تملى انت جرئ ياحزن
تدخل قلوبنا متستأذنش
تسهر معانا كتير منمش
جوانا بس تبان عالوش
تملى انت جرئ يا حزن
نخبى فيك مبتتخباش
نهرب لفين لازم تتعاش
لا والغريبه انك ببلاش
وكل ايامك تشبه سجن
تملى انت جرئ ياحزن
تبدا بجرح وحدوته
تظلم ولد او بنوته
وتسيب قلوبهم مكبوته
محتاجه للضمه وللحضن
تملى انت جرئ يا حزن
من غير سبب تيجى باسباب
وتتحشر وسط الاحباب
مابين زعل حيره وعتاب
ومدخلك وسواس او ودن
تملى انت جرئ ياحزن
نص البشر ليه بكتهم
والنص التانى عزيتهم
ومين تانى تخرب بيهم
مش باقى غير حديثى السن
تملى انت جرئ يا حزن
بنام نقوم وانت معانا
وتملى ماشى ويانا
والفرحه ليه مش سمعانا
تقولش مستنيه الاذن
تملى انت جرئ يا حزن
ياحزن ليه مستقصدنا
وفكل سكه مواعدنا
وحتى لو تهنا بعدنا
نلقاك تجينا بحسن الظن
تملى انت جرئ ياحزن
نلبس جديد نلقاه اسود
ودمعه فى التانيه بتولد
وحتى لو لحظه بتسعد
بنعيشها لما علينا تمن
تملى انت جرئ ياحزن
يا حزن سيبنا بقى و فارق
د معدش شئ جوانا فارق
تملى نحب ونتفارق
وترجعنا للماضى نحن
تملى انت جرئ ياحزن
لا صبر نافع ولا تبرير
من كتر ما رجعنا المشاوير
احنا بجد تعبنا كتير
ودماغنا من الاوجاع بتزن
تملى انت جرئ ياحزن
...........
#الشاعر_عماد_سمرى

......
تملى انت جرئ يا حزن
شعر بالعاميه المصرية
الشاعر عماد سمرى