مشاهدة النتائج 1 الى 2 من 2
  1. #1

    [ قسـى الايــام] قصة رووووعه ومؤثرة

    .

    السلام عليكم يا عيال مكسات ,, اولا القصة منقولة الحق حق وحبيت احطها هنا علشان تقرونها وتستمتعون


    [الجزء الاول]

    في احد الاحياء يعيش ابو عبدالله وعائلته المكونه من زوجته عُلا [42 سنة,, ربة منزل] ,, ابنه عبدالله [20 سنة,, طالب فالجامعة] ,, ابنه محمد [16 سنة ,, طالب في صف ثاني ثانوي] ,, ابنته ريم [18 سنة ,, طالبة سنه اولى فالكليه ]..

    الابن الاكبر عبدالله امه متوفيه من يوم كان عمره سنه ومن بعدها ابوه تزوج وحده مصريه اللي هي عُلا .. وطبعا عبدالله عايش معاهم فالبيت من وهو صغير لأن ابوه وايد يحبه وماخلاه يروح يعيش مع حد من خواله المشغولين اصلا مع حياتهم الخاصه ..
    زوجة الاب ماكانت تحب عبدالله وزرعت الكراهيه بين عيالها وبينه ودايما يتهاوشون مع بعض
    يوم الاثنين
    فالبيت الساعه 2 ظهرا ..

    رجعت ريم من الكليه وشافت اخوانها عبدالله ومحمد يالسين فالصاله وقالت: السلام عليك يا حمود بس

    عبدالله: واشدعوه ماتسلمين علي امج موصيتج؟

    ريم: حدك حدك عاد ,, انا ماسمح لك انك تتكلم عن امي بهالطريقة انت فاهم ؟

    عبدالله: وانا اشقلت عن امج ليكون سبيتها وانا مادري !!

    محمد: هذا الناقص بعد تسب امنا

    عبدالله: يه عاد من زين امكم الحين ,, بروحها مصريه ام الفول والطعميه خخخخخ

    ريم: وت وت وت ,, عيد كلامك مره ثانيه سمعني !!

    عبدالله: قلت انجلعي عن ويهي لا الحين اتدرب ملاكمه على ويهج

    جان تدخل الام عُلا وتسمع الجمله الاخيره وتقول: ايه ده ياواد انت ,, انت عاوز تضرب بنتي ليه ,, هيه عملت لك ايه لامواخده يعني شتمتك والا قتلت امك

    عبدالله: لاتييبين طاري امي لاقوملج الحين
    عُلا: لأ لأ لأ ,, وكمان بترفع صوتك عليا ,, اما بجد انت انسان مش متربي وابوك لازم ...

    جان يدخل الابو ويسمع كلمة ابوك ويقول: وش هالابو هذا اللي ماعسى صار شي الا يبتوا طاريه ,, لاتقولون متهاوشين بعد تراني راد من الدوام تعبان ومالي خلقكم ,, يالله حطوا الغده خلونا ناكل لنا لقمتين ونرقد

    عُلا: مش ابل ماتشوفلك صرفه مع الواد العفريت ده ,, والاكل خليه هوه يحطوهولك ,, هه

    وراحت عُلا مع عيالها ريم ومحمد وهي معصبه وصكوا عليهم الغرفه اونهم زعلانين

    ابو عبدالله: زين جذي الحين ,, انا كم مره قايلك لاتتحرش فيهم خلهم في حالهم يعني انت لى متى بتم جيه ماتسمع الكلام

    عبدالله: يبا انا ماكلمتها ولا ييت صوبها هي وعيالها ,, هم اللي مادري اشفيهم علي عاديني غريب ,, لو امي عايشه جان انا الحين ماتلتهت جذي ,,

    راح الابو بعدين يراضي الام وعبدالله طلع من البيت

    .
    .

    وفي نفس الفريج يعيش ابو فهد وعائلته المكونه من فهد [23 سنة ,, متخرج ويشتغل في شركة للبترول] وراشد [18 سنة ,, طالب سنه اولى جامعه] ,, امل [17 سنة ,, طالبه فالصف الثالث ثانوي],,
    امهم وابوهم تطلقوا من حوالي 10 سنوات والام تركت العيال عند ابوهم وتزوجت واحد غير كان هو سبب كل المشاكل واللي ادت للطلاق..
    ونتيجة هالشي عانت امل من تسلط ابوها واخوانها خوفا من ان امل تكرر اللي سوته امها


    يوم الاثنين
    فالبيت الساعه 2:30 ظهرا ..

    راشد: يبا انت ليش ماتتزوج ,, لى متى بتم جيه يعني ,, لازم تشوف نفسك وتعيش حياتك

    ابوفهد: انا لو كنت ابي اتزوج جان تزوجت من زمان بس انا ماقدر اخليكم واتزوج وحده ثانيه تلعوزكم وبعدين اللي شفته من امكم خلاني اشيل فكرة الزواج من بالي نهائيا ,, مافي حريم فيهم خير هالايام ,, كلهم يدورون عالريال اللي عنده فلوس حق التخقق والمظاهر

    راشد: عاد يبه لاتقول جيه وتخرب احلامي ومخططاتي للمستقبل ,, كفايه فهد شايل فكرة الزواج من باله وكل هدفه فالحياه انه يقص على بنات الناس اونه يعني ينتقم من الحريم بعد اللي سوته امي فينا

    ابو فهد: الله ياخذها ان شالله خربت حياتنا الله لايوفقها ,, حتى الولد صار متعقد كله منها ومن البلاوي اللي شافها على امه ,, السباله ماصدقت طلقتها وعلى طول راحت تزوجت حبيبها الغني مع انه عنده حرمتين ,, بس شتقول عن الحريم وركضتهم ورى البيزات

    واثناء حديثهم كانت امل واقفه ورى الباب تسمعهم وبعدين راحت غرفتها تصيح وانتظرت ليما ابوها واخوها راحوا يرقدون وقامت اتصلت حق ربيعتها فاطمه من تلفون الصاله لأن ماعندها جوال وقالت لها: فطوم فطوم انا مليت من هالبيت واللي فيه خلاص ماني قادره اتحمل اكثر من جيه,, ياليتني اقدر انتحر وافتك من هالدنيا

    فاطمه: لاتقولين جيه امولتي معليه اصبري ,, بكره بتتزوجين وبتفتكين من كل شي

    امل: انا قبل كنت اقول جيه بس الحين شلت هالفكره من بالي ,, انا من بيخطبني اصلا بعد اللي سوته امي ,, اذا اللي عندي مايبون ينسون السالفه وكل يوم يعيدون فيها ويزيدون عيل اشلون الناس!!

    فاطمه: لاتقولين جيه وتعقدين الامور,, وان شالله ربي بيرزقج بولد الحلال اللي ينسيج كل همومج

    وفي هذه اللحظه دخل فهد الاخو الكبير لـ امل وكان توه راجع من الدوام ويقول: املووووه ,, انتي من يالسه تكلمين فهالقايله !!

    امل صكت التلفون بسرعه وقالت: والله كنت اكلم ربيعتي فاطمه والله والله وتمت تصيح

    فهد: مره ثانيه قبل لاتتصلين حق اي حد استأذني مني ,, انتي فاهمه

    امل: ان شالله يا فهد ان شالله

    وراحت امل على غرفتها تكمل صياحها ..

    .
    .

    في الجانب الآخر وفي نفس الفريج كان يعيش ابو نواف مع عائلته المكونه من الزوجه هميان [ 45 سنه ,, ربة منزل ] ,, الابن نواف [ 24 سنة ,, مخلص الثانوية ويالس بلا شغل ] ,, الابن سلطان [ 23 سنة ,, طلع من ثالث ثانوي ويالس بدون شغل ] ,, الابنه بشاير [ 21 سنة ,, باقي لها سنة وتتخرج من الجامعه ] ,, الابنه الهنوف [ 19 سنة ,, طالبة سنة اولى فالجامعة لأنها عادت ثالث ثانوي ]

    الاب صاحب مال وثروة ودايما مشغول مع شركاته عشان جيه عياله مب متعبين اعمارهم فالدراسه ولا حتى يفكرون يشتغلون معاه

    يوم الاثنين
    فالبيت الساعه 9 مساءا ..

    بشاير والهنوف ادخلوا البيت وشافوا امهم وقالوا: هااااااااااي ,, وي أر باك مامي

    الام هميان: صج والله ,, انتوا وينكم هايتين من الصبح ,, من رحتوا الجامعه وتوكم مبينين ,, كل هذا فالسوق

    بشاير: كام اون مامي ,, وي وينت شوبنج اند وي وينت تو ذه سينما ذين وي هاف ادينر وذ اور فريندز

    هميان: وعمى ,, تحجي بالعربي لاصكج على عينج ,, عبالج محد دارس في مدارس انجليزيه الا انتي !!

    بشاير: اووووه ,, اتس تو بورنج ,, هنوفوووووه ,, كان يو ترانسليت فور مامي بليز اي وونت تو سليب ناو بابااااي

    الهنوف: مي تو مي تو ,, سي يا مامي باباااااي

    هميان: هيه انتوا ,, وين رايحين انا يالسه اكلمكم ياقليلات الادب ,, انزين هين ان ماخصمت من رواتبكم ماكون انا هميان بنت سعيد

    جان ينزل نواف من فوق ويقول: هااااااااي مامي ,, هاو آر يو

    هميان: انت شتخربط بعد !!

    نواف: ككككككك ,, اقول ابي فلوس بس باللغه الصينيه كككككك

    هميان: حرام عليك توني امس ماعطتك ,, انت ماتعلمني شو تسوي فالبيزات

    نواف: تبرعت فيهم انتي شورايج يعني !!
    فذمتج هذا سؤال تسألينه يا مامي ,, اكيد بكون صرفتهم

    هميان: ماراح اعطيك ,, فقرتني انت ,, سير عند ابوك اطلب منه يالله فارقني

    نواف: اوكي مامي ,, انا رايح الحين وبسوق السياره بسرعه عشان ادعم وتفتكين مني ومن مصاريفي

    هميان: يالمينون ,, انزين هاك بيزات هاك بس سوق اشوي اشوي انزين يما,, منتو عيال هالايام ياحبكم حق السرعه والمسابق ماتقولون اهالينا مساكين يالسين فالبيت يحاتونّا

    نواف: الحيييييييييين انتي خوش ام,, يالله تيك كير مامي

    هميان: هالعيال صج متخبلين مع هاللغه اللي يرمسون بها مافهم عليهم شو يقولون !!

    وفجأه تسمع صوت طااااخ كأن حد طايح عالارض جان تروح بسرعه وتشوف الا يطلع ولدها سلطان وتقوله: سلطانوووووه ,, اشفيك يما عسى ماتعورت من الطيحه بس !!

    سلطان: ياسلام وياسلام الله وياحمام يجر الالحاني ,, صابني صابني صابني آه ياويلي

    وجان ينتبه على امه ويقول: هيه انتي شو تبين يايه ومبسطه في بيتنا ,, حد مخبرنج ان بيتنا ملجأ ككككك

    هميان: هي انت ماتقولي متى بتعقل وبتبطل شرب الزفت هذا ,, تراني للحين ماخبرت ابوك وكل مره اقول اليوم بيتسنع هالولد لكن ماشي فايده وشكلي بخبره اليوم عشان يلاقيله صرفه وياك

    سلطان: انتي شو قصتج على هالصبح ,, روحي سوي الغدى يالله ,, انا طالع فوق لين استوى العشا ناديني

    هميان: اي صبح الحمدلله والشكر صج مب صاحي وبعدين اوقف مكانك انا للحين ماخلصت كلامي !!

    سلطان: خلاص لاتحاولين ,, كل اللي بيني وبينج انتهى وماعاد لي كلام وياج وخلاص الماضي ودعته محيت ذكراه من قلبي ,, عاااااشو عاااااشو ككككككك

    هميان: الله يغربل ابليسهم من عيال,, مافيهم احد يحترمني في هالبيت,, مالت علي انا اللي مدلعتهم وايد لين قاموا يمصخونها جيه بس بيشوفون ان ماربيتهم من يد ويديد ماكون انا هميان بنت سعيد ..

    .
    .

    بانتظار آرائكم عالجزء الاول

    وتقبلوا ارق واجمل تحية من
    اميرة


  2. ...

  3. #2
    gooood gooood شــكــراًاً gooood gooood


    لكي


    أميرة


    على الموضوع المره حلوwink

بيانات عن الموضوع

الأعضاء الذين يشاهدون هذا الموضوع

عدد زوار الموضوع الآن 1 . (0 عضو و 1 ضيف)

المفضلات

collapse_40b قوانين المشاركة

  • غير مصرّح لك بنشر موضوع جديد
  • غير مصرّح بالرد على المواضيع
  • غير مصرّح لك بإرفاق ملفات
  • غير مصرّح لك بتعديل مشاركاتك
  •  

مكسات على ايفون  مكسات على اندرويد  Rss  Facebook  Twitter