سـلام عليكم جميعا شابين و شابات المنطفيين منكم و المحترقين للحين ندعوا الله ان يفك كربكم و يطفي حريقتكم بدون اصابات << متفائل
حبيت اقدم لكم موضوع علمي يصب في مصلحة المجتمع و الاسره..... والفرد و كيانه وامكانياته و سايكولوجيته النفسية و تأثيرها عليه و على اعداءه << من اولها خاربها
راح اسرد لكم مواقف من واقع ضرير ....آآآ سرير ....آآآآ مرير مرير << مابغت تطلع
هذي المواقف قد تحدث لكم او لأخوانكم او لأصدقائكم لذلك يرجوا اخذ العضه و العبره و الفلوص و الجمع و الرفسة .... و الي ماعنده استطاعه !! طراق على الماشي << ادا ما نفعك ما يضرك
صــــلـــــوا عـــــــلــــــى محمد و أااااااال محمد ....
راح اتكلم بشكل عام عن المواقف الي تصير لينا احنا الشباب لما نوصل اهلنا ( الحريم ) ...
طبعا هم ما يحسوا .... لأن المهم يوصلو للمكان الي يبغوه و خلاص مو مهم شي ثاني
بالنسبه لي بذكر الاشياء الي تقهرني بصراحه ......
( الانتظار صعب )
تتصل لك امك ( تعال ودينا المكان الفلاني ...... عرس ) .... تجي تنتظر قدام البيت نص ساعه
توها طالعه اختك .... تقعد وياك في السيارة تحارسوا بقية الاهل
نص ساعه بعد و توها طالعه الاخت الثانية
السيارة ارتفعت حرارتها وانت واقف والماما لسه ما طلعت
تطلع بعد طول انتظار لا تركض و الجوتي في ايدها توها راكبه
إلا اختك الاولانيه ( يووووووه نسيت جوالي ) وتنزل بدون مقدمات و تقعد ساعه داخل البيت
تأخرت؟؟؟ انت تأف أف وامك تأف أف و اختك الثانية تأف أف .... ويش فيها دي ؟ ويش تسوي ؟؟؟؟
تنزل اختك الثانية عشان تروح تجيبها ...... تدخل اختك الثانية ..... شوي تطلع الاولى تركب السيارة ( ليش تأخرتي و وين اختك ؟؟؟ )
تقول ( ماشفت الجوال مادري وين اختفى .. و اختي تدور جوتيها )
ســـــــاعه وهي تدور طلعت و ركبت السيارة تسألها ( ليش تأخرتي ؟؟ مو جوتي هداا ؟؟ )
تقول ( ما عجبني هدا لبست غيره ..... طلع مادري شفيه .... غيرته طلع مو مناسب غيرته طلع ......إلخ إلخ ) << قصة حياتها
وبعد ثلاث ساعات انتظاااااااااااار توصلهم الكوافير يقولوا ادا خلصنا بندق عليك مابنطول
وتقعد تحارس تربط حالك لا تروح لا يمين و لا يسار خوفه يتصلوا لك في أي وقت وتتأخر عليهم
بعد فترة زمنيه غير معقولة حتى تشك تقول هديلا يصنعوا مكياج بعدين يركبوه لو كيف ؟؟؟؟؟؟؟
يدقوا عليك تعال خذنا ...... ومن الكوافير الـــــــــــى استوديو تصوير ........ ضروري الاستوديو اهم من العرس نفسه
وينزلوا وانت على نياتك على بالك زي الاستيديو حق الرجال تدخل تصور و تطلع
لا هديلا يقعدوا بالساعتين ...... الظاهر يرسموهم رسم .
الفائدة للشباب : إدا عندك توصيل لعرس ...... إلغي مشاريعك كلها في ديك الليله افضل من انك تطلع نكاب قدام اصحابك .
الفائدة للحريم : ادا ناويين تكرروا الحركة ... احملوا احتياط فلوس الى لومزين او تكسي عشـان لا تبيتوا في صالة العرس .
( شوي شوي على الباب )
امك تبغى تروح تزور وحده مريضه .... اول ما تركب السيارة ( طراااااااااااااااااااخ ) صوت اغلاق الباب .....
الجيران يطلعوا يسألوا ( ويش صاير ؟؟؟ قمبلة ؟؟؟ )
تقوليها ( اماه شوي شوي على الباب )
تقولك ( ويش هالسيارات الرقيقه الي ما تتحمل ؟ ) << متعوده على سيارة الوالد كابرس 88
تقولك ( يالله ودينا لبيت فلانه أم فلان بناخذها ويانا )
وتمشي رايح لوجهتك الجديده وتوصل للبيت و تجي صديقة امك تركب السيارة و طراااااااااخ فانية
طلعوا جيرانهم يقولوا ( ويش الي فقـــــع ؟؟؟؟؟؟؟؟؟ )
طلعت صديقة امك متعوده على سيارة رجلها ( بيوك موديل 0 قبل الميلاد )
وتندب حظك بقوه ... يعني لو انت شاري لك عيربانه مو كان احسن ؟؟
وتوصلهم بيت المريضه ... و ينلزوا فنتينهم و يرقعوا لك ابواب السيارة بقوووه تقول ينتقموا منك و إلا متحلفين في السيارة ؟؟؟؟؟
يطلعوا جيرانهم (( ها ويش ؟؟ نفطر ؟؟؟؟؟؟؟؟ )) << الجماعه صايمين يفكروه صوت المدفع حق رمضان
لمن تقول ولمن تحكي ......
الفائدة للشباب : ادا ماعندك تأمين شامل على سيارتك ... وصل اهلك بسيارة ابوك الكابرس 88 احسن لك .
الفائدة للحريم : في اكياس رمل حق الملاكمين في محلات الرياضة ادا تبغي تفرغي شحنات غضبك .
( اشتري لينا عشاء )
تخيل انك قاعد تلمع سيارتك ...... الشباب يعرفوا كيف الواحد يكرف لما يلمع سيارته
البنات عشان تتخيلوا التلميع .... تخيلوا انكم تغسلوا مواعين متجمعه حق اسبوع
المهم وانت وسط الشغل ( التلميع ) تتصل لك امك ( روح اشتري لينا عشـا )
ويبغوا من مطعم معين ..... هالمطعم تحس ان موقعة بكل اختصار ( مصيبه )
ليش فاتحين مطعم هني ؟؟ هدا السؤال الي حير الستين
المهم تروح و رجولك فوق رقبتك و توقف سيارتك في مكان استراتيجي
تطلب و تخلص الطلب و تطلع لسيارتك ...... إلا الطيـــــن من ساسها لكرياسها
انت تنبهر ........ من وين جااي الماااااااي ؟؟؟؟؟؟؟؟؟؟
إلا تطلع موقف جنب بركة ماي متكونه من بيب مكسور من احد البيوت ( مابغى اقول ليكم بيب حق شنو يمكن تكونوا متعشيين لو شي )
تحس بغبنه ... وتروح البيت ماتتعشى وياهم و تنام حزين .
الفائدة للشباب : ادا لمعت سيارتك و جاك مشوار ؟؟؟ روح مشي افووود لك .... ترى المشي زين .
الفائدة للحريم : ادا الي جايب الاكل جاي معصب .... انتبهي ويش تاكلي .. احتمال يحط ايس كريم في الشاورما عشان ينتقم بس .
مع تحياتي
التوقيع
اضافة رد مع اقتباس
المفضلات