ليش تزفوني لقبري؟؟(((*مره حلوه لا تفوتكم*))))

[شــــيــــخــــة الـــبــــنـــــات]

السلام عليكم
انا عضوة جديدة وهذا اول موضوع اكتبه وهاذي قصة قريتها في احد المنتديات وعجبتني وحبيت انقلها لكم وان شاء الله تعجبكم
__________________________________________________ __________

الجزء الاول
القصه مزج بين الإماراتي والسعودي والكويتي ) يعني قصه خليجيه (
لأخذ العلم: فهم شخصيات القصه وايد معقده لذا انتبهوا وركزوا في الشخصيات من البدايه عسب ما تضيعون فنص الطريج.


البدايـــــــــــــه

اليوم هو أول أيام عيد الفطر المبارك .

في أجمل بقاع الأرض ( الإمارات ) وبالتحديد في دار الزين:
العائله كلها كانت مجتمعه في عزبة أبو الريم ( سيف (

أبو الريم ) سيف ) ....... 39 سنه ....طيب ..حنون.. يموت فبنته لأبعد الحدود.
أم الريم ) أسيل)#الأم كويتيه من سكان السعوديه# .. 37سنه..هاديه..ماتحب تدخل فمشاكل العايلة وايد .. منبوذه من حريم خوان ريلها من الأم .
العائله كانت دايما على خلاف لأسباب سخيفه للغايه يثيرونها خوان سيف من أمه (4أخوان و 3خوات(.
عائلة أبو سيف عايشين في العين وعندهم بيت شعبي من أكثر من 17 سنه, حاول سيف فامه وابوه ينتقلون من هذا البيت أكثر من مليون مره ولكن كل محاولاته بائت بالفشل .....كبر فالبيت ووسع فيه لين ماستوى أكبر بيت شعبي فالمنطقه وكانوا خوانه من أبوه ينعتونه بالبخيل وقالوا إنه باخل على أمهم بفيلا مابتظر تجارته بس هو كان دايما يتصبر لأنه استوى مسؤول عن عائلة كبيره بعد وفاة أخوه العود.

قاطمه ( بنت عم الريم من اليده( بنغزه : أقول ريامي ما انتقلتوا؟
الريم بظيج وطفر (ملل): لا ..... وما بننتقل.... بيتنا ونباه والحمدالله يسدنا .
فاطمه بخبث : صدج يسدكم؟؟
الريم : هيه يسدنا .... تشكينا نحن؟
فاطمه : لا بس نحن اللي أقل عنكم مشتريين بيت شكبره وإنتوا أكبر عائله بيتكم شعبي وجد....
الريم تقاطعها: بس تييبين الجلطه .
الريم ..14 سنه ..طيبه .. وتحب الكل .. عنيده .. الله يكافي أمة محمد إذا عصبت ..فيها كبرياء فظيع .
محمد .....11سنه .....أخو الريم ويحبه وايد .....متعلق فأسامه....وطبق الأصل في الصفات عمه حميد أما الشكل كوبي بيست عمه شهاب وطبعا ذياب( بتتعرفون عليهم قريب).
فاطمه : صدج إن قالوا الحق يزعل .
حرجت الريم وقامت يودتها من اثيابها : بيتنا ..كيفنا .. نحن أحرار فيه وبيتج لج واللي موب عايبنه ياكل تراب .
مريم إخت فاطمه سارت ادور حد من أعمام الريم ( من الأم والأب).
مريم : عمي حمييييييييييييد
حميد بظيج : نعم بلاج شاله الدنيا بصوتج؟
مريم : بنت أخوك عافده عفطيم بتجتلها .
حميد " فديتها ريامي بتفكنا منهم , موب خسارة التربيه فيها " وبطرف عين : وبنت عمج على ما أظن ...
مريم " أمحق بنت عم " : هيه بنت عمي بس يالله عن تنفدها.
حميد والريم وصلوا وجافوا الريم تزاعج عفطيم وفرت في ويهه رمل .
قامت فاطمه بتظرب الريم بس في الأحلام .....الريم متربيه بين أولاد رفعت إيد فطيم ولوت الثانيه ورا ظهرها.
فاطمه تزاعج : أبووووويااااااااااا.........أماااااااااااايااااااا ا لحقوني ....أماااااااايااااااااا ..........أبوووووويااااااااااااا بنت أخوك ناويه تحفر قبريه .
الريم فخاطرها " لو أروم كنت ما اترييت للحين يالغبيه".
الرياييل والشباب يو عالصرخه من صوب والحريم من صوب ثاني.
أم مريم وفاطمه : ياويييليييي على بنتيا.
فاطمه ودموع التماسيح : أماايا ( تصيح ) إيديني تعورني.
سيف ( أبو الريم ) حرج وسار صوب بنته معصب .
حميد يود إيده : سيف ياخوي بنتك معاها كل الحق فاللي سوته.
حميد ... 19 سنه) عنده أخوين توائم وإخت ... أبوهم تبرا منهم وهم يهال بعد وفاة أمهم ....ربتهم أم سيف ورضعتهم مع عيالها وعاشوا بينهم كأنهم أفراد من العايله) ...طيب ...حنون مع أهله..مغرور..اللي مايعرفه بيكرهه من نظراته المليانه خقه وغرور وكبرياء .
شهاب + ذياب + مانع + نافع + راشد + أحمد ...كانوا يجوفون الريم ومبتسمين.
شهاب +ذياب.... 18 سنه ... عيال أم سيف (توأم) ... هم خوان نافع+مانع)خوان حميد) بالرضاع.
نافع + مانع .....17 سنه ....( شخصيات التوائم ( الشله) بنتعرف عليها فأحداث القصه).
راشد .... 20 سنه ......ولد المرحوم ( جاسم ) ولد عم الريم بس أكبر عن أعمامه ( بيذلهم ذل هههههههههههههه).
أحمد .....21 ولد خال الريم .....أم الريم ربته مع خوان ريلها اللي ذكرناهم .
أبو الريم : ريم عيب اللي تسوينه مايبتج عسب تسويين جي .
الريم : بس يابوي..........
أبو الريم : إعتذري حق بنت عمج ولا تنسين إنها أكبر عنج .
الريم : عمرا لكن عقلا لا.
أبو الريم ) صوته يعلى ) : الريم .
الريم : لو موب إنت يابوي اللي طالب اعتذر جان ما اعتذرت لو عقص رقبتي.
الريم توجه كلامها لفاطمه ) بنبرة استهزاء): السموحه منج يابنت العم.
عاشه( بنت خال فاطمه والريم ): بس ياعمي العدل مايقول جي الريم فرت فويه فطيم رمل.
أبو الريم من داخل متقطع ....أخوي يقولي إنه الحق كله معاها وانها موب غلطانه وأنا متأكد من تربيتي لها لكن أخليهم يذلونها جدامي مستحيييييييل : عاشه فديتج فطيم مره وعاقل بتسامح بنت عمها ........ولا شو ردج يابنتي ؟؟
فاطمه : مسموحه الريم ولو موب غلاك ياعمي جان ما سامحتها.
حميد كان همه بنت أخوه الغاليه اللي جاف فعينها نظرة عتب وفي عينها كلام صعب ينكتب على ورق .سرح شوي لما رد للواقع ماجافها بينهم , دور عليها بعينه ولقاها تمشي بروحها .... سار صوبه وجافها تدمع بكل هدوء .
حميد يعرف الريم إنا الريم فويه فالتعامل بس شفافه لأبعد الحدود: ريامي
الريم : هلا فديتك .
حميد : مايسوون دمعه من ادموعج الغلا.
الريم : يخسون إلا هم تنزل دموعي عشانهم .
حميد : عيل ليش اتصيحين؟؟
الريم : أصيح حال أبوي يا عمي لين متى بنتم عهالحال؟
حميد : بس هاييل أهلنا . وخوانا الكبار مالنا بد منهم .
أي أهل اللي ترمس عنهم أي خوان اللي قاصين ععماركم ابهم .. إذا أبوي داس عقلبه ومشاعره وك... أن ما أروم أسكت يغلطون عيدي علني فداه واسكت هالشي المستحيل عمري ما غلط عيدهم أو آبائهم ......
حميد قاطعها بحزم ) فخاطره منصدم من اللي قاعد يسمعه ):شو هالرمسه اللي تعقينها عأبوج يالريم ...أبوج عمره ما داس عكرامته.
الريم : وشو اللي استوى اليوم جدام عينك ؟
حميد بهدوء ونبره حانيه : ريامي السكوت عمره ماكان النسيان جوفي الأرض ساكته وفيوفها بركان ...بيي اليوم اللي بتنفجر فيه هالبراكين .
الريم : أتمنى .
حميد : تبين القطيعه لهلج ؟
الريم : لا مابا المذله لهم جوف كيف وضعكم بين الرياييل والشباب ووضع أمي وخالوه وحريم عمي جاسم (الله يرحمه ) إنت راضي بهالوضع؟
حميد : محد راضي فيه ........بس دام أبوي وأبوج أكبرنا وتعبوا وياهم أكثر منا ما اشتكوا بنيي نحن نشتكي . مايصير عيب.
حميد لوى عالريم : كل يوم تكبرين فعيني أكثر.
الريم بغت تغير الجو : تعليمك ........
حميد + الريم : ههههههههههههههههههههه.
حميد : غمضي عينج لج عندي مفاجأه لعيد ميلادج اللي مر فشهر رمضان ,,,,أدري لو حد سمعني بيقول منقود , لا تخبرين حد أوكي ؟؟
الريم : أوكي .
غمضت الريم عيونها وقادها عمها لين رايه بيضاء: هني يالريم كنزج.
الريم وعلامات الإستغرب مرسومه على ويهه: كنننزييي؟؟؟؟؟؟
حميد ضحك من ردة فعلها : هيه كنزج ما ودج تحفرين وتاخذينه؟
الريم بفرح : أبا أبا
حميد ضحك : إنزين يالياهل إحفري.
الريم : ما أبا.
حميد : ليش؟
الريم:لأني موب ياهل .
حميد : سحبناها الشيخه يالله إحفري .
تمت الريم تحفر لين ما جافت صندوق خشبي روعه ظهرته : الللله .....روووووووووووعه .
حميد : بعدج ما بطلتيه وهاي رمستج عيل لو بطلتيه شو بتسويين ؟
الريم : بدفن عمري هني.
حميد + الريم : هههههههههههههههههههههه.
ردت الريم عند أهلها وأول حد سارتله كان أبوها : باابااتي.
أبو الريم بفرح: هلا والله بالغالية.
الريم: أبوي جوف لقيت كنز .
أبو الريم : كنز مره وحده .
الريم بابتسامتها اللي فيها طيش الطفوله والمراهقه: هيه وكنز أغلى من كنوز الدنيا كلها .
أبو الريم : ليش؟
الريم : لأنه من ناس غاليين ........ماعليه باباتي براويك إياه فالبيت إنت والأهل ما با ناس يجوفون ( وناظرت ولد عمها ) طلال .
طلال ......أخو مريم وفاطمه .

إنتهى هاليوم في حياة الريم وحمل وياه درس عمرها مابتنساه وكشف أشياء ما كانت تعرفه مثل : الحقد القوي بين العايلتين.

بعد مرور سنه :
حميد : منوووووع ........ نفووووع......شهابوووووووو.
مانع: اشششششش الوالده راقده بلاك؟
حميد : وينها الريم ؟ عرفت شي ؟
مانع : لا ماعليك ماتدري عن شي والملحق مرتب ومحد يعرف غيرنا وأحمد وعيال حمد .

حمد ( أبو عبدالله) ...38 سنه ...طيب ..بسرعه يعصب .....يحب بنت أخوه بطريقه فظيعه لدرجة إنه سمى ولده " أسامه " لأنها طلبته إذا كانت بنيه يسمونها أسماء فهو حصل أقرب إسم لهالإسم " أسامه " ........عنده خمسه أولاد.
أم عبدالله (عهود)#إخت أسيل ( أم الريم )#: 35 سنه طباعها وايد تختلف عن إختها ...... وايد ربشه ........وماتسكت عن أهل ريلها خصوصا إذا غلطوا على عيالها.
عبدالله : 16 سنه ....الريم متحيره حقه من هم يهال وهو يموت فيها... الأهل خبوا هالشي عنهم .
عبيد.......14 سنه .....طيب.... عصبي ..مدمن إنترنت .......يموت فامه.
فلاح.....13 سنه .......هادي ........بيتوتي ....مريض بسرطان الدم(اللهم كافينا ) .
أسامه...11سنه ....طيب ........ربشه ......يحب أخوه فلاح وايد .....متعلق فخو الريم محمد وهم خوان بالرضاع.
تيم .....آخر العنقود .حبيب البابا والماما ) عقولتهم ) غرام الريم ونقطة ضعفها ...عمره سنه وشهرين.

نرجع للقصه:

حميد : منوووووع ........ نفووووع......شهابوووووووو.
مانع: اشششششش الوالده راقده بلاك؟
حميد : وينها الريم ؟ عرفت شي ؟
مانع : لا ماعليك ماتدري عن شي والملحق مرتب ومحد يعرف غيرنا وأحمد وعيال حمد .
حميد : متأكد ؟؟
يتبع.............................................. .........

[شــــيــــخــــة الـــبــــنـــــات]

الجزء الثاني
في المستشفى:
ظهر الدكتور من حجرة العمليات وتعابير ويهه ما تبشر بالخير : أحسن الله عزاكم , عظم الله أجرنا وأجركم.
الشباب صخوا كيف بيبلغونها بالخبر؟
خليفه : لا حول ولا قوة إلا بالله , أجرنا وأجرك .
( تم خليفه يطالع في الريم اللي قاعده بعيد عنهم تقرا قرآن وتدعي من الخاطر ) .
سلطان ) طالع الريم ورد يرمس الشباب ) : الله يستر .... كيف بنخبرها ؟
سعيد : أنا بتصرف .
سلطان : خلنا نحن نتصرف عن يورم غزك الثاني .
سعيد : فاللي ما يحفظه .
سلطان : إيه .. إيه ... لا تدعى ععمرك .
سعيد : أوووووووه ) وسار صوب الريم ).
سعيد ...... 20 سنه ......يتيم الأبوين ........أبوه وأمه توفوا فحادث سياره ويوم بلغوه عن وفاتهم كان عمره 16 سنه .... وحيد ما عنده لا خوان ولا خوات ....... يعني" مقطوع من شجره " (مادري إذا المثل صح ولا لا ) .
سعبد : لو سمحتي إختي .
الريم : ما بسامحك ولا بعتذر عاللي سويته ) تقصد الطراق ) .
( الريم كانت ما ادمع أبد ) .
سعيد : أفضل ادقين حق حد من أهلج عسب تظهرون أكيد عمج ما يروم يسوق أحين.
الريم : مستحيل .....أنا وعدته إني ماخبر حد .
سعيد : بس إنتي مضطره .
الريم : إنزين بس بشرط .
سعيد : تفضلي .
الريم : أبا أجوفه أول .
سعيد .......كل شعره فجسمه وقفت " تبا تذبح عمرها ....يعني لازم أطبق اللي طبقوه علي قبل 4 سنين": بس .
الريم : خلاص عيل مابدق .
سعيد " صدق إنها ابدويه ......العناد فيها سمه " : دقايق إختي بجوف إذا يوافقون تدخلين أو لا .
الريم "" ما تيوون إلا بالعين الحمرا "" : أترياك الشيخ .
سار سعيد عند ربعه وكلموا الدكتور ووافق .
رد سعيد عند الريم : تفضلي إختي .
سارت الريم وياه لين دشوا حجره فيها جثة عمها.
الريم شلت الغطا عن ويهه: عمي
سعيد : الله يعظم أجرنا وأجرج .
الريم ....حبت عمها عراسه وإيده: عمي إيدك وايد بارده يوم بنرد البيت بتحس بدفوه.
سعيد ) منصدم ) : إختي ما يستوي إتمين هني .
الريم حرجت : عمي ......تفهم شو يعني عمي ولا ما تفهم ؟؟... يوم بيقوم برد وياه .
سعيد ) ياربي هاي مش مصدقه ).
دشت الممرضه : شو عم تعملوا هوني ؟
الريم : أتريا عمي يوم بينش بنرد البيت .
سعيد : موب راضيه اتصدق إنتي رمسيها يمكن تسمع منج ؟
الممرضه : حبيبتي , عمك منو هونا عمك عند الله بالجنه .
الريم ) تأشر ععمها ) : وهذا منوه ؟؟؟؟؟؟شبيهه ...... لا تفاولين ععمي مره ثانيه فال الله ولا هالفال .........
سعيد ) الله يصبرني ) : إختي شو رايج نسير نكتب ترخيص عمج من المستشفى وإنتي إدقين حق حد من أهلج لأنه مايروم يسوق.
الريم ) بكل ثقه ): أوكي ......... لوسمحت تلفونك .
سعيد عطاها تلفونه دقت حق واحد واللي صدم سعيد إنها ما صاحت : عمي شهاب ....أنا وعمي حميد استوالنا حادث ......لا لا لاتتروع الحمدالله الحادث بسيط .
سعيد) الله يرحمه ويعينكم .
الريم عطت سعيد التلفون : مشكور .
ظهرت الريم من الحجره سايره صوب الريسيبشن وسعيد سار عند ربعه .
خليفه : ها يا بوعسكور علامك متكدر شو استوى؟؟؟
سعيد : شو أقولك ؟؟؟آآآآآآآآآآه بس ...........موب راضيه تصدق إنه غاب وأنا كملت الجذبه بدال ما أقنعها .
زايد : الله يعينها ويصبر أهلها .
خليفه : أن توقعتها تنهار ..كنت أترياك تظهر تطلب ممرضات .
سعيد: وأنا بعد والله شراتك .
وصلوا شهاب +ذياب + مانع+نافع.
شهاب :وينه حميد ؟
نافع + مانع : ريامي وينه حميد ؟؟؟؟؟؟؟
الريم : مابلانا شي كلنا بخير ونعمه ........عمي عطوه مخدر والحين هو راقد .
وصلت الريم لين عند الشباب وقالت : هم السبب كانوا يبون يسابقون عمي .
تجدم سعيد منهم وخذا شهاب عطرف بعيد عنهم : أخوي عظم الله أجرك فخوك .
شهاب ) ما صدق ) : بس الحدث بسيط .
سعيد : نحمد ربنا إنها هي ظهرت منه سالمه .
شهاب تغرغرن عيونه دموع واتأكد إنه ربنا إختار أخوه ومحد يقدر يعارض هالشي.
الريم دشت ويا أعمامها الحجره ) كلهم الهم مرسوم على ويوههم.
الريم رفعت الغطا عن ويهه : يعني ما يفهمون كل ما أرفع الغطا يردون يحطونه .
دش شهاب وحب أخوه عراسه وظهر الريم من الحجره: ريامي .....( يبلع غصته ) شكثر تحبين حميد ؟
الريم: ماأحبه أموووووووووووووووووووووت فيه .
شهاب : عيل طلبيله الرحمه .
الريم : ليش ؟
شهاب ) ماكانت مستوعب.......... معقوله :
ريامي فديتج ........عمي راح ,,,, ربج إختاره .
الريم : والحفله ؟؟؟؟؟؟؟؟
شهاب ) خانته دموعه وإتأكد إنه بنت أخوه تحتاج فتره عسب تصدق .
البيت كان أسود واللي يجوفه يقول عنه بيت مهجور بس الصدق إنه الكل عايش فيه وفقلوبهم ذكرى إنسان غاب وترك صدى صوت ضحكاته . زعاقه . بكاه . ارتسامت بسمة شفاهه. غاب وغابت وياه ضحكة البيت ........... غاب وسرق فواد أمه ( أم سيف ) ..........غاب ومارحم عمر أبوه ( أبو سيف ) ...........غاب وترك الريم تايهه ماتعرف شو قاعد يستوي .......... غاب وترك آخر مابقاله من ريحة المرحومه أمه ( نافع + مانع + عليا ) ...... غاب وارتاح إنه هذيلا اللي عاش بينهم ......... وهذيلا اللي بيهد خوانه عندهم ............ وغاب وهو فقمة سعادته ....... شو يبا الواحد أكثر عن جي ......... تبرا أبوه منه وظمته عايله كبيره رحبتبه وبخوانه ......... عاش بينهم ولا حس بالفرق بينه وبينهم ........ حب الأهل .......... رضا الوالدين . شو يحتاج الإنسان غير جي؟؟؟؟؟ ( حدث واقعي ).
عليا إختهم وصلها الخبر بعد ساعه من وفاته ........ دخلت العنايه وولدت ولد سموه " حميد " .
مانع + نافع : كل واحد منهم أسوء من حال الثاني .
أم سيف وأبو سيف كانوا في حاله ما يعلم ابها غير ربنا ) صح مش ولدهم بس ربوه من عمره 6 سنين وفجأه يغيب عنهم شو بيكون شعورهم ؟) .
أم الريم واختها ( أم عبدالله ) كانوا منصدمين , خاصه وهم كلهم عايشين فنفس الحوي .
أحمد كان منهار تماما لأنه علاقته بحميد كانت وايد قويه بالرغم من فارق السن بينهم .
بعد يومين من وفاة حميد :
ذياب : الريم وينها ما جفتها من أمس .
مانع ) بصوت ضايع ) : أنا بسير أجوفها .
طلع مانع غرفتها وما لقاها عرف إنها فغرفة المرحوم (حميد)
............ تنهد يوم وقف جدام الباب .........تخيل إنه إذا دق الباب بيفجه أخوه ) مسح ويهه بيده ) أنا شو قاعد اخرف ).......الله يرحمه والله يصبرنا كلنا ويرحم حال أمي وابوي حالي أفضل عن حالهم ألف مره لازم أتصبر عسب أساندهم فهالمحنه .
دق الباب ودش ) شعر جسمه كله وقف يوم جاف الريم منسدحه عالشبريه تكتب وملامحها هاديه : هلا فديتج ( يبلع غصته ...لأنه الحجره كانت فيها ريحة عطر حميد المفضل .... أكيد الريم عطرتها ) .
الريم : ..........................................) تمت الريم ادور ورقه وكتبت " عمي رد ولا بعده ".
مانع ) ضاع عن باله إنها تقصد المرحوم بكلمة (عمي ): كلنا تحت .
الريم نزلت وهي مستانسه بس الوضع مثل ماهو أول ماوصلت جافت أمها قاعده فالصاله ادمع بهدوء ويوم قربت منها خذتها أمها فحظنها ولوت عليها وقعدت اتصيح من الخاطر .
أم الريم ....... كانت أقرب وحده لحميد.....(كانت تذكر اليوم اللي دش فيه حميد أول مره بيتها ) يوم عرست أبو الريم ( سيف ) ماكانوا شهاب وذياب موجودين أصلا وبعد سنه يابت عمتها شهاب وذياب وبعد ثمان اشهور دش سيف وهو حامل طفلين وولد ميوده من كندورته ويطالع المكان باستغراب .....ام سيف ربت مانع ونافع مع عيالها شهاب وذياب أما أم الريم كانت هي الحضن الدافي لحميد ( الله يرحمه ) ........تعبها يوم ربته لأنه كان وايد عنيد وكان كبير 6سنين موب شوي كل يوم والثاني : وين أمايه سارت ؟؟؟؟؟؟؟؟؟ ليش مايون عماتي ؟.؟؟؟؟؟؟ أنا ماعرفكم ليش قاعد عندكم ؟؟؟؟؟؟ إنتي تقربين لنا من أبوي ولا أمي ؟؟؟؟؟؟؟ ومليون سؤال وسؤال غيره .
استوعبت الريم إنه بعده مارد ......ردت حجرته ورقدت .........وقامت الريم والتفتت عدالها بشووق وحنين لكن للأسف اللي تترياه بعده ما يا ......... جافت الساعه لقتها خمس الفير ....تمسحت وصلت ودعت ربها إنه عمها يرد اليوم ...وبعدين نزلت قعدت في الصاله .......... نزل أحمد وجافها قاعده .
أحمد ) بصوت متقطع ) : ريام شو تسوين الحين قاعده برحج ؟
الريم ) كتبت فورقه ): أتريا عمي حميد .
أحمد انصعق ) تتريا حميد ؟.؟؟؟؟؟؟؟؟؟؟؟؟؟؟

[شــــيــــخــــة الـــبــــنـــــات]

قعد أحمد مجابل الريم : ريام فديتج كلنا نحب حميد بس ربج يحبه أكثر عنا ........ربج خذاه عسب يمتحنا ........... العبد الشاكر الصابر يتميز عن غيره فهالمواقف .
الكلام اللي قاله احمد مادش عقل الريم مووووووول " ادخل الرمسه من اذن واتظهرها من الثانيه ".
أحمد : الغاليه إنتي تحبين حميد ولا لا ؟
الريم هزت راسها بالإيجاب .
أحمد : عيل قولي الله يرحمه ويغفرله اذنوبه .
الريم : ..............................
أحمد : لحظه
سار أحمد حجرته وياب صوره فيها صورته هو والريم وحميد .
أحمد : ريامي وين صورتج ؟؟
أشرت الريم على عمرها .
أحمد : وأنا ؟
الريم أشرت عليه فالصوره .
أحمد : وحميد ؟
الريم أشرت عليه .
أحمد : الحين إنتي وين ؟
الريم تأشر ععمرها .
أحمد : وأنا ؟
أشرت عليه .
أحمد : وحميد ؟
الريم ...فجأه تغيرت ملامحها...... وينه عمي حميد ؟ من يوم اندعمنا ما جفته ...ليش كان البيت ممزور رياييل وحريم من يومين ؟ ليش عمي ماظهر ؟
ليش أمايا ويدوه وكلهم يصيحوون من الخاطر؟ شو مستوي ؟؟ لا مستحيل ......... مستحيل ........ عمي حميد يكون سار وخلاني .
دش فهالحظه نافع ) آآآآآآه متى بترمسين وتريحيين فوادي المحروق يالريم ؟؟ متى ؟؟)
الريم تغرغرن عيونها دموع ودمعت.
أحمد : نااافع الريم ادمع ..........ادمع.
نافع لوى عليها : رياامي حبيبي اتصيحين ؟
الريم انفجرت مره وحده : لا لا لا لا .........ع......عمييييييي بعده حي ... أنا أحبه .....لييش سار ؟؟؟؟ ليش ........ لا ياعمي ليش وين اللي قال أنا بوقف وياج إذا حد غصبج عشي ماتبينه ؟...... وين اللي قال ما عليج من اللي يطنزون منج ويقولج معقده لأنج تبين تدرسين عربي ؟ ........ وين اللي قال أنا أخوج العود اللي راح؟ .......... وين اللي قال بعوضج عن اغياب أخوج واختج ؟ ...... وينها هالرمسه كلها ياعمي وين وين ؟؟؟؟؟؟؟ ما بشوفك بعد اليوم .............. آآآآه يا دنيا عاللي تسوينه........ليش احتفلت بموته فيوم ميلادي؟؟؟؟؟؟ ليش كانت هديتي عذااااب وألم؟؟؟؟؟؟
جدران البيت اللي مابكت بعد غياب حميد بكت من كلمات ودموع الريم اللي كانت تحرق الأرض اللي اطيح عليها .
البيت اهتز واللي نام قام عصراخها اللي زلزل العين كلها .
شهاب خذاها من حضن نافع ) الحمدالله إنها رمست وصاحت ) الحمدالله ) لوى عليها شهاب وقعدت تصيح لين مانامت من كثر البجي والتعب.
بعد ما قامت الريم سارت حجرتها وظهرت الورقه اللي عطاها إياها عمها ( الله يرحمه )
إلى الغاليه : ......................................... الريم

ريامي أدري الكلام اللي بقوله صعب عليج ,أنا ماعرف إذا هالورقه بتوصلج والا لا , بس أتمنى توصلج .
الريم كنتي أغلى إنسانه فحياتي وأغلى بنت أخ ( أدري فيلسوف لأنج بنت أخوي الوحيده لا تغتريييييين هههههههههههه) ضحكت الريم عهالجمله ....... أباج تهتمين فمانع ونافع مع اني أعرف إني لازم أوصيهم عليج مش العكس بس إنتي بضحكتج ورمستج تنسين الواحد همه ...... إنتي اللي تعرفين شو بلانا من نظراتنا .........إنتي اللي مافي منج فهالعالم إثنين ......... أعرف إني لو لفيت العالم أدور إخت شراتج مابلاقي .... وإني لو درت العالم ألف مره أدور حظن وعايله أدفى منكم ما بلاقي ............ بس نافع ومانع والوالد والوالده لا تكدروهم وصيتي هاي هي وصيتي ..... سلمي عأمج وايد وقوليلها حميد يقول : ثرييتيلي ثو؟ أمج بتفهم الرمسه ....أحبكم وايد .......... ريامي قولي لساره : وفاتي ما تعني إنه العالم وقف لا نهايتي تعني إنها لازم توقف ....... الضربه اللي ما تجتل تقوي ......قوليلها إنه وصيتي فيها : تعرس بعدي . أحبكم واااايد .

أخوج وعمج المحب دوما : حميد

صاحت الريم اليوم للمره الألف بعد المئه .

ملاحظه : العائله كلها عايشه فحوي واحد فيها أربع بيوت ثلاث فلل محوطه البيت الشعبي مال الوالد والوالده .
ملاحظه : حميد كان مالج على وحده من عايله ثانيه خذها بعد قصه (تنقع من الضحك بتعرفونها فالأجزاء اليايه (

نرد للقصه :

فهاللحظه أحمد دش الصاله : منو خذا عقل الحلوين ؟؟؟؟؟
انقطع حبل أفكار الريم وذكرياتها اللي عاشتها : رجعت سنه لورا.
أحمد بنظره حانيه : الله يرحمه .
الريم : الله يرحمه ويرحم الجميع
أحمد : موب كافي دموع ؟
الريم : شو تقصد ؟
أحمد : يعني لازم نفرح.
الريم استحت من هالطاري: بس.
أحمد : لا بس ولا شي عالأقل خطوبه.
دش شهاب الصاله : منو بيخطب؟
أحمد: أنا........بس ماعرف متى .
شهاب: منو تعيسة الحظ ؟
أحمد : تعيسة الحظ حرمتك يالجربان.
شهاب : أوكي ...هي من العايله ؟
أحمد ابتسم وهو يناظر الريم : هيه .
شهاب : أعرفها ؟
أحمد : صدج دمك ثجيل ... لا بتتعرف عليها .....أقولك من العايله.
شهاب : أهااااااااااااااا.
أحمد : لاغتمك تستخف دمك .
الريم قعدت تضحك عليهم وعلى خبالهم.
دشت أم الريم الصاله : علني ما خلا من هالضحكه .
قامت الريم وحبت أمها عراسها .
أحمد : عموه جوفي هالمزعج مسويلي تحقيق.
شهاب : ماكون ولد معضد وسعاد إن ما فظحتك .
أحمد : ليش تفضحني أصلا عموه أول وحده بتعرف.
أم الريم : شو بلاكم ياعيالي؟
محمد من الطابق الثاني : أممممممممااااااااااااااااااه
أم الريم : هلا يما أنا هني فوق تعال يما.
محمد دش الصاله : شو بلاكم ؟
شهاب : أقول .
أحمد : قول .
شهاب: عموووووووووووه.
أم الريم : عونك يالغالي .
شهاب:ولد أخوج يبا يناسب .
أم الريم صخت .
أحمد : عمتيا شو بلاج؟
أم الريم : ماشي يايما بس تذكرت المرحوم وهو ياي يقولي إنت كنت تقوله بفضحك وهو كان يقول أمايا أصلا أول وحده بتعرف ( وغصت ).
محمد بغا يغير الجو :أففففففففففففففففف.
شهاب : مسود الويه عيب استح عويهك تتأفف جدام أمك .
محمد : طاعوا بس إنتو والله إني ماجفت غيور شراته ...... ليش يعني اخترت ترمس اليوم بالذات ؟
أحمد : بلا أي مناسبات .
محمد : جفتي يما هذا اللي أونه تقولين حسبة ولدج يجذب.
أحمد : بسم الله عليك اقرب هني بجوف حرارتك مرتفعه ولا منخفضه .
محمد : لا الحمدالله أنا مابلاني شي يالجذاب.
أم الريم : عيب يا يما اللي تقوله .
محمد : أوكي إنتو احكموا بانفسكم ........تبوني أقولكم ليش ناس رمسوا اليوم ؟؟؟؟؟؟؟
الكل: هييييييييييه نبا .
محمد: لأنه عيد ميلادي ال13 بعد باجر فهو يسرق الأضواء.
أم الريم : أشهد إنك ينيت وقعدت .
محمد متحرطم : كنت أباج عون اس......................
أبو الريم : سمعت طاري عيد ميلاد شالسالفه؟
محمد عطا الكل نظره حاره .
محمد : ماشي الغالي كنا نرمس عن أعيادالميلاد مالت النصارى.
أبو الريم : زين عيل بعد اشوي بييكم عبدالله .
الريم تغير لونها وانطفى" الله ينطبك .........أكره هالإنسان أكرهه"

أحمد اللي دش في القصه فجأه هل بيكون له دور مهم ؟
ليش الريم تكره عبدالله ولد عمها ؟

[~·.¸¸Mr.UAE¸¸.·~]

ثانكسـ

[~·.¸¸Mr.UAE¸¸.·~]

ثانكسـ