مشاهدة النتائج 1 الى 17 من 17

المواضيع: مدرعم

  1. #1

    مدرعم

    قرأته وعجبني و حبيت انقله لكمsmile
    باختصار .. ترا هالموضوع منقول

    -------------------------------------------------

    طلعت الصبح من البيت رايح الدوام ومثل العادة درعمت على بوفيه زين السوداني افطرعندة طلبت صحن فول, وانا اكل من الفول حبه من حبات الفول عجزت ابلعها قاسيه واطلعها وحصلت فيها ورقه فتحت الورقه لقيت مكتوب فيها مبروك بوفيه زين للفول تبارك لك لقد فزت بتذكرة سفر ذهاب واياب الى لندن مع السكن لمدة ثلاثة ايام وافطار لمدة شهر صحن فول قلابه
    اثرالفوال زين مسوي جوايز وانا فزت بالجايزة الكبرى هههههههه وقمزت ماكملت صحني وعطيت زين الورقه وفتح درجه وطلع التذكرة وكاميرا ووقفنا وسط البوفيه وصافحني ومد لي التذكره باليد الاخرى ( حركات ) ونبتسم للكاميرا وصورنا عامل عنده والصوره علقها في وسط المحل لا وحاط على صورته سهم وكاتب هذا زين
    وطلعت من البوفيه فرحان وانا بصراحة عمري ماسافرت بس اشوى اني اعرف سبيك لندن
    واخذت اجازة من العمل ورحت السوق واشتريت بدله وشنطه كبيره واكدت الحجز وعرفت منهم ان الوزن المسموح لي فيه خمسه وعشرين كيلو وادرعم بيتنا وافتح الشنطة واحطها فوق ميزان عندي وعبيتها هدوم مالها اي لزمه لين وصل الوزن خمسه وعشرين بالتمام ( احلل التذكره )

    رحت الحلاق وحلقت واسشورت شعري ورجعت البيت وسبحت اكيد الواحد يسبح عقب الاستشوار واتعطر واكشخ بالثري بيسيز ( بدله ثلاث قطع ) واقعد اتميلح قدام المرايه واناظر عمري بالبدله بس بصراحه اللي مخرب الكشخه كرشتي طالعه متر قدامي ( انا اسمع ان السفر له سبع فوايد انا اقول ثمان الثامنة ان البنطلون يعرفك على تضاريس جسمك طبعا الثوب مخفي هالشحوم )
    ودرعمت على المطار ودخلت صاله المغادره وعند الكاونتر وزنوا الشنطه خمسه وعشرين كيلو بالتمام طبعاههههههه
    طالعني الموظف وناظر كرشتي ( على سيرة الكروش فيه ناس كروشها قدام مثلي , وفيه ناس كروشها ورا , وناس كروشها ورا وقدام على شكل حرف اس S , لكن شفت في المطار موضة جديدة كروش ومضغوطة من النص بحزام البنطلون جاية شكل حرف بي B هذا موديل توة نازل )
    المراد ان الموظف قال لي : عندك خمسه وثلاثين كيلو عفش!!!
    قلت: الشنطه مغير خمسه وعشرين !!!
    قال : ايه وكرشك عشرة كيلو رح ادفع الفرق الله لا يهينك
    بصراحه معه حق دفعت الفرق خمسين ريال واخذت البوردنق ودخلت على الجوازات وياخذ موظف الجوازات جوازي وناظر في صورتي و قال: الصورة ماتشبهك
    قلت: ايه هذي الصورة قبل ماسبح
    هز راسه وقال: ياخي ثاني مرة ان بغيت تسافر لا تسبح ( معه حق حتى تطابق الصوره مع الاصل والا لا )
    ودرعمت على التفتيش وكان فيه اثنين من المفتشين واحد دب وقصير والاخر معصقل وقصير بعد
    قال المفتش العصقول: طلع الاغراض اللي في جيوبك وافصخ السير والجاكيت (الكوت) والكنادر( تكرمون ) وادخل, فصختهم ودخلت مع القده وصفر الجهاز ورجعوني
    وقال الدب للمعصقل : تراهني ان سبب الصفيره من قميصه !!! قال الدب: اراهنك
    وقال لي العصقول : افصخ قميصك ولاتفصخ الكرفته خلها عليك !!
    فصخت القميص وطلعت الفنيله العلاقي واصله نصف سري وسري مستحي يويق من تحت الفنيله بس صدقوني ان الفنيله اكبر مقاس بس الكرشه اللي رافعتها
    وتوني بادخل مع القده قال الدب: اقيف اقيف مره وحدة افصخ الفانيله خلي سرك يشم الهوا الظاهر ان سري كسر خاطر الدب وانا ازعل وافصخ الفنيله , والتفت وراي واشوف طابور من الجماهير المسافره يتفرجون
    واقعد اسخن قدام القده والجمهور يصفق ويصفر واجي مسرع وادخل ابي اسجل قول وصفر الجهاز ,
    وقال الدب للمعصقل : هههههه هالحين دوري تراهني ان السبب من بنطلونة
    قال المعصقل: اراهنك عطاني الدب ابتسامه وقال : يالله نزل بنطلونك ,
    انا كنت مستحي بس الجماهير كانت تشجعني وتهتف بصوت واحد .. افصخ افصخ .. انا بصراحه جاني حماس وانا اللي افصخ البنطلون ويطلع سروال السنه صحيح انه اصفر بس صدقوني اني غاسله قبل اسبوع وارجع اربعة متر والجماهير تصفر وتغني .. نبي قول مدرعم على صفيره الحكم .. واجيك مدرعم وادخل بين القدة قووووووووووول واركض فرحان واسوي حركه الكاميروني روجيه ميلا ,
    والجماهير تذب عقلها وشمغها علي وانا احيهم وازحف عندهم على صدري ههههههههه
    بس الفرحه ماكملت الدب رافع يده مشر تسلل ( الجهاز صفر بس ماسمعته من صياح الجماهير )
    واضرب في الارض من الزعل واصرخ منهو التسلل ؟؟
    قال الدب: كرشتك تسلل وانا شاك فيها وهو اللي ينادي يامبروك يامبروك تعال نظف كرشته !!
    وجانا مبروك واحدن عير ياكبره كبراه وهو اللي يسحبني من الكرفته , انا توني اعرف ليه خلوا الكرفته علي ومافصخوها دخلني مبروك الغرفة وعطاني كاس وقال لي اشرب جيت ابي اشرب الا طعمه مر قلت وععععع هذا عشرق وهو يمسكني بشعري وهو يقول: اقولك اشرب وخذ هالحبتين بعد اشربهم مع العشرق واناظر في الحبتين وحدة لونها اسود والاخرى اصفر قلت اكيد الاخ اتحادي خلني ادهن سيرة واقعد اطامر في الغرفة واغني .. اوووة يا اتي ياموج البحر .. ياناس مبروك شاقني ياناس دلوني علية.. اتي اتي ..
    ويرفعني مع اذاني فوق وهو يقول اتي مين يابويا انا اهلاوي ,
    وانا انطم واشرب العشرق مع الحبتين وشوي انا ماحسيت في نفسي ومبروك انحاش ,
    جلست في الغرفه اعاني ساعه بالتمام بعدها حسيت اني خفيف واناظر في جسمي مالقيت لي كرشه اختفت مادري وين راحت !!!
    واطلع من الغرفة بدون كرشه ماسك سروال السنه لا ينصل والجماهير تصفر واحيي الجماهير وارجع ورا القدة خمسه متر والجمهور يصفق ..وحدة وحدة وحدة ...واصفق معهم واجيك مكيم ودخلت من القدة وصفر الجهاز بانتهاء الوقت الاصلي
    قال الدب : خلاص ضربات ترجيح وهم يحطوني مع جهاز العفش ويسدحوني على ظهري وانا زعلان افكر في كرشتي , وصفر الجهاز يوم وصل عند راسي ويفتحون اثمي ويكتشفون ان السبب الله يسلمكم ضرس فضه هذا الضرس مركبه من العام الله يعمي العدو
    ويطبطب على ظهري العصقول يوم شافني زعلان ويقول هارد لك شد حيلك في مباراة الاياب
    وعطاني هدومي وحطيتهم في كيسه مالي نفس البسهم جلست بسروال السنه والكرفته والشراب اتمشى في المطار ضايق صدري وزعلان على كرشتي اللي راحت واجلس على كرسي واحط رجل على رجل واومي برجلي واناظر في كرشتي اللي امسحت..... صدقوني انا ماكان زعلي ان كرشتي راحت لا والله !! اللي كان مزعلني ؟؟؟؟
    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    ؟

    الخمسين ريال اللي دفعتها عفش زايد على كرشتي


    اتمنى تعجبكمsmile

    ملاحظه : هناك قصص اخرى .. لو تحبوا اضعها مافي مانع smile
    3rb100_EfDWjuhdu8


  2. ...

  3. #2
    biggrin biggrin biggrin biggrin biggrin biggrin biggrin biggrin biggrin

    ::bigsmile ::bigsmile ::bigsmile

    تمووووووووووووووت من الضحك .. الحمد لله اني لسا عايش .. tongue

    شكراً don corleone على [shadow]الدرعمة[/shadow] tongue gooood






    تحياتي ..
    .. TheFragile
    ....................wink

  4. #3

  5. #4
    TheFragile : العفو ومشكور على الرد
    شيرك : انت الاحلى smile

    وين بقية الشبابmad

  6. #5
    chirolp_pupuههههههههههههههههههchirolp_pupu

    حلوة يا دون .. حط الباقي و لا تبخل علينا chirolp_wink

  7. #6

  8. #7
    nana : العفو نانا
    Koji Kabotu: العفو


    و هذي قصة اخرى /

    ----------------------------------------

    ابي اسافر الخارج وجوازالسفر حقي مع ابوي وكل مااقول عطني جوازي اسافر يقول لي انطق في ذا وانا ودي انطق في ذاك
    قلت مالي الا استشير عبود الداشر...(عبود الداشر هذا اقوى واحد في حارتنا وذهين ويدينة طوال من طولها تحك بالأرض ولة عيارة مايواطنها اذا قلتها لة يزعل هي .. الدردحي )
    اذكر مرة قمت اعيرة قدام باب بيتهم.. الدردحي..الدردحي..هووة..هووة
    طل علي من فوق سطح بيتهم ومد يدينة وصمخني على وجهي
    المراد اني رحت استشيرة كيف اسافر من غير جواز
    قال عبود: حك لي راسي عشان افكر تدرون يدينة طوال وابعد من راسة قمت احك لة راسة وهو يفكر انا احك وهو يفكر فجأة قال: بس وقف رجع الحكة شوي رجعت انا بالحكة شوي شوي قال: بس هنا اثبت اسمع لقيتها؟؟ .. بنطيرك من غير جواز و طيارة بعد !!
    بنسوي لك جنحان ونطيرك!! عبود ذا ذهين حتى مسمين عمرة ابالحصين ابويدين ( ايه هين )
    المهم عبود طلب مني اجيب صمغ والحقة لبيتهم رحت بيتنا مالقيت الا صمغ فيران خذتة ودرعمت على بيت عبود لقيتة في عشة الدجاج ودخلني معة العشة وقال: بسرعة افصخ كل هدومك
    وانا حياوي واستحي
    وصرخ افصخ وانا على طووووول فصخت واقول تكفى ياعبود استر على ماواجهت
    وهو يناظر في سري النابص ويضحك ههههه ( تفكيركم لايروح بعيد باقي علي الشورت )
    و فتح غرشة الصمغ ودهن كل جسمي بالصمغ ثمن قام ياخذ من ريش الدجاج ويلصق وينتف من الدجاج ويلصق في جسمي لين ماعاد تنشاف الا عيوني وصار كل جسمي ريش وطلعني الحوش ورفعني بيدينة وحطني فوق جدار السطح
    وقال: يالله حرك جنحانك وقل.. واق.. وطب
    انا خفت
    ردها علي ثانيةوقال : قل.. واق..وتوه رافع يدة بيكفخني وانا اللي اقاقي.. واق.. واق.. واق.. واق.. واق.. واق.. واق..ويصرخ عبود : بس عاد لاتبيض طب , بصراحة انا كان عندي احساس اني بااطير
    واومي بجنحاني واطب بس تصدقون عاد اني ماطرت جيت محدر على الأرض
    وقبل ماوصل الأرض الا نسر وش كبرة لاقطني بمخالبة من الهوا وطار فيني فوق واناظر في عبود وعبود مبتسم و يناظرني وانا اركز على وجه عبود واتفل علية
    النسر طار فوق فوق ماعاد اشوف الأرض واسمع النسر يكلمني و يقول وين بتروحين مني يانسرتي تبيني اطلقتس علشان تعرسين على النسر ابو عيون عسلية هاه
    لو تنبت قرون في راستس مافيه طلاق
    اثرالنسر ذا طلع حول وشوفه ردي واصمخ لا وفوق كل هذا ماهوب صاحي خبل ومرتة النسره منحاشة عنة ويحسبها انا ياوالله النشبة حسبي الله عليك ياعبودوووة ياداشروووة
    وطول الطريق يغني .. ماكو ماكو ماكو ماكو فكة
    لين وصلنا عش الزوجية فوق جبل ونزلني قدام العش وقعد جنبي ويناظر فيني بعيونة الحولا وهو مبتسم لي وعطاني غمزة حولا بصراحة خوفتني وهز براسة يبيني ادخل في عشه , وهزيت لة راسي يعني.. لا..
    وضحك وغمزلي مرة ثانية وهو يقول ادخلي العش ياروحي
    قلت: راحت روحك معصي واهز براسي ثانية.. لا..
    ويطمر من مكانة ويصفقني بجناحة ويرفسني برجلة ويسحبني بكراعي داخل العش
    الا اشوف في العش بيضة !! واشرلي النسر على العش يبيني ارجن على البيضة ,
    انا ارجن ماعاد الا هي معصي انا رجانة واهز براسي نكس.. لا.. ويصفقني نكس
    وانا ازعل وانا اللي انثبر وارجن
    ويقرب جنبي ويتغزل فيني اشوى اني نفاس مابعد طلعت من الواحد وعشرين ولا كان علوم
    واحد وعشرين يوم ...وانا راجن على البيضة واكل مثل ماياكل بعلي فطيس و دوووود
    وبعد الواحد وعشرين يوم بدت البيضة تفقس وحنا نطامر فرحانين كثير بمولودنا الجديد اللي بيشرفنا والبيضة تفقس وحنا نلم بعض ونطامر ماوعيت الا هو راجفني بكراعة
    الفرحة ماكملت صارت مصيبة الفرخ طلع تمساح
    اية نعم تمساح اثر مرته النسرة كانت منحاشة خايفة لايكشفها ... وهو يتغير لون وجهه وينبص عيونة الحولا وهو اللي يطمر ويدوس في حوض بطني ويقول خاينة خاينة قال لازم اذبحتس انتي وابوة واغسل عاري قومي وريني ابوة انا ماقويت اقوم من الخوف جتني ام الركب وهو يشيلني مع غاربي ويطير فيني فوق وطول ماحنا طايرين وهو يكلم نفسة ويقول ولدي انا يطلع تمساح..تمساح..هاه.. وطاخ على وجهي ,
    انا تعبت من الطق..وحنا طايرين شفت غورلا خال كبير قلت بيني وبين نفسي ايه جاء الفرج باوهقه مع الغورلا وانا اعطية امر بالهبوط ونزلنا على الأرض وقلت للنسر وانا مشر على الغورلا هذا ابوة ورنا شطارتك...ههههههه والغورلا كان معطينا ظهرة .
    قال النسرللغورلا ( بزمرة) : هييييييية انت هييييييية ياغوغو يالخال ..
    التفت الغورلا والشر في عيونة ويمسك النسر برقبتة وهزة وقال: خير انشاء اللة الظاهر في راسك حب ماطحن وتبي غوغو يطحنة لك ..
    النسر صار طقوع خاف وقام يرتجف ويتعتع في الكلام ويقول ابد يالحبييب !!!
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !
    !

    جايك بالنسرة نبي اخو ولا اخت لولدك يسلية لا يستاحش !!!!!!

  9. #8
    مشكور أخوي الدون على هالتعب وننتظر الثالثة
    تحياتي

  10. #9

    Talking

    مشكور على القصص الحلوووووه
    الله يعطيك العافيه asian asian

  11. #10

  12. #11
    سلامي للجميع ....


    هههههههههههههههههههههههههههههههه .... الله يقطع شياطينك .. لووووووووووووووووووووووول .... مشكور إن شاء الله نشوف من هاذي القصص كثير ........ goooodgoooodgooood

    مشكور...cool
    أنْتَمِي حَيْثُ ....

    لاَ أَتَّفِقُ مَعَالحُزنِ أَبَداً ..!!


  13. #12
    هههههههههههههههه
    كل قصة احلى من الثانية وانا بانتظار باقي القصصwink

  14. #13
    حلم : العفو وجاييك بالثالثة
    فداء : الله يعافيك
    الوردة البيضاء :الله يسلمك
    اترنال : العفو
    سيرينا : العفو والثالثه ... تفضلوا جميعكم :

    رويس ابو عويس :

    عويس ابو رويس :

    عويس هذا كائن من عيال حارتنا مشهور بكبر راسه جسمة مغير راس , يوم هو صغير ماوقف لين صار عمرة ابو اربع سنين كان كل ماوقفوة اهله طاح من كبر راسه , ورقبه ماعنده ولايدرون وينها فية ابوة يقول ان رقبته داخله جسمة والله العالم انها في بطنه امه تقول لا اكيد انها داخلة في راسه والماريه كبر راسه المقصد ان اللي شايلن راسه هي كتوفة ( وياعزتي لكتوفة)
    والناس متهولين من كبر راس عويس مغير يسولفون فيه وصاير عندهم مثل المثل الا بغوا يشبهون شي بالكبر قالوا مثل راس عويس
    وراسه مليان طقوق ومشوخ ..الطقوق من عيال حارتهم دايم يحلتونة ومن كبرة ماينخطي
    والمشوخ من البيبان يحك بس اشوى عقب ماركب له ابوه شنبات حقات تريله في جبهته خفت المشوخ
    واذا راح الحلاق يصفون عليه ثلاثة حلاقين يحلقونه... وكل حلاق يحلق مع كتر ( جهه) و يجلسون لهم ساعتين وهم يجزون في شعره ( ليه ملعب كوره )
    ومايلبس ثوب , اصلا مايقدر يلبسه مايدخل مع راسه بس للحق يلبس دقله ...والفنيله يلبسها من رجليه كانها سروال والطاقيه انسى مافيه امل يلبس والشماغ اكبر مقاس الا البسه ياصل اذانة....
    مرة قالت ام عويس لولدها لعويس رح وانا امك حاسب الهندي شفة في الحوش يركب اسطوانة الغاز راح عويس والا الهندي توة قاضي من تركيب الأسطوانة التفت الهندي الا وشاف عويس واقف قام الهندي ورجف عويس برجلة ثمن قام يدربية برجلة يحسبه اسطوانه فاضيه
    المراد عويس كان عليه مفاوضات بين بلديه الرياض وابوة يبون يشترون عويس ويحطونة مجسم في الرياض بس اختلفوا على الموقع البلديه يبون يحطونه في احد مداخل الرياض وابوة معيي يبيه فوق الفيصليه حتى كلن يشوفة
    المهم انهم ماتفقوا وسكر باب الأنتقال وبيستمر مع اهله الموسم هذا
    المسيكين بغى يبتسم له الحظ بس هون وتفل في وجهه
    عقب السالفه ذي قال ابو عويس : اجل خلونا نسافر بالطيارة نتمشى في الشرقيه يبون يوسعون خطرهم عقب فشل المفاوضات
    وجهزوا شناطهم واركبوا السياره طبعا عويس مايقدر يركب داخل الغماره حطه ابوه في الشنطه جنب الأستبنة وتوجهوا للمطار
    وصلوا المطار ودخلوا صالة المغادرين ووقف عويس جنب ابوة عند الكاونتر يبون ياخذون البوردنق حق دخول الطائرة شافة موظف الخطوط وقال لأبوعويس وهو مشر على عويس: اذا كان العفش هذا معك ..الله لايهينك حطة على الميزان واكتب عليه عنوانك وتلفونك
    قال ابو عويس : لا هذا عويس ولدي هههههههه
    قال الموظف : انا اسف شكله عفش .
    ابو عويس فق اثمه قام يضحك يازعط شبابي وهو يقول : عادي عادي حتى انا ههههههه ( مستخف دمة )
    والمسكين عويس مفتشل
    اركبوا الطياره بس ماقدروا يربطونه بحزام الأمان من كبرة
    جاهم المضيف يبي يساعدهم ما قدر ثمن راح وجاب معه قفص قال لازم تحطونة فيه
    حطوة في القفص وخلوة في اخر الطيارة وكان في الطيارة ورعان ملقف قاموا ينغزونة ويقولون طلع رجليك طلع يديك يحسبونه قنفذ
    المراد وصلوا الشرقيه وخذولهم شاليه على البحر.
    وكشخ ابو عويس بهاف السنه وفنيله علاقي جيشيه ونظارات شمسية بشاوري ونعال صندل(وانتم بكرامه) وعويس لبس شراب بس وانسدحوا على جال البحر يتشمسون في الليل
    اصبحوا الصبح و قالت ام عويس تبي تشوف جسر الملك فهد وراحوا يتفرجون على الجسر , و شافوا عويس ناس اجانب وتجمعوا علية مستغربين من المخلوق العجيب وا قاموا يصورونة ويصورون معه ويقولون شيييييز
    عويس طقت سبده مل ايه عويس مل , قرر ينتحر ركب على الجسر وغمض عيونه وطب وابوة يصرخ يالدرو وقف وامه اغمى عليها عويس طب بس المشكله راسه كبير طفح مثل الكوره يبي يغرق ماقوى ويدفه الموج وعيونة ترمش والموج يزفة بعيد وعيونة ترمش ابعد عن الجسر واختفى ...مر من جنب باخرة شافة القبطان دق سلف وشغل صفارات الأنذار وانحاش يحسبة لغم
    الموج دف عويس بعيد لين وصل الشاطيء طلع من البحر ومشى له شوي وطاح من التعب يوم رفع راسه شاف لوحه كبيره مكتوب عليها... ساحل العاج ترحب بكم ....واغمى علية الله لايلومة
    شافوة افارقة زنوج من اكلة لحوم البشر فرحوا فيه ... بياكلون لحمه راس واي لحمة راس هذي بتكفي قبيلتهم وتزود... شالوة بعلاقاتة ( اذانة) وعيونه ترمش وعزموا كل قبيلتهم وحضر زعيم الزنوج وقعد على كرسية وقاموا وربطوا عويس في شجرة وولعوا حولة النار وقاموا الخوال يطبلون و ويرقصون و يدورون حول الشجرة وعويس مربوط وعيونة ترمش ...ووقف قائدهم وشمر عن ذرعانة واشر بيدة وكلو تبن الخوال واهجدوا واخذ رمح وتقدم خطوتين هذا انت يازعيمهم و حذف الرمح على عويس وارتكز الرمح في قمة راس عويس ..اثر راس عويس مليان ضغط هواء من قوة الضغط طلع هوا قوي فرقع الزنوج هم و زعيمهم الخال و طار عويس مثل الصاروخ فوق..فوق..فوق.. تدرون وين طاح تصوروا.....؟؟؟؟
    !
    !
    !
    !
    !
    !
    !
    !
    !
    !
    !
    على سرير امة وابوة ... ايه نعم بين امه وابوة لا وفش راسه وطلعت رقبته ... وشافته امة وقالت عويس انت جيت قم وانا امك رح نام على فراشك

  15. #14
    biggrin biggrin biggrin biggrin biggrin biggrin ههههههههههههههههههههههههbiggrin biggrin biggrin biggrin biggrin biggrin biggrin
    مشكووووووووور
    دووووووووون
    بطني راح فيهاwink

  16. #15
    ههههههههههههههههههههbiggrin

    قصة حلوة شكرا يادون كروليني بس ممكن طلب ابى قصة رابعة<<<<<طماعةtongue


    واذا ما تقدر خلاص وشكرا مرى اخرىwink

  17. #16
    chirolp_baku2 ههههههههههههههchirolp_baku2

    حلوة يا دون .. تموووت من الضحك chirolp_baku2chirolp_baku2

    مشكووور biggrin

  18. #17

بيانات عن الموضوع

الأعضاء الذين يشاهدون هذا الموضوع

عدد زوار الموضوع الآن 1 . (0 عضو و 1 ضيف)

المفضلات

collapse_40b قوانين المشاركة

  • غير مصرّح لك بنشر موضوع جديد
  • غير مصرّح بالرد على المواضيع
  • غير مصرّح لك بإرفاق ملفات
  • غير مصرّح لك بتعديل مشاركاتك
  •  

مكسات على ايفون  مكسات على اندرويد  Rss  Facebook  Twitter