عاشوا بنات الخليج

[Endless tears]

تحياتي ..اندليس تيرز تحياكم يا اخواني ^_^
احم احم ..خلوني اقولكم عن سالفه ..استوت او شي شفته و لاحظته و الصراحه اندليس ما تقدر تكبت شي شافته !!


من ايام سارت اختكم إحدى مراكز التسوق ..وكنت امشي مثل كل الناس ..واشوف شو في المحلات ..
واذا بي ارى ما ليس في الحسبان !! شفت وحده تمشي بروحها !!لين الحين كل شي طبيعي ..بس خلوني اكمل

..الحلوه المزيونه بنت الناس الاحشام ..تمشي بروحها ..و ترمس ..اكيد بالتلفون ..يا حافظ عليج يوم انج تمشين في نص السنتر وانتي ترمسين و تلعلعين ..و لا ليتها من دون حركات..لا الاخت مريحه !! يدها تسير يميت و شمال و هي ترمس ..وكأن الي تكلمه عدالها ..________________ هذي النقطه الاولى !

أما النقطه الثانيه _________ لابسه جلابيه حلوه ..الصراحه عيبتني ..الخوار يصلق من بعيد !! و العباه ..مفتوحه ..حاطتها و جنها بشت مب عباه ..تطير و هي تمشي و جنها باتمان ..بس انا غلطانه هي باتون !!..و لا تبين بعد التوقيع الي في طرف العباه ..اونها من سويت ليدي .."حركات عليها " و الشيله الا على طرف الراس .. و نص الكشه برع .. طبعا الكشه معدله و مسنعتنها ..!!

النقطه الثالثه __________ يقولكم الشعر مصبوغ ..مره حمر يبين من بعد كيلو !! حشا اشارت قف مب شعر !!عن ناكل البنت ..الحين هي متعدله و نحن نعايب !! زين .. و لان المزيونه تحرك ايدها يمين و شمال ..فغصبا عنك بتشوف صبوعها ..و يا عيني على لون الاظافر ..اسود ..الصراحه غاوي ..وطولهم رهيب ..تقول ظفور كاتومن!!

الله يسلمك العطر شال المكان شل .. الدهن العود روحه يكفي ..والله لو انها ما كانت تمشي بتقول ان محل اجمل يمشي .. لا حشا !!اجمل ما يقدر عليها !! متعطره من ساسها لين راسها .. الريحه خنينه .. _________هذي النقطه الرابعه !

النقطه الساخنه الخامسه __________ والله مشيتها .. عذاب !! تتبختر ..تمشي على راحتها ..حركتها كلها على البطئ ..مادري هو الشريط جيه ..او هي طبيعيه .الحلوه تمشي ورافعه صدرها جنها طير ..مب ادمي !!و الويهه ..الصراحه شفته رمادي ..لو ان ما عندي عما الوان ..بس ابصم بالعشره انه رمادي ..الاي شادو فضي على رمادي .. و البودره ملحها مادري ليش ..الظاهر الموضح الجديده الوحده تخلي وييها املح !! و الشفايف !!روج وردي فيه لمعه !!بس باهت ! و الخدود ورديه تقول خدود باربي !! ........

واخيرا شو اقول ..غير يا حافظ عليكن يا بنات الخليج .. مادري اصفق و اقول برافوا ..او اقول الله يهديكم !
الحين بالذمه ..هذي البنت مسبله بعمرها او تمشي على الموضه !!والناس ان شافوا ..بيمدحون او يذمون ؟ المسكينه تستانس يوم تشوف الشباب يضحكون لها ..ما تدري انهم يشوفونها مقصه !!

و السموحه طولت عليكم ..بس مقهوره من الي شفته !و يا كثر ما نشوف
تحياتي
اندليس تيرز

ملاحظه ..عطوني رايكم ..

[PureAura]

مشكووورة على الموضوع

بس يمكن هذا لبنانية او مغربية الان واايد هذيل الاشكال تحاااول تقلد الخليجيين باى طريقة

[وردة_البنفسج]

وانا وياااااااااااااج الاخت انيييم

الصراااااااحه بيموووووووووووتن الا يقلدن بناااااات الخليج

هوه صح جيه بنات بس اغلبهم حشاااااااااام واكثرهم هاذيلا اللي يقلدووونا

اسمحولي طولت عليكم

تحياااااااااااااتي

ورده

[Kyo Sohma]

وأنا وياكم بعد يحاولون يقلدون بنات الخليج

معن ماله دخل بها الرمسه ولد<<<<<<<<<<<<<<<<<<<<<

[Endless tears]

شكرا على الرد يا بنات ..
اسمحولي يا بنات ..يا انمي و ورده البنفسج و الشاب كاتيو .."عن تغني راب بس !سميتك شاب " .. البنت هذي خليجيه !! وليست شاميه ..وانا اقول لكم انها خليجيه
و الي يخليني اتأكد .. ان الحلوه المزيونه سلمت على البنات الي معايه لانها بنت عمتهم !!

..بس حبيت انوه ..

تحياتي
اندليس تيرز

[وردة الصحراء]

كل شئ صار عادي هالايام
لا ستر ولا حشيمة وهذا الشئ ابدا ماا نستغربه لان الزمن تغير
والبنات صارت بس تقلد وتلبس بدون مااا تعرف وش حكم الي تسويه
واذا كان راح ياثر على كرمتها ولا لا
كل همها تمشي على الموضه
ولا انا غلطانه؟

[Endless tears]

لا حبيبتي ورده الصحراء ..كلامج دورر ..
شو نسوي ..يوم البنات يجلبن في القنوات و يشوفن شاكيرا و اخواتها ..لازم بتغار و تقول ...انا شو فيه !!
و الله يخلي LBC و المستقبل و قناة زين !!!الي كلهما مب .زين !! لازم بيكون فيه اقتباس و تأثر !!.......

بس المشكله مب في القنوات و المغنيات و وسائل الاعلام ..المشكله في المخوخ !! الاخلاق !!

وتحياتي لج يا ورده الصحراء

[وردة الصحراء]

المشكلة مشكله التقليد الاعمى
بدون مراعه للعادة والتقاليد

[الوردة البيضاء]

والله تشكرين على طرحج اختي لهالموضوع الرائع.......
ومثل ما تفضلتي للقنوات الفضائية سببرئيسي في ذلك...... فلو نعود الى الخليج بالثمانينات او بحد أقصى اوائل التسعينات.... لا يتجرأ أحد على أن يلبس هذا اللباس ...ولكن دخول بعض الجنسيات من مختلف الأجانب والعرب ونقلهم لعاداتهم الينا من اللباس والتصرفات دون أن تحكمهم قوانين الدولة وتركهم على ما يشتهون....وتساهل الأهل مع بناتهم منذ صغرهم بحجة انهن صغار لا يعون ما يفعلون ولكنهم يسنسون أن من شب على شيء شاب عليه...
تحياتي

[فـــلــة]

والله كل شيء جايز هذه الايام

للاسف أصبح لبس العباه للزينة والتبختر بها وليس للحشمة

شكرا اختي على الموضوع

[eternal-saudi]

سلامي للجميع ....

أندليس ..

انتي لسه عايشة ..

هلا كيف حالك .؟؟

بصراحة الموضوع جداً .. جميلة .. نقول برافو على الخيبة إللي احنا فيها .. مو شرط تكون شامية او مصرية او اردنية .. أنا أؤكد وجود هاذي الأشكال في الخليج وخليجية المنبع والأصل .. هاذي الأشكال .. ندعي لها .. مو بالهدايا بالشفاء ... عشان تعرف العز إللي هي عليه .. بس ما تقدر ..

وبالذات في هاذي الأيام ... ما نفرق بين الخليجية .. أو الشامية أو المصرية .. كلهم نفس الشكل تقريباً ..

وشكراً ..

[فتاة الرياضيات]

السلام عليكم

موضوع رائع

سكتي ذكرتيني بالي اشوفهم في السوق

وهاذي البنت الي شفتيها تراني شفت مثلها عندنا

والمشكله انهم خليجيات

انا ما اقول غيير الله يهديهم ويستر عليهم دنيا واخره

وسلااااام

[cute_Polyana]

سلالالالالالالالالالالالالامي عليج وعلى موضوعج يا Endless tears


اولا ..كلامج صح 100% الأخلاق الحمدلله والشكر رايحة فيهاومافي شي اسمه ايمان بالقلوب


ولا لو فيه جان الحمدلله بتلاقين البنات كلهن مسترات وما يعيبهن شي ....


ثانيا .. البنات لما يشتكووون والله الشباااب ملعوزينه في الأسواق ومادري شوي ..تدرون ليش ملعوزينكم من اللي


يشوفونه منكم ومن بلاويكم فالمفروض تعذرونهم يعني اذا غازلوكم ..


والله اشكر فنج على هالموضوع الجميييييييييل والهادف الى توعية الناس (الرقود)

[Endless tears]

سلام ..اندليس تيرز back >>

هيه صاجه يا خويتي ورده الصحراء (( على قولة سبجوه في قطعه 13 )) ..
بس مب تخليهم عن العادات و التقاليد ..هذا اكثر من جيه ..ايمانهم و قلوبهم ضعيفه ..فكروا بدنيا و كيف يظهرن فتنهن للناس ...ما فكرت ان الجمر الي بيها على عدد شهر قصتها الي مطلعتنها من الشيله !!

حيا الله الورده البيضاء ..والله صدقج ..من شب على شي شاب عليه ..و هم مثل ما تشوفين .. ما يسمعن امهاتهم يوم ينصحونهم و يقلدن نوال الزغبي و غيرها !!

هلا فله ... اخاف العباه و الشيله ..بعد عشر سنوات ..ما تشوفينها الا في المتحف ..والله يستر !!من يور البنات !

eternal-saudi.........هلا اخويه ..والله اندليس تيرز مازالت على قيد الحياة ..بس شو نسوي ..كنت عايشه في دنيا مختلفه ..بس الحمدالله على ايتي حال .. المهم ..نرجع الى ""محور حديثنا "".....مب المغربيه و الخليجه نفس الشكل ..الا ان الخليجيات نزلن من مستواهن و استووا مثل الروسيات الي ما يعرفا الاخلاق و المعاني !

فتاة الرياضيات ..بعد انتي شفتي هذا الصنف ..يقولج منتشر هل الايام ...!!

cute_Polyana...........اسمحيلي و خليني اقولج انج جميـــــــــــــــــــــــــــــــــــــله على قولة علوان .. !!
والله يا ختي ..الشباب ما ينلامون يوم يغازلون البنات الي من هذي النوعيه ...ترى الشباب ما يقدرون يودون عماروهم ..الحين انا بنت ..و يوم اشوف وحده متعدله و متزقرده و تلق و متسبحه بقرشت العطر و لابسه المزرزر و الي متستر متستر و الي كشفه تراه شكف.. اطالع .. و ين الشباب الفقراء ..بس شو نقول غير الله يهدي البنات ..و يستر عليهن

تحياتي الى جميع اخواني الصغار
الاخت الكبرى