سافر للغربة وقلت اليمن جور
ولن اليمن جنة وان جار جاري

وعز الله إني يوم سافرت مجبور
مخرج طوارئ أو هبوط اضطراري

وقد كنت في عزوة وجنات وقصور
ولي هيبتي ومكانتي واستشاري

واليوم في وحشة وغرفة كتنور
ما شفت منها شمس طيلة نهاري

مسؤول هندي بلى مروة وطرطور
عالم بها راقي مثقف وحضاري

ما تعرفه أبيض أو أحمر كصرصور
دوبه معشق ريوس من المجاري

يا مر ويتلفظ وفي القبح دكتور
ويطل لك في راتبك كيف ساري

وراتبك ما يكفيك أكل وأجور
عامل وقد كنت المدير الإداري

وما تقبضه تدفعه بالطيب مجبور
وحق الكفيل بوسط كيس حراري

الشهر كمل حاضر معاك يا ثور
أو ما معك والسير بالحيل جاري

غبني على صنعاء مدينة من النور
تعرف بطابعها الجميل الحضاري

ما عشت فيها غير ضاحك ومسرور
لو لا رمتها الحرب رمي انتحاري


قد كنت فيها عايش بخير مستور
قلنا نروح ونغترب يا خساري

عز القبيلي أرضه وعايش الدور
بيجيه يوم يقول لو كنت داراي



الشاعر / أمين يعقوب أمين حربه