مشاهدة النتائج 1 الى 2 من 2
  1. #1

    رائع ((( عملية تجميل لرجل ولا اروع ))) الطنازه شينه

    يا كثر ما ازعجونا الرجال واتهمونا باننا نلاحق عمليات التجميلmad
    لا تلومونا وش نسوي نبي الستر من لسان الرجاجيل اللي ما يرحمnervous



    فالبنت قبل الزواج تبدأ باللعب بوجهها عملا بمبدأ ( ايه هيّن نوال ونجوي يصيرون ازين مني ).
    اما بعد الزواج فدافع الزوجه المحافظة على ابو العيال هو وخشته لا يعرس على ثانية او انه يزهد فيها
    عاد من زين ( ابو العيال ) وائل كفوري منسدح بالصالة وإلا علاء زلزلزي متركي ويشرب زنجبيل بالمربعانيه
    من اشكال على بن محمد وسعد جمعه وعبده طارش الفنان اليمني

    من زين وجهه يتشرط ويبي زوجته احسن من نوال الزغبني لا شكل ولا ازياء
    طاقيه وفانيله وسروال سنه وكريشه كنه بالع زيتونه – هذا اللي مهتم بنفسه –
    اما اللي فاتحها بحري ويخمخم كل اللي يطيح تحت يديه ( قرصان / جريش / حلى / بردقان / موز / حلى )
    فهو ماشاء الله فيل يمشي بالبيت ناقصة خرطوم ويصير فيل ونفك الدش ويصير يتروش بخرطومه ياخذ من البانيو ويرش عمره.

    ما دعاني لكتابة هذا الموضوع الحملة الشرشة من الرجل علينا بسبب عمليات التجميل
    خلوني اوريكم هالرجل اللي يتطنز علينا يوم جاء يسوي عملية تجميل جاء يكحلها واعماها يالله لك الحمد بس .
    القصة :

    هذا واحد اسمه ( مارك اليستر ) يحب الحيونات الأليفه وخصوصا ( الكلاب )
    موظف محترم متزوج وعمره 33 سنه وعنده كلب اسمه ( موجو )
    يموت بسعابيل هالكلب الله يخسه ، ومعجب بصفات كلبه مثل ( الوفاء / والقلقسه / والتحكك وغيرها )
    فهداه فكره العقلاني كرجل راشد ناضج ( مضغوط ) مثلوثه <<< كاتبه الموضوع الموضوع قبل الغداء.
    انه يسوي عملية تجميل علشان يشبه شكل كلبه ولعله اذا صار يشبهه انه يكتسب الصفات الداخليه

    attachment

    دور الرجال احد يسوي له هالعملية المهبوله ما لقى احد ولا في الصناعية ولا حقين المناجر
    وكل دكتور يقول له ( اعقل اهااا بس ) ( لا يكثر ) .
    واخذ الموضوع عناد وقعد يبحث في النت ..
    يبحث ... يبحث ... يبحث ... يبحث <<< قولي بحث كثيرا وخلصينا من اسلوب البزران.
    لقى دكتور وسيعتن ذمته واهم ما عنده ( القريشات ) قال له : تعال والله لاسويك عنز لو تبي آمر تدلل بس كلب .. ( لقى هالصحيّح يلعب عليه )
    ابشر بسعدك اذا ما اخليك ( كلب ابن كلب ) ولا يهمك ونعطيك هديه عظم بعد العملية وربطة حلق علشان ما تبعد عن ام العيال .

    يوم خلص الدكتور من العملية جاء الرجال وقعد يتلحوس عند رجلينه وهو يتشكر منه ( عو عو عو )
    قال له الدكتور ما عندي كوره وإلا تسان ارميها واخليك تروح تجيبها يا السلوقي ونختبرك انت صرت كلب اصلي وإلا تايوان؟

    طلع الرجال من عند الدكتور ... شوي الا وهو راجع
    قال الدكتور : هاه وش عندك ؟؟ لا تقولي انك غلطت وتبيني اسويك اسد وقلت ( كلب )
    قال : لا .. اطمئن شغلك مضبوط
    بس لو تضبّط لي نابين علشان اصير كلب ( بحء وحئيئي ) ويصير لي هيبه بمجلس التسلاب
    قام الدكتور وركب له ثنين <<< هالدكتور الظاهر لو يقول الرجال اقلبني حمار تسان قلبه .. اهب ما يخاف الله في ذا الخبل .
    وعقب ما طلع فرحان انه حقق امنيته انه يصير يشبه كلبه

    وهو في الطياره المسيكين ما جابوا له وجبه ( عطوه عظم ) يمصمص فيه .
    وحس ان الناس ما يبون يشوفون وجهه وكلن ما يبي يطالع فيه وبعض الركاب لسان وجهه يقول ( اهيب يا وجهه ) .<<<< ما الومهم .


    وصل ديرته وجاء طاير للمدام يركض ويناقز اول ما دخل فتح يدينه على فوق وقال ( طارااا طرااا طرااااااااااط ) <<<.... موسيقي وش رايك مهيب شيء ثاني .
    قالت زوجته: عمن يعميك وش سويت بعمرك يا المنتهي ؟ اعنبو بليسك تبي تخوف قطاوة الحاره وإلا وش القصة
    لعبوا دارك هالحين وش اقول لاهلي ( زوجي كلب )؟؟ وإلا اذا جاء ولد ان شاء الله تبينا نسميه ( لاسي ؟ )

    الله يلعن اليوم اللي اخذتك فيه لو دارية ان الموضوع كذا اخذت كلب اصلي من البداية .
    وقف الزوج ( مطيّر عيونه ) وتوه بيقول اسمعي يا بنت الحلال
    ما درى الا ذاك الكف اللي يمشي 120 ك/س وعلى جبهته

    وطلبت الطلاق ( ما الومها الضعيفه ) قالت اقول لك : طلقني طلقني طلقني .
    قال : عو عو عو .. عوووووووووووو <<< الاخيره صياح والاولى طلقات

    وضفت شناطها وهو يلاحقها عند الباب ( عو عو عيااا عووو يوااا ) <<<< تعوذي من بليس والعيال وش نسوي فيهم .؟؟
    التفتت عليه ورجفته وقالت ...ابخطب لك سلقه يا السلوقي اوريك؟

    وجلس الكلب الرجل مع كلبه الكلب ( اللي وهقه ) يسولفون
    قال له كلبه ( عو عو عو ) <<< لا تهمك انا موجود والكلاب للكلاب والكل بالله

    قال الكلب الرجل : عو عي عو عوااا وااا <<< ياخوفتي ما وهقني الا انت الله يستر من الجاي.

    الحاصل انه راح فيها وتدهوت اموره
    عمله فصلوه واصدقاه يصرفونه كل ما يتصل عليهم ( ما الومهم يالله نتحمل الصاحين شلون المهابيل ).
    الظاهر انهم صاروا يعرفون صوته اذا اتصل .. آآآل ... وفجأه تعطلع الــ عوووو ؟
    يقوم صديقه ويسكر السماعه
    يسألوا الاهل مين ؟؟
    يقول : واحد من هالكلاب اللي يزعجون

    وهالحين يقولون اخر مره شافوه بمخارب لوس انجلس يتلحوس يدور وجبات كنتاكي .

    attachment

    الزبده بالموضوع ان الله يستر علينا من عمليات هالتجميل لان بعض البنات متهاونين فيها
    يحسبونها مثل روحة الكوافيره ، وبعض الرجال يحسبونها مثل روحة الحلاقة.
    ولا تطنزونا علينا وشوفوا حالكم اذا جيتوا تسووون عمليات تجميل .

    ودمتم سالميين
    ***


  2. ...

  3. #2
    شكرا لموضوعك الجميل
    وورك الحلو

    سلمك الله
    وشكرا


    34535b7634b80e47724f74d9f4182dee


    للإنضمام لفريق كايزولاند للترجمة يرجى المراسلة على الخاص

بيانات عن الموضوع

الأعضاء الذين يشاهدون هذا الموضوع

عدد زوار الموضوع الآن 1 . (0 عضو و 1 ضيف)

المفضلات

collapse_40b قوانين المشاركة

  • غير مصرّح لك بنشر موضوع جديد
  • غير مصرّح بالرد على المواضيع
  • غير مصرّح لك بإرفاق ملفات
  • غير مصرّح لك بتعديل مشاركاتك
  •  

مكسات على ايفون  مكسات على اندرويد  Rss  Facebook  Twitter