القصة:

سلطان بن رباح كان له خوي يقالة محمد بن عقيل جمعتهم خوة الدنيا
من يوم هم صغار على عز ومعزة كبروا وتزوج سلطان وجاله ولد سماه
على اسم خوية على كثر ما يغليه كانوا يحبون المقانيص ويحبون الصيد
فطلعوا مرة الإثنين ما معهم ثالث وبعد صلاة الظهر محمد يسوي الغدا
وسلطان ينظف السلاح فكان فيه طلقة ما درى عنها سلطان في المخزن
ضغط الزناد وثار البندق ومات خوية شال خوية وسلم نفسه بدوا المشايخ
يتوافدون على أهل محمد انهم يتنازلون عن سلطان لكن للأسف وصلت
الدية عشرة مليون ورفضوا الا راس براس صدر الحكم على سلطان
وقصوا سلطان لكن الصدفة في الموضوع إن قبر سلطان كان جنب
قبر محمد فكانوا جيران في الدنيا وإخوان في القبور

القصيدة:

يا فلاح الهم خيم فوق قلبي يافلاح
كيف تبغاني اسولف وانت خابرني عليل

وش قولك في عليل في حياتة ما أستراح
تنتثر دمعة عيونة لظلم الليل الطويل

حالتة لا ما تباعد حال سلطان الرباح
بالخطا راحت حياته والخطا ما له مثيل

كان ويا صاحبة اثنين في أرض براح
يطردون الصيد دايم من صبح لين المقيل

جمعتهم صحبة الدنيا على جد ومزاح
ما يهابون الليالي والحمول اللي تميل

ما قتل عامد ولكن ثور ابليس السلاح
بالخطا ثار السلاح وين يلقاله دليل

ونعقد سجنة وربعة تنتظر فك السراح
والأكيد انه سجين وما رضوا ربع القتيل

وهل دمعة يوم صلى ركعتين في الصباح
من نهار الجمعة اللي من ثقيل في ثقيل

هلل وكبر ونفسه تذكر اللي راح راح
كان في ربعة عزيز وذلة الوقت الذليل

لا محمد لا تهاني لا سعود ولا صلاح
كلهم كانوا على باله وهمة في هديل

طفلة ما كملت عامين صايبها كساح
وانتثر دمعة وحالة من سبايبها نحيل

حان تنفيذ القصاص وغطوا الراس بوشاح
وجاك سيافه يشيل السيف أبوحد صقيل

ارتخا راسه وزاد الموقف الحامي صياح
بين نوح وبين دمع وبين صيحات وعويل

وارتفع صوت الحشود وزادة محمد وصاح
يا يبه تكفى دخيلك تستمع قول الدخيل

يا يبه وشلون نصبر كيف نهجع برتياح
وانت من دنيا عيالك ما خذك مر الرحيل

يا محمد هاك علمي واحفظة قبل المراح
انتبة لاخوانك وبالك عليهم لا تعيل

والله الله في الصلاة والصيام والصلاح
والله الله في أمكم بعدي كفيل

وغمض عيونه ونفسه تطلب الله السماح
رافع سبابته مظلوم والله الوكيل

وسل سياف الصفا سيفة وطقة ثم طاح
راح سلطان المراجل وانتثر دمه يسيل

غسلوه وكفنوه وفاح طيب السدر فاح
وبالمصادف صار قبرة جنب قبر ابن العقيل

يا فلاح الكارثة ماهي سوالف يافلاح
خلني ساكت ودور غير هالقصة بديل



2673311bd2