السلام عليكم ورحمة الله وبركاته
*ملاحظة هامة : الموضوع يخص واحد صاحبي .. وانا أتكلم بالنيابة عنه ..
من زمان اسمع عن عطر نسائي وعطر رجالي .. ولما كنت أسأل ايش الفرق فكنت اسمع ان العطر النسائي أقوى أو اكثر رقة او انعم او اخف لأن التعرق اقل عند الاناث .. << العطر أقوى فهمناها لكن كيف العطر يكون رقيق او ناعم هل قصدهم انه ما يسبب جفاف للبشرة مثلا" ..
أما احنا الشباب فعطورنا لازم تكون خشنة لأننا معرضين للاتساخ أكثر او بالعربي نتعفن بسرعة :: ..
لكن بالنسبة لي فما أهتم بالعطور لأن ريحتها تدوم شوية وتختفي .. كمان في الحر محتواها الكحولي يخلي جلدك اكثر حرارة .. بعدين انا ما احب الفت الانتباه .. هذا غير ان البارفان وهي العطور القوية اللي تدوم باهظة الثمن .. اما العود فانا احب اشمه أحيانا كبخور لكن مش من هواة ان اضعه ..
لذلك كان خياري دايما هو الدي أودرنت او بالعربي مزيل العرق .. لكن عشان الشياكة والبرستيج الواحد يحب يقول ديو اودرنت عشان عبارة مزيل عرق مش ظريفة شوية :: ..
زمان جربت النوعية اللي عليها دعاية قوية AXE فما عجبتني :: لأن ريحتها قوية كمان احسها مليان سبيرتوا او محتوى كحولي .. وانا عايز شيء ناعم وكدا ويمشي الحال .. فعجبني منتجات نيفيا .. طبعا كان ينزل دي أودرنت بكرة سائلة او سبراي .. وبعدين نزل العجينة دي .. وتدوم يوم كامل .. واعتبرها عملية واقتصادية يعني ب 10 او الان أصبحت 12 ريال وتدوم اشهر ..
لكن سمعت ان الدي اودرنت غير مستحب لأن منع التعرق هو شيء غير طبيعي .. لأن العرق رغم انه شيء مزعج لنا الا انه وسيلة للتخلص من السموم وتنظيم حرارة الجسم ..
العرق اللي يفرزه الجسم ليس له رائحة تقريبا "او البعض لديهم حتى غدد عطرية طبيعية" لكن الرائحة السيئة تأتي من البكتريا اللي تتفاعل مع العرق ..
:
المهم مرت الأيام .. وجاءت مناسبة زي فرح او شيء .. وكنوع من التقاليد يعني لازم احط عطر .. مع اني لا اعرف حد او يهمني حد بالفرح او المناسبة اللي كنت رايجها "ما أتذكر اعذروني" .. عندي عطور مخزنة ولا استعملها جاتلي هدايا او عجبني شكل العلبة قلت اجيبه .. لكن انا كسلت لسا حدور بالدولاب او تحت السرير .. فرحت لتسريحة اختي ولقيت عطر كذا حطيت منه .. وبصراحة لقيت نفسي سعيد مش عارف ليه .. الرائحة خلتني مستأنس .. مش بس حلوة بل روعة ..
المهم أختني قفشتني بعدين وقالتلي "العطر دا مش غريب عليا" واتضح انه عطرها المفضل .. وتقولي "انت اجننت دا حريمي مش رجالي .. مينفعش روح حط عطر تاني من اللي عندك " ..
المهم حسيت اني سويت شيء غلط .. وبعدين بقيت شوية استحقر نفسي .. لأن فيه تشبه بالاناث .. طب مثلا هل ما فعلته يعتبر شذوذ .. بس انا ما تعمدت اعمل كدا انا حطيت بالصدفة وعجبني لما حطيته على نفسي ..
واختي تقولي ان المسألة ان العطر حلو .. المسألة ان الست لازم تحطه عشان الناس تشمه .. يعني أنا مسموحلي اشمه .. لكن أحطه على نفسي غلط وتصرف غريب ..
يعني انا رغم ثقتي ان هذا كلام فارغ .. لكن كل ما اسال حد ينظرلي باستغراب .. انه كيف اني اساوي بين عطر رجالي وعطر نسائي ..
:
عموما أحب أسمع رأيكم بمنتهى الصراحة .. هل لو صاحبي فكر انه يشتري زجاجة من هذا العطر لنفسه .. ومثلا وقت النوم يروق وبينه وبين نفسه يستعمله وينام .. لأن هذا العطر بيعمله دماغ ويحسن نفسيته شوية .. فهل هذا تصرف غريب الاطوار تشوفوه ؟؟
وهل عادي لو هو استعمله امام الناس في المناسبات ؟
وهل تشوف فيه فرق بين العطر النسائي والرجالي ؟
+
بالمناسبة اسم العطر هو CHI CHI وهو موجود بكل المتاجر تقريبا للناس العادية والغلابة زينا :: لكن طبعا الناس الهاي كلاس اللي يحبو عطور فوق المية الى خمسمية وانت طالع فاعتبروا نفسكم ما شفتم هذا الموضوع وربنا يزيد ويباركلكم ما شاء الله << عشان ما حد يقول اني بحسد او حاجة :: قصدي صاحبي طبعا
.. ونازل عرض مع سبراي .. هو حياخد العطر لنفسه ويعطي السبراي هدية لاخته .. كمان سعره على قد فلوسه .. فلو الأغلبية شافوا ان عيب خلاص ما حيشتري .. لو شافوا انه عادي حينزل يجبله وحدة ويعيش حياته ..
ولو رأيكم انه مريض نفسي .. فقولوا عشان نجهزله جلسات كهربة بمستشفى الامراض العقلية عشان ينسى حاسة الشم نهائي ::
+
أرجو من الشباب بس يشاركونا عطورهم المفضلة ..
البنات ممنوع .. عشان لو لو كل بنت حطت عطرها .. فاحنا حنتخيل العطر .. ونتخيل اسمك وسنك وعنوانك .. ترى الرجال كلا* احم قصدي ذئاب لديهم حاسة شم قوية وخيال خرافي :: .. فارجو ان تراعوا جهازنا العصبي .. وبعدين عندكم ميجا جيرل تتفاخروا هناك ..
:
المفضلات