أما بعد
جماهير النصر اسمحولي قليلا
الوليد بن بدر
أحسن الله عزائك في أمك اللهم اغفر لها وارحمها وعافها واعف عنها وأكرم نزلها ووسع مدخلها واغسلها بالماء
والثلج والبرد ونقهما من الذنوب والخطايا كما ينقى الثوب الأبيض من الدنس وأبدلها دار خير من دارها اللهم وسع لها في
قبرها وادخلها جنتك جنة الفردوس الأعلى أمين .... قولوا أمين يامسلمين
صلب الموضوع
بحكم تواجدي بمدينة جده في هذه الأيام أتصل بي احد الزملاء وقال : خوي
قلت : وين؟؟
قال: سيتي بلازا city plaza
قلت : وش عندك؟؟
قال : والله مسوين تخفيض 50% وودي اشتري بعض البدل.
قلت : توكلنا على الله .
اليوم : الخميس الموافق 6/4/1427
الموقع : جده (شارع التحليه)
الوقت : بين المغرب والعشاء
أثناء تجولنا بقسم الملابس الرجالية وقعت عيني على واحد وقلت بنفسي (والله مب غريب علي) ياولد هذا عيسى
المحياني ؟؟؟ كنه يختلف شوي عن التلفزيون!!! وش السالفة ياولد خل نستغل الفرصة ونتأكد منه ونسوي لقاء سريع
مع الرجال ونبلغ أعضاء المنتدى بما صار بيني وبين الكابتن عيسى المحياني , مع أنه كان مشغول كل شوي ماخذ
فنيله ويقوسها بغرفة تغيير الملابس لكن لعيون الأعضاء لازم نعرف الحقائق ونعرفه حقيقة الجرايد , الزبده خشيت بوجه
الرجال ودار بيني وبينه الحوار التالي (والله لن أزيد ولا أنقص بما دار بيني وبينه)
Kitkat : السلام عليكم.
عيسى المحياني : وعليكم السلام .
Kitkat : الكابتن عيسى ؟؟
عيسى المحياني : أيه نعم .
Kitkat : كيف حالك طيب .
عيسى المحياني : والله بخير أبشرك .
Kitkat : بشرني عنك أمورك زينه كلش تمام .
عيسى المحياني : والله أبشرك كلش على مايرام .
Kitkat : تفضل معنا نتقهوا مع بعض .
عيسى المحياني : لا الله لايهينك .
Kitkat : صدق والله ترى نتشرف .
عيسى المحياني : والله زي ماتشوف جاي مع الشباب من مكة وتعبانين شوي (زحلقني).
Kitkat : طيب ممكن سؤال ؟
عيسى المحياني : تفضل .
Kitkat : ماصحت مفاوضات النصر لك ؟
عيسى المحياني : والله النصر (كلام) مافيه شي رسمي .
Kitkat : طيب لو تقدم النصر لك بعرض رسمي ؟
عيسى المحياني : والله النصر فريق كبير ولي الشرف أني العب فيه .
Kitkat : طيب تبغى الرسالة هذي توصل لإدارة النادي ؟
عيسى المحياني : يعني لمن ؟
Kitkat : الأمير فيصل والوليد (طبعاً البركة بالإخوان بدر النجوم ومستركي و للنصر رجال لأني ما أعرف أحد بالاداره) .
عيسى المحياني : سكت بالبداية (يفكر) ثم قال : (لا مافيه داعي تتعب نفسك ) .
Kitkat : (حسيت انه مايبي أو أو جايه عرض من الاتحاد أو شاك أني صحفي ما أدري حسيت بباله شي ) كابتن شكلك ماتبي تلعب بالنصر بس مجامله لي ؟
عيسى المحياني : لا والله لاتفهم غلط لي الشرف أني العب لفريق كبير مثل النصر .
Kitkat : طيب كابتن ممكن صوره تذكاريه ؟
عيسى المحياني : طيب خل نبعد شوي عن الطريق .
Kitkat : أيه ياشيخ فكنا من البنات لايسوون لنا مشكله ويقولون يصورونا .
عيسى المحياني : هههههههههه أيه والله إحنا رايقين مشاكل بعد .
وفي الطريق وحنا رايحين بزاوية صاده لإلتقاط الصور تكلمت ....
Kitkat : إيه حسبي الله عليك ياباكيتا .
عيسى المحياني : ليه ؟
Kitkat : الحين هداف الدوري غير مضموم للمنتخب و(العنبر) طاقها أساسي والله مهزلة .
عيسى المحياني : (سكت شوي ونزل راسه) وقال : يارجال الله يوفقهم بس .
Kitkat : بس والله قهر ياخي .
عيسى المحياني : بيني وبينك هي أرزاق .
Kitkat : أحتسب الأجر والله يعوضك خير إنشاء الله .
عيسى المحياني : أنشاء الله .
أخذت صورتين على الطاير وسلمت على الرجال ومشيت .... انتهى لقائي به
على فكره الولد كان أخلاق x أخلاق مب مثل بعض اللاعبين إلي يكلمك من ورى خشمه لاويكلمونك وكنهم يطلبونك 100 ألف ولا سددت ماعلينا قاتل الله الغرور .
الصورة الأولى
وهذي أقرب
إدارة النصر
عيسى المحياني يريد النصر + صالح بشير يريد النصر
ونحن ننتظرهم يذهبون أمام أعيننا والله قهر
أخشى أن تطير الطيور بأرزاقها
الأصل لملف الإدارة
صوره لكل عضو شرف
صوره لمن يريد أن يتدخل
صوره لمعيض مع التحية
ياقلب لاتحزن
الم يعد خالد البلطان انه إذا فاز الشباب بالنهائي أنه سيدعم النصر بصفقه كبيره , دعمت جماهير النصر وحقق الشباب البطولة ولاشفنا شي !!!!
لماذا لايتم عرض الموضوع على الرئيس الفخري ؟؟؟
لماذا لايتم عرض الموضوع على أبو ثامر
آه ياقلبي
تخيلوا هجوم النصر سعد الحارثي و عيسى المحياني (نار x نار)
إدارة النصر لقد طفح الكيل نريد ياصالح بشير أو عيسى المحياني كلاهما يتمنان النصر
لماذا لا نشاهد صفقات من مستوى عالي أم أنشغلتوا بالشباب والناشئين؟؟
لاننكر مجهوداتكم بالشباب والناشئين ويعطيكم العافية ولكن لاننسى الفريق الأول لأنه هو من سيجلب الفرح الحقيقي
للجماهير الصابرة
إلى متى .... أخشى على نصري
يا أعضاء المنتدى لاتقولون إني متشائم والله والله لن يحقق النصر بطوله باللاعبين الموجودين نريد مهاجم مميز نريد حل
لمشكلة الاظهره نريد ظهير أيمن عصري إذا لم يلعب الثقفي بالظهير الأيسر نريد ظهير أيسر عصري نريد مدافع مميز إلى
الآن لم يتم التجديد مع الخوجلي وهل يوجد بديل له في حاله الاصابه لاقدر الله ؟؟؟ إذا كنتم تقولون شريفي فالله
يعطيكم الخير .
والله إني أكتب من واقع حسره نقدر العمل الواضح من الاداره ولكنه لايكفي ليس بمستوى الطموح
سيدي فيصل
سيدي الوليد
قد تقولون ماذا يريد هذا !! هذا يريد المستحيل السعر مبالغ فيه الخ ولكن لامانع من الاجتهاد وفعل الأسباب أما أن نقف
موقف المتفرج واللاعبان يتمنان اللعب بالنصر فهذا هي المشكلة بعينها مانريده كجمهور منكم الاجتهاد في موضوع
الصفقة فان كتبها الله فخير وان لم يكتبها فالحمدلله على كل حال المهم ألا نقف متفرجين .
كتبها الفقير إلى ربه kitkat
وأسف على الإطاله
سبحانك اللهم وبحمدك أشهدا لا اله إلا أنت أستغفرك وأتوب إليك
ليس من الصعب أن تصنع الف لاعب بالسنه لكن الصعب أن تصنع لاعب لألف سنه
ماجد عبدالله
اضافة رد مع اقتباس
المفضلات