السلام عليكم ورحمة الله وبركاته
بدون مقدمات لأن مافيني
التصفيق المجهول
((اكتشفت من فترة ان في ناس مستحيل تصفق !! .. عشان اتيكيت نفسها ما يسمحلها))
من فترة طويلة وقت ما اجي الصباح اصحي اخواني للمدرسة
كنت الاقي واحد فيهم صاحي ويقولي ديدارا الحقيني ماقدرت اناااااام والله العظيم
طول الليل واحد جالس يصفق جمبي ويلف ويطلع من برا الشباك ويصفق ويدخل ويروح المطبخ وطول الوقت يروح ويجي ويصفق
وانا متجمد من الخوف .. ماصدقت كلامه ومسكين طول الوقت يحلف يقول والله العظيييييم والله
واقول له لو صحيح ليش باقي اخواني واحنا ما نسمع واسيبه وفترة على فترة وترجع نفس الحالة له
واحنا بيتنا من طابقين ارضي واول وغرفتي بالدورالاول هو غرفته بالارضي
وكنت من فترة احس في اشياء غريبة بالبيت بس انا دايماً تفكيري موسوس
عشان كذا افكر واخلي أفكاري لنفسي حتى لو لقيت شي قدامي .. واصلاً ما اخاف من الجن
اضافة الى ان زوجة ابوي قلبها ضعييييف مع هذي الاشياء فيبقى سر دفين مع نفسي
غرفة الأساطير
((مع الزمن اكتشفت ان اغلب المصايب صارت بغرفتي وتستمر الحكايات))
في بيت قديم كنا كلنا بالمدرسة وكانت هيا (زوجة ابوي) لوحدها بالبيت وفجأة سمعت صوت غريب من غرفتي و راحت لغرفتها
وقفلت على نفسها الباب بالمفتاح.. رجعت وكنت اول الواصلين لقيت اللمبات مقفلة على غير العادة في هذا الوقت !! المطبخ مقفل !!
(من الخوف ماسوت الغداء) والتلفزيون مقفل (في العادة هي تفتح وترفع الصوت عالي حتى تتشجع لأنها لوحدها)
دخلت غرفتي لأجد الفاجعة .. لقيت مكيف غرفتي مختفي !! (وضوء الشمس احتل الغرفة من فتحة المكيف)
استغربت بالبداية لكن فكرت "اهااا اكيد أخذوا مكيفي وحطوه بالصالة"
(ملاحظة: كان وقتها مكيف الصالة خربان)
حاولت ادور على زوجة ابوي (وبالمناسبة غرفتها مقابل غرفتي مباشرة وهيا كانت حاسة بتحركاتي تقريباً) ادق الباب ردت بصوت مرتجف
مين ولمى تأكدت انها انا فتحت الباب بسرعة وهجمت عليا وكانت عيونها مورمة ووجهها مشطووووف من الخوف وقالت انها سمعت
صوت من غرفتي وهربت لغرفتها قلتلها مين شال مكيفي فاستغربت من سؤالي !! واتضح في النهاية =_= ان المكيف طاح من نفسه
وقتها كنت بخامس ابتدائي او سادس مو فاكرة بالضبط ويمكن حتى دخلت على المتوسط (ذاكرة وزمن مغبرين)
المهم اني مقررة من زمان لو فيه شي غريب اقوله لأبوي فقط لا أخاوني ولا زوجته لأنهم يخافون
الدرج المظلم
((معلومة الدرج يقوي القلب ويُسقط عزيمة فقراء الدم !!))
يومياً اطلع وانزل من درج مظلم اشد الظلمة وعادي ماتفرق معي
و طلوع الدرج بالظلام سهل لكن النزول مصيبة يوم احط رجولي وانا مو عارفة فين رح يبدأ الدرج
الدرج فين ورجولي فين ولمى اكمل نصه امد اشوف خلص نص الدرج ولا لا لكن الاصيب يوم يكون
فيه ألغام ومتفجرات بالدرج !!
صرت وقت ماسمح لي مزاجي امسك وحدة من اجهزتي وافتح الكشاف حتى اشوف العقبات واتفاداها
وما احس الدرج فيه شي غريب غير الاوهام السوداء رغم ان الدرج اسود من الظلام بس يتهيأ لي شي
جنبي يطلع معايا وينزل معايا وعادي مرحباً به والامور طيبة والدرج للجميع
لكن لا يدخل غرفتي ودايما لمى اطلع فوق اسمّي ولمى ادخل غرفتي اسمّي من كثر وسوستي بسبب بعض الامور
منها مرة من المرات كنت جالسة عالفوتوشوب بالليل ونعست ونمت
(الجهاز كان مفتوح وهو اغلق الشاشة بنفسه) لكن فجأة الساعة 3 الليل صحيت منزعجة من نور قوي جاي من جهة جهازي قمت مستغربة
قوة النور جداً عالية ومزعجة وانا اكره النور وقت النوم ولمى انام بالنور احس اني اقوم متكسرة وتعبانة .. قربت من الجهاز
لقيته مفتوح قفلته وكملت نومي ولمى صحيت جلست افكر في السبب يمكن جني فتحه بس ماعرف يستعمل الفوتوشوب فتركه :تفكير:
(لو احد عنده خبره يقولي اذا فيه شيء باللاب توب يخليه يفتح من نفسه فجأة عشان لا اظلم احد)
ومرة كمان لقيت حجرة صغيرة وغريبة تشبه الرخام على مكتبي .. نفففسي اعرف من فيييين جى هالحجر !!
وانا حريصة على الاشياء اللي تدخل وتخرج من غرفتي حتى اني معروفة بالبيت لو قرب من غرفتي شيء من هذي الاشياء
(عطر-معطر جو-عطور الجيب -و فيه عطر كريمي) رح ارميهم بالزبالة واعمل فيهم اغتيال سري لا يعلم به إلا الله لأني اكرههم
من اعمق عميقات اعماق قلبي واحيانا بالدور الارضي اسمع صوت شخير من الزاوية واقول بتوهم واطنش الموضوع
كالعادة
اجتماع سري طارئ
((تذكرت فرقتي للمهمات الخاصة >> أيام المتوسط))
مرة من المرات ههههه سمعت صوت تصفيق حقيقي (أخيرا) وما اعترفت بالموضوع وطنشت وكلمت ابوي لمى رجع من السفر
واستنتجت معاه ان ممكن الجن ساكنين فوق بيتنا لأن بالسطح فيه بيت شعر مهجور ونبهني ابوي ان زوجته لا تدري بالموضوع
لأنها لو درت بتنجن وبتعمل حففففلة مع الجماعة كلها فسوينا اجتماع سري للكبار مكون مني انا وابوي و2 من اخواني الكبار وجالسة اقولهم
انو نطنش الجن لو موجودين من جد واخوي الثاني اللي كان يسمع تصفيق يرتجف من الخوف وانا اقوله لا تخاف لو خفت يستهبلوا
معاك زيادة ومرة فترات وفترات ونسمع احياناً واحياناً ما نسمع .. غير اللمبات اللي كانت تنحرق كل شوية ويقولوا من الجن
والكهربة باكملها كانت تقفل كثير وحطوا كل شيء يصير بالبيت عليهم الين مرة اكتشفنا ان سواقنا هو السبب لأن كان عنده توصيلة كهرباء
محروقة وكل شوية تسبب التماس فتقفل الكهرباء اوتوماتيك
غرفتي اللتي تجذب كل شيء !!
((لكن كل شيء إلا غرفتي منبع الفنون والخيال الواسع والجميل غير الوانها الجميلة اللي تصفي الذهن))
طول فترة الخريف والشتاء ماسمعنا بحاجة الين قبل كم يوم
(الثلاثاء الماضي) كنت مواصلة من اليوم اللي قبله ولمى صارت الساعة 2 الليل تقريباً وجيت انام
فجأة سمعت صوت تخبيص بتسريحتي !!!!!!! (التسريحة مكانها جنب السرير)
جلست من السرير اشوف ايش فيه ولا انا متهيأة من التعب !!
ورجعت نمت على طول وفجأة يرجع الصوت خشخة اكياس وصوت خبيط واشياء تطيح
(مكياجي وارواجي واقلام الكحل اضافة لإكسسواراتي)
فجاة جالسين يطيحوا قمت منزعجة مرة واقول ياربي ايش هذا معقول جني عيني عينك يزعجني لهذي الدرجة !!
حسب معرفتي يزعجون بطريقة غير مباشرة يقدر الواحد يطنشهم < ايام الوهم ..
يعني يا جماعة اصوات تخبيص وتصقيع عيني عينك ادواتي بالتسريحة تتحرك وتطيح وتخبط في بعض خيييير !!!
احاول انام يرجع يصحيني بصوت تخبيصه العالي وكل شوي اقوم ارتب المكان وارجعه زي ما كان !!
عصبت واتنرفزت مره وانا مواصلة وعندي اختبار صعب ولسه ما كملته حتى
وطويييل حتى انه طيح قبعتي الخضراء الامعة اللي كانت مخصصة لليوم الوطني
مو معقول جني يعلن وطنيته بقبعتي يعني!! ولا ايش ؟؟
ارتب التسريحة والأشياء وارجع القبعة وارتب الاشياء اللي يطيحها وارجع احاول انام ويرجع هوا يطيح لي الاشياء !!
انجنيييييت خلاص وقلت هذا الجني عيني عينك ماااا يبغاني انام نهائياً
وفي العادة انا انام في الازعاج بس هذي المرة ماعرفت انام من الارهاق مدري ليه
وتقريباً مرت ساعتين على هذي الحال ولمى شفت ان الساعة 4 قبل الفجر بنص ساعة تقريباً وانا لسه ما نمت
استسلمت لانهبالات الجني وقررت اني اقوم خلاص وأكمل اختباري او اكمل البحث حقي والبرزنتيشن
وفتحت النور وفتحت اللاب توب حقي وبدأت ابحث وانا اتمنى
اني انام ويتركني هذا الجني المشاغب ><
.....يتبع
المفضلات