انه كل ليلة كان يتلهف للنوم علشان يحلم نفس الحلم ويحاول ينقذها وينفك من شرها ومن الذنب الي محملته اياه .... ايشبي انا للان ماصحيت ؟؟ فينك يا جدي عني اليوم ما تصحيني لصلاة الفجر ؟؟ سبحان الله والجوال اليوم جنبي سكتم بكتم ؟؟ كأن الجميع اتفق عليا معاها اليوم ... لكن لا !! لا !! فتح عيونه وجلس فجأة وهو مقهور ... مو مفزوع زي كل مرة ... طالع في انعكاس صورته في المرايا الي قدامه بتحدي " الذنب مو ذنبي !! انا ماسويت شيء !! الذنب مو ذنبي!! أعوذ بالله من الشيطان الرجيم" قطع عليه الجو الملحمي دا صوت همس برا غرفته...
    • خوورشيد !! خورشيد !! فينك ياواد؟؟
    • ها !! بابا ؟!
    • جبت فطور ؟؟
    • ايوا بابا !!
    • والمعصوب ؟؟
    • في جيب بابا .. بس لو حمود يعرف .. في مرة زعلان انا كتيررر ...
    • لا مافي يعرف .. انتا جيب دحين بسرعة هو لسه مافي يصحى ...
    • انشاء الله بابا ..
    • ولا تنسى السمن مع الفول ...زي كل مرة ..
    • انشاء الله بابا..

    oj11_small
    oldjed2
    oj03_small

    ويروح على طراحته الي فارشها في ساحة البيت القديم احد بيوت حارة البحر المطلة على البحر في جدة القديمة والذي يسمى الآن "بالبلد"
    OJsign
    وبالتحديد في الجزء الجنوبي الغربي من مدينة جدة ...تلك المنطقة التي كانت محاطة بسور جدة القديمة الذي بني في عهد المماليك لحماية المدينة من غارات البرتغاليين وقد تم هدمه لدخوله منطقة العمران عام 1947م....
    almangabe
    بيوت تلك الحارة وغيرها من حواري البلد الاخرى مثل حارة المظلوم وحارة الشام وحارة اليمن وحارة الكرنتينة لاتزال شامخة محتفظة بهويتها الحجازية تتحدى المباني الجديدة بتراثها وعراقتها ......برواشينها الخشبية التي ميزت البيوت الحجازية عن الحدائق المعلقة التي تدل على طابع مدينة بغداد .. والبيوت الطينية التي تدل على الهوية النجدية .. واسقف الحصير في البيوت الخليجية...
    oj08_small
    وينسمع صوت مذيع البرامج الصباحية ..فهو ككل رجل عجوز ما له هواية غير سماع الاخبار والبرامج الدينية الا من الراديو ... رغم الـ170 قناة الي ينقلها الستلايت ...
    • يلا ياخووووورشيد ...(ينادي بس يتدارك الامر لانه نسي ان حفيده لسه نايم ... يشخر الاخ .. وفوت الصلاة عليه )
    • (ويجي خورشيد شايل تبسي ) ان شاء الله بابا انشاء الله ..
    • انكتم!! لا يسمعك حمود ويقوم ويسويلي حكاية ...
    • ليش بابا ؟؟ ماتبغاني اروح اصحيه دحين ؟؟ هو لسه ما في صلي !!
    • لا .. لاتصحيه دحين سويد الوجه .. خليه مدام ماصحي بنفسه ... لا يقوم دحين ..يكفينا شره .. فين الشاهي دحين ؟؟ اخلص..
    • (ويصبله الخادم الافغاني الغير صغير في السن الشاهي.. فهو وعم اسماعيل عشرة عمر فقد كان يشتغل منذ ان كان صغير السن عنده من ايام ماكان العم اسماعيل لسه صياد ) انشاء الله ... بس كلام كتير .. كلام كتير (يبربر بصوت واطي )..
    • نعم ؟؟ ياروح امك ايش تتحرطم تقول ؟؟
    • ولا شيء خلاص ... خلاص ..
    • ( ويتناول منه فنجان الشاهي وبغيظ) يتحرطم عليا سويد الوجه ... (ويمد يده يقطع له وصلة من قرص التميس علشان يغمسها في زبدية الفول لكن يلاحظ انو مافيها سمن فيدور بعينه على قارورة السمن وكالمعتاد ما يحصلها ... فتقوم القيامة ... وينسى حفيده النايم جوا .. ويمسك في خناق صبيه وبكل صوته ) ياسويد الوجه ..يارمة .. دحين انا مو قايلك ماتنسى السمن ؟!؟! انتا ماتبغى تبطل التناحة حقتك دي؟؟!
    • بابا !! شويا.. شويا .. والله انا ما يسمع انتا تقول هات سمن ..
    • يعني انا حكدب عليك يالي ماتستحي ؟؟ انا قايلك بالحرف لا تنسى السمن زي كل مرة .. انا عارف انتا تسوي كدا ليش ... عارف انو حمود هو الي موصيك عليا ... عامل له اعتبار يارمة وانا لا ...ها!!
    • لا والله بابا انتا ما في قول ..انا مافي يسمع
    • الا خورشيد ... سيدي قلك لا تنسى السمن وانا شاهد ... ( فرقز عم اسماعيل عيونه الاثنين مفجوع وهو يشوف حفيده قدامه واطلق سراح خورشيد المسكين واتجاهل حفيده وجلس يكمل فطوره ولا كأنه عامل عملة)..روح جيب زيت الزيتون ياخورشيد ... ها ؟!! مو السمن .. الحمدلله ياشيخ انك بتنسى ولا كنا رحنا فيها من زمان..(وجلس جنب جده يلقحه بالكلام) ياهووو!! مافي اتفضلوا ؟؟ مافي شيء؟؟
    • حمود !! اجلس كل وانتا ساكت .. ولا قوم فز ..
    • ...(وابتسم بشطانة وهو يطالع لجده وصبله شويا من الزيت الي جابه خورشيد على الفول وبدأ يأكل معاه وماقدر يقاوم يعاكس جده ) لا .. ماشاء الله .. ماشاء الله .. فول وقلابة ومعصوووب.. وتميس .. وشاهي بسكر ... فطور صحي متكامل ..... مدام هادا هو فطورك كل يوم اجل نستبشر خير .. الدكتورة اليوم لو تروح لها تحلل حتنبسط منك ...ولا تزعل منك زي كل مرة ...
    • (طراااااخ صوت الفنجان وهو يصقعه في التبسي بقوة ولف وجهه وحط عيونه بعيون حفيده ) شوف ياولد ابراهيم .. تحليل ؟؟ انسى .. مني محلل ... وانتا ودكتورتك .. ازعلوا اتفلقوا على نفسكم يا جيل الالمونيوم .. (وبقهر زي الي يستعرض عضلاته) انا بمب .. حديد ...مافيني الا كل خير ... لا بحر .. ولا قروش قدروا عليا .. راح يقدر عليا السكر حقكم دا ؟؟
    • (يسايره) طيب انتا ايش خسران ؟؟ تعال سوي التحليل .. مدام واثق من نفسك ...
    • مني مسوي ..(وفي نفسه يقول مجنون انا اروح احلل بعد صحن الكبدة الي مخلصه كله امس لوحدي في القهوة) ياابويا بقاصر المشوار .. الي كل مااروح احلل تطلعوا فيا بلاوي الدنيا كلها .. واروح لعمك قاسم .. يقولي مافيك الا العافية ...
    • ياسيدي اتقي الله .. ايش دراى عم قاسم بالسكر والطب الله يهديك؟؟
    • عمك قاسم اكتر واحد يفهم في دي الشغلات..
    عم قاسم .. عنده محل عطارة .. وان كتر .. يكوي بعض الاحيان ..والله يستر منه لايودي نفسه مع الناس في داهية..يوم من الايام..
    souq
    • العلاج بالكوي سنة .. لا تخرف انتا دحين ..
    • أي سنة ياسيدي الله يهديك ... الرسول كره الكي وما اعترف فيه الا في حالة عدم وجود البديل .... والطب الان تطور وصار فيه مية بديل عنه .... وانتو لسه على كل طالعة ونازلة رحتوا تكوو.... زي داك اليوم اسمع انو عم قاسم كوى واحدة من بناته علشان جاها شويا مغص .. فين نحن ياسيدي الله يخليك ؟؟
    • والله زمان ياابويا لا كان في دكتور ولا مكتور ولا سكر ولا تحاليلكم الي خرمتوبها جلدي بلا في شكلكم... كنا من يحس الواحد فينا بوجع يقوم ويكوي عند عمك قاسم واهو لساتنا بصحتنا ربينا اولادنا وكبرناهم وجابوكم لنا وبرضه ربيناكم وكبرناكم ... لا عمرنا وديناكم مستشفيات ولا دي الخرابيط...
    • ودحين ؟؟ الخلاصة !! لا يكون ناوي تروح تكوي من ارتفاع السكر كمان ؟؟
    • ومين قلك لسه حكوي ؟؟ انا كاوي من زمان .. مو مستني اخذ اذنك ..(ويقوم لانه خلاص طفش من المناقرة) ......
    • على فين ؟؟ اجلس كمل فطورك ..
    • مني جالس زفت ...اتسمم انتا لوحدك.. تعبتني من الهرج الفاضي حقك (ويزعق ينادي ) خورشيييد..... ياواااااااد هات العمة ....
    • يعني بالله على فين من بدري كدا ؟؟ حتروح تبسط في الدكان ؟؟ محد يبسط دحين..
    • مالك شغل .. شوف خورشيد .. انتا خلاص هادا مواعين فطور بعدين تعال دكان .. انا يروح قهوة دحين وبعدين يجي في دكان ...
    • انشاء الله بابا ....(يرد عليه خورشيد ويناوله العمة والعصايا)
    • (ويضحك محمد على جده وصبيه) والله يا سيدي انتا السبب في انو خورشيد بعد السنين دي كلها لسه هرجتو مكسرة ولا هو المفروض من ايام ماانا صغير معاك ... يعني قبل مااعرف انا نفسي اتكلم ...
    • ......(ويطالع الجد بعصبية لحفيده ويرفع له العصايا الي فيده كأنه حيضربه بها )
    • خلاص !! خلاص !! والله اتوب !! هاها ها !!

  12. #11
    oj06_small oj04_small
    ويطلع عم اسماعيل على سوق ندى ..المشهور بانتشار المكتبات فيه ومحلات بيع السمك المقلي والمشويات وصناعة الاحذية والحقائب واصلاح الساعات...لكنه لم يتجه الى دكانه الذي فتحه ليديره في شيخوخته بعد ان خانه الزمن واصبح يقلي السمك ليبيعه بعد ان كان هو من يصطاده ...واتجه للمقهى الذي يقع بين مبنيين حيث اعتاد التجمع فيه مع زملاءه و جيرانه واصحابه من جدة القديمة او خارجها والذين اعتادوا ان يصيفوا في بيوتهم التي يملكونها في جدة القديمة... ويجلس بينهم..
    • السلام عليكم...
    • (كلهم) وعليكم السلام ورحمة الله وبركاته .. هلا والله ابو براهيم ..
    • هلا فيك .. اقول رامي .. (ينادي صبي القهوة الهندي) بالله عليك ياابويا مع الشاهي تروح تجيب لعمك اسماعيل زبدية فول وقرص تميس .. ولا تنسى السمن ياابني ..الله يرضى عليك.. (يتدحلس الاخ علشان ينول الي في باله .. كفاية حرقة دم عليه من الصبح)
    • انشاء الله ...(يرد عليه صبي القهوة رام)
    • ها !! ابو براهيم !! ايشفيك اليوم ؟؟ منتا على عوايدك ؟؟تجي تفطر معانا من بدري علشان ما يزبطك حمود!!(يستفسر منه عم محسن صاحب محل الورد والريحان واللخم (السمك المجفف))
    • يا أخي !! من نحاستي !! ولا انتا شايف مخليني اخرج على لحم بطني .. ياريتني وفرت على نفسي وجيت من بدري ..
    • حرام عليك ياابو براهيم !! الولد يدور مصلحتك (عم سعيد احد الصيادين القدامى والذين تركوا المهنة مثل عم اسماعيل بعد ان كبروا في السن واصبح يستعين بالعمالة الاجنبية في مراكبه التي تزود استراحته في "ثول" شمال جدة بالسمك الطازج وهو يسكن برا جدة القديمة وعنده محلات يابلاش احدهم في احد احياء جدة القديمة (الخاسكية) والاخر في جدة الحديثة (البوادي) ومتنور اكثر) يااخي الحمدلله الي طلعلك رجال والنعم فيه مو مقصر معاك ويخاف عليك .. مو زي بقية الشباب مو داري الله فين حاطه ...اسالني انا .. وتعال شوف ان كان احد من اولادي الي مو مقصر معاهم بشيء يدري عني ولا قال ابويا.. اريحه.. اساعده.. الا راحوا خلوني افتح لهم محلات يبيعوا لهم فيها بريال ولا بريالين... هادي شغلة بالله هادي!!؟؟
    • (يمزح معاه عم محسن ) يا ابو احمد .. بريال وبريالين احسنلك من لا يبعويلك الحلال كله ببلاش ...هاها ها (ويضحك الكل )
    • وانتا الصادق ياابو هلال شباب دي الايام مايعرف غير اللفلفة طول النهار وماتشوفهم في البيت الا قدام الزفت الدش... بس والحق ينقال لولا ولد ولدك محمد كان فيصل ولدي مشيلي على نهج اخوانو الكبار .. بس انتا الي ماتحمد ربك (يلوم عم اسماعيل)
    • (يخش عرض واحد تاني) اولاد دي الايام مايعجبوني .. لابسبن لك ديك البنطلونات الجنز ..والكشة فوق راسهم تقول عش عصافير..دول رجال دول ؟؟
    • (ويرد احد التجار الاخرين والذي يعود اصله من الصين عم محمد امين ) ياابويا رجال ايش ؟؟ الله يرحم رجال ايام اول .. يخرج لك .. النور في وجهه .. والتوب مبخر ..والكوفية على راسه..
    • (حب يعاكسه عم اسماعيل) وانتا ايش دراك يااخويا بايام اول ؟؟ لا يكون تحسب نفسك من سكان اهل البلد الاصليين ؟؟
    • (ويرد عليه بفخر عم محمد امين ) لولانا ما كان عرفت هادا التميس الي انتا قاعد تاكله دحين ( وياخد وصلة من تميسته ويغمسها في الفول ويأكلها ويكمل ) ولا هادا الفول ولا القدو قادو ولا المكرونة ولا الكاري.. (وعدد مجموعة من الاكلات الجاوية والهندية والايطالية )

    وهذا هو الحال دائما يبدأ نهار هولاء الشيوخ حول مائدة الفول والتميس والشاهي بالحليب في القهوة يتبادلون فيه اطراف الحديث ومن ثم ينهض كلا منهم الا دكانه لتبدأ الحركة التجارية في السوق
    conjunctureofstreets1
    conjunctureofstreets2
    fountain
    palmtreeSoukAl-AlawiSt
    palmtreeSoukAl-AlawiSt2
    soukAl-Alawibluebalconies

    ومن ثم يعودون ليجتمعون في الليل في نفس القهوة ليشربوا الشاهي المنعنع ومرة اخرى الفول والتميس او شربة الكوارع في بعض الاحيان ويتشابكوا في نقاشات طويلة يتفقون فيها ان الزمن لم يعد كما كان في السابق ..
    4224_mb_file_31bf5
    وفي الاخير بعد صلاة العشاء .. يعود كلا من الى بيته...لينامون باكرًا عكس ابنائهم الذين يتناوبون على اماكن السهر من قهاوي بلوت وكافيهات نت ومطاعم واستراحات وشاليهات ...
    realestate.360652
    jeddah_welcome
    jeddah
    fudruckersm

    بعد المناقرة اليومية الصباحية مع جده ماكان لمحمد نفس يكمل الفطور الي تركه جده , خاصة وانو خورشيد كان واقفله فوق راسه يستناه يخلص علشان يرفع المواعين ويروح على محل جده .. فبعد مافتح عم اسماعيل محله انتقل خورشيد معاه لمهنته الجديدة وهي بيع السمك المقلي والمشوي المبهر بطريقة تعجز اي ست بيت تسبكها زيه ... وهو خارج من البيت ... يرن جواله... يشوف مرامي call you
    • نعم..
    • هلا حبي ...
    • .....
    • ماراح تسلم عليا ؟؟
    • سلمنا (بطفش) خير ايش تبغي؟؟
    • لا تصير كدا عاد ..هادا وانا صاحيتلك من بدري !! كدا تكلمني.. هادا جزاتي؟!!
    • لاااااا!!! مالك حق .. مااستاهل ... ليش تكلفي على نفسك ؟؟ كملي بقية الاسبوع ..مافي شيء يسوى..
    • لا تصير حقود .. انا قايلتلك اني حكون مشغولة الايام هادي .. ويمكن اسافر .. الموضوع ماكان في يدي..
    • مرام لا تضحكي عليا وعلى نفسك .. انتي لمن تكوني مسافرة .. ماكنتي بتطنشيني كدا... وانا ماكنت اصلا حعطلك .. كان ممكن تردي تطمنيني وتقفلي..
    • ياحبيبي ماكان ممكن .. بنات خالاتي كانو جنبي.. لاصقين فيا طوال الوقت .. جايين من السفر وكانوا يبغوا يسووا عمرة فخلاني بابا اروح معاهم.. واستأجرنا في برج مكة وقعدنا كم يوم ...
    • غريبة !!من متى ؟؟ انتي الي في رمضان ماتعرفي الحرم.. ايش الي جاء عليكي ؟؟
    • لا عاد لا تغلط...(انقهرت) انا مو بايعتها لدي الدرجة ...
    • والله مدري عنك !! الله الهادي بس..
    • ولعلمك دعيت لك دعوتين .. بعد ماخلصنا طواف.. ولو انك ماتستاهل...
    • هههههههه (يضحك) الله يتقبل.. بس والله انا مازعلت الا علشانك وحشتيني ...
    • طيب مدام وحشتك لاتقعد كل مااكلمك تزن عليا كدا .. ولا تحسب انتا تحبني وانا مااحبك..
    • طبعا لانو انا احبك اكتر ...
    • تحلم....

  13. #12
    وكمل حمود الي طلع مو هين مكالمته الرومنسية مع حبيبة قلبه وكان قدو وصل للسيارة وركب واتجه للجامعة...
    kaau_2_50
    بعد ماقفل منها لانه وصل الجامعة فكر انه بكثر ما يتزاعل هو مرام لكن بكثر مايحبها .. محمد المقطوع من شجرة وماله في الدنيا دي الا جده الي رباه بعد وفاة ابوه وامه الي ماتوا في حادث كان حيروح هو نفسه ضحيته ... وخورشيد الي كان له دور كبير في بتربية محمد والعناية به .. واصحابه الي كانوا له احسن من اخوان الدم ... واصحاب جده من جيران وزملاء المهنة من صيادين وتجار كانوا فخورين به وكل واحد يتمنى اولاده واحفاده يطلعوا زيه ... متفوق في دراسته وراضي جده ويعتمد عليه في اي مهمة او شغلة تسند اليه من شغل الي بداه من صغره او فزعة لاي احد مين مايكون... بالاضافة لدا كله كان وجود مرام في حياته هو الاهم فهي بالنسبة له البلسم والحنان والحب .......صحيح قصة حبه اتخللتها صراعات وانقطاعات.. تمتد احيانا لاسابيع .. واحيانا لساعات.. واحيانا لدقايق... لكن هادا كان بمثابة المقوي لعلاقتهم الي استحملت عوامل الجو والتعرية طيلة هذه السنين...المهم ..... قفل سيارته ونزل متجه لمبنى القبول والتسجيل... في الطريق... يقابل 2 من زملائه ..
    • (عملوا شوو بمجرد ماشافوا محمد بصوت عالي) عبود انا في حلم ولا علم .. معقول الي تشوفه عيوني..(ويمسح عيونه).. لا يكون بدأت اخرف من الفرحة..
    • لا صدق .. الي انتا تشوفه حقيقة مو خيال ...(ويوقفوا في طريق محمد الي حاول يعديهم وماقدر لانهم واقفين قدامه)
    • على فين ياكابتن ؟؟ انتا لازم تروح مبنى الكلية تستلم جدول الترم الصيفي ..علشان يدوب تلحق اذا تبغى تتخرج معانا ...(مراد انسان ممتلى الجسم ومرفه... الدنيا عنده اخر همه .. هو اكبر شباب الدفعة .. لانه يعيد المواد كل سمستر.. اضطر يشد حيله ويتخرج بعد ما ابوه هدده انه حيخرجه من الجامعة ويشغله فخاف انه يصير اقل من غيره بدون شهادة جامعية ..واتخرج اخيرا )
    • (ما عمل محمد له بال زي العادة لمن يحاول يعايره ويقهره ودخل دي المرة جو معاه علشان مايعكر على نفسه في هادا اليوم المميز الي كان ينتظره طوال عمره) اووب !! اووب !! ماشاء الله واخيرا .. مابغيت يارجال ؟!! احنا كنا شاكين انك ناوي عليها دي السنة .. بصراحة ماله معنى تخرج الدفعة كلها من غيرك .. يااخي انتا غير .. وقفتك معانا يوم حفل التخرج وجاهة مابعدها .. ياانهم الدفعات الي قبلنا حينقهروا انك اعطيتنا الشرف انك تتخرج معانا من دونهم كلهم .........
    • ...........(انقهر مراد منه ومارد بس قبل مايروح محمد عنهم وهو يمثل عليه انه فخور فيه) لحظة صح كنت ابغى اسألك !! كنت ناوي اعمل عزيمة بمناسبة التخرج وابغاها كلها ماكولات بحرية .. فعاد انا صاحبك لا تبخل عليا... اتوصط لي عند جدك و زملائك الصيادين .. ترى انا ماأثق في احد غيرك ابغى السمك انتا تصيده ليا من يدك ... (ويوجه نظرة خبيثة لعبود جنبه الي يحاول بصعوبة يمنع الضحكة انها تطلع من فمه ورجع وطالع في محمد الي كان بعيد شويا عنهم وظهر عليه ان ثقته في نفسه اهتزت وبدون ولا كلمة دار وجهه عنهم وكمل طريقه وكملوا الاثنين ضحك لانهم نجحوا مرة تانية بطريقة غير شريفة في جرح مشاعر محمد)

    للاسف حصل الي ماكان محمد يتمناه ونكد عليه مراد زي العادة ...ما فكه من شره حتى في هذا اليوم المميز ... اليوم الي كان محمد يحلم بيه طوال حياته ... يوم تخرجه واستلامه وثيقة تخرجه وحصوله على درجة البكالريوس من الجامعة .. الشهادة الي تضمن له الحصول على وظيفة احلامه .. الي تخوله يرد الجميل لجده و يجبره يقفل محله ويرتاح بعد سنين التعب ... وتريحه هو كمان من الشحططة من شغلة لشغلة .. من صياد سمك في الصباح عند ابو صديقه فيصل وصديق جده العم صالح .. وفي المساء من جرسون لكاشير وموظف استقبال و مندوب مبيعات .. حتى انه في اوقات الفراغ يتكس بسيارته من جدة لمكة او العكس ... وكل هادي الشغلات ماكانت تسبب مشكلة لمحمد بقدر الشغلة الي اجبره جده عليها ..... ففي اعتقاد جده .. بما انه سليل اقدم عائلة صيادين في جدة ... بالتالي عليه ان يزاول نفس مهنة اجداده .. مع انه كان يشك ان ابوه من قبله كان يزاول نفس المهنة زي ماكان جده يحكيله ... الا انه ماقدر يعصي لجده امر .. واستمر في مزاولة هذه المهنة عند صديق جده الي ماقصر معاه ... وكانت فرحته الدبل لمن اصبح عمل محمد عنده دافع لابنه فيصل للعمل معه رغم صغر سنه على عكس بقية اخوانه الكبار .... وفيصل على عكس محمد اصبح غاوي للشغلة مع السنين .. وكان دايما يحلم يطور عمل ابوه .. ويبني له اسطول مراكب لصيد السمك .... لكن محمد حلمه اقتصر على التخرج من الجامعة والعمل في وظيفة مستقرة توفر له الدخل الي يعينه على توفير معيشة كريمة له ولجده ... وهاهو قاب قوسين وادنى من تحقيق هذا الحلم ... بقي منه الحصول على الوظيفة ... استمر محمد في طريقه يخطط لمشاريعه للايام القادمة ...الا ان حصل فيصل جي في وجهه ....الي اول ماشافه .... رخى عينه واكفهرت اساريره مثل الي يحمل اخبار سيئة..انصدم محمد ....
    • اشفيك يابعدي .... لا تقول صار ........ انا ياما حذرتك (بس بقطعه فيصل)
    • انا نجحت ...(ونظرة البؤس لسه في عيونه)
    • اجل اشفيك ..(وقف قلب محمد ) ... انا ؟؟!! (استغرب محمد لانه كان متأكد من نجاحه ..)
    • (بصوت متقطع ) انتا......(كان قلب محمد يدق بسرعة مع كل كلمة يقولها ) ... انتا جبت .....(وفي نفس واحد) امتياز مع مرتبة الشرف ....مبرووووووووووك ياحيوان (بكل صوته)
    وبدأ يضحك على بال ماا ستوعب محمد الصدمة لانه بعدين بدأ يكفخه لين ما رماه على الارض بكل قوته وفيصل لازال يضحك ومحمد برضه يضربه وبعدين وقف وحضن فيصل وبدأ يضحك هو كمان .... لكن لمن حس فيصل ببلبلة في رقبته من وراء بعد محمد عنه ..... واستغرب لمن حصل الدموع في عيونه .....
    • لحووول .. انتا وبعدين معاك .... طالعلي زي الحريم تفرح وتبكي .. قوم ..قوم ياحظي .. جيب وثيقتك .. واتحرك قدامي .. ورانا شغل ..
    • لا فيصل .. الله يخليك .. هادا اليوم الي كنت احلم فيه طوال عمري .. انا مقدم في كذا شركة ووعدتهم اجيب لهم الوثيقة اول مااطلعها ..... وهما وعدوني خير...
    • استحي على وجهك ... الشركات دي ماراح تطير .. المفروض تقول اروح ابشر جدي ..اسوي .. افعل ... يااخي انتا ليش مو زي الناس ... الي زينا يفكر اليوم يسوي حفلة .. يسافر ..يحتفل بعد سنين الكرف الي عشناها ...
    • الي يسمع عاد .. يقول متخرجين طب .. ولا ماخدين الدكتوراة ....
    • لا الله يخليك ....دكتوراة ايش ؟؟!! نحن ماصدقنا نخلص.....
    • عادي .. الي جاب البكالريوس يجيب الماجستير والدكتوراة ..... انتا قدها وقدود ياابو محمد ...
    • في الاحلام ياابو فيصل ... اتحرك دحين خلصنا ورانا شغل .....
    • فيصل عن جد اكلمك ... اعتذرلي من عم سعيد عن اليوم ......
    • ايش اعتذرلك ؟؟!! يااخي لو هو عذرك انا مني عاذرك ....محمد امس واحد من العمال يقول انو البلدية شاكة انو في بضاعة فاسدة في البنقلة .. الله يخليك .. لا تسيبني اليوم ... لاتنسى انو فكرة اننا نبيع بضاعتنا في البنقلة فكرتي انا وانتا ....ولو حصل شيء.. الوالد ماراح يلوم احد غيري ...
    • ياابويا انتا ليش شاكك في نفسك البضاعة الفاسدة حتكون عند المخالفين الي يبيعوا بطريقة غير قانونية ... مو عندنا .....
    • محمد(باصرار)... تعال نروح .... علشان لاصار شيء لا سمح الله نكون موجودين ..
    • (بيأس) ياللــــــــــه !! قول تبغاني معاك !! علشان افرع لا بدأت تتضارب ..قولها بصراحة...
    • والله انا حار.. دمي يفور بسرعة .... انتا ماشاء الله عليك تعرف تتفاهم ....
    • يلا يلا .. مشينا .. لا نستبق الشر قبل وقوعه..... اتحرك ..(واتحرك باتجاه المدخل بس فيصل جره من ياقته)
    • فين؟؟فين ؟؟!! اشوفك نسيت تأخد وثيقتك ..الي كنت ميت عليها ..
    • ايش اسويلك انتا ؟؟!! لبختني معاك .. (ورجع لمبنى القبول والتسجيل)

  14. #13
    عم اسماعيل يدخل البيت ..شايل زنابيل .. زي العادة بعد مايقفل دكانه ... وقعد شويا في القهوة .. شيش ونعنع ... واداها فول وكوارع لين ماحمد ربه ... وقام وفي طريقه دار في السوق يجمع له مقاضي الي يحتاجها والي مايحتاجها ورخص سعرها ... ولحق خورشيد الي سبقه على البيت بعد ماقفل الدكان...
    • (ينادي )خورشييييد ؟؟ فينك ياولد؟؟ (وكمل بدون مايرد عليه خورشيد ) تعال شيل الزنابيل من هنا.. (ويطلع ايراد اليوم من محفظته علشان يعده بس يسمع التلفون ويقوم يرد بخطواته البطيئة وهو ينادي وتحرطم على خورشيد ) يا ولد منتا سامع التلفون.. الله يصنجك ... مدري فين مختفي الله يقلعك ... (ويرفع السماعة ) الووو؟؟ ميين ؟؟
    • (صوت حرمة كبيرة) هادا رقم بيت اسماعيل الصياد ياابويا ؟؟
    • ايوا هادا بيته ..
    • انتا اسماعيل الصياد ...
    • معااااااكي اسماعيل الصياد ..خير ياامي ابشري ؟؟
    • أي خير .. ياابويا ... حرام عليكم .. والله ربنا حيوريكم ..يلي ماتخافو ربكم .. حسبي الله عليكم ونعم الوكيل..
    • (يقاطعها عم اسماعيل وهو مفرقز عينه مفجوع من الهجوم المفاجئ) ...... ايشبك ياامي ؟؟؟ عسى ماشر ؟؟ ليش تتحسبي علينا ؟؟ ايش سوينالك ؟؟
    • تسوي نفسك مو عارف .. حرام عليكم يابيت الصياد .. اتقو ربكم .. طول عمركم كنتو اهل خير وكرم .... ايش صارلكم على اخر العمر ؟؟ (في ديك الاثناء كان عم اسماعيل يحاول يسكتها ويستفهم منها لكن هي ماكانت تدي مجال ) لكن شوف انا اقولك يااسماعيل ياصياد .. والله ربنا ماراح يسيبك .. والدنيا كما تدين تدان .. والي سويته في اختك راح يصير فيك انشاء الله بإذنه تعالى.. وقول نعيمة قالت .. يلي مافيكم مروة راميين الحرمة دي الرمية وهي عندها خير من نعيمه .. حسبي الله عليكم ونعم الوكيل ... مااقول الا حسبي الله ونعم الوكيل فيكم يابيت الصياد ...(وسكتت تأخد نفس فانتهزها فرصة عم اسماعيل)
    • اختي ؟؟ ايشبها اختي ؟؟ ليش تتحسبي علينا ياحرمة يامجنونة انتي ؟؟ فينك ؟؟ فين رحتي ؟؟ (ملبوخ كأنه صدمه قطار)
    • ماعندي كلام تاني اقوله ..(الحرمة بدات تناهج تعبت من الانفعال) زي ماقلتلك .. اذا انتا اليوم بقوتك ..بكرة بعدو اولادك انتا راح يسوو فيك نفس العملة ..
    • أي عملة ؟؟ ياحرمة فهميني ؟؟ ترى والله مني فاهم عن ايش بتتكلمي ؟؟
    • تسوي نفسك مالك دخل ها؟؟
    • والله .. مني عارف ايش تقولي ؟؟ انتي مين اصلا ؟؟ وايشبها اختي ؟؟ وليش هي ماتكلمني ؟؟ لا يكون انتي محامي الدفاع عنها ؟؟
    • منتا عارف ايشبها اختك؟؟ (بسخرية ) متى اخر مرة شفتها ياصياد ؟؟
    • (ورد وهو مكسوف) والله زماااان .. يمكن اخر مرة في العيد ... انتي عارفة الواحد كبر وثقل ومو سهل عليه يضرب مشوار لبيت ولدها في شمال جدة كل يوم ...
    • هاه!! شمال جدة ها ؟؟!! اختك ياصياد مو في شمال جدة ..
    • اجل فين؟؟ نقلت عند ولدها الي في الفيصلية ؟؟
    • لا والله من جد انك مو داري عن شيء (وبنرفزة ) شوف اخرة قطيعتك لاختك ياصياد ايش سوت ... حرام عليك ياشيخ ..
    • ياشيخة لاترجعي تتحسبي .. كملي ايش الهرجة .. ايشبها اختي عزيزة ..
    • شوف ياصياد .. الحكاية وما فيها ..
    • ايوا ..(المسكين بدأت رجله تتنافض لانه واقف من اول) ..
    • بنت بنتي ود .. اشتركت في هادا ايش اسمو .. مركز صيفي .. علشان الاجازة .. يلعبوهم ويحفظوهم قرآن في نفس الوقت .. وكمان يأخدوهم رحلات للمستشفيات ودار الايتام والمسنين ..
    • ايوا؟؟ (دوخته الحرمة ايشله دحين في بنت بنتها!!)
    • امس البنت تحكيني ... انهم ودوهم لمكان اسمو دار النقاهة .. فيه كبار وصغار الي امراضهم مالها علاج .. ولا عجايز .. يعانوا من الشيخوخة الله يجيرنا ... رموهم اولادهم فيه .. قال ايش علشان مو قادرين يقوموا فيهم .. دار... يلي ماتخافو ربنا... قايم على الي يبقى من مستشفى الملك فهد ولا الي يجودوا لهم به اهل الخير ..حسبي الله ونعم الوكيل ..
    • ياحرمة كملي .. خلصينا ...
    • ايش اكملك ياولد الصياد ... البنت جاتني تحكيني على الناس الي شافتهم هناك .. انا الدمعة فرت من عيني وانا سمعت بس مو شفت ......(وبدأت الدموع )...
    • طيب ياامي وبعدين كملي .. الله يهديكي بس..
    • الله يهديكم انتو ... يلي راميين بنتكم دي الرمية ... الحرمة ياناس عندها ملايين .. تعيشها العمر كله معززة مكرمة ... رامينها دي الرمية ... حسبي الله عليكم ونعم الوكيل ...
    • ايش؟؟؟؟؟؟ انا اختي مرمية هناااك؟؟ ايش تقولي انتي ؟؟
    • زي مابقولك ياصياد .. واقولك هي تاني علشان لو من جدك ماتدري ... علشان تروح تلحق اختك ... عرضك .. الي المفروض انتا عزوتها .. روح شوف اولادها الي مافيهم خير ايش سوو فيها ...
    • تعالي تعالي !! وانتي ايش دراكي انها اختي ...مو يمكن واحدة تانية ..
    • لا وانا تفوت عليا .. بعد ماقالت لي البنت الاسم .. خليت ولدي يروح يتأكد .. وطلعت فعلا هي بعينها .. عزيزة بنت ابراهيم الصياد ماغيرها ...
    • ...... (انصدم عم اسماعيل وجلس اتربع في الارض لان رجله ما صارت تشيله) يعني انا اختي في دار المسنين ؟؟ دار المسنين يا اختي ؟؟ ضاقت عليكي 7 بيوت وصرتي في بيت المسنين !! (بدأت الدموع تسيل على وجه الشيخ الكبير المصدوم ) ..
    • لا تقعد دحين يااسماعيل .. روح ياشيخ الحق اختك .. خدها عندك... لمها في بيتك .. عززها كرمها في آخر ايامها .. خليها تموت عندك .. وترى هي عندها خير اصرف عليها منه ... لاتخليها لاولادها الي مافيهم خير .. قوم .. والله ماادري انك ماتدري .. ولو انو الحق عليك برضو الي ماتسأل عنها المدة دي كلها .. بس ايش نقول ... حسبي الله ونعم الوكيل على من ظلم .. حسبي الله ونعم الوكيل على من تجبر .. والله ياناس هادا اخر الزمن ... الله يستر علينا بستره ...(ورخت السماعة)
    • (وقف الشيخ العجوز وهو مازال شايل السماعة وجسمه كله يتنافض من القهر) محمأأأأأأأأأأأأأأأأأأأأـــد .. محمــــــــــــد ؟؟؟
    • (جاله خورشيد المستغرب من حالة الرجال الكبير ) مممــحمد مافي هنا بابا !!
    • فينه ؟؟
    • ما يدري !!
    • ديمنك ماتدري عن شيء ...... روح طس من وجهي ..... (ويدور شيء في جيبه ويطلع الجوال السهل الاستعمال الي جايبه له محمد ويطلع النوتة والنظارة حقت القراية ويطلب الرقم ) محمــــــــــد ؟؟ فينك ياواد ؟؟؟ تجيني دحيييييييييين سامع !! (وينهي المكالمة قبل مايسمع رده )

  15. #14
    فاتن : زميلة جمانة في المركز
    الاخصائي : في المركز
    ميلاني : الشغالة الهندية
    صالحة : صديقة الجازي
    سهى: صديقة الجازي


    في الرياض..في غرفة المعيشة في بيت ابو سلطان...

    Riyadh_Nacht

    • ماما الله يخليكي .. لاتضيعي عليا مستقبلي .. لا تضيعي عليا حلمي .. الله يخليكي بسرعة قبل ما يفوت عليا الوقت...(كانت فرهاد تبكي لامها)
    • حسبي الله ونعم الوكيل ... يابنتي انا اضيع عليكي مستقبلك ؟؟ في ام تسوي في بنتها كدا ؟؟ (عليا تفهم بنتها)
    • طيب ايشبك ؟؟ ماسويتي شيء لين اليوم .. والتسجيل خلاص حيبدأ بكرة .. تبغي تضيعي وقت .. علبالك راح انسى ها ؟؟ (وتزيد بكى)
    • صلي على النبي يافرهاد .. وخلينا نتكلم بعقل .. جامعة الرياض ماتقل عن جامعة جدة شيء .. ان ماكانت كمان احسن منها .. ليش ياامي تبغي تهجولي نفسك؟؟
    • جامعة الرياض مو اكيد تقبل نسبتي في الطب .. لكن في جدة انا متاكدة راح انقبل .. اخت صديقتي انقبلت هناك السنة الي فاتت .. واهيه ماشية معاها ...
    • طيب الله يهديكي ليش ما شديتي حيلك وجبتي نسبة تدخلك الي تبغيه هنا؟؟
    • دحين لاتقعدي تقوليلي دا الكلام الي ماينفع دحين ..........شوفي... انا دايما اعاندك صحيح .. وبعض الاحيان مااسمع كلامك .. بس دحين انا اعتذرلك واوعدك اني عمري مااخلفلك رأي بس لاتقعدي تقهريني وتعانديني زي دايما .. الله يخليكي راح اسويلك الي تبغيه .. راح اسمع الكلام واسوي كل شيء ......(ورمت نفسها على حضن امها تبكي لين ماقطعت قلب امها )..
    • خلاص ياماما .. هدي نفسك ... قوم مشاري جيب لاختك كاسة مويا .......(وعفس مشاري الي منسجم في البلي ستيشن وجهه ) ما تسمع ؟؟!! هيييه !! اكلمك !!
    • يؤؤؤ !! طيب !! مدلعة واحدة !! ليش ماتقوم بنفسها ؟؟ (وعلى خرجته للمطبخ دخل ابوه )
    • وايش فيه ذا ؟؟ والله اذا تسمع كلام امك لاواريك...(يهدده ابوه)
    • ...........
    • بسم الله الرحمن الرحيم...ايش جايبك انتا دحين؟؟(استغربت عليا رجعة زوجها بدري وحاولت تظهر نفسها طبيعية واختلست نظرة لفرهاد الي لحقت مسحت دموعها قبل ماابوها ينتبه لها)
    • خير .. ما تبيني ؟؟ ارجع ؟؟اخرج؟؟
    • لالا!! كيف ماابغاك يانظر عيني ؟؟ بس مستغربة رجعتك بدري!!
    • ابدا (وجلس قدام التلفزيون واعطى شماغه لفرهاد الي قامت تتناوله علشان تعلقه في الشماعة) تعرفي مااحب اطول في الزواجات .. حضرت وعملت الواجب ورجعت ... مو مثل ولدك .. مو مخلي لا شباب ولا شيبان .. مديها رقص وبلوت ..... مدري متى راح يركز ولدك دا ....
    • بسم الله عليه ولدي العقل كله ..
    • باين ... (ويطالع في مشاري الي رجع للقيم بوي حقته ومندمج فيها) اهه !! اتفضلي !! شايفة اولادك ؟؟!! كل مين يغني على ليلاه .. ياريتك ياشيخة جابتلي بس بنات ... يرفعوا راسي زي فرهاد .. مو زي اولادك دول ...(ويطالع عليه مشاري بحقد معترض على كلام ابوه بس طبعا مايقدر يقول ولا كلمة)
    • (طبعا عليا حزنت على مشاري ) عاد ماجيت الا على فرهاد ... (وبسخرية كملت) ياريتك بس تدري ..(عليا كانت مترددة وخايفة من ردة فعل زوجها لو عرفت برغبة فرهاد انها تكمل دراستها لوحدها في جدة ..تعرفه بدوي ودمه حامي)
    • وشفيها بنتي .... تراها الا شيخة البنات .... حتشوفي بكرة ...حتصير دكتورة قد الدنيا ....
    • (فرحت فرهاد الي كانت تسمع كلام اهلها والمغص يقطع بطنها لمن جات سيرتها) صحيح بابا ... تبيني اصير دكتورة ....
    • دا منى عيني يابنتي .... افا عليكي بس ...هو انا في ديك الساعة .... لمن تصير بنتي فرهاد دكتورة .... انتي بس شدي حيلك وانا ابوك .... وتشوفين .. لو لزم الامر اوديك لندن مااتأخر .......
    • (فرقزت عيون الام وبنتها من الدهشة وفرهاد الي ماقدرت تتمالك نفسها من الفرحة حضنت ابوها لين ماخنقته) انا احبك يا بابا ......انا وايد احبك... (ونزلت دموعها وهي في حضن ابوها)
    • انتي اصلا غبية ...... لو كنتي جيتيني من اول ... كان وفرتي على نفسك حرب الاعصاب الي عملت لك هي امك... (وربت على بنته الي ماصدقت انو حلمها على وشك يتحقق يحاول يهديها ) يلا خلاص قومي شوفي التسجيل وش يبيله ؟؟ لو لازم من هناك !! شوفي بسرعة نشوفلنا طيارة الحين ...يلا قوميييي...
    • (ضحكت فرهاد وقامت ) طيييراااااان ..(وطارت على غرفتها) ..
    • (عليا المستغربة) ياسبحان الله !!
    • (رد عليها زوجها) خير؟؟
    • ابدا سلامتك !! بس الي يشوفك دحين مايصدق انك الي دايما توصيني ومجنني ...فرهاد .. فرهاد .. بنتك .. انتبهي على بنتك ...دحين تبغى ترسلها جدة تدرس لوحدها ؟؟!! ولا تعال ؟؟ لا يكون ناوي ننقل كلنا هناك؟؟
    • لا فين تنقلي ؟؟!! خليكي مكانك.. شوفي .. انا اقولك .. صحيح .. انا ملتزم .. ومحافظ على العادات والتقاليد .. لكن تحفظي والتزامي عقلاني .. انا ربيت .. وكبرت .. وواثق في تربيتي .. ومدام الانسان عنده طموح ماراح اوقف في طريقه .. سواء بنت ولا ولد ...
    • ........(وابتسمت له عليا فخورة فيه وفرحانة انها عدت على خير على غير المتوقع )

  16. #15
    NightFountain
    1303.nat.p8.n605
    في غرفة تشبه غرف المستشفى ...دقت جمانة الباب ودخلت ... وابتسمت للست العجوزة الي ابتسمت اول ماشافت عيونها جمانة وزميلتها داخلين عليها ....
    • السلام عليكم .......معليش الوقت متأخر صحيح .. بس حبيت اسلم عليكي قبل ما امشي ... (وقربت جمانة على الست ذات الوجه الملائكي الي مستحيل احد يشك انها مريضة ولاحظت ان في يدها ورقة وقلم ).. ايش كنتي قاعدة تسوي ؟؟ ممكن اشوف ؟؟
    • (فاتن زميلة جمانة) جمانة !! يلا قلتي حتسلمي بس !!
    • دقيقة !! (وشالت الورقة في يدها تقرأ بعد ماسمحت لها الحرمة العجوزة انها تقرأ) وبدأت تقرأ بصوت عالي اول ...
    تكفين يا طيور حرار افزعيلي***أبي عن ديــــار الأهل منك الأخبــار
    تكفين حومي فوقهم وارجعيلي***وإلا إن حصل لك حومة داخل الدار
    تكفين حول ابيوتــــــهم دوري لي***سبعة فروخ يـوم أخــليهم صغار
    شوفي ضناي وعودي وانكفي لي *** وشلونهم ياعلهم صــــــاروا كبار
    نسوا دفاي ونومهم في شلـــــيلي***ايش علاماهم يجعلهم طول الأعمار
    قولي لهم إن إمـــكم له عويــــــلي***شهور و سنين دمعـــها دوم مدرار
    وقولي لهم إني علـــــى طول ليلي *** أنوح ولــــيا قرب الصبح أنهار
    وقولي عـــــيونه دايم له همــــيلي***تبكي لو شافت من الناس زوار
    كل يوم أقول بكرة احد فيهم يجي لي***راحـــت أيام مافيهم واحد زار
    وأنا اللي من سبــة سوات الحليلي ***حالـــــي تردت كل ماله وتنـــهار
    وفرقى ضناي اللي تردت بحــــيلي***كأني على شوفتهم اصلى على نار
    ياويلي كان الله عــــــجل رحـيلي*** وأنا لي ســـنين أبي لهم أخبار
    ياعــــونة الله من يبي يرتكــي لي***جارت علي بأمر الولي كل الأقدار
    تنكروا من يدخــــلون الدخـــيلي ***واللي بوسط ديارهم يامن الجـــار
    قولي لهم ياطــيور قلبي علـــــيلي***الله يكافي قلوبهم صــارت أحجار
    وأنا اللي لبراق الخيال استـــحيلي***وأقول ياعــــل (.......) للأمطار
    تكفين وسط ديارهم صـوتي لي***شوفي عسى لاسمي مع الناس تذكار
    وقولي لمن نسيانهم يستـــــحيلي*** يااللي نــسيتوها ترى الوقــت دوار
    ياهيه ياللي بالسما لك هديلـــي*** ردي خـــــــبر تكفين يكفيني أمرار
    شوفي أكا اللي نومهم في شليلي *** من آذان المغرب لوقــــت الأسحار
    شوفي أكا اللي ماهتني في مقيلي *** إلا بمقيل معــــــــــهم كبار وصغار
    وقولي لهم إن كان حـــملي ثقيلي *** مره يجــون وعقبها شي ماصار
    وأنا يـــــــتولا ني كريم جلــــــيلي *** ياعلــــني في جنته وسط الأبرار

    (منقولة من الايميل قصة حقيقية مع الاعتذار لصاحبها على الاقتباس والتغيير مراعاة لتغير اللهجات )

    ( وخلصت جمانة القراية ورفعت عيونها الي كلها آلم للسيدة الحنون الي وزعت الحنان حولينها بدون ماتقوم من سريرها كل المرضى والممرضين والممرضات يعرفوها وكل الموظفين والموظفات في مركز النقاهة يعرفوها حتى المتدربات مثل جمانة اهتمامهم بها كان غير عن بقية المرضى ...علشان كدا تحب جمانة قبل ماتمشي تشوف السيدة دي الي الله العالم ايش الي جابها هنا !! المركز مليان بالحالات الي تقطع القلب .. لكن الله ما يخلي الحمدلله بوجود اهل الخير .. لكن هادي الست ياما كانت تحير جمانة .. رغم ابتسامتها الي ترد الروح .. كان واضح ان قلبها مليان جروح .. كان واضح انها مو محتاجة فلوس من هيئتها الوقورة وملابسها وفرش سريرها والغرفة الخاصة الي ساكنتها والخدامة الهندية الي مرافقتها وسبع اولاد ؟؟؟؟؟ استغربت جمانة انها اول مرة تلاحظ الامور دي كلها !! ياترى ؟؟ مدام عندها الخير دا كله !! ايش الي جابها هنا ؟؟ ايش الذنب الي اقترفته علشان تترمي الرمية دي وهي عندها 7 اولاد ؟؟ كل دي الاسئلة سألتها جمانة بعيونها للست العجوز.. الي ردت عليها بمجرد ابتسامة ... في اعتبارها تكفي وتزيد .. )
    • جمانة ترى انا رايحة (عصبت فاتن وخرجت )...
    • (ولا اهتمت لها جمانة ) عندك سبعة اولاد ؟؟
    • ......(ابتسمت لها الست العجوز بدون ماترد زي كل مرة تجي جمانة تقرقر فوق راسها من اول يوم اتعرفت عليها... من اول ما بدأ تدريبها في دا المركز كأخصائية اجتماعية واصرت انها تكون المسئولة عن علاج هادي الست بس الادارة لسه ما بتت في الامر لان حالة الست دي مرة صعبة وجمانة لسه متدربة وتحتاج وقت تمارس مع مرضى تانيين )
    • (وزي العادة كملت جمانة كلامها بدون ما تنتظر رد منها ) وفينهم عنك ؟؟ ليش مااشوفهم يزوروكي ؟؟ (اختفت ابتسامة السيدة العجوز وسرحت عيونها .. لكن جمانة ماكانت تبغى تعطيها مجال تسترسل في قوقعتها ) تعرفي لو كنت مكانهم ماكنت حضيع يوم واحد بعيد عنك .. (وحضنتها) انتي اطيب من مامتي كتير .. (ورخت صوتها كأنها تقولها سر ) الحمدلله انها مو هنا ولا كانت بهدلتنا انا وانتي .....(وضحكت وضحكت معاها الخالة الي كان نفسها تسمع صوتها ) شوفي ياخالة .. انا حاسة انو انا وانتي حنكون مرة اصحاب .. وانا نفسي نكون اكتر ..وراح احاول مع الادارة تخليني مسئولة عن حالتك .. بدل المجنون المعقد الي يبغوني استلمه ... بس انتي الله يخليكي ساعديني ها ؟؟ اتفقنا ؟؟ (وابتسمت لها الست العجوزة على صراحتها وجرائتها المتهورة ) .. يلا دحين اخليكي .. علشان تنامي .. اشوفك بكرة ياقمر .. اموووه !! باي !! باي ميلاني !!(ودعتها وودعت الشغالة الهندية واتجهت للباب علشان تفتحه بس سمعت صوت صريخ )
    • فينها ؟؟؟؟؟؟ فين اختي ؟؟؟؟ اقولكم فينها ؟؟؟؟طلعوها يااولاد الكلب!!!
    • ياسيدي الله يهديك والله لو ادري انك تبغى تسوي كدا .. ماجبتك ..
    • مو بكيفك تجيبني ..فاهم ؟؟ شوف انتا (يكلم الاخصائي) وريني فين اختي .. لا اخليها لكم يا قاتل يامقتول ...
    • (استغرب الاخصائي من العجوز المكحكح دا و الي لساتو يعافر ويهدد كمان) يا عم الله يهديك .. ما يصير الي تسويه دا كله .. ماحد قلك لا... حنخليك تشوف اختك .. بس الدنيا ليل دحين والعنابر مليانة حريم ... الصباح رباح ياعم الله يهديك ...
    • لا صباح .. ولا مراح .. دحين ... دحين اشوفها .. مايخصني في حريمكم .. انا عليا في اختي وبس ...
    • (وطالع الاخصائي لمحمد بيأس) الله المستعان ... دقيقة بس اشوف الممرضات ...
    • طيب يا سيدي .. ناقصين فضايح نحن ؟؟ (يلوم محمد جده )
    • انطم انتا ...فينو دا ؟؟
    • (رجع له الاخصائي بسرعة بعد ما كلم الممرضات الي اتلموا يتفرجوا ) اتفضل ياعم .. بس الله يخليك لا تطول ..
    • عاد انا الي ميت فيكم ابغى اقعدلكم .. (ومشي وعدى جمانة الي كانت واقفة برضه مستغربة من الموقف واستغرابها زاد لمن وجههم الاخصائي لغرفة مريضتها المفضلة .. دخل العجوز ولقى فعلا اخته ...شقيقته .. الي طلع بها من الدنيا على السرير .. كانت الشغالة قاعدة تحضرها للنوم بعد ماخرجت جمانة ..) عزيزة ... (نادى العم اسماعيل اخته الي ماكانت منتبهة لدخوله وبمجرد ما شافته ارتسم تعبير جديد اول مرة تشوفه جمانة على وجهها من بداية فترة تدريبها ...... تعبير كغيره يغني عن أي كلام ) .............................. (حتى العم اسماعيل نفسه الي كان دوبه يعافر ويضارب .. خانه لسانه وماقدر ينطق بكلمة وهو يشوفها .. تأنيب الضمير .. والقهر ..أكلوا قلبه .... بس اخيرا قدر ينطق وهو مرمي على الكرسي جنب سريرها والعبرة في لسانه) سامحيني يااختي .........(وماقدر يغالب دموعه الي سبقتها دموع اخته المكسورة واخوها الوحيد يشوفها بهذا الشكل بعد ما انهك الزمن قوة كلا منهم وصاروا على ماصاروا عليه )
    مشهد الرجال العجوز وهو يبكي .. يبكي الصخور الميتة .. فكيف بالقلوب الانسانية الي تشوفهم؟؟ الشغالة وجمانة ومحمد والاخصائي الي حالة كل منهم حالة ...

  17. #16
    في سيارة اسامة قدام مركز النقاهة ومعاه الجازي وهنادي... قالك كان يبغى ياخدهم يعشيهم بعد مايمروا على جمانة .. علشان يسلوا الجازي ويغيروا نفسيتها...
    • (قفل الجوال من القهر وكان حيتهور ويضغط بوري ) فينها الي ماتستحي دي ؟؟ تبغاني انزل اجرها من شعرها ؟؟ وحدة فيكم تنزل تشوفها ؟؟
    • مالي انا اخاف (هنادي )
    • (الجازي) دحين انا ادقلها ...
    • يعني حترد عليكي انتي ... دوبي كاسر جوالي عليها ادق وماترد .. ترى واحدة فيكم تنزل احسن ماانزل انا .. وماادري ايش اسوي فيها ؟؟
    • (الجازي ) ترى اذا حتقلبها خناقة معاها رجعونا البيت واتخانق معاها هناك براحتك ..
    • خليني بس اشوفها ....شوفيها الحمارة جات ...
    • (جات جمانة وركبت جنب الجازي وراء لان هنادي جالسة قدام... جنب اسامة) ...........
    • لا والله جنابك (استلمها اسامة قبل ما يمشي) نقعانا تحت زي عبيد ابوكي ...
    • شوف اسامة ترى فيا الي مكفيني مو ناقصتك انتا كمان (وانهارت بكى وارتمت على الجازي وانفجعت عليها هنادي ونطت لهم وراء تشوف اختها .. حتى اسامة نفسه انفجع وندم على طريقته في توبيخها )
    • (الجازي) ايشبك جمانة ؟؟ فهمينا ايش صار؟؟
    • (هنادي) خلاص يااختي !! (وطالعت في اسامة ) عاجبك كدا ؟؟ (وبدأت هي كمان تبكي على اختها الي حضنتها )
    • (اسامة) انا اسف جمانة ما كان قصدي !! ايش في؟؟ ايشبك؟؟
    • (جمانة) لا ماصار شيء (وهي حاضنة هنادي ) خلاص هنادي.. اهه ... انا ماابكي ...
    • (الجازي) والله انتو تشكيلة تحف ماحصلتو .. قالبينها ملحمة مزبوطة .. الاخوات قالبينها مناحة .. والاخ الي كنت احسبه حيمسك سكينة بعد شويا يفقع بها بطنك قاعد يتعذر ويتأسف .. (وهجمت على جمانة ) وانتي السبب في كل دا .. ماقلتي ايشبك ؟؟ ايش صار ؟؟ لا تقولي و لا شيء
    • والله ولا شيء !! (ومسحت دموعها بالمناديل الي في يدها ) حالة مريضة عندي بس اثرت فيا ..انتو عارفين المركز مليان حالات وانا مااستحمل ... (وبدأت الدموع تهطل مرة تانية بس المرة دي هنادي جنبها مستعدة للدعم .. طالعوا اسامة والجازي على بعض شايلين هم الطلعة الي باينة من اولها )

    في داخل المركز مرة ثانية..
    • (عم اسماعيل بعيونه الحمراء من شدة الانفعال ويخبط على مكتب الاخصائي) انا مالي شغل .. اختي انا اولى فيها .. ما عليا منك ولا من عشرة زيك .........
    • (الاخصائي المبتلش ) ياعم الله يخليك افهمني ...ويطالع في محمد يطلب منه يساعده في افهام الرجال العجوز المحكم دماغه) ياجماعة افهموني انتو ماترضوا انكم تضروني .. انا مالي ذنب ... انتو لو اخدتوا قريبتكم اليوم بدون اذن الادارة راح تضروني ... ترضالي ياعمي ؟؟ (يحاول يتفاهم معاه) بكرة على عيني وراسي تعال وراح اكون مكلملك المدير ومجهز لك خطاب التعهد توقعه .. واذا تبغى بنفسي اوصلك لين بيتكم ...
    • (حاول محمد) خالص ياسيدي ... سمعت ايش قلك الرجال ؟؟ نحن عادي نقدر ناخد عمة عزيزة متى مانبغى ... بس راح نضر الرجال وهو ماله ذنب .. معليش ياسيدي استحمل لبكرة والصباح رباح ...
    • .............. (مارد عليهم الرجال العجوز وقعد يقلبها في راسه مستصيب فكرة وجود اخته في هذا المكان بعلمه ولو حتى كم ساعة لين ما يطلع الصبح ... لكن العين بصيرة واليد قصيرة .. والاثنين اعتبروا طول فترة سكوته موافقة وما استنوا) ........
    • خلاص ياسيدي يلا ...... علشان تلحق تنام ونجي من بدري .......يلا ...
    • (بس الاخصائي قال قبل مايوصلوا للباب ) لحظة يامحمد !! خليه يسلم على الست عزيزة قبل مايمشي اذا يبغى ؟؟
    • .........(وابتسمله محمد يشكره والعم اسماعيل مشي مع حفيده لغرفة اخته بخطواته الثقيلة المهمومة ......الله يعينه على الكم ساعة دول قبل مايطلع الصبح)

  18. #17
    دخلوا جمانة والجازي الغرفة الي صارت تضمهم هما الاثنين من بعد انتقال الجازي لبيت عمها ... الغرفة الي ياما نامت فيها لمن كانت تحب تبات عند بنت عمها جمانة ... الغرفة الي مااتصورت في يوم من الايام انها حتصير غرفتها الخاصة... عمها وزوجته كانوا مخططين يوفرولها غرفة خاصة بها علشان يكون لها خصوصيتها خاصة ايام الدراسة ... وتلافيا لمضايقات جمانة المتخرجة الجديدة لها .. لكن جمانة رفضت واقنعت اهلها بدون اعتبار لرأي الجازي بتأجيل مشروع الغرفة الجديدة للجازي فترة ..
    • (رمت الجازي نفسها على السرير الكبير) آآه !! يا بطني !!حتنفجر... الله يصيبكم انتي واخوانك ... راح تموتوني من الفطصة .....
    • (جلست جمانة جنبها ) بلا دلع !! انتي تسمي الي اكلتيه هادا أكل ؟؟ ياامي انتي مو ادمية ؟؟ انتي هيكل عظمي شوفي عظامك باينة !! يبغالك كل يوم زي كدا خرجة علشان ترجعي اولد الجازي "الجازي القديمة" ...(وقامت تبدل ملابسها ... وهذا مااعطى للجازي فرصة تفكر وتتأمل وتتذكر "Old الجازي" ... الي رغم انه مايبين في جسمها لكن كانت اول من يجلس على السفرة حتى قبل مايتجمع الكل ...وماكانت تقوم الا وهي مخلصة على الاخضر واليابس ... اتذكرت لمن كان مازن اخوها الكبير الممتلى الجسم يقارن بين اكله واكلها ..... ويحقد عليها لمن يبين عليه ولا يبين عليها ... اتذكرت اخوها الصغير زياد الي دايما كانت تسرق حلوياته والمعركة الي كانت تصير بعد مايكتشف انها هي الي سرقتها ...... افتكرت امها الي ياما كانت تخاصمها علشان ماتتغدى بدري اول ما توصل من الجامعة وتستنى ابوها واخوانها يوصلوا لكن هي كانت ترفض وتتحجج انها تعبانة و جيعانة ومافيها تستنى ...)
    • ( رمت عليها جمانة بجامتها وقطعت حبل افكارها ) قومي غيري ... لاتناميلي بملابسك ...
    • ........ (قامت الجازي تبدل بحزن وهي لازالت تحت تأثير الذكريات الي عبرت في خاطرها)...
    • (لكن جمانة الدفشة ماحبت تعطيها فرصة ) .... ياسلام عليكم لو كل يوم كدا تجوا تأخدوني ونخرج نتعشى زي كدا كل يوم ...... والله ياشيخة انو زي الهم وانزاح ... بس ياخوفي من بكرة !!
    • صحيح !! تعالي !! انتي اشبك اليوم ؟؟ ما حبيت اسألك اول قدام اخوانك !! ليش كنتي منرفزة ؟؟
    • مو منرفزة يا الجازي !! قولي مكسور قلبي .. يالله لو تشوفي الي شفته ..
    • (استغربت الجازي اذا كان في لسه اصعب من الي شافته ... اصعب من انها تشوف اهلها يموتوا قدام عيونها .... اصعب من....) ايش شفتي ؟؟ قولي !!
    • شفتي الست العجوزة الي مرة احبها وكنت دايما احيلك عنها من يوم ماصرت اداوم في المركز ؟؟
    • ايوا !!اشبها ؟؟
    • اليوم .. دخلت لقيتها قاعدة بتكتب .. استأذنت منها وخلتني اقرأ الي بتكتبه .. لقيتها بتكتب قصيدة .. ترثي نفسها .. وتتحسر على عمرها وعلى اولادها السبعة ..
    • عندها سبعة اولاد ؟؟ لحظة !! مو قلتيلي انو دا المركز يستقبل حالات الشيخوخة والامراض المستعصية ؟؟
    • ايوا صح !!
    • طيب !! كيف تقوليلي سبعة اولاد ؟؟ وعندها شغالة !! انا الي فهمتوا منك انو هما يستقبلوا حالات الشيخوخة للاشخاص الي مالهم احد !! طيب !! ايش الي جايبها هنا مدام معاها شغالتها وسبعة اولاد؟؟؟
    • (ردت عليها جمانة بحزن) الي جابها غدر الزمن .. الله يجيرنا ويجيرك ... خليت بها الدنيا وهي عندها سبعة اولاد !! لكن ياامي ربنا مايخلي ..
    • ليش ايش صار؟؟
    • اخوها اليوم جاء وسوا هوليلة في المركز .. وهادا هو الي اخرني ... شكله ما عرف عنها الا اليوم....وجاء زعلان يتضارب مع الاخصائي والموظفين ... الا يخرجها .....
    • (الجازي المذهولة ) الحمد الله طيب .. من جد ربنا ما يخلي ..
    • لو شفتي حالته لمن جاء يشوفها .. قطعوا قلبي الاتنين ...
    • بكيو ؟؟
    • بكيو وبس؟؟ بكي و هي بكيت وانا بكيت والاخصائي والشغالة والممرضات .. عن جد موقف قشعر جسمي .....
    • يالله ....(ولفت الجازي المتربعة على السرير يدها حولين جسمها ) قشعرتيلي جسمي انا كمان ....
    • شفتي كيف؟؟ الدنيا مليانة بلاوي !! بس الواحد يحمد ربه !!
    • (اتنهدت الجازي ) الحمدلله....
    • الحمدلله ... دحين انا بس فهمت حالتها .. وسبب انغلاقها على نفسها ورفضها التعاطي مع الناس من حولها بحجة انها مشلولة ....فقدت القدرة على الكلام والمشي .... واتمنى يا جازي انك تنتبهي لنفسك قبل مايصيرلك زيها..
    • (انفجعت الجازي وفرقزت عيونها) انا ؟؟ انا ايش دخلني دحين ؟؟ ايشبك قلبتي عليا ؟؟
    • انا مو قاعدة الومك .. انا مقدرة الي انتي بتمري فيه ... اعرف انو مو سهل عليكي انك تشوفي اهلك يموتوا قدام عيونك!! اعرف انو مو هين انك تفقديهم كلهم فجأة !! لكن انا ابغاكي برضو تكوني قوية وتصمدي !!
    • (اتأثرت الجازي بهجوم جمانة المفاجئ.. كانت متعودة منهم دايما عدم مناقشة هذه الامور معاها .. ماتعرف اذا كان هناك اتفاق مسبق بينهم بدا الشيء !! او من باب مراعاة لمشاعرها !! انهم ما يفتحوا عليها الجرح بين كل فترة والتانية !! لكن يظهر انو جمانة قررت اخيرا تخل بدا الاتفاق ) ايش سويت انا دحين ؟؟ انا مابكيت !! ولا صرخت !! حتى ايام العزا كلكم كنتو تبكوا وتنهاروا !! الا انا !!
    • وهادا هو الغلط بعينه !! التصرف الانساني الطبيعي كان انك تبكي وتصرخي وتسوي كل الي يريحك علشان تعبري عن مشاعرك !! لكن انتي كبتي كل مشاعرك وألمك داخلك .. واعتزلتي عننا .. وعن الناس وعن صحباتك ....وماصرتي تقعدي معانا ولا تأكلي معانا !! وهادي طريقتك في التعبير عن رفضك للوضع !! بالضبط زي ما عملت خالة عزيزة الي رفضت وضعها وعزلت نفسها عن الناس سوت نفسها مشلولة ورفضت الكلام والمشي واي وسيلة من شأنها تجمعها بالناس... والله يستر لو استمر وضعها .. ممكن كان ترفض انها تعيش حتى .. لكن الحمدلله الي ارسل لها اخوها قبل فوات الآوان...
    • .... (كشرت الجازي من كلام جمانة) هيييي.. انتي... بطلي خلاص تحليلاتك النفسية لنا الي ماتخلص ... انا مو مجنونة عندك علشان تعالجيني .. روحي عالجي نفسك اول ...
    • (انقهرت جمانة) انا مااحاول اعالجك ... انا احذرك قبل مايطيح الفأس في الرأس .. انا اكلمك لمصلحتك مو معناة كدا اني مو مراعية مشاعرك زيهم بالعكس...انا يمكن اشجعهم ... كلهم نفسهم يقولوا لك الكلام دا بس خايفين .. واسامة اليوم ماخرجنا الا علشانك ... هو كان متفقـ ...(وقطع عليها رنين جوالها ) استني اشوف مين !! مكالمة خارجية !! اوه هادا الرقم الي كلمتني عبير الهبلة منه امس!! (وطنشتها الجازي وانسدحت وحمدت ربها الي فكها منها ولا ماكان تركتها الا في الصبح) الو ؟؟!! اهلين ياهبلة!!
    • مساء الخير !!
    • (صوت رجالي .. استغربت جمانة ) مساء الخير !!! ؟؟
    • كيف الحال ؟؟
    • الحمدلله .. مين حضرتك ياأخ ؟؟
    • كيف الاهل ؟؟ كلهم طيبين؟؟
    • الحمد الله .. مين انتا لو سمحت ؟؟ وتبغى مين ؟؟ انتا اخو عبير؟؟
    • لا انا مو اخوها !!
    • طيب انتا مين؟؟
    • بعدين تعرفي..
    • ........(؟؟؟؟؟؟؟؟) طراااخ..(قفلت الخط) الحقيرة !! النذلة !!
    • (استغربت الجازي ودارت عليها ) ايشبك ؟؟
    • شفتي الحقيرة مكلمتني شكلها من رقم صاحبها .. وهو دحين حيستلمني الكلب ...(كانت تفور من القهر)..
    • اووف!! طيب ليش هي كدا تسوي ؟؟
    • علشانها قليلة ادب ومنحطة.....(ومسكت الجوال تتصل)
    • ايشبك ؟؟ تتصلي على مين ؟؟
    • عليها النذلة والله لا العن سلسفين الي جابوها .....
    • (سألتها الجازي بعدم فهم كالعادة ) حتى في مصر ماخدة معاها صاحبها تديت معاه !! فين اهلها عنها دي ؟؟ طيب مدام عندها جوال !! ليش تتصل من رقمه ؟؟
    • علشانها بخيلة ياامي ماتحب تضيع اتصالاتها علينا ...(صرخت جمانة وتحاول تتصل مرة تانية ) شفتي الكلبة ماترد ... لكن انا اوريها (وترجع تتصل مرة تانيةعلى رقم تاني في مصر برضه وتصرخ في السماعة) الووووووو ؟؟ مااااااجد .. ليييييييين .. الحقوني .... شفتوا عبيييير ايش سوتلي .....
    • (سابتها الجازي تكلم صحباتها تحكيلهم المصيبة الجديدة حقتها وخرجت من الغرفة ونزلت الصالة .. كانت لمبات البيت كله مطفاية .. والبيت كله نايم ... فكرت تفتح التلفزيون تقلب شويا في القنوات .. بس ماكان لها نفس .. فراحت للتلفون ورفعت السماعة واتصلت على واحدة من صحباتها لاول مرة بعد وفاة اهلها ..) الو؟!
    • (صالحة) الو؟!!! الجازي مو معقووووول !! حبيبتي كيفك ؟؟ ايش اخبارك ؟؟
    • الحمدلله كيفك انتي ؟؟ ايش عاملة ؟؟
    • بخير الحمدلله ... وحشتيني يادبة !! فينك يا شيخة ؟؟ كل مااتصل يقولولي نايمة !! دبحتي النوم !!
    • (انكسفت الجازي لانها من يوم الحادث وهي مقفلة جوالها ما تتصل على احد ولا ترد على احد .. حتى لمن كان احد يتصل فيها على بيت عمها كانت تخليهم يعتذرولهم بأي شيء.. ) معليش .. بس والله في بالي .. واهوه كلمتك اول ما قدرت .. كنت متأكدة محد صاحي غيرك في دي الساعة .. اعرفك !! (وضحكت هي وصحبتها )
    • ايوا عاد تعرفيني !! احب احرس الناس لمن يناموا!!
    • حتقوليلي !! تعالي صحيح !! ايش اخبار الشلة ؟؟ البنات كيفهم ؟؟
    • هنا وهناك !! الي سافرت!! والي اتزوجت!! والي قعدت زيي تقلب قنوات الدش!! كلهم ترى لمن غلبوا يكلموكي !! وجمانة الخاينة ما صارت ترد عليهم وصوني اطمن عليكي واطمنهم !!!
    • فيهم الخير .....
    • تعالي صحيح !!!!
    • ايش في ؟؟؟؟
    • تدري انو سهى اشتغلت !!!!
    • من جد ؟؟؟ كيف ؟؟ وفين ؟؟
    • والله .. اليوم مكلمتني قالتلي ....شغلوها في شركة على اساس بس فترة الصيف .....
    • ايش حتشتغل ؟؟
    • مدري مندوبة مبيعات ؟؟ او حاجة زي كدا ؟؟
    • الله !! والله برافووو عليها !! يابختها !!
    • ايش يابختها يا غبية ؟؟ احمدي ربك انك مو محتاجة تشتغلي ...
    • ومين قلك ياغبية انتي انو سهى محتاجة ؟؟
    • اجل ليش حتشتغل يعني .. ناقصة كرف ؟؟
    • سهى طوال عمرها مجتهدة وطموحة .. مو زيكم يا شلة الهيش بيش !!
    • الي يسمعك يقول منتي معانا ...
    • لا مني معاكم .. وحتشوفي .. روحي انقلعي دحين خليني اكلم سهى ...
    • ايش تبغي فيها؟؟
    • حكلمها تشوفلي يمكن يشغلوني معاها...
    • ياهبلة !! استني !! ...(وماكملت لانو الجازي قفلت في وجهها وطلعت تدور على جوالها )

  19. #18
    الاخصائي الاجتماعي: عبدالله ..
    الاخصائية الاجتماعية : ايمان ...
    المريض: خالد..........
    عبدالقادر : ولد العمة عزيزة الكبير
    عبد الواحد: ولد العمة عزيزة


    الساعة 10 صباحًا في بيت العم اسماعيل... عزيزة بنت ابراهيم الصياد رجعت لغرفتها في بيت ابوها ...
    • (العم اسماعيل جالس على كرسي جنب سريرها) انستي بيتك يااختي ... اخيرا جات الي حتنور غرفتك وتعطرها بريحتها بدل ريحة الخايس دا الي دايمنو كان مخمج نوم فيها ......
    • (محمد الي جنبه) حرام عليك ياسيدي ... ايش سويتلك انا ؟؟ (وقرب عليها)شوفي عمتي ... زي منتي شايفة غرفتك في غيابك كانت في الحفظ والصون ... مافي ولا جدار ناقص ولا سقف .. عديهم علشان لا تبلشيني بعدين ......(وضحك للست العجوزة الي مسكت خده بحنان جديد على محمد اليتيم الي اتربى طول عمره على حنان ذكوري... حنان جده وصبيه خورشيد ... وكان مستقر في غرفتها من يوم انتقل للعيش في بيت جده وهو صغير ...وكأنه فهمها.. وفهم قلقها من نظراتها ... ) ولا تقلقي عليا انا دحين راح احل ضيف على غرفة سيدي الكبير ابراهيم ...هو طبعا ما كان حيقبل انو غيري يحتل غرفته من بعده الا انا .... صح سيدي؟؟
    • لا تقعد تقرقر لستك دحين قوم اخرج خليها ترتاح ... روح شوف المفعوصة الهندية دي فين ؟؟
    • اكيد .. مستلمها خورشيد .. من جد اروح اشوفهم .. مع السلامة ياعمتي ...اسيبك ترتاحي ..

    وخرج فعلا حصل مناقرة كانت على وشك أن تبدأ ... بين خورشيد وميلاني .....الافغاني والهندية ....
    • (خورشيد)انا قلت هادا ..قدر ... ما في ...يمسك!! انتي مافي يفهم ؟؟ (يحاول يفهمها واضطر انه يكسر الكلام المكسر حقه وما غنى الامر عن استخدام لغة الاشارة كمان )
    • (ميلاني )انتي مجنونة ؟؟ انا كيف سوي شاهي ؟؟ انا لازم استعمل بوتوجاز !! قدر.. هادا.. ودي ..شيلي بعيد ...
    • (اضطر محمد يتدخل ينهي الخلاف) خورشيييد !! ايش في ياجماعة صلوا على النبي؟؟
    • (ميلاني) هادا مجنونة حمارة .....(ورجعت تكمل شغلها وهي تبربر بالهندي حقها)
    • (خورشيد ) شوووف.. هادا شيل قدر ايدام ... دحين بابا اسماعيل مررة زعلان لمن في كب ..
    • ماراح تكبه ياشيخ (محمد) .. عيب خورشيد .. هادي ضيفة .. وقاعدة تراعي اخت سيدي .. المفروض نشكرها مو نسبها .. بالعكس ترى انتا لو زعلتها بابا اسماعيل مرة في زعلان ... (وانتبه لجده الي خرج من غرفة اخته ورايح على طراحته وراحله وترك خورشيد يراقب ميلاني وهي تقربعله في مواعينه علشان تعبي فطور العمة عزيزة كأنه خايف تخرب له شيء ...)
    • ها ياسيدي ؟؟ ارتحت دحين ؟؟ سويت الي فراسك ؟؟
    • ... (طنشه جده وقعد يدور في راديوه على اذاعة الرياض)
    • طيب الحمدلله ... يلا انا استئذن...
    • فين رايح ؟؟
    • رايح يا سيدي .. عندي شغل ...
    • شغل ايش؟؟ خلاص مايمديك تلاقي المراكب راحت عليك وراجعة كمان ...
    • (ما كان محمد يبغى يقول لجده انه رايح يشوف معاملة الوظيفة الي مقدم عليها .. جده مو من النوع الي يتحمس كتير للدراسة والشهادات والكلام هادا .. اهم شيء عنده انو عندك عقل وتعرف تكتب وتقرأ والحمدلله ... لو عليه ماكان يبغى محمد يضيع سنين حياته في الدراسة في الجامعة بدل ما يشتغل وبشطارته يجيب فلوس ..والرزق من الله ... طبعا عكس تفكير محمد الطموح ) لا انا رايح البنقلة اقابل فيصل اشوف لو جاتهم البلدية اليوم ...
    • آآه !! طيب روح !! ولا تتأخر لأنصاص الليالي ...
    • ان شاء الله .. يلا في امان الله ...
    • مع السلامة .....

    طريقة العم اسماعيل في الكلام مع محمد .. تدل انه يعتقده من الشباب الي يهيت في الشوارع زي بقية الشباب .. مايدري انو محمد تأخيره كان دايما بسبب انشغاله بالشغلات الي تتوفر له بسبب علاقاته العامة الي كل مالها تتوسع .. وصار الكل يعرف انه يقدر يعتمد عليه في أي مهمة يكلف بيها ... ورغم انو الدخل الي كان يطلع له قليل ... بالنسبة للمجهود الي كان يبذله ...لكنه كان يسد ...
    بعد ماطلع محمد ..اتاكد جده انه خرج وقام وجاب النوتة يدور رقم ومسك التلفون يتصل عليه ...
    • الوووو...
    • الو!! مرحبا !!
    • لا مرحبا ولا مسهلا ...
    • عفوا ؟؟!!!!! مين معايا ؟؟ افااا خالي اسماعيل ؟؟ هلا والله !!!
    • خلت ضروسك قول امين ...
    • ايش في ياخالي ؟؟ عسى ماشر ؟؟ ايشفيك عليا ؟؟
    • شوف !! ماابغى هرج كتير فاضي في التلفون ...تجيني دحين انتا واخوانك كلهم .. تسمع ؟؟
    • طب افهم ايش الموضوع ؟؟
    • دحييييين !! ويااا ويلك لو اتأخرت ؟؟(وقفل السماعة)
    • (استغرب عبد القادر بكر الخالة عزيزة من دي المكالمة) يعني ايش حيسويلي؟؟ حيجي يضربني ؟؟ واللهي حاااالة !! على اخر الزمن يجي عجوز مكحكح يهددني !!!(ويرن جواله مرة تانية ويرد على اخوه ) اهلييين !! بالقاطع !!
    • (عبدالواحد) انا ولا انتا ؟؟
    • لا انا ولا انتا !! خلصني ايش تبغى ؟؟ ايشفيكم اليوم كلكم متصلين ؟؟
    • ليش مين متصل عليك كمان ؟؟
    • خالي اسماعيل ياشيخ .. متصل يسب و يهدد ويخاصم كأني اصغر عياله ... ياويلي!! ياسواد ليلي!!! لو ماجيته وجبتكم معايا ... كأني حخاف منه زي زمان...
    • آآآآهاااااا !! قلتلي !!! طيب قوم فز .. لا يطينها بطينة..
    • ليش ؟؟ ايش قصدك؟؟
    • ما ادري بس اتصال خالي عليك اليوم اكيد له علاقة بالاتصال الي جاني من شويا !!
    • من مين؟؟
    • من مركز النقاهة...
    • .............
    • .............. (سكتوا الاثنين)
    • طيب كلم اخوانك والحقوني على البلد ....
    • يلا جيينك !!!

    الجازي تكلم سهى
    • (سهى) معليش الجازي !! سامحيني بس لمن سالتهم علشان يوظفوكي معايا .. قالوا هما مكتفيين دحين ..
    • .............. (زعلت الجازي وخاب املها ) لا اتس اوكي ...
    • بس ترى قالي المدير اذا احتاجوا حيقولولي علشان اجيبك ...
    • خلاص انشاء الله ...
    • (وحمستها سهى لانها خافت تفقد الامل ) وانا كمان ياستي حسأل هنا أي احد .. اذا يعرف شركات تانية تشغل بنات في الصيف حقولك ...
    • خلاص اوكي ..شوفيلي .. نفسي اشتغل زيك وزي جمانة ...
    • انشاء الله .. قريب...
    • طيب تعالي هنا حكيني !! كيف شغلك ؟؟ مرتاحة ؟؟
    • ايييش اقولك ؟؟ روووعة !! احساسك انك تشتغلي وتحققي ذاتك وتحسي بقيمتك لا يوصف .. انشاء الله حتجربيه ...وتشوفي ...
    • دايمنك كدا .. تتحمسي .. تتحمسي لاي شيء جديد .. وبعدييين ...تطفشي..
    • لا دحين غير ... الشغل يساعدك انك تحسي بالمسئولية ...
    • بس البنات يحسبوكي محتاجة الشغل ...
    • مايهمني فيهم .. المهم انا اسوي الشيء المقتنعة فيه ... وراضية عن نفسي .... و صحباتك ما يهمني رأيهم...(قالت العبارة الاخيرة بقهر)
    • طيب خلاص .. لاتعصبي عليا انا ...
    • هههههههه !! سوري !!

  20. #19
    ظهور السيارات الفخمة ليس غريبا في حارة البحارين .. لكن تجمع خمس سيارات فخمة امام احد بيوتها كان غريبا وأثار حيرة الجيران .. اتجمعوا الاخوان الخمسة الذكور .. علشان يدخلوا مع بعض لمقابلة خالهم الي طلبهم...دقوا الباب وفتحلهم خورشيد الي ماراح يفتح المحل اليوم لا هو ولا عم اسماعيل الي كان في انتظار اولاد اخته ... انتقلت نظرات الرجال الخمسة من خالهم الي كان في استقبالهم في مكانه المعهود في ساحة البيت وفي عيونه نظرة تشرح مشاعره اتجاههم.. للمطبخ الي واصلة منه ضجة الشغالة الهندية الي تبربر على خورشيد .. للكرسي المتحرك قدام غرفة امهم القديمة.. هنا فهموا كل شيء.. وتأكدوا ليش خالهم طلبهم ...

    في احدى الشركات في مكتب شئون الموظفين ..
    • (مدير شؤؤن الموظفين) ماشاء الله يا أخ محمد .. لا اطمنك .. بدا المعدل .. وبدي الخبرات ...راح تتضارب عليك الشركات .. بس انشاء الله انك راح تكون من نصيبنا ..
    • (انتشى محمد ) نقول انشاء الله ...
    • على كل حال انا شرحت لك مهام وظيفتك والامتيازات الي نقدمها لموظفينا ... في عندك استفسار عن شيء تاني ؟؟
    • .. لا ابدا !! بس صحيح متى تحبوا اني اباشر؟؟
    • والله نحن في انتظار بس ورقة معاملتك توصل من الادارة .. واول ما توصل تقدر تجي تستلم ...
    • خلاص انا في انتظار اتصالكم ..(وقام وصافح المدير وخرج وهو كان نفسه يطير على جده يبشره بس جواله يرن ويرد على فيصل) .. خييير يااخي ؟؟ انتا عليك اوقات غريبة !!!!!!
    • تكفى يامحمد !! (وافتعل نبرة واحد عنده مصيبة وشويا حينفجر يبكي )
    • خلاص !! خلاص !! جيك !! ابتلشت بك انا ... (ويروح لسيارته ويتجه للبنقلة بدل ما يروح لجده يبشره )



    طال انتظار الاخوة الخمسة لخالهم الذي ظل صامتًا وهم جالسين حولينه .. الا ان مل اكبرهم عبدالقادر ...وبادر بالحديث..
    عبدالقادر: ها ياخالي !؟؟ مااظن جايبنا على ملى وجهنا علشان تقعدنا حوليك كدا ..وتقعد ساكت !! قول الي عندك وخلينا نروح لاشغالنا ...
    عبدالواحد: استنى يا عبدالقادر استهدى بالله !! (ويغمز لاخوه انه يروق اعصابه )
    الخال: (باستهزاء) انتا ماتقولي أي فلاح تترجاه انتا واخوانك لسه بعد عمايلكم السوداء؟؟ أي خير تدوروه؟؟ أي رحمة ؟؟ أي بركة ؟؟ والله مالكم الا السخط والغضب من الله ...دنيا وآخرة...
    عبدالقادر: لو سمحت ياخال لاتغلط !! (عصب وقام على حيله وقاموا اخوانه كلهم على قومته )
    الخال: لا ترفــــع صوتك في بيتي يا عاق امك ..ياجــــــاحد .. هادا بدال ماترخي عينك في الارض وتنكسف من فعايلك انتا واخوانك!!؟؟ جي ببجاحة تعلي صوتك وتتكلم عن الغلط ؟؟
    عبدالواحدfrownيقاطع خاله) يا خال ايش فيك ؟؟ تراك فاهم الموضوع غلط !! أي جحود وأي عقوق تتكلم عنه ؟؟ كل دا علشان ماقلنالك ان الوالدة دخلت المستشفى ؟؟!! نحنا ماحبينا نقلقك .. كل ماهنالك انو الوالدة تعبت علينا شويا واضطرينا ندخلها مستشفى الملك فهد .. ولمن اتضح انو حالتها ممكن تطول نقلتها المستشفى لدا المركز لان فيه مختصين يعرفوا كيف يتعاملوا مع حالتها بشكل افضل.. وطبعا لانو لا نحن نقدر نسيب اشغالنا ولا البنات اخواتنا يقدروا يسيبو بيوت ازواجهم جبنالها شغالة تقعد معاها كمرافق و تقوم فيها ... هادا جزاتنا منك يعني ؟؟ تطلعنا جاحدين وعاقين...
    استناه خاله يخلص كلامه وبعدين قله : انتا ماتستحي على وجهك؟؟ تحط عينك في عيني وتكذب عليا ؟؟ طبعــــــا... الي تغره الدنيا و يهون عليه يرمي الي حملته وهن على وهن الرمية دي .. يتوقع منه أي شيء !! انتا تحسب بالي تسويه عمرك راح توفيها حقها .. يابهيم !! ياجاهل!! لو ايش ماسويت ماتوفيها رفزة ... رفزة بس ..شفت كيف ؟؟
    عبدالواحد : ياخال ...
    يقاطعه خاله : ضاقت بكم الدنيا !!؟؟ مالقيتوا غير ترموها في دار المسنين ؟؟ ما تعرف انتا واخوانك عقوبة عقوق الوالدين ؟؟ ماتعرف ان الله يعجل بعقوبة العاق في الدنيا قبل الاخرة ؟؟
    عبد الواحد: ياخال ؟؟!!
    الخال: ماابغى اسمع كلام فاضي تاني ...لو حلفتلي من اليوم لين بكرة ... الابن العاق أي يمين يؤخذ منه؟؟ اي مصير سوف يلقى ؟؟ وأيّ وعيد سوف ينال ؟؟ وأيّ جهنم سوف يصلى ؟؟
    عبدالقادر: بس عاد تراك زودها ...مو انتا الي تجي تسويلنا محاضرات وتعلمنا بصالح امنا ... زي ماقلك عبدالواحد الوالدة تعبت علينا ووديناها مستشفى تبغى تصدق صدق ماتبغى عنك لاصدقت ...
    الخال (باستهزاء واحتقار): ووالدتك الي انتا ادرى بصالحها !! على فكرة ...تدري انتا ايش كان مرضها؟؟ ايش كان عندها ؟؟
    سكت عبدالقادر يطالع بخاله بتردد بس اخوه انقذه ورد عنه...
    عبدالواحد : الوالدة اول جاتها جلطة .. ولمن نقلناها للمستشفى اكتشفنا انها انشلت بسبب الجلطة...
    الخال (بحزن ولوم) : وهانت عليكم تسيبوها لوحدها وهي عندها جلطة ؟؟ هانت عليكم الي ماكانت تنام الليالي لو واحد فيكم طاح مريض !! ولا اتأخر برا البيت؟؟
    عبدالواحد: يا خال!! يعني ايش كنت تبغانا نسوي ؟؟ نحنا شفنا انو في كدا صالحها !! صحيح نحنا قصرنا وما نزورها كتير!! لكن على قد مابنقدر بنسأل..
    الخال : بتسأل ؟؟!!(وقلبها تريقة عليه) لاااااااا جزاك الله خير الي لقيت وقت تسأل !! اكيييييييد!!! مو انتو ماتهون عليكم العشرة والرحم !! مو معقولة تقطعوها مرة واحدة !! صحيح هي خلاص ماصارت تنفع زي اول بعد ماطاحت ومرضت وصار لازم تحال للمعاش !! وعندكم دحين غيرها الي اهم منها ويستحق وقتكم اكتر منها!!! ورميتوها زي الخرقة على جنب ...ساعة ما حب واحد فيكم يكسب اجر راح اتصل سأل عنها.........مااقول الا الله يخسكم من ذرية!!! يا بعير منك له !! كل واحد فيكم صاير اطول من التاني !! وفاتحين بيوت يرمح فيها الخيل !! مو بشطارتكم لالالالا!! كل هادا من خيرها وخير ابوكم الله يرحمه!! بعد وفاته ماقصرت مع ولا واحد فيكم ربتكم وعلمتكم وزوجتكم بنفسها.. بنات واولاد!! ماخلت احد فيكم يحتاج شيء !! كله بفلوسها ماخلت واحد فيكم يمد يده على ورثه علشان تخلوه تتمتعوا فيه انتو واولادكم !! بعد هادا كله لمن صارت في أرذال العمر ماتحصل لنفسها جحر تأوي إليه في بيوتكم الي فتحتها لكم !! تفووو عليكم !! وعلى امثالكم !! (ماكان احد يحاول يقاطعه دي المرة ... ماكان احد فيهم يقدر ينكر ... ماكان احد فيهم يقدر يبرر... وكان سكوتهم اكبر دليل ضدهم ) حرمتوا نفسكم من البركة والخير والبر !! بس لعلمكــــــــــــــم !! الدنيا سجالا .. سريعة الدوران .. فكما تدين تدان ... بإذنه تعالى !! عاجلا وليس آجلا!! راح تذوقوا من نفس الكأس الي ذوقتوه امكم .. وتترموا نفس رميتها ... وأختي الي ضاقت بها بيوتكم وقلوبكم !! راح يأنس بها بيتها الي تربت فيه صغيرة وحتموت فيه وهي كبيرة !! والله لا يحوجها لكم..
    عبدالقادر (الي اخيرًا قدر ينطق ولمن نطق فجر): انتا اتهبلت ياعجوز يامخرف ؟؟!! كيف تبخانا نخليلك امنا وهي تعبانة ؟؟ مو ترى علشان حشمناك وسكتنالك !! تسوق فيها الهبل !! تبغى امي تقعد في الخرابة الي انتا تسميها بيت!! وانشاء الله ..كيف ناوي تقوم فيها؟؟ ولا تصرف عليها !! وانتا حتت صياد كحيان ماوراك ولا قدامك!! ولا تحسب اننا حنخليك تغرف من خير الوالدة علشان تصرف بيه على نفسك ولا على ولد ولدك .. فوووق لنفسك !! واعرف انتا بتكلم مين !! الوالدة راح ترجع المركز !! وانتا لو نطقت حرف واحد !! راح اشيلك انتا كمان ارميك هناك !! ياعجوز يامخرف !! (وكان حيتقدم يمسك في خناق جده لولا اخوانه مسكوه بالذات انهم خافوا لا تنشب خناقة لمن رفع خالهم عصايته فوق راس اخوهم الكبير وكان حيضربه بها لولا انها طاحت من يده و طاح هو معاها في الارض قدامهم وهو ماسك صدره )

    تـرا الـكـلام الـزيـن ملحه قراكم
    وتـرا الـبـلاسـه مـن كبار العذاريب
    تـرى ردا الـمـذهـب يـبور نساكم
    يـاعـيـال مـاضـربتكم بالمشاعيب
    ولا سـمـعـوا الـجيران لجة بكاكم
    يـامـا تـمـسعرت امكم على الخلايق تقول ذيب
    مـن خوفتها يـقصر عليكم عشاكم
    أحـفـيـت رجلينها بقيظ اللواهيب
    ونمت بالجوع وخـلـيـت الجبن يخالط عشاكم
    والـيـوم شـوفـوا لحيتي كلها شيب
    وشـوفـوا محل تخوضعي في ذراكم
    قـمـت اتوكا فوق عوجاء المصاليب
    وقـصـرت خـطايا يوم طالت خطاكم
    يـاعـيـال يـا عيال عليكم مطاليب
    ردو لي الـقـرضه جزاء موتاكم
    خـوالـكـم يـاعـيال هم منقع الطيب
    يـا عيال مدري هالردى منين جاكم
    يـاعـيـال يـاعيال الخناء كلكم عيب
    يـالـي عـلـى الخال كثير لغاكم
    وقصيتم وجهي يا وادي سلاحيب
    يـا عـيـال بـعتوني بصفرالعراقيب * (زوجات الابن)
    مـاهـي حـقـيـقة سود الله أقراكم
    عسا نساكم لاتحمل ولا تجيب
    ويبقن رمالى وعايشات بلاكم
    وعسي قمركم لا يظهر ولا يغيب
    والشمس مطميه ومعتم سماكم
    ولا بـد مـاهـوعـاوي دوني الذيب
    بـالـقـبـر مـفرق طيبكم من رداكم (من الايميل بتصرف)

بيانات عن الموضوع

الأعضاء الذين يشاهدون هذا الموضوع

عدد زوار الموضوع الآن 1 . (0 عضو و 1 ضيف)

المفضلات

collapse_40b قوانين المشاركة

  • غير مصرّح لك بنشر موضوع جديد
  • غير مصرّح بالرد على المواضيع
  • غير مصرّح لك بإرفاق ملفات
  • غير مصرّح لك بتعديل مشاركاتك
  •  

مكسات على ايفون  مكسات على اندرويد  Rss  Facebook  Twitter