تـــــــــــــــــــخيــــــــــــــــلوا لشاعر المبدع / ياسر التويجري
تخيلوا لو الحريم بيسوقن***** ونلقى لهن في كل شارع طرايف
تلقى العجايز في الشوارع يدورن****** وسيارة الإسعاف ترقب حتايف
وليا تأخرن دقايق يصيحن *****ثم ركبوا فوق المواتر ولايف
قامت تكبس لك بالأنوار ياهن بين *****أخوياك وصرت محرج وخايف
وتخيلوا لو ذات يوم يمرن *****عليك دوريات والجمس طايف
ويوم طرحوه يصير موقفك محزن***** تلقى العجوز مكلبشه ياحسايف
وتلقى البني في كل جلسة يتكن***** طقه بلوت ومعهن الكيف كايف
هذي تبى تحكم وهذي تبى صن *****والبيت ضايع دون طبخ و غرايف
يالي ذنوبك فوق رأسك يحنن****** إلي في قلبك طلعتها الشفايف
أنظارنا من فوق ذكرك يشوحن *****نشوف شيء ما تشوفه ياهايف
حق المرأة يا شيخ تلعب على من***** خبلان حنا ولا ويش أنت شايف
وين أنت عن صوت الأرامل ينوحن ***** وين أنت عن حق المرأة في الوظايف
وين أنت عن جملة بنات يضيعن***** وين أنت يا راعي العلوم النصايف
لو هي بيديكم كان قلتم يغنن *****لكن صدمتم في الجبال النوايف
من دونهن حنا و في بقلوبنا هن***** الطاهرات الساجدات العفايف
والمسألة لا صارت لحقت شرفهن***** يروح فيها يا زلفى طوايف
هذا كلامي وأسمعه زين وأذعن *****قلته ولا ني من تواليه خايف
قلته وباقف وأرفع الصوت وأعلن *****إرادة الأمة على لسان نايف
مهو تخلف لا رفضنا يسوقن****** رأس التخلف لا تركنا العطايف
المفضلات