بسم الله الرحمن الرحيم
السلام عليكم ورحمة الله وبركاته
يالله شباب احزموا حقائبقكم وابشروا ترى السفره اليوم على حسابي
حنرجع ورى 10, 20 , 30 سنه <<< حسب ما عمركم يسمح
ونفتكر ايام الطفوله ... ونعيش سوى احلى لحظات
ايام الحصالات وتجميع المصروف
ايام كانت الأنصاص تعز علينا اكتر من المية
بس إيش!!!
ترى حصالتنا اليوم غيييير شكل
كل ما زادت فيها الفلوس كل ما زادت خسارتك
وكمان هذه المره على طريقة مارلين مونرو
استنوا هنا .... ايشبكم انفجعتوا
كملوا معايا للاخر
ولا تحكموا بالمظاهر
الله يا زمن !!
والله حاجه تقهر
معاملاتنا كلها صار اساسها الشكل الخارجي , الاسم , العنوان ,....
ما نتعمق في الحاله اللي قدامنا عشان نعرف ايش السالفه
والمصيبه نتحجج بـ (( الكتاب باين من عنوانه )) <<< لا بالله !
ليش ما نقرأ الكتاب بعدين نقول رأينا فيه
ليش ما نتعرف على الشخص بعدين نحكم عليه
اقرب مثال من الواقع
حقيقة مره اعيشها بسبب النك نيم (مارلين مونرو) والجنس (ذكر)
وهي استنفار كبييييير من الكثير من الأعضاء
تترجم على صورة رسائل خاصه فيها كل ما تطيب النفس لسماعه من موشحات وحاضرات ... الخ
شخص يقول لي: اتقي الله كيف تتشبهي بنجمة منتحره
واخر يقول: لماذا تقدتي ايها الفتى بنجمة الإغراء وتفتخر بها
......... الخ من اشكال والوان الكلام
والله شي يفجع ......!
انا ما اعترض على هذا الكلام بالعكس
اشكر كل اللي قام بالنصح
لكن سؤال يطرح نفسه << ابو الأسلوب الصاحي
هل اتكلمت معايا قبل لا تقول كلام زي كدا ؟
عرفت وجهت نظري ؟
طيب على الأقل شفت مشاركاتي ؟
للأسف الجواب لا ;
ههههههههههه
والله خرجنا عن الموضوع الأساسي
لكن ما يضر طالما اننا مازلنا نتكلم في شي مفيد
( يالله هو الواحد كل فين وفين لمن ينزل موضوع... وهو كدا وكدا محسوب علي خليني اقول اللي في جعبتي )
ربما يكون صحيح ان الكتاب باين من عنوانه
وان الطيور على اشكالها تقع
لكن كمان بأكد لك ان لكل قاعده شواذ
وبس بدي أعيد على أسماعكم تأكيداً على كلامي
1- أصابيع يدك مو قد بعض
2- مو كل كتاب يكون واضح من عنوانه
3- والطيور على اشكالها تقع.... لكن صدقني مو كلها
اعرف انه ردك في هذه اللحظه حيكون
( لا بس انا كنت امشي على مبدأ ابعد عن الشر وغني له )
طيب اوكي ... بس لمن تكون متأكد من انه شر يا فالح
يالله نرجع للأساس<<<< وأخيراً
الحكايه وما فيها يا حبايب
شأنها شأن سائر أمور حياتنا أساسها همه ثم نيه ثم عمل <<< حطوا تحت هذه الجمله عشرمية خط
معايا....
يالله شد الهمة يا فلان
واعقد النيه على انك حتقوم بالأمر على اكمل وجه ولا تتكاسل ولا تتراجع
نحن كل اللي مودينا في داهيه هو الاستكسال والاستعجاز عن اداء واجباتنا اليوميه
لكن خلينا نسأل نفسنا كدا سؤال عالطاير (( إلى متى ؟))
اليوم ان شاء الله نقدر نكسر شهوتنا ونتغلب على اهواءنا ونحطم نفسنا الأماره بالسوء ونكون نحن الفايزين بإذن الله
والحصاله المزعومه حتساعدنا في الموضوع ان شاء الله
هيا دحين دور العمل
يالله هات حصاله
ما عندك اسرق حقت اخوك الصغير طيب السرقه حرام ... اجل انزل اقرب محل ابو ريالين وهات لك حصاله على قدك
ما مشي الحال اجل ازهم الخدامه وقلها تفضي لك علبة الحليب او التونه وتفتح لك فتحه بالسكين.... ياخي مدري عنك المهم اتصرف
كل واحد فينا يكتب لسته خاصه فيه
يكتب فيها كل الأشياء اللي لازم يسويها واللي لازم يبعد عنها
ويحدد غرامه على كل شي لازم يسويه وما سواه او يبعد عنه وما بعد عنه
مثلاً:
السب والشتم----------- 3 ريال
الغيبه والنميمه----------4 ريال
تأخير الصلاه ------------ 5 ريال
تضييع الصلاه------------10 ريال
........... الخ
وفي اخر الشهر تفتح الحصاله وتتصدق بالمبلغ
ترى في بعض ناس يأخروا صلاتهم ويقول لك لوجه الله علشان اعبي الحصاله
خخخخخخخ والله عجب
ويا حبذا لو تكون الفلوس من مصروفك علشان تحس اكتر
خلص الشهر هيا فك الحصاله وشوف كم فيها
اوكي 50 ريال !!
هيا اوعد نفسك انه الشهر الجاي حيكون المبلغ اقل من دي المره
صدقني لو مشيت على هذا الأساس في كل شي
راح تطور من نفسك وتصير زي مانفسك تكون
وبس خلص الموضوع شكراً لكم على حسن الإستماع
ادري اني صجيتكم بس ترى هو واحد موضوع
احمدوا الله اني ما بنزل مواضيع كتير
ولا كان مداكم
مع السلامه
المفضلات