السلام عليكم ...
أنا إنسان بطبعه يحب الدندرة .. كذا الله خالقني .. و ودي اطرح موضوع بس ما أدري وش أقول فيه .. من جد يا
جماعة إلى الأن ما فيه أي فكرة في راسي
(هذا شي متأكدين منه ان عقلك فاضي مافي الا قطو ميت)
لكن خلونا نمشي مع بعض حبة حبة .. و نشوف وش عندي .. و وش أبقول .. و في الأخير تحمدوا ربكم لا يجيكم عيال مثلي .. ايوه .. ايوه .. فيه موضوع طن في راسي ..
[
ماوكلي مثلا ( اللي في أفلام كرتون ) .. ورى ماوكلي ما يلبس مثل الناس و يغدي رجال .. مفشلنا عند ذا البزور و الحريم مغير مهابد من شجرة إلى الشجرة هو و ذا السروال القصير البني اللي لابسه .. عيب و الله .. المفروض تلفزيونات الخليج يدبلجون الصورة و يلبسونه غتـره و عقال مع السروال القصير .. و بكيفه عقبها يهابد إلين ما يقول بس ..
على طاري ماوكلي .. ليش ما يزينون افلام كرتون خليجيه .. على غرار ماوكلي .. مثلا يجيبون بزر يطلع مع أهله للبر ، لكن ذا البزر يضيع في البر فيروحون أهله و يخلونه ( <-- الله من زين الأهل ) .. ثمن يجي ضب يرحمه و يتبناه .. و يعيش معهم و يكبر .. و تسوقهم الأقدار أن أخوان ذا البزر يطلعون يضببون في يوم من الأيام .. و يتركون كل جحور الضبان و لا يجون إلا لجحر أخوهم و عائلته المصونة .. و إذا دخلوا الشكمان و بدو يدعسون بنزين .. يطلع عليهم أخوهم الصغير و كنه سكران .. ثمن يطيح عند رجولهم مغمى عليه .. و عاد الله من الذهانة في ذا الأخوان بدال ما يتعرفون عليه .. يودونه للجريدة و يقولون لهم لقينا ضب على شكل أدمي
على طاري الحادثة اللي تو .. ورا بعض الخليجيين فيهم دلاخة مالله بها عليم .. و أنا أولهم بلا فخر .. مرة من المرات كنت حسران و أبي الحمام _ وانتم بكرامه _ و باب الحمام مقفول .. الوضع الطبيعي أن فيه واحد جوا .. لكن أخوكم ما طاع يقتنع فرحت أهبد باليد حقت الباب و أصقعه محاولا فتحه .. من جد يلعن أم الدلاخه .. يعني بالله وش رايي .. ابكسر الباب و ادخل و الرجال موجود .. يعنــي تلقـى في الخليجين طبــع العنــاد .. وهــذا طبع خاااايس ..
على طاري الخيسة .. ليش أي حمام عمومي عندنا تلقاه مخيس .. شي يقهر و الله .. يعني صعبة على الواحد يسحب السيفون إذا خلص !! .. و الله ودك الحكومة تفرض عقوبة على اللي ما يسحب السيفون .. مثلا اللي ما يسحب السيفون يغرم مبلغا و قدره على حسب الخياس اللي خلفه .. عاد ما رايح فيها إلا الهنود .. الظاهر مهوب سادهم و لا الإعدام .. ..
[
على طاري الهنــود .. ورا الباكستانيين جلوف و الهنود اللي ديرتهم جنب الباكستانيين ضعوف . . شي غريب سبحان الله العظيم .. تلقى الباكستاني يشيل له تسعطعشر بلكة في رد واحد .. أما الهنود فتلقاهم تسعطعشر واحد يتشاقلون بلكة وحدة .. و بعدين الباكستاني تحس أن أزين وقت عنده هو عز الظهر مدري ليش منيب القى هالباكستانيين إلا ثنتين الظهر و في يد كل واحدن منهم علبة سفن أب فيها موية و اليد الثانية نفر بخاري و [ ] يالله يدق في ذا البخاري ربع ساعة ثمن يكمل بنا ذا البيت في ساعة .. زي ذوليك اللي في أفلام كرتون اللي يبنون ناطحة سحاب أعلى من الفيصلية في أربع ساعات و عاد الله من زين المقاول قاعدن يغني و أخر شي يجي ذاك الكلب الخبل و يصك الباب ثمن تطيح العمارة مع صكة الباب .. صــدق انــه كلب خبل .. الظاهــر انــه ماخــذ اشتــراك من حمار ...
على طاري الاشتراك و البنزين .. ما ترحمون البنات ، اللي ينحجرن في البيت كنهنم قطاوه .. لا طلعات و لا روحات و لا جيات .. بالذات في وسط الأسبوع و إلا في عطلة الصيف .. مالها إلا التلفون عشان تكلم صديقاتها و لو تسمع كلامهم مع بعض .. كان تملع جنوبك من الضحك على المواضيع المطروحة للنقاش .. يا مؤامرات على بعض و إلا حش في ملابس بعض و إلا يتواعدون وش كل وحده تجيب معها بكرا في الفسحة .. .. من جد لازم تشوفون صرفة لها الضعيفات .. الوحدة ما عندها إلا التلفون و إلا الإنترنت ولو يقضي اشتراكها في الإنترنت كان تلقاها تحوس في البيت كنها جرذي ماتدري وش تسوي ..
على طاري البنات .. ما يقهرونكم ذا المغزلجية اللي حياتهم كلها غزل في غزل .. إذا جا يسولف سولفلك عن البنات .. و إذا جا يهوجس هوجسلك في البنات . . و إذا بغا يطلع راح يدور ذا البنات .. و الله الحل الوحيد لذا العينات هو أنهم ينطقووون عشان يتعلمون .. مفشلينا في كل مكان في العالم .. الناس يسافرون عشان يغيرون جو وهو يسافر عشان يقز في ذا البنات .. لا و ودك تشوفهم إذا سافروا برا و بغو يتميلحون عند ذا البنات وش يسوون .. اللي يلبس لي عقد و اللي يحط في أذنه خروص .. عاد الله من زود الملح بعضهم يتمكيج .. إلين يطلع كنه ( دليدة ) شغالة خوالي .. الله يفشلهم بس .. و الله أني إذا شفتهم كذا ودي أدخل أصبعي في الحلق اللي في أذنه و أقعد اركض إلين تنقطم أذنه و تخرخر دمان ..
على طاري المصالة .. أللحين بعـض تلفـزيونات الخليــج .. اللـي مســوين بــرامج لقطات طـريفـه .. من جدهم يومهم يبيون يقلدون " بوب ساقت " و يبيون الخليجيين يرسلون لهم لقطات مضحكة زي اللي في برنامج امريكان هوم فيديو !!!! .. قسمن بالله موووب صاحيين .. غباء و جهل مركب في ذا التلفزيونات .. يبيون يقلدون الناس و لا يدرون وش يزينون .. ما عندهم روح الابتكار .. ما يدرون ان للمجتمع الخليجي خصوصية و ما تصلح له ذا البربسة . . يعني بالله وش يحترون لقطات تجيهم ؟؟ .. ما يدرون أن حنا شعب ما يعرف كميرة الفديو إلا في الزواجات و إلا السفر !! .. ما يدرون أن الواحد فينا إذا صور أهله بكميرة الفديو ما يودع الشريط الا في احدى البنوك السويسرية خوف من أن ذا الشريط يطيح في يد أحد .. و بعدين الواحد إذا بغى يصور أهله بكميرة الفديو ما تقضب إلا ذا المبزرة وهم يتهاوشون كلن وده يرتزز قدام الكميره
أعذرونا يا جماعة الربع على كثر الدندرة ، وش أسوي في ذا المشاعر تتأجج في راسي المسطح فتنهال كالشلال الهادر على ورقة كل ذنبها أنها بيضاء فتستجدي العون من قلم أبو نص ..
(( يا رجا ل أنطم !!!!!! )) ....
الموضوع طبعا منقووووش ...
وشكرا لكم ...
الطائر الجريح ..
اضافة رد مع اقتباس
مع السروال المقطع 
المفضلات