مشاهدة النتائج 1 الى 2 من 2
  1. #1

    غشيم في المغازل لايفوتكم..........الجزء الثاني

    السلام عليكم ورحمة الله وبركاته
    نتابع القصه
    وعساها تعجبكم
    بسم الله الرحمن الرحيم

    بس المشكله اها ضاعت هالكتب مني وصررت اروح عند بيارة جارنا اللي طافحه واقعد افكررر واتامل وارمي حصى وسط البياره .. (( مسوي رومانسي .. مثل : اللي يجلسون على البحر ويرمن حصى ..!!)) المهم في ليله من الليالي
    قالت البنت : مصيول اوصف لي شكلك .. !! يا والله البلشه .. وش اقولها هذي هاللحين اقولها اني قرد اعترف لها بالحقيقه المرره واقولها اني جدار مالي ملامح .. اعترف لها اني شبيه عبدالله سليمان (( الف حمد لله والشكر )) الوكاد يا واد خلني اسووي مثل كل الشباب .. وانصب عليها يعني تلقى الواحد من الشباب شيييين وإذا شفتهفي الشارع ماتدري هورايح وإلا جاي لان وجهه ماله معالم .. ولو تشوف وجهه تحسبه واحد معطيك مقفاه .. يعني مفروض يحط لوحه على وجهه ويكتب .. ترى هذا وجهي .. عشان الناس ما يلخبطون المهم اني
    قلت لها : انا عيوني مثل عيون جواد .. وطولي مثل طول طلال الرشيد .. وخشمي مثل خشم خالد عبدالرحمن .. وملحي مثل ملح راشد الماجد .. ومهضوم كثير مثل رامي عياش .. (( والله ماناقص الا تحط ملحن معاهم ويكمل الاوبريت ..!!)) الوكاد ان البنت شكلها خقت معي وقامت تشاهق من الفرحه وسالتها انا .. وانتي اوصفي لي شكلك ..
    قالت : ما اقدر لما تشوفني بتعرف لان مالي شبيه (( اخس يا برتني ..!!)) وانا اللي افك خشتي وسعابيلي تقوطر .. كاني كلب شايف له عضمه ..
    وقلت لها : يعني باشوفك ..؟؟
    قالت : اكيد انا بكره باروح شاليهات اليمامه اللي على طريق الرياض الخرج .. ونتقابل هناك
    قلت لها : بس هذيك للعوائل بس ..
    قالت : عاد انت دبر نفسك ..
    قلت : اوكي مو مشكله بس كيف اعرفك ؟؟
    قالت : بيننا الجوال اذا وصلت كلمني وانا اعلمك وين تلقاني ..
    قلت : لها خلاص الوعد هناك .. المهم اني انا توهقت .. وش لون ادخل الشاليهات ...؟؟؟
    وقلت : مالي الا عبدوش .. اتصل عليه واتفاهم معاه .
    دقيت عليه ورد علي قال : نعم وش تبي يا الغبي ..؟؟
    وعلمته بالسالفه من سلسل اللين طقاق عليكم ..(( يعني من طقطق اللين السلام عليكم ))
    وقال لي : والله صعبه وش بتسوي ..؟؟
    قلت له : وش رايك تلبس عباه وتسوي نفسك حررمه وترووح معي على انك زوجتي ..
    وهو اللي يتغير وجهه وقال : انا ولد ابوي ..
    قلت : بالله توني ادري .. كنت احسبك ولد ابوي انا ..!!
    قال : تستهبل يا الزبال .. انا اسوي نفسي حرمه ..؟؟ يا ويل ويلي ويلاه .. خيل الخيل خيالها
    قلت : يا رجال كلك تبن لا ادوس في بطنك .. جالسين في مضارب الباديه حنااا ..!!
    قال لي : لا يا مصيووول هذا شي ما اقدر عليه .. وش اقول للجماعه ..؟؟
    قلت له : ومن قالك اننا بنحظر عرس .. حنا بنروح الشاليهات .. وانت ما راح تكشف وجهك ابدا ..
    قال : طيب ليه انت ما تسوي نفسك حرمه وانا الرجال ..؟
    قلت يا رجال انا ما اقدر لاني لا رجال نافع ولا حرمه نافع وبعدين حتى لو سويت نفسي حرمه بيكشفوني من ريحتي اللي كنها ريحة شرابات عزووبي
    قال لي : خلاص بس لا حد يدري ..
    اليوم الثاني واخذ سيارت واحد من العيال ورحت لبيت عبدووش ولقيت عند بابهم شحاذه وهي اللي تجي تبي تركب قلت لها الله يعطينا ويعطيك يا خاله .. وهي اللي تطق قزاز السياره شوي وتكسره واطلع من جيبي ريال ونص كنت ناوي اشتري فيه توكس بس قلت مو خساره
    وتوني افتح الدريشه باعطيها الا وهي تقول افتح الباب الله ياخذ هالراس الصوت مو غريب علي يووووووه عبدووووووش قال .. اييه عبدوووش الله لا يبارك فيك افتح بسرعه قبل ما يطلع احد من اهلي .. وركب وانطلقنا للشاليهات المهم وصلنا وامسك يد زوجتي اللي هي عبدووش سابقا ودفعنا التذاكر ويوم جينا ندخل وقفنا الحارس اللي على الباب
    وقال : لحظه لازم زوجتك تدخل محل تفتيش النساء لاننا شاكين فيها
    قلت له : ليش مطار ..؟؟
    قال الحارس : يا اخوي وش هالحرمه اللي لابسه زبيريات ..!!! وانا اللي اناظر في ارجول عبدوش والا فعلا لابس زبيريات ..!!
    يالله لا تفضحنا بس وانا اللي اقول للحارس : ممكن تتركني معى زوجتي .. ابيها في كلمة راس ..
    قال : ادخل هالغرفه الفاضيه وتفاهم معاها .. وانا اللي اسحب عبدوش للغرفه واترفس في بطنه وانواع
    الاكواع .. نعن ابوك يالغبي زبيريات مره وحده ..
    قال : وش اسوي ما لقيت جزمه كعب على مقاسي ..
    قلت له : اسمع نزل العباه على ارجولك عشان ماحد ينتبه يا الغبي .. المهم اننا رجعنا للحارس واعتذرنا منه على سوء التفاهم ودفيناه بمية ريال عشان يسكت .. واول ما دخلنا استاجرت شاليه صغير وقلت لعبدوش يجلس فيه وانا برووح ادور خويتي .. ووصفت لي مكانها .. تقول انها عند الشجر اللي جنب المطعم .. وانا اللي اروح هناك واجلس ساعتين ادورها وما لقيتها .. وادق عليها جوال
    قلت لها : وينك فيه لي ساعتين ادورك .
    قالت انت وينك بالضبط ؟؟
    قلت : انا واقف جنب كيس زباله وانتي ؟؟
    قالت : انا واقفه جنب واحد شكله مجنون .. وانا اللي التفت ورااي اوووب .. هذي هي (( افااا طلعت انا المجنون اللي تقصده وطلعت هي كيس الزباله اللي اقصدها ..!!))
    وهي اللي تنصدم .. وقالت : هذا انت ؟؟ وين الوصف اللي تقول .. اجل طلال الرشيد هاااه امحق طلال اللي تشبه له (( صادتني عيوني مثل عيون خالد الملا .. وجسمي مثل نبيل شعيل وخشمي مثل عبدالمجيد عبدالله ..!!))
    قلت : لا انا فعلا مثل ما قلت بس صار لي حادث هو اللي اثر علي والا انا كنت حلو (( ايه هين )) موو مشكله اهم شي اسلوبك اعجبني .. قلت لها اشوى ان اعجبك شي فيني .. وطلبت منها انها توريني وجهها ..
    قالت طيب بس لا يشوفنا احد ..
    قلت لها : يالله بسرعه .. وهي اللي ترفع الغطووه .. وانا اللي اضحك ..!!
    قالت : وش فيك تضحك ..؟؟
    قلت : يالله عاد بدون استهبال .. !!
    قالت وش فيك ..!!
    قلت لها : يالله بسرعه شيلي القناع اللي على وجهك لا تستهبلين ..
    وهي اللي تقول : هذا وجهي الصدقي يا القرد .. وانا انصدم واحس ان الارض تدور فيني وش ذا الوجه الشين .. اول مره اشوف وجه يطلع منه ريحه .. نعن ابووك حتى الشجره اللي كنا جنبها رفعت ثوبها وانحاشت وانا كنت حاط في بالي كلام رومانسي جلست عشرين دولار يوم احفظ فيه .. بس يوم شفت وجهها الي كنه واحد جالس في مجلس رجاجيل وفيه اسهال .. واضيع كل الكلام اللي حفظته
    ليه الغمص ساكن عيونك ..؟؟ جاوبتني من الارق
    سالتها طيب وش هالببسي اللي مكبوب على ثوبك ..؟؟ جاوبتني هذا موب ببسي هذا مرق
    سالتها طيب ما عندك غير هالثوب ..؟؟ جاوبتني الا كان عندي بس انسرق ..
    سالتها طيب مادام شينه وشهو له تغازلين ..؟؟ جاوبتني انا كنت حلوه بس ان وجهي انحرق ..
    وسالتني وش رايك فيني .. ما اشبه باسكال ..؟؟ جاوبتها انتي جسمك مثل جسم باسكال بس وجهك الله خلق وفرق ..!!
    المهم اني ما قدرت اتحمل وجهها وقلت لها .. انتي جدك الاكبر كان غوريلاا ..؟؟
    قالت لي : لا تطنز انت ووجهك .. انا اول كنت مصدقه ان الديناصورات انقرضت .. بس من يوم شفت وجهك عرفت ان هالكلام اشااااعاااات
    قلت لها : شوفي يا انسه جراده انا ودي اجاملك واقولك كلام حلو بس وجهك يقول مالك امل ..!!
    قالت لي .. والله حتى انا بعد ودي اقول كلام حلو بس وجهك ما يساعد .. وجهك كانه دعاية لاااااااا للمخدرات ..!!
    المهم ان كل واحد منا تفل في وجه الثاني ورحنا .. وانا من الصدمه توقف تفكيري .. كل امالي واحلامي راحت ادراااج الدواااليب ... وركبت السياره ورجعت للبيت وانا متحطم .. كنت كنت متخيلها مثل مايا نصري والا اليسا وطلعت مثل فطووووومه ..لاااااااا خلاص ما عاد ابي اتعرف على بنات .. (( تكفى اخر مره حرام تحطم قلوب المعجبات يا رامي عياش ..))
    المهم اني سكرت باب الغرفه ورحت في نوووووووومه
    وما دريت اليوم الثاني الا اللي يرفس الباب .. وانا اللي انقز من فراشي .. وش السالفه يالربع الا وهو ابوي يصايح .. افتح يا السمرمدي .. افتح لا بارك الله فيك .. وانا اللي افتح الباب ..
    الا وابوي في وجهي ووجهه ما يطمن .. ويطلع ذيك العجرررررررررررا من مخباه .. وانواع التلحيط .. واخواني وامي واقفين عند الباب يتفرجون الانذال .. من لقاها مصارعه على الطبيعه
    المهم ان ابوي شغال فيني تمحيط ويقول : ((تتزوج من ورانا)) يا الخسيس قلت له والله ما تزوجت قال : الا الشاليهات اتصلو علينا وقالو خلو مصيول يجي ياخذ زوجته اللي نساها امس .. وانا اللي تضيع علومي ..
    وابي افهم ابوي شغال ضرب فيني .. وبعد جهد جهيد قدرت انفك من ابوي ورحت لاخر الغرفه ..وياخذ ابوي نعال ويرميها على .. وانا اللي اوخر عنها بسرعه وامسكها بفمي ..(( متاثر بالافلام )) واخواني يوم شافوني سويت هالحركه وهم اللي يصفقووووون ويصفروووون لي .. وانا اللي اتحمس .. وانط على ابوي وامسكه مسكه منووووومه (( خربها الغبي مع ابووه ..)) وينط واحد من اخواني ويمسك يد ابووي ويرفعها اول مره ويرفعها ثاني مره وطاحت ويرفعها ثالث مره وطاااحـــ.. لاااا لا لا لا غير معقول رفع ابوي يده وقام ياشر باصبعه يعني لا تراني ما نمت ..!! ويوم شفته ما نام وانا اللي اقوم وامسك ارجوله واسوي له حركه مقصيه عشان يستسلم .. بس ما استسلم .. واخواني يقنعونه يستسلم بس هو عنيد يزحف عند الحبال .. بس انا ما خليته ينفس .. وفجاه اووووه لااااااا تدخل خارجي .. امي جات المقلاه ومحطتني على جبهتي محطه مدووووويه .. وتدخلو اخواني ومسكو امي وطلعوها برا الحلبه (( عائله دلووووخ )) المهم اني دخت ما عاد ادري وين انا وطحت مكاني .. ويزحف ابووووووووي .. ويحط يده على صدري .. ويعدون اخواني .. واحد .. اثنين .. ثلاثه .. فااااااااز ابوووووووي .. هييييييييييييييييييييه (( الحمد لله والشكر ))
    المهم اني فهمت ابوي السالفه .. ونمر بيت ابو عبدووش ونعلمه وانواع التمحيط فيني المهم اننا وصلنا الشاليهات وقلت له معي لك مفاجاه وهو اللي يضحك قال والله اني خابرك ذيب ما تترك خويك كذا الرجال والا بلاش .. وانا اقول في صدري ايه هين .. وهو يقول اكيد بتعرفني على وحده من خواتها قلت ايه انا بعرفك على وحده صحيه وهو يبي يشوف المفاجاه بيفصخ العباه قلت : لا خلها عليك كذا احسن (( انواع النذاله )) وصلنا السياره ..الا الا وابو عبدوش ما سك مفك عجل يحتري ولده .. وعبدوش من هول الصدمه ما عاد شالته رجليه .. طاح مكانه وقام يصيح ويولول واستلمه ابوووه انواعتفقيع الوجه وانواع الترفيع والتنزيل زانا جالس اتفرج ومبسوووط .. وما دريت الا وابوي ما سكني وانواع الركب .. وانا اصيح فيه .. هيه يا ابو الشباب حلا هو..؟؟ توك طاقني قال ابوي .. ايه بس عيب الرجال يطق ولده وانا جالس اتفرج لازم اسوي شي انا بعد ..
    المهم كل منهم اكل طق وتزاعلوووووووووو

    تحـــــــــيــــــــــا تـــــــــــــي

    أخوكــــــــــــــم :
    كــــــــــــــازوزا

    ودمــــــــتـــــــــــم ســــــــالـــــــــمــــيــــن

    منقووووووووووووووووووووووووووووول
    اخر تعديل كان بواسطة » كازوزا في يوم » 03-08-2006 عند الساعة » 00:33
    attachment
    attachment
    attachment
    ****يكفي إني من نجد تعلمت إن الخضوع لغير ربي مذله *****


  2. ...

  3. #2
    هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههههههههههههههههههههه
    رووووووووووووووووووووووووووووووووووووووووووووووووو وووووووووووووووووووووووووووووووووووووووووووووووووو ووووووووووووووعة وتحفففففففففففففففففففففففففة القصة موتتني ضحك والله
    حلوة حلوة حلوة حلوووووووووووووووووة كتيييييييييييييييييييييييييييييييييييييييييييير

    ما بعرف كيف اعبر عن خفة دمها للقصة ^^

    من جد روعة تسلم ايديك
    بس ممكن تعطيني رابط الجزء الاول اخي؟؟ لو ممكن

    والف شكررررررررررررررررررررررررررر عالقصة الجناااااااااان

بيانات عن الموضوع

الأعضاء الذين يشاهدون هذا الموضوع

عدد زوار الموضوع الآن 1 . (0 عضو و 1 ضيف)

المفضلات

collapse_40b قوانين المشاركة

  • غير مصرّح لك بنشر موضوع جديد
  • غير مصرّح بالرد على المواضيع
  • غير مصرّح لك بإرفاق ملفات
  • غير مصرّح لك بتعديل مشاركاتك
  •  

مكسات على ايفون  مكسات على اندرويد  Rss  Facebook  Twitter