في الذكرى الثالثة لوفاة زوجتي زهراء الغالية
رحمها الله
أكتب بالدارجة المغربية لرثائها
بتشكلة من الأوزان الشعرية العربية
********
*******
بْمَشِيئَةْ الله نَرْضَى... مَا نَتْأَفَّفْ
مَنَ مَكْتُوْبُو... لَا مَقْدُورْ يَتَّحْدَف
وَحَدُوْ .. فْ.لْمُوتْ وُلْحَيَا يَتْصَرَّفْ
حَانَ الْأَجَلْ... عْلَى زْهَرْتِي زَفْ
*****
مَاتَتْ زَهْرَا... رَبِّي انْتَا بِيهَا رَاءَفْ
مَنْ يْوَاسِينِيْ؟... رَانِيْ لِيْهَا مْوَالَفْ
مَا تَتْعَوَّضْ ...بْ.مُوَّالِيَّاتَ السْوَالَفْ
الزْمَانْ القَادَمْ مَايْكُونْ بْحَالُ السَّالَفْ
*****
نَصْ عُمْرِي ...دَازْ سْرِيعْ خْفِيفْ
كِي نَسْمَهْ مْعَطْرَهْ ...فْ.جَوْ لْطِيفْ
ذْبَالَتْ زْهَرْتِيْ ...وُارْبِيَعْ تَمْسَخَ اخْرِيفْ
الْمَكْمُولْ ...لَازَمْ النْقَصْ عْلِيهْ يْحِيفْ
*****
بْكَا عْلِيْهَا لَحْبَابْ وُلَمْعَارَفْ
وُجْمِيعْ الَلِّيْ بَقْيمَتْهَا عَارَفْ
مَنْ صْغِيرْهُمْ حَتَّى الْلِّي شَارَفْ
قَدْرُوْهَا... حَبُّوْهَا مَا كَانْ فِيهُمْ جَاحَفْ
*****
وُكَايِنْ مِنَ أَهْلِيْ الْلِّي خَالَفْ
حَاسَدْ... بْ.عْدَاوَتْهَا حَالَفْ
عَزَّانِي الْكُلْ... وْعْزَاهُ كَانْ زَايِفْ
يَارَبِّي اغْفَرْ لِيهْ وُ كُونْ لَاطَفْ
*****
نَشْهَدْ والشَّاهَدْ لَمْنَزَّلْ لْ.مَصْحَافْ
عَاشْرَاتْنِي بالنِّيَهْ... رَاضْيَهْ بْلَكْفَافْ
مَا بْهَرْهَا ذْهَبْ ولَا مَكْنَوْنَ لَ.صْدَافْ
بَرَّتْ بِيَّا وُبْوَالِدِيَّا مَنْ يُومْ الزْفَافْ
*****
فَطْرَتْهَا سْلِيْمَا مْطَبْعَا بْ.صْفَا
شَارْكَاتْنِي أَيَّامْ هَانْيَا وُعَاصْفَا
بْلِيْسِيرْ رَاضْيَا وُصَابْرَا... عَافَّا
مْتَّاقْيَا رَبْهَا... مَنَ عْذَابُو خَايْفَا
*****
زِيْنَةْ لَحْرُوفْ... مَزْيَانَةَ الْأَوْصَافْ
وَنَّاسَهْ... مَا شَفْتَ مَنْهَا شْنَافْ
شْرِيفَهْ بَنْتَ نَاسْ... سْلِيلَةْ لَ.شْرَافْ
فْرِيْدَهْ هِيَّا فْ.النْسَا... مَا مْثْلَهَا بَزَّافْ
*****
أَصِيلَهْ... طَبْعَهَا مَا هُوَ جَافْ
فْ.قَلْبِي سَكْنَاتِ مَنُّو لَشْغَافْ
بَارَّه بَقْلُيِبْ رْهِيفْ مَعْطَافْ
يَنْكُرْ فْضَلْهَا ... مَنْ خْصَايْلُو اضْعَافْ
*****
كَانَتْ عْوِيْنِيْ دَاعْمَا لِيَ لَ.كْتَافْ
رَا فَ.بْحَرْ الذَّنْيَا كَانَتْ لِي مَجْدَافْ
نَذْكُرْهَا دِيْمَا بْشْتَوَا وَصْيَافْ
لَمْعَزَّتْهَا صَايَغْ شْعَارْ بَ.قْوَافْ
*****
كُلْمَا نَذْكُرْهَا قَلْبِي يَرْجَفْ
يْحُومْ طِيْفْهَا وْرُوحْهَا تْرَفْ
انْحَسْ بْ.حَسْهَا وُبْ.رَنَّةْ صُوْتَهَا تَعَزَفْ
خَاطْرِي تَتْغَلْغَلْ والْعِينْ تَدْرَفْ
*****
بَعْدْهَا عْطَاتْنِيْ الَفَرْحَا بْ.لَقْفَا
مَنْ مْعَزَّتْهَا مَا بَاغِي نَشْفَا
فْ.قَلْبِيْ ذِكْرَى وُإْسَمْ عْلَى الشْفَا
كِيفْ مَا نْبَادَلْ وُفَاهَا بْ.لُوْفَا
*****
كَانْ حُلْمِي بَخْيَالِي يَطْرَفْ
بَرَّاتْنِي شَابْ ...مْعَوَّلْ نْبَرْهَا فْ.الْشْرَفْ
وُمَنْ حْلَاوَةَ صْحَبْتْتَهْا نَرْشَفْ
لَكْنَ سَاعَةْ مُوتْهَا مَا تَتْخَلْفْ
*****
رَبِّي عَالَمْ لْطِيفْ... لَ.ضَّرْ يَكَشْفْ
لُوْ شْكَايَا... مَانِيْ مَنُوْ نَزْعَفْ
نَصْبَرْ وَالْعِينْ تَدْمَعْ وَقَلْبِي يَنْزَفْ
وَعْدُوْ لَ.صَّابَرْ جَنَّهْ... لْ.وْعَدْو مَا.يَخْلَفْ
*****
لَا تْقُوْلُوْ مَسْكِينْ مَصْدُومْ كَا.يْخَرَّفْ
كْلَامِيْ عْلَى صَدْقُو نَحْلَفْ
حَدِّي هَاذَا ...وُجَهْدِيْ فْ.لُوْصَفْ
بْحَقْ زَهْرَا تَعْبِيرْي مَا سْعَفْ
*****
رَاجْعِينْ لِيكْ فْ.آخِرَ الْمَطَافْ
حْسَابْنَا ...بْوَاسَعْ عَفَوَكْ يَخْفَافْ
مَا تَفْرَقْنَا.... لِيَّا يَارَبِّيْ اسَتِعْطَافَ
بْ.فِرَدْوُسَكْ مْعَا زَهْرَتِيْ يَا لَطَّافْ
عبدالعالي حميتو




اضافة رد مع اقتباس


المفضلات