زجلية بالدارجة المغربية
يْعَجْبَكْ مَنْ لْبَشَرْ بَعْضِينْ
تْظَنْهُمْ بْلَمْحَاسَنْ مَتْخَلْقِينْ
تْصْدَمْ فِيهُمْ مَنْ بَعْدْ حِينْ
تْلْقَاهُمْ لْشِّيطَانْ خَاضْعِينْ
بْغِيرَكْ لَا تْحْسَنْ ظَنْ
حَتَى تْخَبْرُو وُتَوْرَنْ
وُكُونْ مَكْيَاسْ مْرَزَّنْ
مْعَ لِي طَبْعُوْ دْكَنْ
صْعِيبْ تْكُونْ لْبِيبْ
تْكُوْنْ لَلْحَكْمَةْ قْرِيْبْ
تْفَرَّقْ عْدُوْ مَنْ حْبِيبْ
وُ تَفْرَزْ خْرُوفْ مَنْ دِيبْ
لَعْيُوبْ النَّاسْ فْطَنْ
لَخْبِيثْهُمْ لَا تَأْمَنْ
كَا يْوَسْوَسْ فْ لَوْدَنْ
وُيْطَعْنَكْ فْ ظْهَرْ وُ بْطَنْ
لَا تَلْذَغْ مَنْ لْغَارْ مَرْتِينْ
خَلِّي عَقْلَكْ لِيكْ عْوِينْ
عْلَاشْ تْكُونْ بْحَالْ بَعْضِينْ
حُمَّاقَ يَتْلَذْغُوْ كُلْ حِينْ
سْفِيهْ لْ سْفَاهُو مَا يَفْطَنْ
وَ صْحَبْتُو تْضَرْ وُتْمَحَنْ
تَعْيَا مَا تْنَصْحُوْ وُ تْلَقَّنْ
رَيُّوْ يَدِّيهْ لْ حُفْرَا أُو كْفَنْ
لَحْمَقَ جُورْتُو تْرَكْهَا
يَبْغِيْ يْدَاوِيهَا يَعْوَرْهَا
لْحُوتَةْ تَخَنَزْ مَنْ رَاسْهَا
وُيَخْنَازْ مَنْ لْمَسْهَا
عِيبْ تْكُونْ حْمَقْ
فْ لِي شَفْتُوْ مَا تْدَقَّقْ
دَغْيَا تِّيقْ وَتَزْلَقْ
وُتَفِيقْ بَعَدْ مَا تَغْرَقْ
بِينْ حَقْ وُ بَاطَلْ ارْبَعْ صْبَاعْ
مَا بِينْ لَعْيَانْ وُ لَسْمَاعْ
كَيْكُونْ لْيَاقِينْ لَمَّاعْ
أُوُ قَدْ يْكُونْ بَاطَلْ خَدَّاعْ
فْ لَحْسَابْ يُومْ لْقِيَّامَهْ
كَايَنْ حْقُوقْ وُ كَايْنَا مَظْلَمَهْ
وَ كَايْنَا جَنَّهْ وُكَايْنَا جَهَنَّمَهْ
عَنَدَاكْ عْلْ لْحْكَمَا تَعْمَى
المفضلات