[SIZE="3"]السلام عليكم اعضاء مكسات
هذي قصه صارت لي حبيت اكتبها لكم[/SIZE]مره كان عند باب بيتنا قطوه صغيره تصيح وشافها اخوي ودخلها البيت وعطاها حليب ويوم
شافتها امي قالت رجعوها الشارع وطبعا حنا اقنعناها تخلي لنا القطوه على الاقل بالحوش
وسميناها ((فرطوقه)) لأنها انثى ومره فكرنا نشتري قطو دلوع وحلو ومن نوعيه نادره نوعيته
هملايا شريناه طلبيه من روسيا واول ما جابوه سميناه ((رومي)) وطبعا فرطوقه غارت من
رومي لأن فضينا له غرفه لحاله وما ياكل الا من احسن الانواع والرمل حقه من احسن الانواع
وكل شي من افضل وافخم شي وكان اخوي يسرق اكل رومي ويعطيه لفرطوقه واذا طلعنا
رومي بالحوش نلعبه شوي<<<لو تشوفون نظرات فرطوقه نظرة حقد
ومره من المرات حطينا رومي وفرطوقه بغرفه لحالهم وحطينا لهم اكل وماي بصحن واحد
وطبعا فرطوقه الي هي اكبر سناً من رومي كانت تاكل الاكل واذا جا رومي جنبها قامت تطلع
اصوات غريبه غغغغغغ ورومي المسكين اول ما تطلع فرطوقه هذي الاصوات تلقاه بآخر الغرفه
من الخوف
وبعد فتره قررنا نشتري لرومي قطوه حلوه مثل رومي انثى عشان اذا كبر يتزوجها وشرينا
قطوه لونها ابيض حلوه وخواااافه اسمها ((روبي)) وفرطوقه تركت البيت فتره
تزوجت وحملت وجابت اولاد وسميناهم
مفرطق وفرطوق<<<توائم وين ماتحطهم يقعدون
فريطيق<<<طالع على امه قطو شوارع مختوم بعلامة الجوده
مفرطقه<<<الانثى الوحيده بينهم
فاراطيقو<<<هذا دلوع ماما هو الوحيد الي حركاته حركات قطاوة بيوت بس شكله الله لايوريك
قرد مقَعًد
اذا جا وقت الاكل النايم يقوم من نومه من اصواتهم يرجون البيت رَج والمشكله ان اصواتهم
مبين انها قطاوة شوارع يا مياااااااااااو أو نياااااااااااااو أو واااااااااااو أو يااااااااااو أو ماااااااااو
كل يوم صوت والمشكله كل صوت يقول الخياس عندي....
وفي يوم من الايام قررنا نسكن بيت جديد وطبعا فرطوقه وعيالها بنخليهم يوم جينا نطلع من
البيت يعني خلاص ما راح نرجع له قاموا يصيحون عندنا ويشوفون سياراتنا وهي تطلع من
البيت..
والحين حنا خلاص سكنا البيت الجديد وفرطوقه وعيالها انتقلوا الى بيت الجيران..
وحنا ودينا معانا رومي وروبي بيتنا الجديد ...
ورومي تزوج روبي بعد مرور فتره من الزمن وحملت وجابت سته 2 يشبهون ابوهم رومي
و3 يشبهون امهم روبي و1 ما ادري يشبه مين بس هو احلى واحد لونه غريب بني على اسود
وما امدى يمر اسبوع الا كلهم ماتوا لأن امهم ما تهتم فيهم ولا تعتني فيهم ولا ترضعهم
ورومي كبر وصار كسول يانايم يابرى البيت بالشارع مع انه قطو بيوت،وبعد فتره حملت روبي
مره ثانيه وجابت ثلاث قطاوه وبعد ما جابتهم بأسبوع هرب رومي أو انخطف أو ما ادري عنه
وصرنا ندور عليه بالسياره بالحي ولا نلقاه والى هذا اليوم وهو مش في بيتنا ..
والقطاوه الي جابتهم روبي كبرو وصار عمرهم ثلاث اسابيع اثنين يشبهون امهم لونهم ابيض و
واحد لونه بني على اسود غريب بس يجنن.
وما بقى في بيتنا الحين الا اربع قطاوه بس روبي وثلاثه صغار وحنا ندور على الرومي الضايع
وهذي قصتي الواقعيه مع فرطوقه ورومي وروبي وعيالهم
هذي صورة رومي وهو صغير بعد ما شريناه بأسبوع
http://www.9q9q.org/index.php?image=N4dwWvqOlddB
وهذي الصوره لرومي وحنا ندور عليه في البيت وشوفوا وين لقيناه
http://www.9q9q.org/index.php?image=apveEdXwSKlj
وهذي اخر صوره صورنا فيها رووومي الضايع
http://www.9q9q.org/index.php?image=p7EVwUIHDDfd
وهذي صورة روبي زوجه رومي
http://www.9q9q.org/index.php?image=1KQ23075z261
المفضلات